Panangikasaba iti Naimbag a Damag a Buyogen ti Nabileg a Kombiksion
1 Idi rugrugi ti umuna a siglo, binilin ni Jesu-Kristo dagiti pasurotna nga ikasabada ti naimbag a damag ti Pagarian ken ‘agaramidda kadagiti adalan a tattao iti isuamin a nasnasion.’ (Mat. 24:14; 28:19, 20) Serioso ti panangmatmat dagiti Saksi ni Jehova iti bilinna, isu nga idi arinunos ti maika-20 a siglo, dimmakkel ti Nakristianuan nga organisasiontayo a nagbalin a nasurok a 5,900,000 nga adalan iti 234 a pagilian. Anian a naindaklan a dir-i ti panangidayaw iti nailangitan nga Amatayo!
2 Nakastrektayon iti maika-21 a siglo. Sisisikap nga ikagkagumaan ti Kabusortayo a singaen ti kangrunaan a trabahotayo a panangikasaba iti Pagarian ken panagaramid iti adalan. Us-usarenna dagiti pammarigat daytoy a sistema ti bambanag iti panangikagumaanna a mangisiasi iti atensiontayo, mangibus iti tiempotayo, ken mangpakapuy kadatayo babaen iti adu nga awan unay pategna a pakaseknan ken paginteresan. Imbes nga ituloktayo daytoy a sistema a mangidiktar no ania ti napateg iti biag, masiertotayo iti Sao ti Dios no ania ti kapatgan—ti panagaramid iti pagayatan ni Jehova. (Roma 12:2) Kaipapanan dayta ti panangipangag iti Nainkasuratan a patigmaan nga ‘ikasabatayo ti sao iti mainugot a panawen ken iti nariribuk a panawen ken naan-anay nga itungpaltayo ti ministeriotayo.’—2 Tim. 4:2, 5.
3 Patanoren ti Natibker a Kombiksion: Dagiti Kristiano nasken nga ‘agtakderda a naan-anay ken addaan natibker a panagtalek (iti Ingles, “conviction”) iti amin a pagayatan ti Dios.’ (Col. 4:12) Nadepinar ti sao a “kombiksion” kas “nabileg a pannakaguyugoy wenno panamati; pannakakombinsir.” Kas Kristiano, masapul a makombinsirtayo a ti naimpadtuan a sao ti Dios ket sierto ken addatayon iti pagnguduan ti tiempo ti panungpalan. Masapul nga addaantayo iti pammati a kas iti kabileg ti pammati ni apostol Pablo, a nagkuna a ti naimbag a damag ket “kinapudnona, dayta ti pannakabalin ti Dios a pakaisalakanan ti tunggal maysa nga addaan pammati.”—Roma 1:16.
4 Us-usaren ti Diablo dagiti nadangkes a tattao ken dagiti agpampammarang, a nayaw-awan a mismo, tapno impluensiaan ken iyaw-awanda dagiti sabsabali. (2 Tim. 3:13) Yantangay napakdaarantayon maipapan iti daytoy, ikagumaantay a pabilgen ti kombiksiontayo nga adda kadatayo ti kinapudno. Imbes nga ituloktayo dagiti pakaringgoran iti biag a mangpakapuy iti regtatayo, itultuloytayo nga iyun-una dagiti interes ti Pagarian. (Mat. 6:33, 34) Ditay met kayat a mapukaw ti panangmatmattayo iti kinaganat ti panawen, a nalabit ipapantayo nga adayo pay ti panungpalan daytoy a sistema. Nakaas-asidegen. (1 Ped. 4:7) Nupay mabalin nga ipapantayo a ti panangisaknap iti naimbag a damag ket awan unay epektona iti sumagmamano a pagilian no pampanunotentayo ti naaramidanen a panangasaba, masapul nga agtultuloy ti trabaho a panangballaag.—Ezeq. 33:7-9.
5 Dagitoy ti napapateg a saludsod itatta: ‘Serioso aya ti panangmatmatko iti bilin ni Jesus a panagaramid kadagiti adalan? No ikaskasabak ti naimbag a damag, iparparangarangko aya a kombinsidoak unay a ti Pagarian ket agpaypayso? Determinadoak kadi a mangaramid iti inggat’ kabaelak iti daytoy makaispal-biag a ministerio?’ Yantangay ammotayo a nabayagen nga addatayon iti tiempo ti panungpalan, masapul nga ipaayantay ti atension ti bagbagitayo ken ti annongentayo a panangasaba ken panangisuro. No aramidentayo daytoy maisalakantayto nga agpadpada ti bagitayo ken dagidiay dumngeg kadatayo. (1 Tim. 4:16) Kas ministro, kasanotay a mapabileg ti kombiksiontayo?
6 Tuladenyo Dagiti Taga Tesalonica: Iti pananglaglagip ni apostol Pablo iti panagbannog dagiti kakabsat idiay Tesalonica, kinunana kadakuada: “Ti naimbag a damag nga ikaskasabami saan a dimteng kadakayo buyogen ti sasao laeng no di ket kasta met a buyogen ti pannakabalin ken buyogen ti nasantuan nga espiritu ken nabileg a panamati, kas iti pagaammoyo no ania a kita ti tattao ti nagbalinanmi kadakayo maigapu kadakayo; ket nagbalinkayo a tumutulad kadakami ken iti Apo, yantangay inawatyo ti sao iti sidong ti adu a rigat buyogen ti rag-o ti nasantuan nga espiritu.” (1 Tes. 1:5, 6) Wen, kinomendaran ni Pablo ti kongregasion dagiti taga Tesalonica agsipud ta nangaskasabada a buyogen ti regta ken nabileg a panamati (kombiksion) nupay naipasangoda iti adu a rigat. Ania ti nakatulong kadakuada a nangaramid iti kastoy? Kangrunaanna, adda positibo nga epektona kadakuada ti regta ken kombiksion a nakitada ken apostol Pablo ken kadagiti katrabahuanna. Kasano a kasta?
7 Ti mismo a biag ni Pablo ken dagiti agdaldaliasat a kakaduana ti mangipaneknek nga adda kadakuada ti espiritu ti Dios ken namatida a naimpusuan iti inkaskasabada. Sakbay a napan da Pablo ken Silas idiay Tesalonica, sigugubsang ti pannakatratoda idiay Filipos. Nasapsaplit, naibalud, ken naitul-ongda uray saanda pay a nabista. Nupay kasta, saan a kimmapuy ti regtada iti naimbag a damag iti laksid daytoy natuok a kapadasan. Nawayawayaanda gapu iti tulong ti Dios, a nakaigapuan ti pannakakomberte ti agay-aywan iti pagbaludan ken ti sangakabbalayanna, ket naitultuloy dagitoy a kakabsat ti ministerioda.—Ara. 16:19-34.
8 Iti bileg ti espiritu ti Dios, dimteng ni Pablo idiay Tesalonica. Nagtrabaho sadiay tapno adda pagbiagna sa kalpasanna impamaysana ti nangisuro iti kinapudno kadagiti taga Tesalonica. Di nagkedked a nangipakaammo iti naimbag a damag iti kada oportunidad. (1 Tes. 2:9) Ti panangaskasaba ni Pablo a buyogen ti napigsa a kombiksion ket nabileg unay ti epektona kadagiti lokal nga umili a gapu iti dayta inidian ti dadduma kadakuada ti panagdaydayaw iti idolo ket nagbalinda nga ad-adipen ti pudno a Dios, a ni Jehova.— 1 Tes. 1:8-10.
9 Ti panangidadanes dina nalapdan dagiti kabbaro a manamati a mangikasaba iti naimbag a damag. Yantangay natignayda gapu iti kabbaro a pammatida ken naan-anay a kombinsidoda a magun-odda dagiti agnanayon a bendision, natignay dagiti taga Tesalonica a mangiwaragawag iti kinapudno a sigagagar nga inawatda. Aktibo unay daydi a kongregasion nga uray la a nagdindinamag ti pammati ken regtada iti sabsabali pay a paset ti Macedonia ken uray idiay Acaya. Gapuna, iti daydi immuna a panagsurat ni Pablo kadagiti taga Tesalonica, nalatak idin ti nasayaat nga ar-aramidda. (1 Tes. 1:7) Anian a naisangsangayan nga ulidan!
10 Matignay Gapu iti Ayat iti Dios ken Kadagiti Tattao: Kas kadagiti taga Tesalonica, kasanotay a masalimetmetan ti nabileg a personal a kombiksion no ikaskasabatayo itatta ti naimbag a damag? Maipapan kadakuada, nagsurat ni Pablo: “Laglagipenmi a di agressat ti matalek nga aramidyo ken ti panagbannogyo a maigapu iti ayat.” (1 Tes. 1:3, ftn. ti New World Translation of the Holy Scriptures—With References) Nabatad nga addaanda iti nauneg, naimpusuan nga ayat ken Jehova a Dios ken kadagiti tattao a kinaskasabaanda. Daytoy met laeng nga ayat ti nangtignay ken Pablo ken dagiti kakaduana a mangiburay kadagiti taga Tesalonica “saan laeng a ti naimbag a damag ti Dios, no di ket kasta met dagiti bukod[da] a kararua.”—1 Tes. 2:8.
11 Umasping iti dayta, ti nauneg nga ayattayo ken Jehova ken iti padatayo a tao tignayennatayo a makipaset a naan-anay iti trabaho a panangasaba nga ipapaaramid ti Dios kadatayo. Buyogen ti kasta nga ayat, mabigbigtayo a ti panangisaknap iti naimbag a damag ket personal ken inted ti Dios a responsabilidadtayo. Babaen ti panangmennamenna a sipopositibo ken buyogen ti panangapresiar iti amin a naaramidan ni Jehova kadatayo tapno maiturongnatay iti “pudpudno a biag,” matignaytayo a mangipakaammo kadagiti sabsabali ti isu met laeng a nakaskasdaaw a kinapudno a patpatientayo a naimpusuan.—1 Tim. 6:19.
12 Bayat nga okupadotayo iti trabaho a panangasaba, masapul nga agtultuloy a dumakkel ti ayattayo ken Jehova ken kadagiti tattao. No kasta, matignaytayto nga ad-adda pay a makiraman iti panagbalaybalay a ministerio ken makipaset iti amin a sabsabali pay a kita ti panangasaba a silulukat kadatayo. Aprobetsarentayo dagiti oportunidad a mangasaba iti di pormal kadagiti kabagian, kaarruba, ken gagayyem. Nupay di awaten ti kaaduan a tattao ti ituktukontayo a naimbag a damag ken ikagumaan ti dadduma a singaen ti pannakaiwaragawag ti Pagarian, mariknatayo ti napalalo a ragsak. Apay? Agsipud ta ammotayo nga inaramidtayo ti amin a kabaelantayo a mangikasaba iti Pagarian ken tumulong kadagiti tattao a gumun-od iti pannakaisalakan. Ket bendisionanto ni Jehova ti panangikagumaantayo a mangbirok kadagiti nasingpet ti panagpuspusoda a tattao. Uray agtutupatop dagiti pakarigatantayo iti biag ken ikagumaan ni Satanas a pukawen ti rag-otayo, kabaelantayo a taginayonen ti nabileg a kombiksion ken regtatayo a mangasaba kadagiti sabsabali. No aramidentay amin ti pasettayo, mangibunga daytoy kadagiti nabileg, naregta a kongregasion a kas iti daydi kongregasion ti Tesalonica.
13 Di Pulos Sumuko iti Sidong ti Pannakasuot: Kasapulan met ti kombiksion no maipasangotayo iti nadumaduma a pakasuotan. (1 Ped. 1:6, 7) Imbatad ni Jesus kadagiti adalanna a no sumurotda kenkuana, agbalindanto a ‘puntiria ti pananggura dagiti amin a nasnasion.’ (Mat. 24:9) Napasaran daytoy da Pablo ken Silas idi addada idiay Filipos. Kuna ti salaysay iti Aramid kapitulo 16 a naibalud ken naitul-ong da Pablo ken Silas iti makin-uneg a pagbaludan. Kaaduanna, ti kangrunaan a pagbaludan ket kasla iti korte wenno kukuarto a naipalawlaw iti igid a sadiay ti ayan dagiti selda nga addaan iti naranraniag a lawag ken naparpariir. Ngem ti makin-uneg a pagbaludan ket nasipnget ken saan a nasayaat ti bentilasionna. Inibturan da Pablo ken Silas ti kinasipnget, pudot, ken bangsit daytoy makatuok a pagbaludan. Mailadawanyo kadi ti ut-ot a nariknada bayat a nakatul-ongda iti adu nga oras a nalatlatan ken agdardara dagiti bukotda gapu iti pannakasapsaplit?
14 Iti laksid dagitoy a pakasuotan, nagtalinaed a matalek da Pablo ken Silas. Imparangarangda ti naimpusuan a kombiksion, a dayta ti nangpabileg kadakuada nga agserbi ken Jehova iti laksid ti aniaman a suot. Ti kombiksionda ket agminar iti bersikulo 25 ti kapitulo 16, a sadiay kunana a “nagkarkararag da Pablo ken Silas ket indaydayawda ti Dios babaen iti kanta.” Kinapudnona, nupay addada iti makin-uneg a pagbaludan, masiguradoda unay a nagun-odda ti anamong ti Dios, a gapu iti dayta, nagkankantada iti napigsa nga uray la a nangngeg dagiti sabsabali pay a balud! Masapul nga addaantayo iti kasta a kombiksion itatta no maipasangotayo kadagiti pakasuotan ti pammatitayo.
15 Nakaad-adu ti pakasuotan nga ipaspasango kadatayo ti Diablo. Kadagiti dadduma, mabalin a panangidadanes ti pamilia. Adu kadagiti kakabsattayo ti maisaksaklang iti korte. Mabalin a maipasangotayo iti ibubusor dagiti apostata. Adda dagiti pinansial a pakarigatan ken pakaseknan no kasano ti agbirok iti pagbiag. Sanguen dagiti agtutubo ti panangdurog dagiti kaeskuelaanda. Kasanotayo a mapagballigian dagitoy a pakasuotan? Ania ti kasapulan tapno maiparangarangtay ti kombiksiontayo?
16 Umuna ken kangrunaan iti amin, nasken a taginayonentayo ti nasinged a personal a relasion ken Jehova. Idi naipisok da Pablo ken Silas iti makin-uneg a pagbaludan, dida nagrekreklamo iti dayta a tiempo gapu iti kasasaadda wenno dida inay-ay ti bagbagida. Dagus a nagkararagda iti Dios ket indaydayawda babaen iti kanta. Apay? Gapu ta addaanda iti nasinged a personal a relasion iti nailangitan nga Amada. Ammoda nga agsagsagabada gapu iti kinalinteg ken ammoda a ti pannakaisalakanda ket agpannuray ken Jehova.—Sal. 3:8.
17 No maipasangotayo kadagiti pakasuotan itatta, masapul met nga agpannuraytayo ken Jehova. Kas Kristiano, paregtaennatayo ni Pablo nga ‘ipakaammotayo koma dagiti dawdawattayo iti Dios; ket ti talna ti Dios a mangringbaw iti amin a panunot aywanannanto dagiti pusotayo ken dagiti pannakabalin ti isiptayo.’ (Fil. 4:6, 7) Anian a makaliwliwa a maammuan a tulongannatayo ni Jehova no aglak-amtay kadagiti pakasuotan! (Isa. 41:10) Kanayon nga adda kadatayo no la ketdi ta agserbitay kenkuana a buyogen ti pudno a panagtalek.—Sal. 46:7.
18 Ti sabali pay a napateg a tulong iti panangiparangarang iti kombiksion ket panagtalinaed nga okupado iti panagserbi ken Jehova. (1 Cor. 15:58) Naibalud da Pablo ken Silas gapu ta okupadoda a mangikaskasaba iti naimbag a damag. Insardengda kadi ti mangasaba gapu kadagiti suot a napasaranda? Saan, intultuloyda ti nangaskasaba uray nakabaludda, sa kalpasan a nawayawayaanda, nagturongda idiay Tesalonica ket napanda iti sinagoga dagiti Judio tapno ‘makirinnason[da] kadakuada manipud iti Kasuratan.’ (Ara. 17:1-3) No nabileg ti pannakaguyugoy wenno pammatitayo ken Jehova ken kombinsidotayo nga adda kadatayo ti kinapudno, awanto ti ‘makabael a mangisina [kadatayo] manipud iti ayat ti Dios nga adda ken Kristo Jesus nga Apotayo.’—Roma 8:35-39.
19 Dagiti Moderno a Pagulidanan iti Nabileg a Kombiksion: Kas kada Pablo ken Silas, adu ti nasayaat a pagulidanan iti kaaldawantayo a nangiparangarang iti nabileg a kombiksion. Nagkomento ti maysa a sister a nakalasat iti kampo konsentrasion ti Auschwitz maipapan iti di maisin a pammati ken kombiksion nga impakita dagiti kakabsat sadiay. Kunana: “Iti naminsan, kabayatan ti panagpalutpotda, inasitgannak ti maysa nga opisial a kasla kayatna ti dumanog. ‘Aniat’ aramidenmi kadakayo a tattao?’ inriawna. ‘No arestarendakayo, kasla awan aniamanna. No ibaluddakayo, dikay pulos agproblema. No ipisokdakayo iti kampo konsentrasion, awan dandanagyo. No sentensiaandakayo iti ipapatay, nakatakderkay latta a kasla awan aniamanna. Aniat’ aramidenmi kadakayo?’” Anian a makapabileg iti pammati ti pannakakita iti pammati dagiti kakabsattayo iti sidong ti kakasta a nakas-ang a kasasaad! Naynay a nagpannurayda iti tulong ni Jehova tapno makapagibturda.
20 Sigurado a silalagiptay iti kombiksion ti adu kadagiti kakabsattayo a naipasango iti guranggura gapu iti puli a napasamak iti kallabes a tawtawen. Nupay naipasangoda kadagiti napeggad a kasasaad, impamuspusan dagiti responsable a kakabsat a siguraduen a mapakan iti naespirituan dagiti kakabsatda. Nagtalinaedda amin a matalek a buyogen ti nabileg a kombiksion nga ‘awan ti igam a naaramid a maibusor kadakuada a rumang-ayto.’—Isa. 54:17.
21 Adu kadagiti kakabsattayo a di manamati ti assawada ti mangiparparangarang met iti nabileg a pammati ken panagibtur. Adda maysa a kabsat a lalaki idiay Guadeloupe a napalalo ti panangbusor kenkuana ti di manamati nga asawana. Tapno maupay ken saan a makatabuno kadagiti Nakristianuan a gimong, saanna nga ilutuan wenno ilabaan, saan nga agplansa, ken dina as-asikasuen dagiti kawesna. Mabayag a dina kasarsarita. Ngem babaen ti panangiparangarang daytoy a kabsat iti naimpusuan a kombiksion nga agserbi ken Jehova ken panangikarkararagna iti tulongna, naibturanna amin dayta. Kasano kabayag? Agarup 20 a tawen—a kalpasan dayta in-inut a nagbalbaliw ni baketna. Nagangayanna, pudno a makapagrag-o agsipud ta inawat ni baketna ti namnama nga iyeg ti Pagarian ti Dios.
22 Kamaudiananna, ditay koma liplipatan ti nabileg a kombiksion dagiti agtutubotayo nga ageskuela iti kada aldaw ken maipasango iti panangdurog dagiti kapatadanda ken dadduma pay a karit. Maipapan iti panangpilit a makikompromiso idiay eskuelaan, kinuna ti maysa a balasitang a Saksi: “No addaka idiay eskuelaan, isuda amin kanayon a paregtaendaka nga agbalin a medio nasukir. Ad-adda a raemendaka dagiti ubbing no medio nasukirka.” Ania ketdin a panangdurog kadagiti agtutubotayo! Masapul a determinado ti panunot ken pusoda a mangsarked iti sulisog.
23 Adu dagiti agtutubotayo a nagballigi a nangsalimetmet iti kinatarnawda iti laksid dagiti pakasuotan. Maysa kadagita ti agtutubo a sister nga agnanaed idiay Francia. Maysa nga aldaw kalpasan ti pannangan, addada babbarito a nangpilit kenkuana a mangbisito kadakuada, ngem nagkararag ken napinget ti panagkedkedna, isu a pinanawan dagiti babbarito. Kalpasanna, nagsubli ti maysa kadakuada ket imbagana a raemenna ti tured ti sister. Naipaayanna iti nasayaat a pammaneknek maipapan iti Pagarian, nga inlawlawagna dagiti nangato nga estandarte nga impaay ni Jehova kadagiti amin a mayat a manggun-od kadagiti bendision nga iyegna. Iti dayta a tawen a panageskuela, nailawlawagna met iti intero a klase ti maipapan kadagiti patpatienna.
24 Anian a nagpateg a pribilehiotayo ti maibilang kadagiti pagragsakan nga usaren ni Jehova nga agsao a buyogen ti natibker a kombiksion maipapan iti pagayatanna! (Col. 4:12) Kasta met, addaantayo iti nakaskasdaaw a gundaway a mangipaneknek iti kinatarnawtayo no rautennatayo ti kasla leon a Kabusortayo, a ni Satanas a Diablo. (1 Ped. 5:8, 9) Ditay pulos liplipatan nga us-usaren ni Jehova ti mensahe ti Pagarian a mangisalakan nga agpadpada kadatayo a mangikaskasaba iti dayta ken kadagidiay dumngeg. Sapay koma ta dagiti pangngeddengtayo ken ti inaldaw a panagbiagtayo ipaneknekda nga iyun-unatayo ti Pagarian. Itultuloytayo koma nga ikasaba ti naimbag a damag a buyogen ti nabileg a kombiksion!