Pannakisarita iti Maysa a Kaarruba​—Ania ti Nasantuan nga Espiritu?

MARAGSAKAN dagiti Saksi ni Jehova a makisarita kadagiti kaarrubada maipapan iti linaon ti Biblia. Adda kadi saludsodmo maipapan iti Biblia? Kayatmo kadi a mailawlawag kenka ti aniaman kadagiti patpatien wenno narelihiosuan nga aktibidad dagiti Saksi ni Jehova? No kasta, no adda maam-ammom a Saksi, saanka koma a bumdeng a makisarita kenkuana ta maragsakan a mangilawlawag iti dayta.

Naisalaysay iti baba ti maysa a pagarigan. Iladawam iti panunotmo a ti Saksi nga agnagan Sam ket simmarungkar iti pagtaengan ti lalaki nga agnagan Bert.

Ania ti Tuktukoyem nga “Espiritu Santo”?

Bert: Nadamagko a saan a Kristiano dagiti Saksi ni Jehova. Saanyo ngamin a patien ti espiritu santo.

Sam: Umuna iti amin, kayatko nga ipasiguro kenka a Kristianokami. Mamatiak ken Jesu-Kristo ket dayta ti makagapu a simmarungkarak kenka ita nga agsapa. Ngamin, ni Jesus ti nangibilin kadagiti pasurotna a mangasabada. Ngem maisaludsodko man, ania aya ti ipagarupmo nga “espiritu santo”?

Bert: Para kaniak, isu ti nasantuan nga espiritu, daydiay maikatlo a persona iti Trinidad, daydiay katulongan nga inkari ni Jesus nga ibaonna kadatayo. Nakapatpateg kaniak dayta a katulongan. Kayatko a marikna ti kaadda ti nasantuan nga espiritu iti biagko.

Sam: Kasta ti pannakaawat ti adu a tattao maipapan iti nasantuan nga espiritu. Adda gundaway idi a sinukimatko no ania ti isursuro ti Biblia maipapan iti dayta a topiko. No ipalubosmo, kayatko nga ilawlawag kenka iti sumagmamano a minuto no ania ti naadalko.

Bert: Ala wen, ikkanka iti sumagmamano a minuto.

Sam: Siak gayam ni Sam. Sika ngay, ania ti naganmo?

Bert: Siak ni Bert. Maragsakanak a makaam-ammo kenka.

Sam: Kasta met kaniak, Bert. Yantangay imbagak a mabiitak laeng, maysa pay laeng nga aspeto dayta a topiko ti ilawlawagko. Nadakamatmo a ti nasantuan nga espiritu ti katulongan nga inkari kadatayo ni Jesus. Umanamongak kenka. Ngem matmatam kadi a ti nasantuan nga espiritu ket maysa a persona ken kapadana ti Dios?

Bert: Wen, dayta ti naisuro kaniak.

Persona Kadi ti Nasantuan nga Espiritu?

Sam: Usigenta ti maysa a teksto iti Biblia a tumulong kadata a mangammo no ti nasantuan nga espiritu ket persona wenno saan. Mabalin a nabasbasamon dayta a teksto. Iti Aramid 2:1-4, kastoy ti mabasa: “Itan bayat ti panagtultuloy ti aldaw ti piesta ti Pentecostes addada amin idi a sangsangkamaysa iti maymaysa a lugar, ket pagammuan adda dimteng manipud langit nga ungor a kaasping ti ungor ti bumanesbes a napigsa a puyupoy, ket pinunnona ti intero a balay nga ayanda a pagtugtugawan. Ket nagparang kadakuada ti dildila a kasla iti apuy ket naibunongda, ket maysa ti nagdisso iti tunggal maysa kadakuada, ket napnoda amin iti nasantuan nga espiritu ket nangrugida nga agsao iti nagduduma a pagsasao, kas iti impaay kadakuada ti espiritu tapno sawenda.”

Bert: Nabasak idin dayta a salaysay.

Sam: Sigun iti dayta a teksto, Bert, mabalin kadi a mapunno ti maysa a persona iti sabali a persona?

Bert: Siempre, saan.

Sam: Kitaenta no ania met ti kunaen ti bersikulo 17 iti isu met laeng a kapitulo. Kastoy ti mabasa iti umuna a paset dayta a bersikulo: “‘Kadagiti maudi nga aldaw,’ kuna ti Dios, ‘mangiparukpokakto iti espirituk iti tunggal kita ti lasag.’” Ania ti panagkunam, Bert, ti kadi Dios mabalinna ti mangiparukpok iti paset ti padana a Dios?

Bert: Saan.

Sam: Ni Juan a Mammautisar nagusar iti sabali a panangdeskribir iti pannakapunno iti nasantuan nga espiritu. Masarakan dayta iti Mateo 3:11. Pakibasam man daytoy a bersikulo?

Bert: “Siak, iti biangko, bautisarankayo iti danum gapu iti panagbabawiyo; ngem daydiay um-umay a sumaruno kaniak nabilbileg ngem siak, a kadagiti pallokana saanak a maikari a mangikkat. Bautisarannakayto dayta iti nasantuan nga espiritu ken iti apuy.”

Sam: Agyamanak. Nadlawmo kadi no ania ti kinuna ni Juan a Mammautisar a pakaaramatan ti nasantuan nga espiritu?

Bert: Dinakamatna ti pannakabautisar iti nasantuan nga espiritu.

Sam: Umiso ti kunam. Dinakamatna pay ti pannakabautisar iti apuy. Nabatad a saan a persona ti apuy. Iti panagkunam, ibagbaga kadi dayta a bersikulo a ti nasantuan nga espiritu ket persona?

Bert: Saan.

Sam: No kasta, sigun kadagiti nausigta a teksto, ti nasantuan nga espiritu ket saan a persona.

Bert: Aywen, aya?

Apay a Makuna a “Katulongan”?

Sam: Ngem nadakamatmo itay ti sao a “katulongan.” Iti Juan 14:26, tinukoy ni Jesus ti nasantuan nga espiritu kas maysa a “katulongan.” Basaenta a dua dayta a teksto: “Ti katulongan, ti nasantuan nga espiritu, nga ibaonto ti Ama iti naganko, isuronto dayta kadakayo ti amin a bambanag ket ipalagipna kadakayo ti amin a bambanag nga imbagak kadakayo.” Adda dagiti mangipagarup a kasla suportaran dayta a teksto ti kapanunotan a ti nasantuan nga espiritu ket maysa a persona gapu ta tumulong wenno mangisuro.

Bert: Wen, kasta ti nabayagen a panangmatmatko.

Sam: Ngem saan ngata a nagusar ni Jesus iti piguratibo a sasao? Utobem ita no ania ti kinuna ni Jesus maipapan iti kinasirib, sigun iti Lucas 7:35: “Nupay kasta, ti kinasirib mapaneknekan a nalinteg babaen iti amin nga annakna.” Panunotem kadi a ti kinasirib ket persona, a talaga nga addaan kadagiti annak?

Bert: Saan. Nalawag a saan a literal dayta.

Sam: Umanamongak kenka. Kayat a sawen ni Jesus a ti kinasirib ket maiparangarang babaen kadagiti resulta. Masansan nga agusar ti Biblia kadagiti piguratibo a sasao a naawagan iti personipikasion​—kayatna a sawen, ti panangtukoy iti awan biagna a banag a kasla sibibiag. Masansan nga usarentayo ti kasta a piguratibo a sasao iti panagpapatangtayo. Kas pagarigan, iti daytoy a naraniag nga agsapa, saan aya a kadawyan laeng no kunaen ti maysa, “Luktam dagiti tawa tapno sumrek ti init”?

Bert: Uray siak, maibagbagak met dayta.

Sam: Ket pinanunotmo kadi a ti init ket maysa a persona a sumrek iti balaymo kas sangaili?

Bert: Siempre, saan. Saan a literal dayta.

Sam: Isu nga idi dinakamat ni Jesus ti nasantuan nga espiritu kas maysa a katulongan, wenno mannursuro, mabalin kadi nga agus-usar iti piguratibo a sasao?

Bert: Mabalin a kasta. Maitunos dayta kadagiti teksto a binasam maipapan iti espiritu a naiparukpok ken maipapan kadagiti tattao a nabautisaran iti dayta. Ngem no ti nasantuan nga espiritu ket saan a persona, ania ngarud dayta?

Ania ti Nasantuan a Espiritu?

Sam: Iti Aramid 1:8, ibaga kadatayo ni Jesus no ania ti nasantuan nga espiritu. Kayatmo kadi a basaen?

Bert: “Umawatkayto iti pannakabalin inton dumteng kadakayo ti nasantuan nga espiritu, ket dakayto dagiti saksik agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.”

Sam: Kas ipakita ti binasam, innaig ni Jesus ti nasantuan nga espiritu iti pannakabalin. Kasta met, sigun kadagiti bersikulo a binasata itay, naggapuan dayta a pannakabalin?

Bert: Manipud iti Dios nga Ama.

Sam: Hustoka. Ti nasantuan nga espiritu ket isu met laeng ti puersa nga inusar ti Dios idi pinarsuana ti uniberso. Tinukoy dayta ti maikadua a bersikulo iti Biblia. Kuna ti Genesis 1:2: “Ti aktibo a puersa ti Dios agtigtignay idi nga agsublisubli iti rabaw ti dandanum.” Ti Hebreo a sao a naipatarus ditoy nga “aktibo a puersa” ket naipatarus met nga “espiritu.” Isu dayta ti di makita nga aktibo a puersa nga us-usaren ti Dios a mangitungpal iti panggepna ken mangipalgak iti pagayatanna. Pangngaasim ta usigenta man ti maysa pay a teksto. Mabalin a pakibasam ti Lucas 11:13.

Bert: “No dakayo, nupay nadangkeskayo, ammoyo no kasano ti mangted iti naimbag a sagsagut iti annakyo, anian a nangnangruna pay a ti Ama sadi langit mangtedto iti nasantuan nga espiritu kadagidiay agdawdawat kenkuana!”

Sam: No ti Ama sadi langit ti mangkonkontrol iti nasantuan nga espiritu, nga ipapaayna dayta kadagidiay agkidkiddaw kenkuana, mabalin kadi a ti nasantuan nga espiritu ket kapada ti Ama?

Bert: Saan. Maawatak ti kayatmo a sawen.

Sam: Nadakamatmo itay Bert a sumagmamano laeng a minuto ti maipaaymo kaniak, isu a kas sumario iti napagsaritaanta, adda man maisaludsodko kenka. Sigun kadagiti teksto ti Biblia nga inusigta, ania ti makunkuna a nasantuan nga espiritu?

Bert: Isu dayta ti aktibo a puersa ti Dios.

Sam: Hustoka. Ken idi dinakamat ni Jesus iti Juan 14:26 a ti nasantuan nga espiritu ket maysa a katulongan, wenno mannursuro, nagusar iti piguratibo a sasao a naawagan iti personipikasion.

Bert: Ita laeng a naammuak dayta.

Sam: Adda makaparegta a maammuan iti sasao ni Jesus.

Bert: Ania dayta?

Sam: Mabalintayo a kiddawen iti Dios ti nasantuan nga espirituna a tumulong kadatayo no maipasangotayo kadagiti narigat a kasasaad. Mabalintay met a kiddawen ti nasantuan nga espirituna a tumulong kadatayo a mangammo iti kinapudno maipapan kenkuana.

Bert: Makapainteres dayta. Nasken nga utobek dayta.

Sam: Sakbay a pumanawak, kayatko ti mangibati iti pagpampanunotam. Yantangay ti nasantuan nga espiritu isu ti aktibo a puersa ti Dios, umannugottayo ngarud a mabalin nga usaren ti Dios dayta a mangibanag iti aniaman a kayatna.

Bert: Wen a.

Sam: No kasta, apay a saanna pay nga inusar dayta a di nakedngan a pannakabalinna tapno pagpatinggaenna ti amin a rigat ken kinadakes a sagsagabaentayo ditoy lubong? Napanunotmo kadin dayta?a

Bert: Kinapudnona, napanunotko met dayta.

Sam: Kayatmo kadi a pagsaritaantanto dayta inton sumaganad a lawas iti kastoy met laeng nga oras?

Bert: Wen a, padaanankanto.

[Footnote]