Leksion Manipud iti Kasuratan: Joel 1:1–3:21

Umawag iti Nagan ni Jehova ket Maisalakan!

“NO SAAN a matengngel ti saplit, dayta agsaknapto agingga iti Makindaya nga Africa ken ti Asideg a Daya. Dayta mabalin nga agbalin a didigra.” Kasta ti kinuna ti maysa nga opisial iti UN Food and Agriculture Organization maipapan ti binilion a narawet nga insekto nga agdama a mangraraut iti makin-amianan nga Africa​—ti dudon.

Idi tawen 820 K.K.P., ti mammadto ti Dios a ni Joel sinaritana ti umasping a saplit. Kadagiti nalawag a termino a di maartapan ti kinaumisona ken kinapudnona, dineskribirna no kasano a ti Juda ket madadael babaen iti panangsaplit ti insekto. Nupay kasta, dayta a saplit ket maysa a panangiladawan iti napatpateg pay nga ekolohikal a pagpeggadan. Dayta ti mangipakaammo nga umun-una “ti aldaw ni Jehova”! Ti kaputotantayo sangsanguenna ti “nakaam-amak nga aldaw” a kasta unay ti panangdadaelna. Ania ti adda a namnama ti pannakaisalakan? Ket ania dagiti masursurotayo a leksion manipud iti naimpadtuan a libro ni Joel?

Ti Nakaam-amak a Panangraut ti Insekto

Kasapulan ti panagbabawi a maipaay iti pannakaisalakan bayat ti nakaam-amak nga aldaw ni Jehova. Babaen kadagiti mata ni Joel, makitatayo ti maysa a didigra bayat ti naan-anay a pannakadadael dagiti mulmula babaen iti pangen dagiti caterpillar, dudon, ken dagiti agkarayam a di nagpayak a dudon ken dagiti ipes. Dagiti papadi, papanglakayen, ken dagiti dadduma nga umili iti Juda mamaregtada iti panagbabawi “ket umkisda ken Jehova a maipaay iti tulong.” Nalangalang dagiti kamalig, ket marakrak dagiti kamarin ta awanen ti nagyanda nga apit. Agalla-alla dagiti dinguen, nga agsapsapul iti pagaraban. Anian nga aldaw ti panangdadael Daydiay Mannakabalin-amin!​—1:1-20.

Ti kaasideg ti aldaw ni Jehova ti mangtignay koma kadatayo a mangaramid kadagiti ar-aramid iti kinasanto. (2 Pedro 3:10-12) Impakita ni Joel kadatayo a dayta ket maysa nga aldaw iti kinasipnget, ul-ulep, ken napuskol a kinasipnget. Dagiti dudon ket maysa a nakaam-amak a mangipakaammo iti mapasamak iti dayta nga aldaw. Iti tiempo ti kaaduda, ti kasla Eden a daga ti Juda agbalin a langalang a let-ang. Nalawag, met, ti timek dagiti dudon, ta dayta ket kas maysa a karwahe ken ti daranudor ti apuy a manguram iti garami. Bayat ti iyaadani dagiti dudon “kas maysa a nabileg nga umili, a makidangadang,” umulida kadagiti pader, sumrekda iti siudad, ket sumrekda kadagiti balbalay. Uray pay ti init, ti bulan, ken dagiti bitbituen sumipngetda bayat ti ‘nakaam-amak nga aldaw ni Jehova.’​—2:1-11.

Ti Dalan iti Pannakaisalakan

Maipaay iti pannakaisalakan, masapul a bigbigentayo a ni ‘Jehova ket Dios ket awanen ti sabali.’ “Agsublikayo kaniak iti isuamin a pusoyo,” imbalakad ni Jehova. Maparegta dagiti nataengan ken dagiti agtutubo nga aguurnong ket dumawat iti nadiosan nga anamong. Ti Dios mangipakita ti asi, mangipaay iti supapak gapu iti panangdadael ti insekto, ket bendisionanna ti ilina iti kinawadwad. Dagidiay a mangbigbig iti saad ni Jehova kas ti kakaisuna a pudno a Dios ken ti Gubuayan iti pannakaisalakan saandanto a mabainan.​—2:12-27.

Ti pannakaisalakantayo agpannuray met iti panangawag iti nagan ni Jehova a buyogen iti pammati. Sakbay “ti nakaam-amak nga aldaw ni Jehova,” ti Dios ‘ibukbuknanto ti espirituna kadagiti amin a kita ti lasag.” Dagiti agtutubo ken nataengan, lalaki ken babai, agipadtodanto. Gapuna, adunto ti makaammo a ‘tunggal maysa nga umawag iti nagan ni Jehova maisalakanto.’​—2:28-32.

Panangukom kadagiti Nasnasion

Isalakan ni Jehova ti matalek nga ilina no ukomenna dagiti nasnasion. (Idiligyo ti Ezequiel 38:18-23; Apocalipsis 16:14-16.) Ti Tiro, Sidon, ken Filistia supapakandanto ti dakes a panangtratoda iti ili ti Dios ken ti panangilakoda kadakuada iti pannakaadipen. Isublinto ni Jehova dagiti kautibo iti Juda ken Jerusalem, ket karitenna dagiti kabusorna, a kunkunana: “Santipikarenyo ti gubat!” Ngem dagitoy awan ti pakaipadpadanda iti Dios, a mangukom kadakuada iti simboliko “a lobong ni Josafat.” Nupay agkintayeg ti langit ken daga, ni Jehova isunto ti pagkamangan kadagiti ilina. Dagiti matalek makalasatdanto iti panangukom kadagiti nasnasion ket tagiragsakendanto ti biag iti sidong ti naparaisuan a kasasaad.​—3:1-21.

Dagiti Leksion a Laglagipen: Kasapulan ti nasakbay a panagbabawi no ti maysa a tao ket maisalakan iti nakaam-amak nga aldaw ni Jehova. Ti kinaasideg dayta nga aldaw ti mangtignay koma kadatayo a mangaramid kadagiti nasantuan ken nadiosan nga ar-aramid. Siempre, ti pannakaisalakantayo agpannuray iti panangbigbigtayo a ni laeng Jehova ti Dios. Ket no umawagtayo iti naganna iti pammati, isalakannatayo inton ukomenna dagiti nasnasion.

Mangipaay ti padto ni Joel kadatayo ti ad-adu pay a pagpanunotan. Ta, “ti dakkel ken nakaam-amak nga aldaw ni Jehova” ket asidegen! Masapul a mapakdaaran ti sangatauan. Kas kadagiti dudon iti padto ni Joel, dagiti Saksi ni Jehova dadaelenda iti Kakristianuan babaen ti awan sardayna a panangibutaktakda iti naespirituan a kinalupesna. Daytoy ti mangtignay iti panagpungtot ken ti panangbusor dagiti papangulona, ngem aniaman a kasla pader a lapped nga ipasdekda iti dalan dagiti simboliko a dudon ket saan nga epektibo. Imbukbuk ni Jehova ti espirituna iti ilina, a kinabalanna ida a mangiwaragawag iti panangukomna. Ngarud, iti ababa a tiempo a natda sakbay ti nakaam-amak nga aldaw, maaddaantay koma ti naan-anay a pannakipaset iti panangtulong kadagiti dadduma nga ‘umawag iti nagan ni Jehova ket maisalakan.’

[Kahon iti panid 30]

DAGITI TEKSTO TI BIBLIA A NAUSIG

o 1:2​—Kinablaawan ni Joel dagiti “panglakayen” a nangisiasi iti nasion. Agsipud ta “dagiti umili iti daga” sinurotda ti ulbod a panangiturong, agsungbatda met iti imatang ni Jehova. Itatta, dagiti relihiuso a papangulo iti Kakristianuan isiasida met dagiti arbanda. Kas ken ni Joel, dagiti Saksi ni Jehova inturongda dagiti mensaheda iti dayta a klase klero. Kaskasdi, ti kaaduan kadagiti tattao ket masapul a mapakaammuan iti Sao ti Dios ta agsungbatdanto met ken Jehova​—Isaias 9:15-17; Roma 14:12.

o 2:1-10, 28​—Napakdaaran dagiti Israelitas a no salungasingenda ti Dios, dagiti dudon ken dagiti dadduma a parparsua ti mangibusto kadagiti apitda. (Deuteronomio 28:38-45) Yantangay ti Kasuratan dina irekord ti panangraut dagiti insekto iti Canaan iti kas iti kaadu a dinakamat ni Joel, ti saplit a nadeskribir ket maysa laeng a mangiladawan. Nalawag, ti padto nangrugi a natungpal idi Pentecostes 33 K.P., idi rinugian ni Jehova nga ‘imbukbok ti espirituna’ kadagiti paspasurot ni Jesus, isu a nangtutuok kadagiti ulbod a relihiunista babaen iti inted-Dios a mensaheda. (Aramid 2:1, 14-21; 5:27-29) Dagiti Saksi ni Jehova itan ibambanagda ti umasping a makalangalang a trabaho.

o 2:12, 13​—Iti kadaanan a tiempo, ti panangray-ab iti pagan-anay ket maysa a pammarang nga ebkas iti panagladingit. (Genesis 37:29, 30; 44:13) Ngem mabalin a maaramid daytoy nga awan iti kinapasnek, iti panaginsisingpet. Pinagbalin ni Joel a nalawag a ti pammarang nga ebkas iti panagladingit ket saan nga umdas. Masapul a ‘ray-aben dagiti tattao ti pusoda’ babaen ti naimpusuan a panagbabawi.

o 2:31, 32​—Nangipaay ni Jehova ti pannakaisalakan dagiti matalek manipud iti pannakadadael idi tiempo ni Joel. Itatta, kadagitoy “maudi nga al-aldaw,” pagbalbalinen ti Dios a posible ti pannakaisalakan babaen ken Jesu-Kristo. (2 Timoteo 3:1; Roma 5:8, 12; 6:23) Nupay kasta, masapul nga umawag dagiti managbasol a tattao iti nagan ni Jehova a maipaay iti agnanayon a pannakaisalakan. Kaipapanan daytoy ti panangammoda iti nadiosan a nagan, a raemenda dayta, ket agpannurayda a naan-anay iti Daydiay mangik-ikut iti dayta. Gapuna dagidiay umawag iti nagan ni Jehova a buyogen iti pammati “maisalakanda” inton ibanag ti Dios ti panangukomna kadagiti nasnasion bayat ti “dakkel ken nakaam-amak nga aldawna.”​—Sofonias 2:2, 3; 3:12; Roma 10:11-13.

o 3:2, 14​—Ti simboliko a lugar a pangibanagan ti nadiosan a panangukom “iti aldaw ni Jehova” ket maawagan “ti lobong iti pangngeddeng.” Dayta met ti makuna a “ti lobong ni Josafat.” Maitutop daytoy, yantangay ti nagan a Josafat kaipapananna “Ni Jehova ti Ukom.” Bayat ti panagari ni Ari Josafat, insalakan ti Dios ti Juda ken Jerusalem manipud kadagiti puersa ti Moab, Ammon, ken kadagiti kabambantayan iti Seir, a riniribukna ida ket nagpipinnatayda ti maysa ken maysa. (2 Cronicas 20:1-30) Iti kaaldawantayo, “ti lobong ni Josafat” agserbi a kas ti simboliko a pagpespesan ti ubas isu a pakapespesan dagiti nasnasion a kas kadagiti ubas gapu iti dakes a panangtratoda iti ili ni Jehova.

o 3:6​—Ti Tiro, Sidon, Filistia nakabasolda iti panangilakoda kadagiti tattao iti Juda ken Jerusalem iti pannakadipen kadagiti Griego. Mabalin, dadduma a kadagiti Judio a kinayawan dagiti dadduma a nasnasion ti naipan kadagiti taga Tiro, taga Sidon, ken Filistia a negosiante iti adipen. Ket dakdakes pay, mabalin a dagitoy a nasnasion inadipenda dagiti Judio a nagkamang manipud kadagiti kabusorda. Aniaman ti kasasaad, pagbayaden ti Dios dagidiay a managlako iti natauan a biag gapu iti dakes a panangtratoda iti ilina. Daytoy ti mangipamatmat iti agur-uray kadagiti nasnasion a mangidaddadanes kadagiti ad-adipen ni Jehova itatta.

[Picture Credit Line iti panid 31]

Pictorial Archive (Near Eastern History) Est.