No Aniat’ Isuro Kadatayo Dagiti Parsua nga ‘Addaan Naikasigudan a Sirib’

TI AIR-CONDITIONING, panglaban iti lamiis, panangikkat iti asin manipud iti danum-apgad, ken ti sonar ket imbension a nasaknap a pagaammo ti sangatauan iti maika-20 a siglo. Nupay kasta, rinibribun a tawen nga addan dagitoy iti lubong dagiti animal. Wen, magunggonaan ti sangatauan iti panangadal iti kakasta a parsua nga ‘addaan naikasigudan a sirib.’ (Proverbio 30:24-28; Job 12:7-9) Agparang a ti sumagmamano nga animal nagbalin a di-agsasao a mannursuro iti sangatauan, ket masarakantayo a makapainteres unay a sukimaten ida.

Magunggonaantay ngata iti panangusig kadagiti kababalin ti sumagmamano nga animal? Bueno, inyasping ni Jesu-Kristo dagiti pasurotna kadagiti karnero, serpiente, kalapati, ken dagiti dudon pay ketdi. Aniat’ pampanunotenna idi inyaspingna dagiti pasurotna kadagitoy a parsua? Kitaentayo.

“Dagiti Karnerok Imdenganda ti Timekko”

Nasurok a 200 a daras a dakdakamaten ti Biblia dagiti karnero. Kas ilawlawag ti Smith’s Bible Dictionary, “ti karnero ket maysa a simbolo ti kinaamo, kinaanus, ken panagpasakup.” Iti Isaias kapitulo 53, ni Jesus a mismo ket naimpadtuan a nayasping iti maysa a karnero. Anian a mayanatup nga iyaspingna dagiti pasurotna iti isu met laeng nga animal! Ngem ania a partikular a kababalin ti karnero ti adda iti panunot ni Jesus?

“Dagiti karnerok imdenganda ti timekko, ket am-ammok ida, ket surotendak,” kinuna ni Jesus. (Juan 10:27) Iti kasta intampokna ti kinaamo dagiti adalanna ken ti kinagagarda a sumurot kenkuana. Dagiti literal a karnero agimdengda iti pastorda ken sitatallugodda a sumurot kenkuana. Adda met nadekket a relasion ti pastor iti arban.

Ti arban mabalin a mawarawara iti tay-ak no agar-arabda, ngem tunggal karnero agtalinaed a makitipon iti grupo kas pakabuklan. Gapuna, no mabutbuteng wenno maamak dagiti animal, “dagus a makapaguummongda a sangsangkamaysa,” kuna ti isu met laeng a libro nga Alles für das Schaf (Amin a Banag Agpaay Kadagiti Karnero). No agtataray dagiti karnero tapno umadayo iti peggad, aramidenda dayta kas maysa nga arban, a pasaray agsardengda tapno sukimatenda manen ti kasasaad. “Ti natukantukad nga iyaadayo isut’ tumulong tapno makasurot dagiti kordero ken dagiti nakapkapuy nga animal. Ti umariwekwek mangipaay pay ketdi kadakuada iti naisangsangayan a proteksion.” Aniat’ maadaltayo iti daytoy a panagtignay?

Dagiti pudno a Kristiano ita saanda a nawarawara iti tengnga dagiti denominasion ken sekta ti Kakristianuan. Imbes ketdi, naummongda iti maymaysa nga arban. Tunggal Kristiano makarikna iti personal a relasion iti daytoy nga arban ti Dios, ket mangyeg daytoy iti panagkaykaysa ti organisasion dagiti Saksi ni Jehova. No dumteng ti krisis​—nakaro man a sakit, gubat, wenno natural a didigra​—sadinot’ pangbirokan ti tunggal managdaydayaw iti panangiwanwan ken proteksion? Iti organisasion ni Jehova, a mangipapaay iti naespirituan a kinatalged.

Kasano a maipapaay ti balakad ti Biblia? Babaen kadagiti publikasion kas ti Pagwanawanan ken ti kaasmangna, nga Agriingkayo! Dagitoy a magasin ken dagiti Nakristianuan a gimong mangipaayda pay iti naisangsangayan a tulong kadagidiay agkasapulan iti kanayonan a pannakaaywan, kas kadagiti kordero ken nakapkapuy a karnero iti arban. Kas pagarigan, maipaay ti atension kadagiti agsolsolo a nagannak ken kadagidiay malmalday. Anian a nainsiriban, no kasta, a basaen ti tunggal magasin, tumabuno iti tunggal gimong iti kongregasion, ken iyaplikar dagiti maad-adaltayo! Iti kasta maipakitatayo ti kinaemma ken natibker a relasion iti arban ti Dios.​—1 Pedro 5:2.

“Naannad a kas Kadagiti Serpiente ket Kaskasdi a Nasingpet a kas Kadagiti Kalapati”

Kuna ti Smith’s Bible Dictionary: “Iti intero a Daya ti serpiente ket maus-usar kas simbolo ti dakes a prinsipio, ti espiritu ti kinasukir.” Iti sabali a dasig, ti “kalapatik” ket maysa a termino ti panangipateg. (Canta ni Salomon 5:2) Aniat’ pampanunoten ni Jesus, no kasta, idi pinaregtana dagiti pasurotna nga agbalin a “naannad a kas kadagiti serpiente ket kaskasdi a nasingpet a kas kadagiti kalapati”?​—Mateo 10:16.

Agbilbilin idi ni Jesus maipanggep iti panangasaba ken panangisuro. Nadumaduma a reaksion ti manamnama dagiti adalanna. Mangipakita ti sumagmamano iti interes, idinto ta pagkedkedan ti dadduma ti naimbag a damag. Dadduma ti mangidadanes pay ketdi kadagitoy a pudno nga adipen ti Dios. (Mateo 10:17-23) Kasanot’ rumbeng a panangsango dagiti adalan iti panangidadanes?

Iti Das Evangelium des Matthäus (Ti Ebanghelio ni Mateo), kuna ni Fritz Rienecker maipanggep iti Mateo 10:16: “Ti kinalaing . . . rumbeng a mabuyogan iti kinatarnaw, kinapudno, ken kinaprangka, di la ket ta adda mapasamak nga aniaman a mangipaay kadagiti kabusor iti nainkalintegan a makagapu tapno agreklamo. Dagiti embahador ni Jesus addada iti nangtetengngaan dagiti naranggas a kabusor, nga awanan konsiderasion ken rumaut kadagiti apostol nga awanan asi ken iti kabassitan a gundaway. Gapuna, kasapulan​—kas iti maysa a serpiente​—nga agbalin a nasiput kadagiti kabusor, ket sukimaten ti situasion buyogen ti nasiglat a panagkita ken panagrikna; nga agtalinaed a kontrolado ti kasasaad nga awan panagkusit wenno panangallilaw, nga agbalin a nadalus ken napudno iti sao ken aramid ket iti kasta mapaneknekanda ti bagida a kas kalapati.”

Aniat’ masursuro dagiti moderno-aldaw nga adipen ti Dios kadagiti sasao ni Jesus a masarakan iti Mateo 10:16? Ita, ti panagtignay dagiti tao iti naimbag a damag ket umasping unay idi umuna a siglo. No maipasango iti pannakaidadanes, kasapulan nga addaan dagiti pudno a Kristiano iti kinasirib ti serpiente agraman ti kinadalus ti kalapati. Pulos a di agkusit dagiti Kristiano wenno di mapagpiaran no di ket nadalusda, napudno, ken mapagtalkan iti panangiwaragawag iti sabsabali ti mensahe ti Pagarian.

Tapno iladawan: Mabalin nga adda makasair a sasao manipud kadagiti katrabahuan, dagiti agtutubo iti eskuelaan, wenno iti pay ketdi kameng ti pamiliayo maipapan iti pammatiyo kas Saksi ni Jehova. Ti dagus a reaksion ket mabalin a mangisawang met iti umasping a makasair a sasao maipapan iti pammatida. Ngem panagbalin kadi a nasingpet dayta? Pulos a saan. No ipakitayo kadagiti manangbabalaw kadakayo a dagiti komentoda awan epektona iti nasayaat a kababalinyo, amangan no agbalbaliwda. Iti kasta agbalinkayo agpadpada a nalaing ken awan pakababalawanna​—‘naannad a kas iti serpiente, ket kaskasdi a nasingpet a kas iti kalapati.’

“Dagiti Dudon Immarngida Kadagiti Kabalio a Naisagana iti Pannakibakal”

Impadamag ti magasin a GEO nga idi 1784, ti South Africa ket rinaut ti “kadakkelan pay laeng a bunggoy [dagiti dudon] a nailanad iti historia.” Ti kalawa ti nasaknapan ti bunggoy ket nakagteng iti lima ribu ket dua gasut a kilometro kuadrado, nga aglima a daras a kas ti kalawa ti Hong Kong. Kuna ti Smith’s Bible Dictionary a dagiti dudon “agaramidda iti nakaap-aprang a panangraut iti mulmula kadagiti pagilian a sarungkaranda.”

Iti inted-Dios a paltiingna kadagiti banag a maaramid iti “aldaw ti Apo,” inaramat ni Jesus ti sirmata ti maysa a bunggoy dagiti dudon. Kinunana maipanggep kadakuada: “Dagiti dudon immarngida kadagiti kabalio a naisagana iti pannakibakal.” (Apocalipsis 1:1, 10; 9:3-7) Aniat’ kaipapanan daytoy a panangiladawan?

Nabayagen a natarusan dagiti Saksi ni Jehova a dagiti dudon iti Apocalipsis kapitulo 9 iladawanda dagiti napulotan nga adipen ti Dios ditoy daga iti daytoy a siglo.a Nadutokan dagitoy a Kristiano iti maysa a partikular a trabaho​—ti panangikasaba iti mensahe ti Pagarian iti intero a daga ken panangaramid kadagiti adalan. (Mateo 24:14; 28:19, 20) Ditoy kasapulan a mapagballigianda dagiti bangen ken reggetanda ti trabahoda. Ania pay koma ti nasaysayaat a mangiladawan iti daytoy no di dagiti di mapaksiat a dudon?

Nupay nasurok laeng a dua pulgada ti kaatiddogna, gagangayen nga agdaliasat ti dudon iti 100 aginggat’ 200 kilometro kada aldaw. Maiyad-adayo pay ketdi ti dudon ti disierto daytoy aginggat’ 1,000 kilometro. Ilawlawag ti GEO a “dagiti payakna agpayakpak iti 18 a daras kada segundo ken aginggat’ 17 nga oras iti maysa nga aldaw​—banag a di maaramid ti sabsabali nga insekto.” Anian a nagdakkelan a trabaho para iti kasta a nagbassit a parsua!

Kas maysa a grupo, napinget dagiti Saksi ni Jehova iti panangisaknap iti naimbag a damag ti Pagarian. Mangaskasabada itan iti nasurok a 230 a daga. Pagbalballigian dagitoy nga adipen ti Dios ti adu a pakarigatan tapno adda maaramidanda iti panangtungpal iti trabaho. Ania a kita dagiti parikut ti maipaspasango kadakuada? Ti panagilem, panangipawil ti linteg, panagsakit, pannakaupay, ken ibubusor dagiti kabagian isut’ sumagmamano laeng. Ngem awan aniaman a nakapasardeng iti irarang-ayda. Agtultuloyda iti inted-Dios a trabahoda.

Agtultuloykayo a Mangipakita Kadagiti Nakristianuan a Kababalin

Wen, inyasping ni Jesus dagiti pasurotna kadagiti karnero, serpiente, kalapati, ken dudon. Maitutop unay daytoy iti kaaldawantayo. Apay? Gapu ta asidegen ti panungpalan daytoy sistema dagiti bambanag, ket nakarkaro dagiti parikut ngem idi.

Iti panangpampanunot iti mangiladawan a sasao ni Jesus, sisisinged dagiti pudno a Kristiano iti arban ti Dios ken sieemma nga umawatda iti balakad manipud iti organisasion ni Jehova. Agtultuloyda a nasiput ken nasiglat kadagiti kasasaad a manglapped iti Nakristianuan a trabahoda, bayat nga agtalinaedda nga awan pakababalawanna iti amin a banag. Malaksid iti daytoy, agtultuloyda a mangaramid iti pagayatan ti Dios iti sanguanan dagiti lapped. Ket agtultuloyda nga agsursuro kadagiti parsua nga ‘addaan naikasigudan a sirib.’

[Footnote]