Dagiti Saludsod Manipud Kadagiti Managbasa

Kinuna ni Jesus: “No pakawanenyo ti basbasol dagiti asinoman a tattao, napakawandan kadakuada; no pagtalinaedenyo ti basbasol dagiti asinoman a tattao, mapagtalinaedda.” Kayat kadi a sawen dagitoy a sasao a mapakawan dagiti Kristiano dagiti basol?

Awan Nainkasuratan a pakaibatayan iti panangikuna a dagiti Kristiano iti sapasap, wenno uray dagiti nadutokan a panglakayen iti kongregasion, ti addaan iti nadiosan a kinaturay a mangpakawan kadagiti basol. Nupay kasta, ti kinuna ni Jesus kadagiti adalanna iti Juan 20:23, a naadaw iti ngato, ipasimudaagna nga inikkan ti Dios dagiti apostol iti naisangsangayan a bileg iti daytoy a banag. Ket ti sasao ni Jesus sadiay mabalin a mainaig iti kinunana iti Mateo 18:18 maipapan kadagiti nailangitan a pangngeddeng.

Mapakawan dagiti Kristiano ti dadduma a nakabasolan, maitunos iti balakad ni apostol Pablo a nailanad iti Efeso 4:32: “Agbalinkayo a manangaasi iti maysa ken maysa, nadungngo a mannakipagrikna, a sibubulos a pakawanenyo ti maysa ken maysa a kas met iti Dios sibubulos a pinakawannakayo babaen ken Kristo.” Agsasao ditoy ni Pablo maipapan kadagiti personal a parikut iti nagbabaetan dagiti Kristiano, kas iti nadarasudos a panagsasao. Ikagumaanda koma a risuten dagitoy a banag, nga agpipinnakawanda. Lagipenyo ti sasao ni Jesus: “No, ngarud, mangidatdatagka iti sagutmo iti altar ket sadiay malagipmo a ti kabsatmo addaan iti maysa a banag a maibusor kenka, panawam ti sagutmo sadiay sanguanan ti altar, ket mapanka; umuna a makikappiaka ken kabsatmo, ket kalpasanna, inton nakasublikan, idatonmo ti sagutmo.”​—Mateo 5:23, 24; 1 Pedro 4:8.

Nupay kasta, iparipirip ti konteksto ti Juan 20:23 a dakdakamaten ni Jesus dagiti nakarkaro a basol, kas naipakita iti simmaganad a kinunana iti daytoy naiduma a tallaong. Kitaentayo no apay.

Iti daydi aldaw a pannakapagungarna, nagparang ni Jesus kadagiti adalan iti maysa a nabalunetan a siled idiay Jerusalem. Kuna ti salaysay: “Ni Jesus, ngarud, kinunana kadakuada manen: ‘Maaddaankayo koma iti talna. Kas iti panangibaon kaniak ti Ama, kasta met nga ibaonkayo.’ Ket kalpasan a naisaona daytoy pimmuyot kadakuada ket kinunana kadakuada: ‘Awatenyo ti nasantuan nga espiritu. No pakawanenyo ti basbasol dagiti asinoman a tattao, napakawandan kadakuada; no pagtalinaedenyo ti basbasol dagiti asinoman a tattao, mapagtalinaedda.’”​—Juan 20:21-23.

Awan duadua, dagiti matalek nga apostol ti kangrunaan a nadakamat kas ad-adalan. (Idiligyo ti Ju 20 bersikulo 24.) Iti panangpuyotna kadakuada ken panangikunana, “Awatenyo ti nasantuan nga espiritu,” iti simboliko a pamay-an nga impakaammo ni Jesus kadakuada a din agbayag maiparukpokto ti nasantuan nga espiritu kadakuada. Kinuna pay ni Jesus a maaddaandanto iti kinaturay maipanggep iti pannakapakawan ti basbasol. Nainkalintegan, agkanaig ti dua a sinaona, a ti maysa iturongna iti sumaganad.

Limapulo nga aldaw manipud iti panagungarna, iti aldaw ti Pentecostes, imparukpok ni Jesus ti nasantuan nga espiritu. Aniat’ naaramidan dayta? Ti maysa, dagidiay immawat iti espiritu nayanakda manen kas naespirituan nga annak ti Dios nga addaan iti namnama a makipagturay ken Kristo idiay langit. (Juan 3:3-5; Roma 8:15-17; 2 Corinto 1:22) Ngem ad-adu pay ti naaramidan dayta a pannakaiparukpok ti espiritu. Dadduma nga immawat nakagun-odda kadagiti karkarna a pannakabalin. Babaen iti dayta makapagsao ti dadduma kadagiti ganggannaet a pagsasao a dida ammo. Makaipadto ti dadduma. Ngem kabaelan ti dadduma ti mangpaimbag iti sakit wenno mangpagungar kadagiti natay.​—1 Corinto 12:4-11.

Yantangay tuktukoyen ti sasao ni Jesus iti Juan 20:22 daytoy a pannakaiparukpok ti nasantuan nga espiritu kadagiti adalan, dagiti nainayon a sasaona maipapan iti panangpakawan kadagiti basol agparang a kayatna a sawen nga impaay ti Dios kadagiti apostol ti naisangsangayan a kinaturay a mamakawan wenno mamagtalinaed kadagiti basol baeten ti panagandar ti espiritu.​—Kitaenyo Ti Pagwanawanan, Marso 1, 1949, panid 78.

Saannatay nga ikkan ti Biblia iti naan-anay a salaysay iti tunggal gundaway nga inaramat dagiti apostol ti kasta a kinaturay, ngem saanna met nga inlanad ti tunggal kaso idi inaramatda ti karkarna a sagut nga agsao kadagiti pagsasao, agipadto, wenno mangpaimbag.​—2 Corinto 12:12; Galacia 3:5; Hebreo 2:4.

Ti maysa a kaso a nakainaigan ti pannakabalin dagiti apostol a mamakawan wenno mamagtalinaed kadagiti basol ramanenna da Ananias ken Safira, a nagulbodanda ti espiritu. Ni Pedro, a nakangngeg iti sasao ni Jesus a mabasatayo iti Juan 20:22, 23, imbutaktakna da Ananias ken Safira. Immuna a kinasarita ni Pedro ni Ananias, a natay a dágus. Idi simrek ni Safira kalpasanna ken intultuloyna ti nagulbod, impakaammo ni Pedro ti pannakaukomna. Saan a pinakawan ni Pedro ti basolna no di ket kinunana: “Adtoy! Dagiti saka dagidiay nangitabon iti asawam addada iti ruangan, ket awitendakanto nga iruar.” Natay met a dágus.​—Aramid 5:1-11.

Iti daytoy a kaso inaramat ni apostol Pedro ti naisangsangayan a kinaturay a mangyebkas iti sigurado a pannakapagtalinaed ti basol, ti karkarna a pannakaammo a saan a pakawanen ti Dios ti basol da Ananias ken Safira. Agparang met nga addaan dagiti apostol iti natantan-ok ngem tao a pannakaawat kadagiti kaso a sadiay masiguradoda a napakawanen dagiti basol maibatay iti daton ni Kristo. Gapuna dagidiay apostol nga impaayan ti espiritu iti pannakabalin kabaelanda nga ipakaammo ti pannakapakawan wenno pannakapagtalinaed ti basbasol.a

Dina kayat a sawen daytoy nga amin a napulotan-espiritu a panglakayen iti daydi a tiempo ti naaddaan iti kasta a datdatlag a kinaturay. Makitatayo dayta iti kinuna ni apostol Pablo maipapan iti lalaki a nailaksid iti kongregasion idiay Corinto. Saan a kinuna ni Pablo, ‘Pakawanek dagiti basol dayta a tao’ wenno uray pay, ‘Ammok a napakawanen dayta a lalaki idiay langit, gapuna nga awatenyo ti panagsublina.’ Imbes ketdi, indagadag ni Pablo iti intero a kongregasion a pakawanenda daytoy naisubli a Kristiano ken ipakitada ti ayat kenkuana. Innayon ni Pablo: “Ti aniaman a siaasi a pangpakawananyo iti asinoman, aramidek met.”​—2 Corinto 2:5-11.

No naisublin ti maysa a tao iti kongregasion, amin dagiti Kristiano a kakabsat mabalinda ti mamakawan iti anag a saanda a guraen gapu iti naaramidanna. Umuna, nupay kasta, kasapulan nga agbabawi ken maisubli. Kasano a mapasamak dayta?

Adda dagiti nakaro a basol a kasapulan a tamingen dagiti panglakayen ti kongregasion, kas ti panagtakaw, panagulbod, wenno nakaro nga imoralidad. Ikagumaanda nga ilinteg ken tubngaren dagiti kakasta a managbasol, a tignayenda ida nga agbabawi. Ngem no adda di agbabbabawi nga agar-aramid iti nakaro a basol, iyaplikar dagitoy a panglakayen ti nadiosan a pammilin nga ilaksidda ti managbasol. (1 Corinto 5:1-5, 11-13) Saan nga agaplikar kadagita a kaso ti kinuna ni Jesus iti Juan 20:23. Awanan dagitoy a panglakayen iti karkarna a sagut ti espiritu, kas ti abilidad a mangpaimbag iti masakit iti pisikal wenno mangpagungar kadagiti natay; natungpalen ti panggep dagidiay a sagut idi umuna a siglo ket iti kasta nagpatinggan. (1 Corinto 13:8-10) Maysa pay, awanan dagiti panglakayen ita iti nadiosan a kinaturay a mamakawan kadagiti nadagsen a basol iti anag nga ipakaammoda iti maysa a nakaaramid iti nadagsen a basol kas nadalusen iti imatang ni Jehova. Masapul a maibatay daytoy a kita ti pannakapakawan iti daton a subbot, ket ni laeng Jehova ti makapakawan maibatay iti dayta.​—Salmo 32:5; Mateo 6:9, 12; 1 Juan 1:9.

Kas iti kaso ti lalaki iti nagkauna a Corinto, no di agbabawi ti maysa a nakaaramid iti nakaro a basol, kasapulan a mailaksid. No agbabawinto ken mangpataud kadagiti aramid a mangipakita iti panagbabawi, posible ti nadiosan a pannakapakawan. (Aramid 26:20) Iti kasta a kasasaad, ti Kasuratan ipaayanna dagiti panglakayen iti rason tapno mamati a pudno a pinakawanen ni Jehova ti managbasol. Iti kasta, no naisublin ti maysa a tao, matulongan dagiti panglakayen iti naespirituan tapno bumileg iti pammati. Mabalinan met dagiti dadduma iti kongregasion ti mamakawan a kas iti panangpakawan dagiti Kristiano a taga-Corinto iti nailaksid a lalaki a naisubli kalpasanna.

Iti panangtaming kadagiti bambanag iti kastoy a wagas, saan nga agaramid dagiti panglakayen iti bukodda a pagalagadan iti panangukom. Iyaplikarda dagiti prinsipio ti Biblia ken surotenda a siiinget dagiti Nainkasuratan nga addang nga intuyang ni Jehova. Gapuna, aniaman a panangpakawan wenno di panangpakawan iti biang dagiti panglakayen ti tumutop iti sasao ni Jesus iti Mateo 18:18: “Pudno kunak kadakayo, Aniaman a bambanag a galutanyo ditoy daga isunto dagiti bambanag a nagalutan idiay langit, ket aniaman a bambanag a warwaranyo ditoy daga isunto dagiti bambanag a nawarwaran idiay langit.” Mayanninaw laeng iti tigtignayda ti panangmatmat ni Jehova kadagiti bambanag kas naidatag iti Biblia.

No kasta, ti kinuna ni Jesus, kas nailanad iti Juan 20:23, saan a maisupadi iti dadduma pay a paset ti Kasuratan, no di ket ipasimudaagna a naaddaan dagiti apostol iti naisangsangayan a kinaturay maipapan iti panangpakawan, maitunos iti naisangsangayan nga akemda idi panangrugi ti kongregasion Kristiano.

[Footnote]