Naballigi ti Pudno a Kristianidad!
“Iti nabileg a pamay-an nagtultuloy a rimmang-ay ken nagballigi ti sao ni Jehova.”—ARAMID 19:20.
1. Deskribirenyo ti irarang-ay ti Kristianidad idi umuna a siglo.
TI NASANTUAN nga espiritu pinabilegna dagiti nagkauna a Kristiano a mangiwaragawag iti sao ti Dios buyogen ti regta a di bumaaw. Insurat ti maysa a historiador: “Nakaskasdaaw ti napartak a panagsaknap ti Kristianidad iti lubong dagiti Romano. Idi tawen 100, nalabit adda komunidad dagiti Kristiano iti tunggal probinsia iti igid ti Mediteraneo.”
2. Kasano a ginandat ni Satanas a sumraen ti naimbag a damag, ket kasano a naipakpakauna daytoy?
2 Di nabaelan ni Satanas a Diablo a pagulimeken dagiti nagkauna a Kristiano. Gapuna, sinumrana ti epekto ti naimbag a damag babaen ti sabali a pamay-an—apostasia. Impakpakauna daytoy ni Jesus iti pangngarigna maipapan iti trigo ken dagiti dakes a ruot. (Mateo 13:24-30, 36-43) Namakdaar met ni apostol Pedro a tumaudto dagiti saan a pudno a mannursuro iti uneg ti kongregasion, a mangyeg kadagiti makadadael a sekta. (2 Pedro 2:1-3) Kasta met, espesipiko nga impakpakauna ni apostol Pablo nga adda panagapostasia sakbay ti aldaw ni Jehova.—2 Tesalonica 2:1-3.
3. Ania ti napasamak kalpasan ti ipapatay dagiti apostol?
3 Kalpasan ti ipapatay dagiti apostol, dagiti napaganuan a sursuro ken pilosopia riningbawanda ti naimbag a damag. Kas naipadto, tiniritir ken linibeg dagiti saan a pudno a mannursuro ti nasin-aw a mensahe ti kinapudno. Ti pudno a Kristianidad ket in-inut a liningdan ti sinsinan a Kristianidad a maaw-awagan Kakristianuan. Timmaud ti klase klero a nangipamuspusan a mangyadayo iti Biblia kadagiti kadawyan a tattao. Nupay immadu dagidiay agkunkuna a Kristianoda, saan a nasin-aw ti panagdayawda. Nagsaknap ti Kakristianuan ket nagbalin a nabileg nga institusion ken nakaro ti impluensiana iti kultura dagiti pagilian iti Laud, ngem awan kenkuana ti parabur wenno espiritu ti Dios.
4. Apay a napaay ti gandat ni Satanas a mangkeltay iti panggep ti Dios?
4 Nupay kasta, naikeddeng a mapaay ti gandat ni Satanas a mangkeltay iti panggep ni Jehova. Uray kadagiti nalidem unay a panawen ti apostasia, sibibiag latta ti pudno a Kristianidad kadagiti sumagmamano. Adda dagiti tattao a nangikarigatan a mangkopia a siuumiso iti Biblia. Gapuna, nagtalinaed a kompleto ti Biblia, nupay ti mensahena ket binallikug dagiti adu nga agkunkuna nga addaan iti karbengan a mangisuro iti dayta. Iti las-ud ti adu a siglo, dagiti eskolar a kas kada Jerome ken Tyndale situtured nga impatarus ken insaknapda ti Sao ti Dios. Minilion a tattao ti nakabasa iti Biblia ken nakasursuro iti maysa a kita ti Kinakristiano, nupay saan a pudno dayta.
5. Ania ti impadto ni propeta Daniel maipapan iti “pudno a pannakaammo”?
5 Idi agangay, kas naipadto iti libro ni Daniel, ‘immadu ti pudno a pannakaammo.’ Napasamak daytoy iti “tiempo ti panungpalan”—ti tiempo a pagbibiagantayo. (Daniel 12:4) No kadagiti mangipatpateg iti kinapudno iti intero a lubong, inturong ida ti nasantuan nga espiritu iti umiso a pannakaammo maipapan iti pudno a Dios ken iti panggepna. Nagballigi ti sao ti Dios iti baet ti adu a siglo a panagsaknap ti apostata a sursuro! Iti kaaldawantayo, maiwarwaragawag ti naimbag a damag iti amin a lugar, a mangted kadagiti tattao iti namnama nga agbiag iti nakaay-ayat a baro a lubong. (Salmo 37:11) Usigentay ita daytoy a panagsaknap ti sao ti Dios iti moderno a panawen.
Panagsaknap ti Sao iti Kaaldawantayo
6. Aniada a kinapudno ti naawatan dagiti Estudiante ti Biblia idi tawen 1914?
6 Idi arinunos ti maika-19 a siglo, ti kinapudno a masarakan iti Biblia pinabilegna ti maysa a bassit a grupo dagiti Estudiante ti Biblia, a pagaammo ita kas dagiti Saksi ni Jehova. Idi 1914, nagbalin a pudpudno kadakuada ti Biblia. Naawatanda dagiti makaay-ayo a kinapudno maipapan iti panggep ti Dios. Natukay unay ti riknada iti ayat ni Jehova babaen ti panangibaonna iti Anakna ditoy daga a nanglukat iti dalan nga agturong iti biag nga agnanayon. Naammuan ken inapresiarda met ti nagan ken personalidad ti Dios. Maysa pay, naawatanda a nagpatingga ti “panawen dagiti Gentil,” a mangipasimudaag nga asidegen nga iyeg ti gobierno ti Pagarian ti Dios dagiti bendision iti sangatauan. (Lucas 21:24, King James Version) Anian a nagdayag a naimbag a damag! Dagitoy a nabileg a kinapudno ket masapul a maipakaammo iti isuamin a tattao, iti amin a lugar. Nakapusta ti biag dagiti tattao!
7. Kasano a nagballigi iti moderno a panawen ti kinapudno a masarakan iti Biblia?
7 Binendisionan ni Jehova dayta a bassit a grupo dagiti Kristiano a napulotan iti espiritu. Itatta, nasurok nga innem a milionen ti bilang dagidiay immawat iti pudno a Kristianidad. Nagsaknap metten ti sao ti Dios, ta adda dagiti Saksi ni Jehova iti 235 a daga. Kanayonanna, nabileg ti kinapudno a masarakan iti Biblia, ta maparmekna ti amin a tubeng, narelihiosuan ken dadduma pay. Daytoy a sangalubongan a trabaho a panangasaba ket maysa pay a di mailibak a pammaneknek nga agturturayen ni Jesus iti Pagarian.—Mateo 24:3, 14.
8. Ania ti kinuna dagiti dadduma maipapan iti irarang-ay dagiti Saksi ni Jehova?
8 No kasano a kinomentuan dagiti historiador ti irarang-ay ti Kristianidad idi umuna a siglo, adu nga eskolar ti nagkomento met maipapan iti irarang-ay ti ili ni Jehova iti moderno a panawen. Idiay Estados Unidos, kastoy ti insurat ti dua nga eskolar: “Iti napalabas a 75 a tawen, nakaskasdaaw ti kapartak ti irarang-ay dagiti Saksi ni Jehova . . . ket pudno dayta iti sangalubongan.” Kinuna ti maysa a pagiwarnak idiay East Africa a dagiti Saksi ti “maysa kadagiti kapartakan ti irarang-ayna ken mararaem unay a relihion ditoy lubong a pagaammo iti sangalubongan gapu iti naan-anay a panangannurotna kadagiti sursuro ti Biblia.” Dinakamat met ti maysa a konserbatibo a pagiwarnak dagiti Katoliko, a naipablaak idiay Europa, ti “nakaskasdaaw nga irarang-ay dagiti Saksi ni Jehova.” Ania ti nakatulong iti kastoy nga irarang-ay?
Agtigtignay ti Nasantuan nga Espiritu iti Kaaldawantayo
9. (a) Ania ti maysa a kangrunaan a makagapu a naballigi ti sao ti Dios iti kaaldawantayo? (b) Kasano a guyugoyen ni Jehova dagiti tattao?
9 Ti maysa a kangrunaan a makagapu a naballigi ti sao ti Dios iti kaaldawantayo isu ti aktibo a panagtignay ti espiritu ni Jehova, kas idi umuna a siglo. Kinuna ni Jesus: “Awan ti tao a makaumay kaniak malaksid no ti Ama, a nangibaon kaniak, ti mangyasideg kenkuana.” (Juan 6:44) Ipasimudaag dagitoy a sasao a siaayat a guyugoyen ti Dios dagidiay siuumiso a maikari, nga allukoyenna ti pusoda. Babaen ti trabaho a panangasaba dagiti Saksina, ur-urnongen ni Jehova nga agserbi kenkuana “dagiti matarigagayan a banag dagiti amin a nasion”—dagiti naemma, arig karnero a tattao ditoy daga.—Haggeo 2:6, 7.
10. Aniada a kita ti tattao ti nangipangag iti sao ti Dios?
10 Ti nasantuan nga espiritu saanna la a pabilgen ti ili ti Dios a mangidanon iti sao ti Dios iti kaadaywan a paset ti daga; tignayenna ti amin a kita ti tattao a mangipangag iti naimbag a damag. Pudno unay, dagidiay nangawat iti sao ti Dios ket naggapu “iti tunggal tribu ken pagsasao ken ili ken nasion.” (Apocalipsis 5:9; 7:9, 10) Masarakan ida kadagiti nabaknang ken napanglaw, edukado ken di nakaadal. Dagiti dadduma inawatda ti sao iti baet ti gubat ken naulpit a panangidadanes, idinto ta dagiti dadduma inaramidda dayta iti tiempo ti talna ken kinarang-ay. Iti sidong ti amin a kita ti gobierno, amin a kultura, manipud kadagiti kampo konsentrasion agingga kadagiti palasio, adda dagiti lallaki ken babbai a nangipangag iti naimbag a damag.
11. Kasano nga agtigtignay ti nasantuan nga espiritu iti biag dagiti tattao ti Dios, ket ania a panagduma ti nabatad?
11 Nupay adu ti nagdudumaan dagiti tattao ti Dios, adda panagkaykaysada. (Salmo 133:1-3) Maysa pay daytoy a pammaneknek nga agtigtignay ti nasantuan nga espiritu iti biag dagidiay agserserbi iti Dios. Ti espirituna ket nabileg a puersa nga agpaay iti pagimbagan a tumulong kadagiti adipenna a mangiparangarang iti ayat, rag-o, talna, kinaimbag, ken dadduma pay a makaay-ayo a galad. (Galacia 5:22, 23) Iti kaaldawantayo, nalawag a makitatayo ti kaitungpalan ti impadto ni propeta Malakias idi un-unana: ‘Makitayonto ti pagdumaan daydiay nalinteg ken daydiay nadangkes, daydiay agserserbi iti Dios ken daydiay saan a nagserbi kenkuana.’—Malakias 3:18.
Agballigi ti Sao ti Dios Kadagiti Naregta a Trabahador
12. Kasano ti panangmatmat dagiti Saksi ni Jehova iti trabaho a panangasaba, ket ania a reaksion iti trabahoda a panangasaba ti namnamaenda?
12 Saan a basta paspasurot laeng dagiti Saksi ni Jehova ita. Aktiboda a mangaskasaba. Kas kadagiti nagkauna a Kristiano, situtulokda a mangaramid iti pagayatan ti Dios, nga ikagumaanda a tulongan dagiti sabsabali a makasursuro maipapan kadagiti kari ti Pagarian ni Jehova. Katrabahuan ida ti Dios a, maitunos iti nasantuan nga espirituna, ur-urnongenna dagiti dadduma nga agserbi ken Jehova. Iti panangaramidda iti dayta, iyan-anninawda ti asi ken ayat ni Jehova kadagiti tattao a saan a mamati. Ket ar-aramidenda dayta nupay mayaleng-aleng, mauy-uyaw, ken maidadanesda. Impakpakauna ni Jesus kadagiti pasurotna ti nadumaduma a reaksion dagiti tattao iti naimbag a damag. Kinunana: “Ti adipen saan a dakdakkel ngem iti apona. No indadanesdak, idadanesdakayto met; no tinungpalda ti saok, tungpalendanto met ti saoyo.”—Juan 15:20.
13. Ania dagiti banag nga awan iti Kakristianuan a naruay kadagiti Saksi ni Jehova?
13 Masdaawtayo iti pagpadaan dagiti Saksi ni Jehova iti panawentayo ken dagidiay nangawat iti pudno a Kristianidad idi umuna a siglo. Nakakadkadlaw met ti naggidiatan dagiti Saksi ni Jehova ken ti Kakristianuan ita. Kalpasan a nagsurat maipapan iti kinaregta dagiti nagkauna a Kristiano a mangasaba, maladingitan a kinuna ti maysa nga eskolar: “Saantay a rumang-ay malaksid no mabalbaliwan ti agdama a pagannurotan ti iglesia ket iparebbengna manen iti tunggal nabautisaran a Kristiano ti annongen a mangasaba, ken mabuyogan dayta iti kalidad ti panagbiag a naim-imbag ngem iti kasayaatan a panagbiag dagidiay awanan pammati.” Naruay kadagiti Saksi ni Jehova dagiti mismo a banag nga awan iti Kakristianuan! Addaanda iti nabiag a pammati, napaypayso a pammati, ken pammati a naibatay iti kinapudno a masarakan iti Biblia a mariknada a masapul nga iranudda kadagiti amin a dumngeg.—1 Timoteo 2:3, 4.
14. Kasano ti panangmatmat ni Jesus iti ministeriona, ket ania a kababalin ti iparparangarang dagiti adalanna iti kaaldawantayo?
14 Impasnek unay ni Jesus ti ministeriona. Dayta ti kangrunaan a pakaseknanna. Kinunana ken ni Pilato: “Maigapu itoy a nayanakak, ken maigapu itoy nga immayak iti lubong, tapno saksiak ti kinapudno.” (Juan 18:37) Ti panangmatmat ti ili ti Dios ket kas iti panangmatmat ni Jesus. Tangay adda iti pusoda ti kinapudno a linaon ti Biblia, ipampamuspusanda nga iranud dayta kadagiti amin aginggat’ mabalin. Naisangsangayan ti dadduma kadagitoy a pamuspusan.
15. Kasano nga impamusmusan dagiti dadduma nga ikasaba ti naimbag a damag?
15 Iti maysa a pagilian ti Sud America, linasat dagiti Saksi ti maysa a karayan a sanga ti Amazon River tapno idanonda ti kinapudno kadagiti tattao. Nupay kasta, idi timmaud ti riribuk idi 1995, naparitan dagiti umili a lumasat iti karayan. Tangay determinadoda nga itultuloy a suplayan dagiti interesado a tattao kadagiti publikasion a naibatay iti Biblia, inkeddeng dagiti Saksi nga ipaanud ti mensahe iti karayan. Nangaramidda kadagiti surat sada inserrek dagitoy agraman dagiti kopia ti magasin a Ti Pagwanawanan ken Agriingkayo! kadagiti basio a botelia a plastik. Kalpasanna, impalladawda dagiti botelia iti karayan. Nagtultuloy daytoy iti uppat ket kagudua a tawen agingga a napalubosan manen dagiti umili a lumasat iti karayan. Amin dagiti tattao nga adda iti igid ti karayan nagyamanda kadagiti Saksi gapu kadagiti literatura. Maysa a babai nga agad-adal idin iti Biblia ti nakalua a nangarakup kadakuada sana kinuna: “Impagarupko no dikay makitan. Nupay kasta, idi nangrugi a makaawatak kadagiti nakabotelia a literatura, ammok a saandak a nalipatan!” Kinuna dagiti dadduma nga agnanaed iti igid ti karayan a namin-adu a nabasadan dagiti magasin. Adu a purok ti addaan iti “opisina ti koreo”—maysa nga alikuno a temporario a pakaurnongan dagiti banag a maipaanud. Masansan a mapan sadiay dagiti tattao tapno kitaenda no adda aniaman a “surat” a naggapu iti surong.
16. Kasano a ti panagbalintayo a madadaan ikkannatayo no dadduma iti gundaway a mangaramid kadagiti adalan?
16 Ti pannakaikasaba ti naimbag a damag ket iturturong ken supsuportaran ni Jehova a Dios ken dagiti mannakabalin nga anghelna. (Apocalipsis 14:6) No la ket ta madadaantayo, sumangbay no dadduma dagiti di ninamnama a gundaway a mangaramid kadagiti adalan. Idiay Nairobi, Kenya, dua a Kristiano a babbai ti nalpas a nangasaba iti naituding a teritoriada. Kellaat nga inasitgan ida ti maysa nga agkabannuag a babai ket magagaran a kinunana: “Inkarkararagko a makasarakak koma iti tao a kas kadakayo.” Indawatna kadagiti Saksi nga umayda a dagus iti pagtaenganna tapno agsasaritada, ket inrugina ti nakipagadal iti Biblia iti dayta met la nga aldaw. Apay a nagdardaras ti babai nga immasideg kadagiti dua a Kristiano? Agarup dua a lawas sakbayna, pimmusay ti maladagana. Isu nga idi nakitana ti maysa nga agtutubo a lalaki a nakaiggem iti tract nga “Aniat’ Namnama Kadagiti Ing-ingungoten a Natayen?” nagustuanna unay dayta, ket kiniddawna iti agtutubo nga itedna laengen dayta kenkuana. Nagkedked ti agtutubo, ngem intudona dagiti Saksi a nangted iti tract kenkuana. Di nagbayag, nasayaat ti naespirituan nga irarang-ay ti babai ket nailiwliwagna ti nasaem nga ipapatay ti anakna.
Masapul nga Agballigi ti Ayat ti Dios
17-19. Ania nga ayat ti impakita ni Jehova iti sangatauan babaen ti subbot?
17 Ti panagsaknap ti sao ti Dios iti intero a daga ket nainaig unay iti daton a pangsubbot ni Kristo Jesus. Kas iti subbot, ti trabaho a panangasaba ket ebkas ti ayat ni Jehova kadagiti tattao iti amin a disso. Napaltiingan nga insurat ni apostol Juan: “Ti Dios inayatna ti lubong [ti sangatauan] iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”—Juan 3:16.
18 Panunotenyo ti ayat nga impakita ni Jehova iti panangipaayna iti subbot. Iti las-ud ti di mabilang a panawen, tinagiragsak ti Dios ti nasinged a panagkaduada iti ipatpategna a bugbugtong nga Anakna, “ti pangrugian ti panamarsua ti Dios.” (Apocalipsis 3:14) Ay-ayaten unay ni Jesus ti Amana, ket ni Jehova inayatna ti Anakna “sakbay ti pannakabangon ti lubong.” (Juan 14:31; 17:24) Impalubos ni Jehova a matay ti dungdungnguenna nga Anak tapno magun-od dagiti tattao ti biag nga agnanayon. Anian a nakaskasdaaw nga ebkas ti ayat iti sangatauan!
19 Kuna ti Juan 3:17: “Ti Dios imbaonna ti Anakna iti lubong, saan a tapno ukomenna ti lubong, no di ket tapno ti lubong maisalakan babaen kenkuana.” No kasta, imbaon ni Jehova ti Anakna tapno mangisalakan, saan a tapno mangukom wenno mangkondenar. Maysa dayta a naayat a mision. Maitunos daytoy iti kinuna ni Pedro: “[Ni Jehova] saanna a tarigagayan a madadael ti asinoman no di ket tarigagayanna a makagteng dagiti isuamin iti panagbabawi.”—2 Pedro 3:9.
20. Kasano a ti pannakaisalakan ket nainaig iti pannakaikasaba ti naimbag a damag?
20 Tangay naipaaynan ti maitutop a pakaibatayan ti pannakaisalakan nupay kaipapanan dayta ti dakkel a sakripisio iti biangna, kayat ni Jehova nga aprobetsaren dayta dagiti amin a tattao aginggat’ mabalin. Insurat ni apostol Pablo: “‘Tunggal maysa nga umawag iti nagan ni Jehova maisalakanto.’ Nupay kasta, kasano ti panangawagdanto iti daydiay a kenkuana saanda a naaddaan iti pammati? Kasta met, kasano a maaddaandanto iti pammati iti daydiay saanda a nangngeg? Kasta met, kasano ti pannakangngegdanto no awan ti mangasaba?”—Roma 10:13, 14.
21. Kasano ti rumbeng a panangmatmattayo iti gundaway a makiraman iti trabaho a panangasaba?
21 Anian a naisangsangayan a pribilehio ti makiraman iti daytoy sangalubongan a trabaho a panangasaba ken panangisuro! Saan a nalaka a trabaho daytoy, ngem maragsakan unay ni Jehova no makitana dagiti tattaona a simamatalek nga agbibiag a mayannurot iti kinapudno ken mangiranranud iti naimbag a damag kadagiti dadduma! Isu nga aniaman ti kasasaadyo, bay-anyo a ti espiritu ti Dios ken ti ayat nga adda iti pusoyo gutugotennakayo a makiraman iti daytoy a trabaho. Ken laglagipenyo a ti maim-imatangantayo a magapgapuanan iti sangalubongan ket makapnek a pammaneknek a din agbayag tungpalento ni Jehova a Dios ti karina nga iyegna ti nadayag a “baro a langlangit ken maysa a baro a daga” a ‘pagtaengan ti kinalinteg.’—2 Pedro 3:13.
Malagipyo Kadi?
• Apay a ti apostasia dina mapagulimek dagiti mangikaskasaba iti naimbag a damag?
• Kasano a nagballigi ti sao ti Dios iti kaaldawantayo?
• Kadagiti ania a pamay-an nga agtigtignay ti espiritu ti Dios iti kaaldawantayo?
• Kasano a nainaig ti subbot iti pannakaikasaba ti naimbag a damag?
[Graph/Ladawan iti panid 16]
(Para iti aktual a pannakaurnosna, kitaem ti publikasion)
Panagadu ti bilang dagiti manangiwaragawag iti Pagarian iti maika-20 a siglo
Promedio a Bilang Dagiti Agibumbunannag (iti milion)
6.0
5.5
5.0
4.5
4.0
3.5
3.0
2.5
2.0
1.5
1.0
0.5
1900 1910 1920 1930 1940 1950 1960 1970 1980 1990 2000
[Dagiti Ladawan iti panid 15]
JEROME
TYNDALE
GUTENBERG
HUS
[Credit Line]
Da Gutenberg ken Hus: Manipud iti libro a The Story of Liberty, 1878
[Ladawan iti panid 15]
Dagiti Estudiante ti Biblia a mangiwarwaragawag iti naimbag a damag idi dekada 1920
[Dagiti Ladawan iti panid 16, 17]
Iti intero a lubong, adda dagiti tattao a mangipangpangag iti naimbag a damag
[Ladawan iti panid 18]
Kas iti daton a pangsubbot ni Jesu-Kristo, ti trabaho a panangasaba itan-okna ti ayat ti Dios