Kasano a ni Jesus ken ni Amana ket Maymaysa?

“Siak ken ti Ama maymaysakami,” kinuna ni Jesus. (Juan 10:30) Dayta a teksto ti us-usaren ti dadduma tapno paneknekanda a ni Jesus ken ni Amana ket dua a paset ti nagkatlo a Dios. Kasta kadi ti kayat a sawen ni Jesus iti dayta nga imbagana?

Kitaentayo ti konteksto. Iti bersikulo 25, imbaga ni Jesus a dagiti trabahona ket ar-aramidenna iti nagan ni Amana. Manipud bersikulo 27 agingga iti 29, nasaona ti maipapan kadagiti simboliko a karnero nga inted kenkuana ni Amana. Dagita nga imbaga ni Jesus ket saan koma a matarusan dagiti dumdumngeg kenkuana no isu ken ni Amana ket maymaysada ken isu met la a persona. Imbes ketdi, daytoy ti kayat a sawen ni Jesus, ‘Dakami ken Amak ket nakasingsinged ta awan ti makaagaw kadagiti karnerok, no kasano nga awan ti makaagaw kadakuada ken Amak.’ Umasping unay dayta iti ibaga ti maysa nga anak iti kabusor ni amana, ‘No kabilem ni tatangko, kas man la siak ti kabkabilem.’ Awan ti mangipapan a dayta nga anak ken ni amana ket maymaysa a persona. Ti ketdi mapanunot ti amin ket ti kinasingedda nga agama.

‘Maymaysa’ met ni Jesus ken ti Amana a ni Jehova a Dios iti anag nga agpadpada dagiti panggep, pagalagadan, ken prinsipioda. Saan a kas ken Satanas a Diablo ken iti umuna nga agassawa a da Adan ken Eva, pulos a saan a tinarigagayan ni Jesus ti di agpaituray iti Dios. “Ti Anak saanna a kabalinan nga aramiden ti maysa a banag iti bukodna a nakem, no di laeng ti makitana nga ar-aramiden ti Ama,” inlawlawag ni Jesus. “Ta aniaman a bambanag ti aramiden Daydiay, dagitoy a banag ti aramiden met ti Anak iti umasping a pamay-an.”​—Juan 5:19; 14:10; 17:8.

Ngem daytoy a kasta unay a kinasingedda dina kaipapanan a ti Dios ken ti Anakna a ni Jesus ket awanen ti nagdumaanda. Isuda ket dua a persona. Adda bukod a personalidad ti tunggal maysa kadakuada. Ni Jesus ket adda bukodna a rikna, panunot, kapadasan, ken wayawaya nga agikeddeng. Nupay kasta, pinilina ti agpasakup iti pagayatan ni Amana. Iti Lucas 22:42, kinuna ni Jesus: “Saan koma a ti pagayatak, no di ket ti pagayatam ti maaramid.” Awan koma ti serserbi dagita a sasao no dina kabaelan ti agaramid kadagiti bukodna a pangngeddeng a naiduma ken Amana. No ni Jesus ken ni Amana ket talaga a maymaysa a persona, apay pay la a nagkararag ni Jesus iti Dios ken sipapakumbaba nga inadmitirna a dina ammo dagiti bambanag a ni laeng Amana ti makaammo?​—Mateo 24:36.

Dagiti kameng ti adu a relihion agdaydayawda iti didiosen a nailadawan a makiap-apa ken makirangranget kadagiti mismo a kapamiliada. Kas pagarigan, iti Griego a mitolohia, ni Cronus pinadisina ti amana a ni Uranus. Kalpasanna, inalun-onna dagiti mismo nga annakna. Naiduma unay dayta iti kinasinged a naibasar iti pudno a panaginnayat da Jehova a Dios ken ti Anakna a ni Jesus! Gapu iti dayta a panagkaykaysada, matignaytayo a mangipateg unay kadakuada! Kinapudnona, addaantay iti awan kaaspingna a pribilehio a makikaykaysa kadagitoy dua a kangatuan a Persona iti intero nga uniberso! Maipapan kadagiti pasurotna, inkararag ni Jesus: “Agkiddawak . . . tapno maymaysada koma amin, a kas kenka, Ama, naikaykaysaka kaniak ket naikaykaysaak kenka, tapno isuda met maikaykaysada koma kadata.”​—Juan 17:20, 21.

No kasta, idi kinuna ni Jesus, “Siak ken ti Ama maymaysakami,” tuktukoyenna ti nagsayaat a panagkaykaysa​—ti kasisingedan pay laeng a relasion ti dua a persona, saan ketdi a ti misterioso a Trinidad.