Ni Jehova, ti Dios ti Kinapudno

“Sinubbotnak, O Jehova a Dios ti kinapudno.”​—SALMO 31:5.

1. Ania dagiti kasasaad idiay langit ken ditoy daga idi awan pay ti kinaulbod?

AWAN pay ti kinaulbod idi. Dagiti perpekto nga espiritu a parsua ti agnanaed iti di makita a langlangit, nga agserserbida iti Namarsua kadakuada, ti “Dios ti kinapudno.” (Salmo 31:5) Awan ti kinaulbod, awan ti panangallilaw. Naan-anay a kinapudno ti inyallatiw ni Jehova kadagiti espiritu nga annakna. Ay-ayatenna ngamin ida ken maseknan unay iti pagimbaganda. Kasta met laeng ti kasasaad idi ditoy daga. Pinarsua ni Jehova ti umuna a lalaki ken babai, ken babaen ti dinutokanna a kalasugan, kanayon a makikomunikar idi kadakuada iti nalawag, direkta, ken napudno a pamay-an. Nagsayaat la ketdi daydi a panawen!

2. Siasino ti nangyussuat iti kinaulbod, ken apay?

² Ngem idi agangay, maysa nga espiritu nga anak ti Dios ti awan babainna a nanggandat a mangisaad iti bagina kas maysa a karibal a dios, a bimmusor ken ni Jehova. Daytoy nga espiritu a parsua, a pagaammo ita kas ni Satanas a Diablo, kayatna nga adda agdayaw kenkuana. Tapno maibanagna ti panggepna, inyussuatna ti kinaulbod kas pamay-an a makontrolna ti dadduma. Idi inaramidna dayta, nagbalin ni Satanas a “maysa a managulbod ken ti ama ti kinaulbod.”​—Juan 8:44.

3. Ania ti inaramid da Adan ken Eva idi inulbodan ida ni Satanas, ket ania dagiti imbungana?

³ Babaen ti serpiente, imbaga ni Satanas iti umuna a babai a ni Eva a saan a matay no labsingenna ti bilin ti Dios ket kanenna ti naiparit a bunga. Kinaulbod dayta. Imbagana pay iti babai nga agbalinto a kas iti Dios no kanenna ti bunga, a maammuanna ti naimbag ken dakes. Kinaulbod met dayta. Nupay saan pay pulos idi a nakangngeg ni Eva iti kinaulbod, mabalin a nabigbigna a ti nangngegna iti serpiente ket saan a maitunos iti sinao ti Dios ken ni Adan nga asawana. Kaskasdi, ni Satanas ti pinatina, saan a ni Jehova. Gapu ta naan-anay a naallilaw, innalana ti bunga ket kinnanna. Kalpasanna, nangan met ni Adan iti dayta a bunga. (Genesis 3:1-6) Kas ken Eva, pulos a di pay nakangngeg idi ni Adan iti kinaulbod. Ngem saan a mabalin nga ibaga a naallilaw ni Adan. (1 Timoteo 2:14) Babaen ti aramidna, impakitana a linaksidna ti Nangaramid kenkuana. Nakalkaldaang dagiti imbungana iti sangatauan. Gapu iti panagsukir ni Adan, natawid ti amin nga annakna ti basol ken ipapatay, agraman ti pannakatulaw ken nakaro a panagsagaba.​—Roma 5:12.

4. (a) Aniada a kinaulbod ti naisawang idiay Eden? (b) Ania ti masapul nga aramidentayo tapno dinatay maallilaw ni Satanas?

⁴ Simmaknap ti kinaulbod. Ditay liplipatan a dagidi a kinaulbod a naisawang iti minuyongan ti Eden ket panangatake iti panagbalin a napudno ni Jehova a mismo. Kinuna ni Satanas nga adda kano naimbag a banag a sililimed nga ipapaidam ti Dios iti umuna a pagassawaan. Siempre, saan nga agpayso dayta. Awan ti nagunggona da Adan ken Eva iti panagsukirda. Natayda, kas kinuna ni Jehova a mapasamak kadakuada. Ngem nagtultuloy ti panangpardaya ni Satanas ken ni Jehova, ta uray kalpasan ti adu a siglo, napaltiingan ni apostol Juan a mangisurat nga ‘iyaw-awan ni Satanas ti intero a mapagnaedan a daga.’ (Apocalipsis 12:9) Tapno maliklikan ti panangallilaw ni Satanas a Diablo, masapul nga addaantayo iti naan-anay a panagtalek a napudno ni Jehova ken ti Saona. Kasanoyo a mapatanor ken mapabileg ti panagtalekyo ken ni Jehova ken mapatibker ti bagiyo kadagiti panangallilaw ken kinaulbod nga irakrakurak ti Kabusorna?

Ammo ni Jehova No Ania ti Kinapudno

5, 6. (a) Ania a pannakaammo ti ik-ikutan ni Jehova? (b) Idiligyo ti pannakaammo ti tao iti pannakaammo ni Jehova.

⁵ Ni Jehova laeng ti tukoyen ti Biblia kas daydiay “namarsua iti amin a bambanag.” (Efeso 3:9) Isu “Daydiay nangaramid ti langit ken ti daga ken ti baybay ken ti amin a bambanag nga adda kadakuada.” (Aramid 4:24) Yantangay ni Jehova ti Namarsua, ammona no ania ti kinapudno iti amin a banag. Kas panangyilustrar: Panunotenyo ti maysa a tao a nangdisenio ken nangbangon iti bukodna a balay, a nangiplastar ken nangilansa iti tunggal kayo. Ammona ti amin a detalye dayta a balay ken isu laeng ti naan-anay a makatarus iti dayta ngem iti asinoman nga agpalpaliiw. Ammo ti tattao dagiti banag a dinisenio ken inaramidda. Umasping iti dayta, ammo ti Namarsua ti amin a detalye dagiti pinarsuana.

⁶ Nagsayaat ti panangyebkas ni propeta Isaias iti kalawa ti pannakaammo ni Jehova. Mabasatayo: “Siasino ti nangsukat iti dandanum iti lukong laeng ti imana, ken nangrukod iti mismo a langlangit babaen iti maysa laeng a dangan ken nangiraman iti tapok ti daga iti maysa a pagsukatan, wenno nangbagting iti bambantay babaen ti maysa a paggantingan, ken iti turturod kadagiti timbangan? Siasino ti nangrukod iti espiritu ni Jehova, ket siasino kas mamatigmaan a taona ti makaipakaammo kenkuana iti aniaman a banag? Siasino ti nakiumananna tapno isu maikkan ti maysa iti pannakaawat, wenno siasino ti mangisuro kenkuana iti dana ti kinahustisia, wenno mangisuro kenkuana iti pannakaammo, wenno mangipakaammo kenkuana iti mismo a dalan ti pudpudno a pannakaawat?” (Isaias 40:12-14) Pudno, ni Jehova ti “Dios ti pannakaammo” ken ‘naan-anay ti pannakaammona.’ (1 Samuel 2:3; Job 36:4; 37:16) Awan la ketdi ti kaimudinganna ti pannakaammotayo! Iti laksid ti kaadu ti pannakaammo a nasursuro ti sangatauan, ti pannakaawattayo kadagiti pisikal a parsua di pay dumanon uray iti “pingir ti daldalan [ti Dios].” Kasla “arasaas” no idilig iti “mannakabalin a gurruod.”​—Job 26:14.

7. Ania ti nabigbig ni David maipapan iti pannakaammo ni Jehova, ket iti kasta ania ti masapul a bigbigentayo?

⁷ Yantangay pinarsuanatayo ni Jehova, am-ammonatayo a naimbag. Binigbig dayta ni Ari David. Insuratna: “O Jehova, sinukimatnak, ket ammonak. Sika naammuam ti panagtugawko ken itatakderko. Naimutektekam ti panunotko manipud adayo. Ti panagbaniagak ken panagunnatko rinukodmo, ket naammuam unay uray pay ti amin a daldalanko. Ta awan pay uray maysa a sao iti dilak, ngem, adtoy! O Jehova, ammomon amin dayta.” (Salmo 139:1-4) Siempre, ammo ni David nga adda wayawaya dagiti tattao nga agdesision. Inikkannatayo ti Dios iti kapasidad nga agtulnog wenno agsukir kenkuana. (Deuteronomio 30:19, 20; Josue 24:15) Kaskasdi, adayo nga am-ammonatayo ni Jehova ngem iti pannakaammotayo iti bagitayo. Ti kasayaatan ti pampanunotenna para kadatayo, ken kabaelanna nga iturong ti danatayo. (Jeremias 10:23) Kinapudnona, awan ti mannursuro, eksperto, wenno mamalbalakad a nasaysayaat a mangisuro kadatayo iti kinapudno ken mamagbalin kadatayo a masirib ken naragsak.

Napudno ni Jehova

8. Kasanotayo nga ammo a napudno ni Jehova?

⁸ Adda nagdumaan ti panangammo iti kinapudno ken ti panagsao iti kinapudno iti amin a gundaway, ti panagbalin a napudno. Ti Diablo, kas pagarigan, pinilina ti saan nga ‘agtakder a di maisin iti kinapudno.’ (Juan 8:44) Maisupadi iti dayta, ni Jehova ket ‘naruay iti kinapudno.’ (Exodo 34:6) Kanayon a patalgedan ti Kasuratan a napudno ni Jehova. Kinuna ni apostol Pablo a ‘di mabalin nga agulbod ti Dios,’ ken ti Dios “saanna a mabalin ti agulbod.” (Hebreo 6:18; Tito 1:2) Ti kinapudno ket napateg nga aspeto ti personalidad ti Dios. Makapagpannuray ken makapagtalektayo ken ni Jehova gapu ta isu ket napudno; pulos a dina allilawen dagiti nasungdo kenkuana.

9. Kasano a nainaig iti kinapudno ti nagan ni Jehova?

⁹ Ti mismo a nagan ni Jehova patalgedanna nga isu ket napudno. Ti naganna kaipapananna “Pagbalinenna.” Daytoy ti mangipamatmat a ni Jehova daydiay Manangitungpal kadagiti amin a karina. Awan ti asinoman a makaaramid iti kasta. Gapu ta ni Jehova ti Katan-okan, awan ti makalapped iti pannakatungpal dagiti panggepna. Saan laeng a napudno ni Jehova no di pay ket isuna laeng ti addaan iti pannakabalin ken sirib a mangibanag kadagiti amin a sawenna.

10. (a) Kasano a napaneknekan ni Josue a napudno ni Jehova? (b) Aniada a kari ni Jehova ti nakitam a natungpal?

¹⁰ Ni Josue ti maysa kadagiti adu a nakaimatang kadagiti nakaskasdaaw a pasamak a mangpatalged iti kinapudno ni Jehova. Adda ni Josue idiay Egipto idi inwayat ni Jehova ti sangapulo a saplit iti dayta nga ili, nga impakpakaunana ti tunggal maysa kadagita. Maysa pay, napasaran ni Josue ti pannakatungpal dagiti kari ni Jehova nga ispalenna dagiti Israelita manipud Egipto ken iturongna ida iti Naikari a Daga, a parmekenda dagiti nabileg a buyot dagiti Canaanita a bumusor kadakuada. Iti arinunos ti biagna, kinuna ni Josue kadagiti lallakay iti ili ti Israel: “Pagaammoyo unay iti amin a pusoyo ken iti amin a kararuayo nga awan napaay a maysa a sao manipud iti amin a naimbag a sasao a sinao kadakayo ni Jehova a Diosyo. Pimmudnoda amin maipaay kadakayo. Awan uray maysa a sao kadakuada ti napaay.” (Josue 23:14) Nupay dimo nasaksian dagiti milagro a naimatangan ni Josue, personal kadi a napadasmo ti pannakatungpal dagiti kari ti Dios?

Ipalgak ni Jehova ti Kinapudno

11. Ania ti mangipakita a kayat ni Jehova nga iyallatiw ti kinapudno iti sangatauan?

¹¹ Panunotem ti maysa a nagannak nga aduan iti pannakaammo ngem manmano a makisarita kadagiti annakna. Dika kadi agyaman ta saan a kasta ni Jehova? Siaayat a makikomunikar ni Jehova iti sangatauan, ken aramidenna dayta a sibubulos. Ti Kasuratan inawaganna ti Dios kas ti ‘Naindaklan a Manangisuro.’ (Isaias 30:20) Gapu iti naayat a kinamanangngaasina, makikomunikar uray kadagidiay di interesado nga umimdeng kenkuana. Kas pagarigan, nabilin ni Ezequiel a mangasaba kadagidiay ammo ni Jehova a manangyaleng-aleng. Kinuna ni Jehova: “Anak ti tao, mapanka, sumrekka iti tengnga ti balay ti Israel, ket masapul nga agsaoka kadakuada babaen ti sasaok.” Sana imballaag: “Saandanto a kayat ti umimdeng kenka, ta saanda a tarigagayan ti umimdeng kaniak; agsipud ta amin dagiti kameng ti balay ti Israel natangken ti panagul-uloda ken natangken ti panagpuspusoda.” Narigat dayta nga annongen, ngem simamatalek nga intungpal ni Ezequiel, ket iti panangaramidna iti dayta inyanninawna ti kinamanangngaasi ni Jehova. No adda gundaway a marigatanka a mangasaba ket agpannurayka iti Dios, makapagtalekka a pabilgennaka kas inaramidna ken ni propeta Ezequiel.​—Ezequiel 3:4, 7-9.

12, 13. Kadagiti ania a wagas a nakikomunikar ti Dios iti sangatauan?

¹² Kayat ni Jehova a “maisalakan . . . dagiti amin a kita ti tattao ken dumtengda iti umiso a pannakaammo iti kinapudno.” (1 Timoteo 2:4) Nagsao ti Dios babaen dagiti propeta, anghel, ken uray ti dungdungnguenna nga Anak a ni Jesu-Kristo. (Hebreo 1:1, 2; 2:2) Kinuna ni Jesus ken ni Pilato: “Maigapu itoy a nayanakak, ken maigapu itoy nga immayak iti lubong, tapno saksiak ti kinapudno. Tunggal maysa nga adda iti dasig ti kinapudno imdenganna ti timekko.” Naaddaan ni Pilato iti naisangsangayan a gundaway a mangammo iti kinapudno manipud iti mismo nga Anak ti Dios maipapan iti pannakaisalakan nga inyurnos ni Jehova. Ngem saan a dimmasig ni Pilato iti kinapudno, ken dina kayat ti makasursuro ken ni Jesus. Imbes ketdi, mangumsi a kinunana: “Ania ti kinapudno?” (Juan 18:37, 38) Nagsayang la ketdin! Kaskasdi, adu ti nangipangag iti kinapudno nga impakaammo ni Jesus. Kinunana kadagiti adalanna: “Naragsak dagiti matayo agsipud ta makakitada, ken dagiti lapayagyo agsipud ta makangngegda.”​—Mateo 13:16.

¹³ Intalimeng ni Jehova ti kinapudno babaen ti Biblia ken impaayna dayta kadagiti tattao iti sadinoman. Ibuksilan ti Biblia no ania ti kinapudno. Dineskribirna dagiti galad, panggep, ken bilin ti Dios, kasta met ti pudno a kasasaad ti sangatauan. Kastoy ti inkararag ni Jesus ken ni Jehova: “Ti saom ket kinapudno.” (Juan 17:17) Dayta ti makagapu a naisangsangayan a libro ti Biblia. Dayta laeng ti surat nga impaltiing ti Dios a makaammo kadagiti amin a banag. (2 Timoteo 3:16) Maysa dayta a napateg a sagut iti sangatauan, maysa a banag nga ipateg dagiti adipen ti Dios. Nainsiriban a basaentayo dayta iti inaldaw.

Salimetmetan ti Kinapudno

14. Ania ti dadduma nga inkari ni Jehova nga aramidenna, ken apay a patientayo ti Dios?

¹⁴ Nasken nga ipapusotayo dagiti bilin ni Jehova a masarakan iti Saona. Inyam-ammona ti kinasiasinona, ken aramidenna ti pagayatanna. Awan ti rason tapno ditay agtalek iti Dios. Patientayo ti kuna ni Jehova nga “iyegna ti pammales kadagidiay saan a makaammo iti Dios ken kadagidiay saan nga agtulnog iti naimbag a damag maipapan ken Apotayo a Jesus.” (2 Tesalonica 1:8) Patientayo met ti kinuna ni Jehova nga ayatenna dagidiay mangsalimetmet iti kinalinteg, nga ipaayna ti biag nga agnanayon kadagidiay mangipakita iti pammati, ken ikkatenna ti ut-ot, panagsangit, uray pay ti ipapatay. Impaganetget ni Jehova ti kinamapagtalkan daytoy naudi a kari idi imbilinna ken ni apostol Juan: “Isuratmo, agsipud ta dagitoy a sasao matalek ken napudnoda.”​—Apocalipsis 21:4, 5; Proverbio 15:9; Juan 3:36.

15. Ania ti sumagmamano a kinaulbod nga irakrakurak ni Satanas?

¹⁵ Ni Satanas ti naan-anay a kasungani ni Jehova. Imbes a lawaganna dagiti tattao, allilawenna ketdi ida. Tapno mapagtallikudna dagiti tattao manipud iti nasin-aw a panagdayaw, mangisaknap ni Satanas iti adu a kinaulbod. Kas pagarigan, kayat ni Satanas a patientayo nga awan bibiang ken saan a maseknan ti Dios kadagiti sagsagabaentayo ditoy daga. Kaskasdi, ipakita ti Biblia a dakkel ti panangipateg ni Jehova kadagiti parsuana ken karimonna ti kinadakes ken panagsagaba. (Aramid 17:24-30) Kayat pay ni Satanas a patien dagiti tattao nga awan serserbi dagiti naespirituan a kalat. Maisupadi iti dayta, ipanamnama kadatayo ti Kasuratan a “saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna.” Maysa pay, nalawag ti kuna ti Biblia nga “isu agbalin a mananggunggona kadagidiay sipapasnek a mangsapsapul kenkuana.”​—Hebreo 6:10; 11:6.

16. Apay a nasken nga agtalinaed a nasalukag dagiti Kristiano ken salimetmetanda ti kinapudno?

¹⁶ No maipapan ken ni Satanas, insurat ni apostol Pablo: “Ti dios daytoy a sistema ti bambanag binulsekna ti pampanunot dagiti di manamati, tapno ti lawag ti nadayag a naimbag a damag maipapan iti Kristo, a ladawan ti Dios, saan koma nga agsilnag.” (2 Corinto 4:4) Kas ken Eva, adda dagidiay naan-anay a naallilaw ken ni Satanas a Diablo. Dadduma ti timmulad ken ni Adan, a di naallilaw ngem sipapakinakem a nangpili iti dana ti kinasukir. (Judas 5, 11) Gapuna, napateg nga agtalinaed a nasalukag dagiti Kristiano ken salimetmetanda ti kinapudno.

Kalikaguman ni Jehova ti “Pammati nga Awanan Panaginsisingpet”

17. Ania ti nasken nga aramidentayo tapno magun-od ti anamong ni Jehova?

¹⁷ Gapu ta napudno ni Jehova iti amin a danana, namnamaen ni Jehova a napudno met dagiti agdaydayaw kenkuana. Insurat ti salmista: “O Jehova, siasinonto ti sangaili iti toldam? Siasinonto ti agtaeng iti nasantuan a bantaymo? Daydiay magmagna nga awan pagkuranganna ken mangan-annurot iti kinalinteg ken agsasao iti kinapudno iti pusona.” (Salmo 15:1, 2) Kadagiti Judio a nangikanta kadagita a sasao, ti pannakadakamat ti nasantuan a bantay ni Jehova ket awan duadua a nangipalagip iti Bantay Sion, a nangisaadan ni Ari David iti lakasa ti tulag iti tolda a binangonna sadiay. (2 Samuel 6:12, 17) Ti bantay ken ti tolda ipalagipda ti lugar a simboliko a pagnanaedan ni Jehova. Sadiay, mabalin dagiti tattao ti umadani iti Dios tapno magun-odda ti anamongna.

18. (a) Ania ti kalikaguman ti pannakigayyem iti Dios? (b) Ania ti mausig iti sumaruno nga artikulo?

¹⁸ Asinoman nga agtarigagay a makigayyem ken ni Jehova nasken ‘a naimpusuan’ nga agsao iti kinapudno, saan laeng nga iti bibigna. Dagiti pudno a gayyem ti Dios masapul a napudno ti pusoda ken masapul nga iparangarangda ti “pammati nga awanan panaginsisingpet,” gapu ta aggubuay iti puso dagiti aramid ti kinapudno. (1 Timoteo 1:5; Mateo 12:34, 35) Saan a nakillo wenno manangallilaw ti gayyem ti Dios, gapu ta “ti tao ti . . . panangallilaw karimon ni Jehova.” (Salmo 5:6) Dagiti Saksi ni Jehova iti intero a lubong ikagumaanda ti agbalin a napudno kas panangtulad iti Diosda. Usigen ti sumaruno nga artikulo daytoy a banag.

Ania ti Sungbatyo?

• Apay nga ammo ni Jehova no ania ti pudno iti amin a banag?

• Ania ti mangipakita a napudno ni Jehova?

• Kasano nga impalgak ni Jehova ti kinapudno?

• No maipapan iti kinapudno, ania ti makalikaguman kadatayo?

[Dagiti Ladawan iti panid 10]

Ti Dios ti kinapudno ammona ti amin maipapan iti pinarsuana

[Dagiti Ladawan iti panid 12, 13]

Matungpal dagiti kari ni Jehova