Agnanayon a Kinaragsak ti Agur-uray Kadagiti Nadiosan a Manangted
“Ta kasta la unay ti panagayat ti Dios iti lubong nga intedna ti bugbugtong nga Anakna, tapno amin a mangalagad iti pammati kenkuana saan koma a mapukaw no di ket adda biagna nga agnanayon.”—JUAN 3:16.
1, 2. (a) Siasino ti kadadakkelan a Manangted,kenaniat’ kadadakkelan a sagutna iti sangatauan? (b) Iti panangtedna ti kadadakkelan a sagutna, ania a galad ti imparangarang ti Dios?
NI Jehova a Dios isu ti kadadakkelan a Manangted iti amin. Maipapan kenkuana, ti Namarsua iti langit ken daga, a ni Kristiano nga adalan a Santiago nagsurat: “Isuamin a sagut a nasayaat ken isuamin a sagut a naan-anay aggapuda iti ngato, bumaba nga aggapu iti Ama dagiti lawag, a kenkuana awan ti aniaman a panagduduma iti panagbaliw ti aniniwan.” (Santiago 1:17) Ni Jehova isu met ti Manangted iti kadadakkelan pay laeng a sagut a mabalin a maipaay. Maipanggep iti kadadakkelan a sagutna para iti sangatauan, naikuna: “Ta kasta la unay ti panagayat ti Dios iti lubong nga intedna ti bugbugtong nga Anakna, tapno amin a mangalagad iti pammati kenkuana saan koma a mapukaw no di ket adda biagna nga agnanayon.”—Juan 3:16.
2 Ti nangisawang kadagidiay a sasao ket awan sabali no di ti bugbugtong nga Anak ti Dios a mismo. Ti maysa a bugbugtong nga anak ti maysa nga ama talaga nga apresiarenna ken ayatenna ti kasta nga ama kas ti gubuayan ti biag ken amin a naimbag a bambanag nga impaayna para iti panangtagiragsakna iti biag. Ngem ti ayat ti Dios ket saan a naipamaysa iti daytoy a maymaysa nga Anak laeng. Tapno maipagteng ti kasta a sagut kadagiti sabsabali kadagiti pinarsuana ket mangiparangarang iti panangwatwat ti Dios iti ayat iti karkarna a rukod. (Idiligyo ti Roma 5:8-10.) Ad-adda pay a nalawag daytoy no sukimatentayo no ania ti pudpudno a kaipapanan ti sao nga “inted” iti daytoy a konteksto.
Ti Sagut ti Dios a “Dungdunguenna nga Anak”
3. Malaksid “iti dungdunguenna nga anak,” siasinoda pay ti nangtagiragsak iti ayat ti nailangitan nga Ama?
3 Iti di maibaga a kaunday ti tiempo, tinagiragsak ti Dios ti personal a pannakitimpuyog iti daytoy a bugbugtong nga Anak—“ti dungdunguenna nga Anak”—idiay nailangitan a lubong. (Colosas 1:13) Kabayatan dayta a tiempo, ti Ama ken ti Anak dimmakkel unay ti panagayat ken pammategda iti maysa ken maysa nga awan umartap iti panaginnayat nga adda kadakuada. Dagiti sabsabali a pinarsua a pinataud ti Dios babaen ti bugbugtong nga Anakna nagiinnayatda met kas kameng ti nadiosan a pamilia ni Jehova. Ngarud, ti ayat nagraira iti intero a pamilia ti Dios. Umiso unay a naikuna idiay nasantuan a Kasuratan a “ti Dios ayat.” (1 Juan 4:8) Ti nadiosan a pamilia, ngarud, ket buklen dagidiay inayat ti Ama, ni Jehova a Dios.
4. Kasano a ti panangited ti Dios iti Anakna iramanna ti ad-adda pay ngem ti pannakapukaw ti personal a pannakitimpuyog, ken para kadagiti siasino?
4 Nakadekdekket unay ni Jehova ken ti inauna nga Anakna a ti panangipaidam kadakuada ti kasta a nakasingsinged a panagtimpuyog ket mismo a maysa a dakkel a pukaw. (Colosas 1:15) Ngem ti ‘panangted’ iti daytoy a bugbugtong nga Anak kinaipapananna ti ad-adda ngem ti panangipaidam ti Dios iti bagina iti personal a pannakitimpuyogna iti “dungdunguenna nga Anak.” Dimmanon pay agingga iti panangipalubos ni Jehova iti Anakna nga aglak-am iti ipapatay ket ngarud mapukaw iti apagbiit kas maysa a paset ti unibersal a pamilia ti Dios. Daytoy ket maysa nga ipapatay maigapu kadagidiay saan a pulos a nagbalin a kameng ti pamilia ti Dios. Awan dakdakkel a maipaay a sagut ni Jehova maigapu iti agkasapulan unay a sangatauan ngem ti bugbugtong nga Anakna, a bigbigen met dagiti Kasuratan kas “ti puon ti pinarsua ti Dios.”—Apocalipsis 3:14.
5. (a) Aniat’ nasaem a nagbanagan ti kaputotan ni Adan, ken aniat’ kiniddaw ti kinahustisia ti Dios iti biang ti maysa kadagiti matalek nga annakna? (b) Aniat’ kiddawen ti kadadakkelan a sagut ti Dios iti biangna a mismo?
5 Ti immuna a natauan a pagassawaan, da Adan ken Eva, napaayda a mangtaginayon iti lugarda kas paset ti pamilia ti Dios. Isu dayta ti kasasaad a nakasarakanda iti bagida kalpasan pannakapagtalawda manipud minuyongan ti Eden gapu iti panagbasol maibusor iti Dios. Saanda laeng a nagbalin a saanen a kameng ti pamilia ti Dios no di ket naipataw met kadakuada ti ipapatay. No kasta, ti parikut ket saan laeng a ti panangisubli kadagiti annakda iti anamong ti Dios kas kameng ti pamiliana no di ket kasta met ti panangikkatna iti nadiosan a dusa ti ipapatay kadakuada. Sigun iti panagkurri ti nadiosan a kinahustisia, daytoy kiddawenna a maysa kadagiti matalek nga annak ti Dios ti makapasar iti ipapatay a kas sandi, wenno subbot. Ngarud, ti dakkel a saludsod ket: Daydiayto ngata mapili situtulok nga aglasat iti kasta a mangisuno nga ipapatay maigapu kadagiti managbasol a tattao? Kasta pay met, ti panagipagteng itoy kiddawenna ti maysa a milagro iti biang ti Dios a Mannakabalin-amin. Daytoy sapulenna met ti maysa a panangiyebkas iti nadiosan nga ayat iti di maartapan a rukod.—Roma 8:32.
6. Kasano a ti Anak ti Dios naikari kadagiti kiddawen ti kasasaad a mangiramraman iti managbasol a sangatauan, ken aniat’ kunana maipapan itoy?
6 Ti laeng inauna nga Anak ni Jehova ti maikari kadagiti naisangsangayan a kasapulan iti kasasaad a mangiraman iti managbasol a sangatauan. Isut’ kaladladawan ti nailangitan nga Amana iti panangipakita iti pammateg kadagiti kameng ti nadiosan pannakapataudna a pamilia nga awan umasping kenkuana kadagiti annak ti Dios. Yantangay amin a sabsabali a masirib a pinarsua ket napaaddada baeten kenkuana, ti pammategna kadakuada ket sigurado nga aglaplapusanan. Mainayon pay, ti ayat ket maysa nga agraira a galad ti bugbugtong nga Anak ni Jehova, ni Jesu-Kristo, gapu ta “isu ti raniag ti dayag [ti Dios] ken ti napaypayso a ladawan ti kinaisuna met laeng.” (Hebreo 1:3) Iti panangipakitana iti kinatulokna a mangiyebkas itoy nga ayat iti kadadakkelan a rukod babaen panangipaayna ti biagna maigapu iti managbasol a sangatauan, kuna ni Jesus kadagiti 12 nga apostolna: “Ta ti Anak ti tao immay, saan a tapno pagserbian, no di ket tapno agserbi ken itedna ti kararuana a subbot kadagiti adu.”—Marcos 10:45; kitaenyo met ti Juan 15:13.
7, 8. (a) Aniat’ motibo ni Jehova iti panangibaonna ken Jesu-Kristo iti lubong ti sangatauan? (b) Iti ania a kita ti panggep ti nangibaonan ti Dios iti bugbugtong nga Anakna?
7 Ni Jehova a Dios addaan naisangsangayan a rason iti panangibaonna ken Jesus iti daytoy a nakaayay-ay a lubong ti sangatauan. Ti nadiosan nga ayat isu ti pakatignayan iti daytoy, ta kuna a mismo ni Jesus: “Ta kasta la unay ti panagayat ti Dios iti lubong nga intedna ti bugbugtong nga Anakna, tapno amin a mangalagad iti pammati kenkuana saan koma a mapukaw no di ket adda biagna nga agnanayon. Ta imbaon ti Dios ti Anakna iti lubong, saan a mangukom iti lubong, no di ket ti lubong maisalakan gapu kenkuana.”—Juan 3:16, 17.
8 Gapu iti mision ti panangisalakan a siaayat nga imbaon ni Jehova ti bugbugtong nga Anakna. Saan nga imbaon ti Dios ti Anakna ditoy tapno ukomenna ti lubong. No ti Anak ti Dios ket naibaon iti kasta a mision ti panangukom, ti koma panangmatmat iti amin a sangatauan ket awanen pananginanamaan. Ti naipataw a nakaro a panangukom nga inyebkas koma ni Jesus iti natauan a pamilia ket pannakailunod iti ipapatay. (Roma 5:12) Ngarud, babaen itoy a naisangsangayan nga ebkas ti nadiosan nga ayat, tinupagan ti Dios ti panangipataw iti ipapatay a kiniddaw koma ti nasin-aw a kinahustisia.
9. Kasanot’ panagrikna ni salmista David maipapan iti panangted ni Jehova?
9 Kadagiti amin a banag, iyeb-ebkas ken ipakpakita ti Dios ti ayat kas ti naidaddaduma a parupa ti personalidadna. Ket mabalin nga umiso a kunaen a ti Dios ik-ikkanna a siaayat dagiti matalek a managdayawna ditoy daga iti nasursurok ngem ti umdas no maipapan kadagiti naimbag a bambanag. Kasta ti panagrikna ni salmista David maipapan iti dayta a banag idi a kunana iti Dios: “Anian nga aglaplapusanan ti kinaimbagmo, nga impempenmo kadagiti agbuteng kenka! Nga inaramidmo kadagiti agkamang kenka, iti sanguanan dagiti annak dagiti tattao.” (Salmo 31:19) Kabayatan ti kinaari ni David iti nasion ti Israel—wen, iti intero a panagbiagna kas maysa a kameng ti dayta a nasion a naisangsangayan a pinili ti Dios—masansan a napasaranna ti kinaimbag ni Jehova. Ket nautob ni David a dayta ket aglaplapusanan.
Ti Pannakapukaw ti Israel iti Dakkel a Sagut Manipud iti Dios
10. Apay a ti kadaanan nga Israel saan a kas iti aniaman a nasion ditoy daga?
10 Iti panangikutna ken Jehova kas Diosna, ti Israel ket saan a kas iti aniaman a nasion ditoy daga. Baeten ken mammadto a Moises kas manangibabaet, inyeg ni Jehova dagiti inapo ni Abraham, Isaac, ken Jacob iti maysa a pannakibagi a tulag kenkuana. Isut’ saan a nakilangen iti kastoy a pamay-an iti aniaman a sabali a nasion. No kasta, maidir-i ti napaltiingan a salmista: “Imparangna ti saona ken Jacob, dagiti al-alagadenna ken dagiti panangukomna iti Israel. Saan a nangaramid iti kasta iti siasinoman a sabali a nasion; ket no maipanggep kadagiti pangngeddengna, dida naammuan ida. Idaydayawyo ni Jah, dakayo a tattao!”—Salmo 147:19, 20.
11. Aginggat’ kaano a ti nasion ti Israel tinagiragsakna ti naanamongan a takderna iti Dios, ken kasano nga inyebkas ni Jesus ti panagbaliw iti pannakirelasionda?
11 Nagtultuloy ti nasion ti natural nga Israel iti daytoy a naparaburan a pannakirelasion iti Dios agingga a linaksidna ni Jesu-Kristo kas ti Mesias idi tawen 33 iti Kadawyan a Panawentayo. Daytat’ pudpudno a nakalkaldaang nga aldaw iti Israel idi inyebkas ni Jesus daytoy a nakalidliday a panagasug: “Jerusalem, Jerusalem, mammapatay kadagiti mammadto ken manangubor kadagiti naibaon kenkuana,—namin-ano a kinayatko nga urnongen koma dagiti annakmo,a kas iti maysa nga upa urnongenna dagiti piekna iti sirok dagiti payakna! Ngem dakayo a tattao dikay kinayat. Adtoy! Ti balayyo mapanawan kadakayo nga awan naggian.” (Mateo 23:37, 38) Dagiti sasao ni Jesus impabigbigna a ti nasion ti Israel, nupay iti kallabes unay ket inanamongan ni Jehova, napukawna ti naisangsangayan a sagut manipud iti Dios. Kasano a kasta?
12. Siasino dagiti ‘annak ti Jerusalem,’ ken ania komat’ kinaipapanan ti panangurnong ni Jesus kadakuada?
12 Babaen panangusarna iti termino nga “annak,” tinukoy laeng ni Jesus dagiti natural a nakugit a Judio a nagnaed idiay Jerusalem ken nangibagi iti intero a nasion a Judio. Tapno maurnong ni Jesus ‘dagiti annak ti Jerusalem’ kaipapananna iti biangna nga iyegna dagitoy nga “ubbing” iti maysa a baro a tulag iti Dios, nga isu a mismo ti agserbi kas ti Manangibabaet ken Jehova ken dagitoy a natural a Judio. (Jeremias 31:31-34) Nangibunga koma daytoy iti pannakapakawan dagiti basol, ta dayta ti rukod ti ayat ti Dios. (Idiligyo ti Malakias 1:2.) Daytoy ket pudpudno koma a dakkel a sagut.
13. Ti pananglaksid ti Israel iti Anak ti Dios nagbanag iti ania a pukaw, ngem apay a saan a naksayan ti rag-o ni Jehova?
13 Maitunos iti naimpadtuan a Saona, nagur-uray ni Jehova iti aginggat’ mabalin sakbay panangipagtengna kadagiti di-Judio ti sagut a panagbalin a makiraman iti baro a tulag. Ngem babaen pananglaksidda iti mismo nga Anak ti Dios, ti Mesias, napukaw ti nasion ti natural nga Israel daytoy a dakkel a sagut. Tinupagan ngarud ni Jehova ti pannakalaksid ti Anakna babaen panangipagtengna iti daytoy a sagut kadagiti tattao iti labes ti nasion a Judio. Iti dayta a pamay-an, ti rag-o ni Jehova kas ti Naindaklan a Manangted nagtultuloy a saan a naksayan.
Ti Kinaragsak iti Panangted
14. Apay a ni Jesu-Kristo ti kararagsakan a parsua iti amin nga uniberso?
14 Ni Jehova isu “ti naragsak a Dios.” (1 Timoteo 1:11) Ti panangted kadagiti sabsabali ket maysa a banag a mamagragsak kenkuana. Ket idi umuna a siglo K.P., kuna ti bugbugtong nga Anakna: “Ad-adu ti ragsak iti panangted ngem iti iyaawat.” (Aramid 20:35) Maitunos iti daytoy a prinsipio, ni Jesus ti nagbalin a kararagsakan a parsua ti Namarsua iti intero nga uniberso. Kasano a kasta? Bueno, sumaruno ken Jehova a mismo, inted ni Jesu-Kristo ti kadadakkelan amin a sagut babaen ipupusayna maigapu iti sangatauan. Kinapudnona, isu ‘ti naragsak a Mannakabalin.’ (1 Timoteo 6:15) Inyulidan ngarud ni Jesus no ania ti kunana maipapan iti dakdakkel a ragsak ti panangted.
15. Maipapan iti ania a ni Jehova dinto pulos agsardeng nga agbalin nga ulidan, ken kasano a mapasaran dagiti nasaririt a pinarsuana ti dakkel a rukod ti kinaragsakna?
15 Baeten ken Jesu-Kristo, saanto a pulos nga agkurang ni Jehova iti panagbalinna a managparabur a Manangted kadagiti amin a nasaririt a pinarsuana ken kankanayonto nga agbalin a kasasayaatan nga ulidanda iti panangted. No kasano a pagragsakan ti Dios ti panangted kadagiti naimbag a sagsagut kadagiti sabsabali, kasta met nga inkabilna ti kinamanagparabur kadagiti puso dagiti nasaririt a pinarsuana ditoy daga. Iti dayta a pamay-an isilnagda ken tuladenda ti personalidadna ken mapasaranda ti dakkel a rukod ti kinaragsak. (Genesis 1:26; Efeso 5:1) Maitutop unay, kuna ni Jesus kadagiti pasurotna: “Sanayenyo ti mangted, ket ikkandakayto dagiti tattao. Ibuyatdanto iti saklotyo ti sukat a naimbag, napempen, nasedsed ken agliplippias. Ta ti rukod a pangrukodyo, isunto met laeng ti pakarukodanyo.”—Lucas 6:38.
16. Iti ania a panangted ti tinukoy ni Jesus idiay Lucas 6:38?
16 Nangituyang ni Jesus ti ekselente nga ulidan iti panangipaugali iti kurso ti panangted. Kunana nga addanto nasayaat a panangsubad ti kasta a panangted iti biang dagiti umawat. Idiay Lucas 6:38, saan la a tuktukoyen ni Jesus ti panangted kadagiti material a sagut. Saanna nga ibagbaga kadagiti adalanna a surotenda ti maysa a kurso a mangpapanglaw kadakuada iti material. Imbes ketdi, iturturongna ida iti maysa a kurso a mangted kadakuada ti rikna ti naespirituan a pannakapunno.
Naipanamnama ti Agnanayon a Kinaragsak
17. Ania a nakaskasdaaw a sagut ti impaay ti Dios kadagiti Saksina kadagitoy maudi nga al-aldaw?
17 Anian a nakaskasdaaw a sagut ti impaay ni Jehova, ti Ulo ti amin a pinarsua, kadagiti Saksina kadagitoy a maudi nga al-aldaw! Intedna kadatayo ti naimbag a damag ti Pagarianna. Addaantayo iti dakkel a pribilehio nga agbalin a manangiwaragawag ti naipasdeken a Pagarian ti Dios kadagiti ima ti agturturayen nga Anakna, ni Jesu-Kristo. (Mateo 24:14; Marcos 13:10) Ti pannakapagbalin a natinggaw a Saksi ti Kangatuan-amin a Dios ket maysa a sagut nga awan kaaspingna, ket ti kasasayaatan a pamay-an a masanaytayo ti panangted kas panangtulad iti Dios ket isu ti panangiranud ti mensahe ti Pagarian kadagiti sabsabali sakbay nga umay ti panungpalan daytoy a dakes a sistema ti bambanag.
18. Kas dagiti Saksi ni Jehova, aniat’ masapul nga itedtayo kadagiti sabsabali?
18 Tinukoy ni apostol Pablo dagiti rigat a linasatna idi inwaragawagna ti mensahe ti Pagarian kadagiti sabsabali. (2 Corinto 11:23-27) Dagiti moderno-aldaw a Saksi ni Jehova masapul met nga aglasatda kadagiti rigat ken iwalinda dagiti personal a paggustuanda iti panagreggetda nga ikkan dagiti sabsabali ti namnama ti Pagarian. Mabalin a saan a nainkasigudan kadatayo ti mapan kadagiti ruangan dagiti tattao, nangnangruna no managbabaintayo. Ngem kas pasurot ni Kristo, saantay a malisian, wenno maliklikan, ti pribilehio a panangited kadagiti naespirituan a banag kadagiti sabsabali babaen panangikasaba “daytoy naimbag a damag ti pagarian.” (Mateo 24:14) Kasapulantay ti maaddaan ti isu met laeng a kababalin a naadda ken Jesus. Idi naipasango iti ipapatay, inkararagna: “Amak, . . . saan a kas iti kayatko, no di kas iti kayatmo.” (Mateo 26:39) No iti banag ti panangted ti naimbag a damag ti Pagarian kadagiti sabsabali, dagiti adipen ni Jehova masapul nga aramidenda ti pagayatan ti Dios, saan a ti bukodda—no ania ti kayatna, saan ket a ti kayatda.
19. Siasino dagiti Agtagtagikua kadagiti “abong-abong nga agnanayon,” ken kasanotay a makigayyem kadakuada?
19 Ti kasta a panangted iramanna ti tiempotayo ken dagiti pagsanikuaan, ngem babaen panagbalin a nadiosan a manangted, pagbalbalinentayo a sigurado nga agnanayon ti kinaragsaktayo. Apay? Gapu ta kuna ni Jesus: “Mangaramidkay kadagiti gagayyemyo babaen kadagiti di nalinteg a kinabaknang [“nailubongan a kinabaknang,” New International Version], tapno inton maibusen, awatendakayto kadagiti abong-abong nga agnanayon.” (Lucas 16:9) Ti rantatayo koma ket isu ti panangusar kadagiti “di nalinteg a kinabaknang” tapno makigayyem kadagiti Agtagtagikua iti “abong-abong nga agnanayon.” Bilang Namarsua, kukua ni Jehova amin a banag, ket ti inauna nga Anakna makipagtagikua met kas ti Agtawid kadagiti amin a banag. (Salmo 50:10-12; Hebreo 1:1, 2) Tapno makigayyemtay kadakuada, masapul nga aramatentayo dagiti kinabaknang iti pamay-an a mangiyeg iti anamongda. Iraman daytoy ti kaadda ti umiso a kababalin iti panangusar kadagiti material a bambanag para iti pagimbagan dagiti sabsabali. (Idiligyo ti Mateo 6:3, 4; 2 Corinto 9:7.) Mausartay ti kuarta iti umiso a pamay-an tapno mapakiredtayo ti pannakigayyemtayo ken Jehova a Dios ken ni Jesu-Kristo. Kas pangarigan, aramidentayo daytoy babaen ti siraragsak a panangusar iti adda kadatayo tapno tumulong kadagiti tattao a pudpudno nga agkasapulan ken iti panangbusbos kadagiti pagsanikuaantayo tapno parang-ayen ti intereses ti Pagarian ti Dios.—Proverbio 19:17; Mateo 6:33.
20. (a) Apay a makibindatayo ni Jehova ken ni Jesus agturong kadagiti “abong-abong nga agnanayon,” ken sadino dagitoy a lugar? (b) Ania a pribilehio ti kukuatayo iti kinaagnanayon?
20 Gapu iti imortalidadda, mabalintay a magayyem nga agnanayon ni Jehova a Dios ken ni Jesu-Kristo ken makibindatayo nga agturong kadagiti “abong-abong nga agnanayon.” Pudno daytoy uray daytoy ket kadagiti langlangit a kadua dagiti nasantuan nga anghel wenno iti daytoy a daga iti naisublin a Paraiso. (Lucas 23:43) Ti naayat a sagut ti Dios a ni Jesu-Kristo ti namagbalin a posible amin dagitoy. (Juan 3:16) Ket ni Jehova a Dios usarenna ni Jesus tapno itultuloyna ti panangted iti intero a sangaparsuaan, agpaay iti bukod a nagpaiduma a kinaragsak ti Dios. Kinapudnona, iti kinaagnanayon maaddaantayo a mismo ti pribilehio ti panangted iti sidong ti unibersal a kinasoberano ni Jehova a Dios ken iti kinaari ti bugbugtong nga Anakna, ti Apo ken Manangisalakantayo, ni Jesu-Kristo. Agbanagto daytoy iti agnanayon a kinaragsak para kadagiti amin a nadiosan a manangted.
Malagipmo Kadi?
◻ Aniat’ kiddawen ti kadadakkelan a sagut ti Dios iti biangna?
◻ Iti ania a kita ti ranta ti nangibaonan ti Dios iti Anakna?
◻ Siasino ti kararagsakan a parsua iti intero nga uniberso, ken apay?
◻ Kasano a mapasaran dagiti nadiosan a manangted ti agnanayon a kinaragsak?
[Ladawan iti panid 10]
Apresiarenyo kadi ti panangisagut ti Dios iti Anakna kas maysa a daton a subbot?
[Dagiti ladawan iti panid 12]
Birukenyo kadi nga umuna ti Pagarian ti Dios babaen panangikasaba iti naimbag a damag ken babaen panangsuportar iti dayta a trabaho buyogen dagiti pagsanikuaanyo?