No Aniat’ Intay Aramiden Tapno Maisalakan

APAY kasapulan a maisalakantayo? Gapu ta agsagsagabatayo amin iti makadidigra a bunga ti basol: ti kinaimperpekto, ut-ot, sakit, sennaay, ken kamaudiananna ti ipapatay. Inlawlawag ni apostol Pablo a kasta daytoy gapu ta ni Adan nga amatayo immalsa iti linteg ti Dios. Nagsurat ni Pablo: “Gapu iti maymaysa a tao [ni Adan] simrek ti basol ditoy lubong ken ti ipapatay gapu iti basol, ket iti kasta ti ipapatay immay kadagiti isuamin a tattao agsipud ta isuda nagbasolda amin.” (Roma 5:12) Apay a ti basol ni Adan nangisaknap ti ipapatay iti isuamin a tattao? Ngamin, ta daytoy ket gapu iti natural a pannakaaramid dagiti bambanag.

Idi nagbasol ni Adan, isut’ nakondenar ken patay sigun iti nadiosan a linteg. Agpadpada a daytoy ti nainkalintegan ken kasapulan. Nainkalintegan, ta ti biag ket saan a maysa a karbengan no di ket sagut a naggapu iti Dios. Babaen ti inggagara a panagbasol, napukaw ni Adan amin a panangtagikuana iti dayta a sagut. (Roma 6:23) Ti pannakakondenar ni Adan ken patay ti kasapulan agsipud ta awan aniaman nga imperpekto a mapalubosan nga agbiag ken mangrugit nga agnanayon iti uniberso. Gapuna, idi nagbasol ni Adan, isut’ mangrugin a matay ken dinan ik-ikutan ti perpekto, awan basolna a biag nga isut’ ipatawidna koma kadagiti annakna. Maikkanna laeng ida ti biag a namantsaan ti kinaimperpekto ken basol.​—Roma 8:18-21.

Nupay kasta, ditay koma liplipatan, a gapu laeng iti di kaikarian a kinamanangaasi ti Dios nga adda kadatayo uray laeng ti ababa a biagtayo itatta. (Job 14:1) Saan nga obligado ti Dios a mamalubos kada Adan ken Eva a maaddaan ti annak sakbay ti ipapatayda. Pinalubosanna ida a mangaramid ti kasta tapno paneknekan a dadduma kadagiti imperpekto a tattao ket mabalinda a suportaran ti kinasoberano ti Dios babaen ti panangsalimetmetda ti kinatarnawda kenkuana. Impalubos met ti Dios daytoy, agsipud ta ammona nga iti agangay subbotennanto, wenno ispalennanto, dagiti dumngeg a kapuonan dagidiay immuna a rebelde, da Adan ken Eva. Kasano?

Probision ti Pannakaisalakan

Saan a basta maiwalin ni Jehova a Dios ti nalinteg a pannusana. Saanna a mabalin a basta lipaten lattan ti orihinal a basol ni Adan ken amin nga innaynayon ti intero a sangatauan iti dayta nanipud idin. No laksiden lattan ti Dios dagiti mismo a nainkalintegan a linlintegna, daytoy ti mangpakapuy ti respeto nga agpaay iti intero a sistemana ti kinahustisia ken panagtalek iti dayta. Agasenyo koma ti ikkis a mangngegan no, gapu iti sumagmamano a personal a kapritso, ti natauan nga ukom gagaraenna a palubosan a di madusa ti maysa a kriminal. Nupay kasta, ti naasi nga ukom maiyanatup nga iyurnosna ti sigun iti linteg a multa a mabayadan maipaay iti tao a nakabasol babaen iti dadduma pay a situtulok a tao. Daytoy, iti arigna, ket isut’ inaramid ti Dios nga agpaay kadatayo.

Inyurnos ni Jehova para iti mismo nga Anakna, a ni Jesu-Kristo, nga ited ti perpekto a natauan a biagna a kasukat ti perpekto a biag a napukaw ni Adan. Situtulok nga imbaklay ni Jesus ti supapak dagiti basbasoltayo​—nga isu ni patay. (Isaias 53:4, 5; Juan 10:17, 18) Kuna ti Biblia: “Ti Anak ti tao . . . immay tapno itedna ti biagna a maysa a subbot kadagiti adu.” (Mateo 20:28; 1 Timoteo 2:6) Awan sabalin a makaaramid iti daytoy. Ni Jesus ket naisalsalumina ta isut’ naiyanak nga awan basolna ken nagtalinaed a perpekto, awan basolna a tao agingga iti ipapatayna. (Hebreo 7:26; 1 Pedro 2:22) Ti kinamatalekna agingga ken patay ti namagbalin a posible ti panangbayadna ti sigun ti linteg a supapak ti basbasoltayo.

Ngem, laglagipenyo, a ti Dios, ti Katan-okan nga Ukom, ket saan nga obligado a mangwayawaya iti asinoman. Matmatmatanna ti indaton ni Jesus a perpekto a natauan a biag kas bayad iti utangtayo gapu iti basol. Ngem saan nga iyaplikar ni Jehova a Dios daytoy iti awan panagbabawina, awan panangapresiarna, sipapakinakem a managbasol. Imbes a mangted iti maysa a kita ti pangkaaduan nga amnestia wenno sapasap a pannakaisalakan, ti Biblia ti nangiwayat kadagiti kondision a masapul a maragpat no kayattayo ti maisalakan manipud kadagiti epekto ti natawid a basol.

Dagiti Pagannurotan Maipaay ti Pannakaisalakan

Ngarud, aniat’ kasapulan maipaay ti pannakaisalakan? Ti kangrunaan a kasapulan isu daydiay kinuna ni apostol Pablo iti agbambantay ti pagbaludan a taga Filipos: “Mamatika ken Apo Jesus ket maisalakankanto.” (Aramid 16:31) Ti naimpusuan a panangakseptar iti dara nga imparukpok ni Jesus ket nasken no kayattayo ti maisalakan. Ket aniat’ kaipapanan ti pannakaisalakan kadatayo? Impamatmat ni Jesus ti sungbat idi a kinunana: “Ket siak ikkak ida ti biag nga agnanayon, ket didanto mapukaw uray kaano.” (Juan 10:28) Iti kaaduan, ti pannakaisalakan kaipapananna ti biag nga agnanayon ditoy daga a naisublin iti naparaisuan a kinaperpekto. (Salmo 37:10, 11; Apocalipsis 21:3, 4) Iti biang ti “bassit nga ipastoran,” nupay kasta, kaipapanannanto dayta ti panagturay a kadua ni Jesus iti nailangitan a Pagarianna.​—Lucas 12:32; Apocalipsis 5:9, 10; 20:4.

Dadduma isingasingda a ti panamati ken Jesus isut’ panungpalanen dagiti bambanag. “Adda laeng maysa a banag a kasapulan nga aramiden ti maysa tapno makagteng idiay langit,” kuna ti maysa a narelihiusuan a polieto. “Dayta ket, ti panangakseptar ken Jesu-Kristo kas ti personal a Manangisalakanmo, a sumukoka Kenkuana kas Apo ken Maestro, ken sipapanayag nga Isut’ ipudnom a kasta iti imatang ti lubong.” Iti kasta, adut’ mamati a ti giddato, emosional a kapadasan ti pannakakumberte isu lat’ kasapulantayo tapno maigarantia ti biag nga agnanayon. Nupay kasta, ti panangipamaysa iti maysa laeng a nasken a kasapulan maipaay ti pannakaisalakan nga ipueran dagiti dadduma ket arigna ti panangbasbasa ti maysa a napateg a sao iti maysa a kontrata ket laksidenen dagiti dadduma.

Ad-adda a nabatad daytoy no denggentayo dagiti komento ti dadduma a naminsan pagarupda a ti panagkunada a ti panamatida ken Jesus ket isu laeng ti kasapulan tapno maisalakanda. Kuna ni Bernice: “Dimmakkelak iti Brethren Church, ngem nagpampanunotak no apay, a no ti biag nga agnanayon ket agpannuray laeng ken Jesus, isu a mismo kinunana: ‘Daytoy kaipapananna ti biag nga agnanayon, ti panangammoda kenka, ti maymaysa a pudno a Dios, ken daydiay imbaonmo, nga isu ni Jesu-Kristo.’”​—Juan 17:3.

Iti siam a tawen kumbinsido ni Norman nga isut’ naisalakanen. Ngem kalpasanna nakitana nga ad-adu pay gayam ti kasapulan ngem ti basta emosional a panagkuna a ni Jesu-Kristo isut’ Manangisalakanmo. “Nakitak manipud iti Biblia a saan nga umdas ti panangbigbig iti Dios a managbasoltayo ken agkasapulan ti pannakaisalakan,” kunana. “Masapul met nga addaantay ti ar-aramid a maikari iti panagbabawi.”​—Mateo 3:8; Aramid 3:19.

Wen, ti panamati ken Jesus ket nasken iti pannakaisalakantayo, ngem adu pay ti kasapulan. Nagsao ni Jesus maipapan ti sumagmamano nga agkunkuna a mamati kenkuana ken agar-aramidda pay kadagiti “adu a datdatlag” gapu iti naganna. Ngem saanna a binigbig ida. Apay? Agsipud ta isuda ti “agar-aramid iti dakes” ken saanda nga agar-aramid iti pagayatan ni Amana. (Mateo 7:15-23) Palagipannatayo ni adalan a Santiago ti pannakasapul a “managtungpalkay koma iti sao, ket saan laeng a managdengngeg, nga allilawenyo dagiti bagbagiyo met laeng.” Kinunana pay met: “Sika patiem a ti Dios maymaysa? Naimbag ti aramidem. Dagiti sairo patienda met ket agpigergerda. . . . Ti pammati nga awanan ar-aramid, natay.”​—Santiago 1:22; 2:19, 26.

Dadduma, nupay kasta, irasonda a dagidiay pudpudno a naisalakanen ar-aramidenda metten amin dagitoy a bambanag. Ngem iti kinapudnona kasta aya ti al-alagadenda? Ni Denis, a ‘nangakseptaren ken Jesus’ idi ubing pay, kunana: “Dagiti ‘naisalakanen’ a tattao a naam-ammok ket awan mariknada a dakkel a pannakasapul a mangsukimat kadagiti Kasuratan agsipud ta pagarupda nga adda aminen kadakuada a kasapulan iti pannakaisalakan.” Kinapudnona, ti kinamanaginsisingpet ken di nakristianuan nga ar-aramid dagiti adu nga agkunkuna a naisalakandan ti nangiyeg iti intero a tema ti pannakaisalakan iti pannakalalais.

Nupay kasta, adut’ mangipapilit a kuna ti Kasuratan: “Ti mamati iti Anak addaan biag nga agnanayon.” (Juan 3:36, King James Version) Gapuna, kunaenda nga oras nga inawatmon ni Apo Jesu-Kristo kas personal a Manangisalakanmo, dikanto pulos a mapukawen. “Apaman a naisalakanen, naisalakan nga agnanayonen” daytat’ replanda. Ngem isu aya daytat’ pudno a kuna ti Kasuratan? Tapno masungbatan daytoy, masapul nga usigentay amin a kuna ti Biblia iti dayta a tema. Ditay kayat nga ‘allilawen ti bagitayo iti ulbod a panagrasrason’ babaen iti panangbasa laeng kadagiti napili a paset ti Sao ti Dios.

“Apaman a Naisalakanen, Naisalakan nga Agnanayonen”?

Kitaenyo ti naipaltiing a pakdaar ni adalan a Judas. Insuratna: “Ay-ayatek, idinto nga ikabilko ti amin a kinaregtak nga agsurat kadakayo iti maipapan iti pannakaisalakantayo a sapasap, napilitak nga agsurat kadakayo a balakadankayo tapno makidangadangkayo a sibibileg gapu iti pammati a namimpinsan a naited kadagiti sasanto.” (Judas 3) Apay nga insurat ni Judas daytoy? Agsipud ta ammona a dagiti indibidual a Kristiano kaskasdi a mapukawda pay ti ‘pannakaisalakan a sapasap.’ Sana intuloy a kinuna: “Tarigagayak ngarud nga ipalagip kadakayo . . . a ni Jehova, idinto nga inaonna ti maysa nga ili [dagiti Israelita] idiay daga ti Egipto, kalpasanna pinukawna dagiti saan a namati.”​—Judas 5.

Awan serserbi ti pakdaar ni Judas no saan a naipasango dagiti Kristiano iti peggad nga umas-asping ti peggad a sinango dagidiay nga Israelita. Saan a pagduaduaan ni Judas ti pateg ti daton ni Jesus. Dayta a daton ti nangisalakan kadatayo manipud Adamiko a basol, ket salakniban ni Jesus dagidiay mangalagad ti pammati kenkuana. Awan mabalin a mangrabsut kadakuada manipud imana. Ngem mabalintay a mapukaw dayta a pannalaknib. Kasano? Babaen ti panagaramid kas kadagiti adu nga Israelita a naispal manipud Egipto. Mabalintay met a gagaraen ti isusukir iti Dios.​—Deuteronomio 30:19, 20.

Panunotenyo ti pannakaisalakanyo manipud sumsumged a torre. Panunotenyo ti pannakabang-ar a nariknayo idi sitatalged a nairuarkayo manipud iti patakder ket kuna ti nangalaw kadakayo: “Natalgedka itan.” Wen, mabalin a naispalka manipud sigsigurado nga ipapatay. Ngem ania ngay ti mapasamak no napanunotmo ti agsubli iti dayta a patakder gapu iti minamaag a rason? Ti biagmo agpeggad manen.

Dagiti Kristiano ket addadan iti naisalakan a kasasaad. Addaandat’ namnama ti biag nga agnanayon agsipud ta addadan iti naanamongan a kasasaad iti imatang ti Dios. Kas maysa a grupo, ti pannakaisalakanda manipud Adamiko a basol ken amin a bungbungana ket siguradon. Ngem iti sinaggaysa maisalakanda laeng iti biag nga awan inggana no agtultuloyda a sumurot kadagiti amin a pagalagadan ti Dios. Impaganetget ni Jesus daytoy idi inyarigna ti bagina iti puon ti ubas ken dagiti adalanna kas sangsanga dayta nga ubas. Kunana: “Isuamin a sangak a di agbunga [ti Dios] ikkatennanto . . . No adda saan nga agnaed kaniak, maibellengto iti ruar a kas ti sangak ket magangonto; ket urnongendanto ket ibelleng iti apuy ket mapuoranto.” (Juan 15:2, 6; Hebreo 6:4-6) Dagidiay makapukaw ti pammatida ken Jesus mapukawdanto met ti biag nga agnanayon.

“Ti Agtalinaed . . . Maisalakanto”

Wen, adda nagduduma a bambanag a nairaman iti pannakaisalakan. Masapul a maaddaantayo ti umiso a pannakaammo iti pangpanggep ti Dios ken ti dalan ti panangisalakanna. Kalpasanna mamatitayo iti Kangrunaan nga Ahente ti pannakaisalakan, a ni Jesu-Kristo, ket aramidentayo ti pagayatan ti Dios iti isuamin a panagbiagtayo. (Juan 3:16; Tito 2:14) Ti pannakaisalakan ket sigurado kadagidiay sumurot itoy a kurso. Ngem ramanen dayta ti panagtultuloy agingganat’ panungpalan daytoy agdama a biagtayo wenno iti daytoy a sistema dagiti bambanag. Daydiay laeng “agtalinaed agingga iti panungpalan maisalakanto.”​—Mateo 24:13.

Agraman dadduma iti sangakabbalayanna, daydiay agbambantay ti pagbaludan a taga Filipos inawatna a sipopositibo ti mensahe ti pannakaisalakan nga inkaskasaba ni Pablo ken ni Silas. “Ket dagus a nabautisaran isu ken amin dagidi kabbalayna.” (Aramid 16:33) Mabalintay met nga alaen ti kasta a positibo a panagtignay. Iti kasta, mabalintay iti sumrek iti nasinged ken bendito a pannakirelasion ken Jehova a Dios ken ni Jesu-Kristo nga Anakna, ken maaddaantay ti naan-anay a kompiansa kadagiti nadiosan a probision ti pannakaisalakan. Ti agbambantay ti pagbaludan a taga Filipos “nagay-ayat iti dakkel a namati iti Dios agraman amin iti balayna.” (Aramid 16:34) Ti kasta a kurso ti mangted met ti ‘dakkel a panagay-ayat’ kadatayo.

[Ladawan iti panid 7]

Anianto ngay ti mapasamak no agtarayka nga agsubli iti mapupuoran a patakder kalpasan ti pannakaisalakanmo?