Makiramankayo iti Rag-o iti Panangted!
“Ad-adu ti kinaragsak iti panangted ngem iti panangawat.”—ARAMID 20:35.
1. Kasano nga indemostra ni Jehova ti rag-o iti panangted?
NAPAPATEG a sagut a naggapu iti Dios ti rag-o iti panangammo iti kinapudno ken dagiti ibungana a bendision. Adu ti rason nga agrag-o dagidiay nakaam-ammo ken Jehova. Ngem nupay adda rag-o iti panangawat iti sagut, adda met rag-o iti panangted. Ni Jehova ti Manangted iti “tunggal naimbag a sagut ken tunggal naan-anay a rangkap,” ken isu “ti naragsak a Dios.” (Santiago 1:17; 1 Timoteo 1:11) Iburayna ti makapasalun-at a sursuro kadagiti amin nga umimdeng ken maragsakan iti panagtulnog dagidiay isursurona, no kasano nga agrag-o dagiti nagannak no ipangag dagiti annakda ti naayat nga instruksion.—Proverbio 27:11.
2. (a) Ania ti kinuna ni Jesus maipapan iti panangted? (b) Ania a kinaragsak ti magun-odtayo no isurotayo kadagiti sabali ti kinapudno nga adda iti Biblia?
2 Kasta met, idi adda ditoy daga naragsakan ni Jesus a nakakita kadagiti tattao a nangipangag iti sursurona. Inadaw ni apostol Pablo ni Jesus a nangikuna iti kastoy: “Ad-adu ti kinaragsak iti panangted ngem iti panangawat.” (Aramid 20:35) Ti kinaragsak a magun-odtayo no isurotay kadagiti sabali ti kinapudno iti Biblia ket saan laeng a pannakapnek nga adda umanamong kadagiti narelihiosuan a patpatientayo. Ad-adda pay ngem iti dayta, naragsaktayo agsipud ta ammotayo a mangipapaaytayo iti banag a pudpudno ken manayon ti pategna. Babaen ti naespirituan a panangted, matulongantay dagiti tattao a magunggonaan agpadpada itan ken iti agnanayon.—1 Timoteo 4:8.
Mangyeg Rag-o ti Panangted
3. (a) Kasano nga inyebkas da apostol Pablo ken Juan ti rag-oda iti panangtulong kadagiti sabsabali iti naespirituan? (b) Apay a ti panangiburay iti kinapudno iti Biblia kadagiti annaktayo ket ebkas ti ayat?
3 Wen, no kasano a nagrag-oan ni Jehova ken ni Jesus ti panangiburay kadagiti naespirituan a sagut, kasta met dagiti Kristiano. Nakasarak ni apostol Pablo iti rag-o iti pannakaammona a natulonganna dagiti sabsabali a mangammo iti kinapudno a linaon ti Sao ti Dios. Insuratna iti kongregasion iti Tesalonica: “Ania ti namnamami wenno rag-o wenno korona ti panagrag-omi—ay ket, saan aya a dakayo iti kinapudnona?—iti sanguanan ni Apotayo a Jesus iti kaaddana? Pudno unay a dakayo ti dayag ken rag-omi.” (1 Tesalonica 2:19, 20) Umasping iti dayta, idi dinakamatna dagiti naespirituan nga annakna, insurat ni apostol Juan: “Awanen ti adda kaniak a dakdakkel pay a pakaigapuan ti kinamanagyaman ngem kadagitoy a banag, a mangngegko koma a ti annakko agtultuloyda a magna iti kinapudno.” (3 Juan 4) Panunotenyo met ti rag-o iti panangtulong kadagiti annaktayo nga agbalin a naespirituan nga annaktayo! Ti panangpadakkel kadagiti annak “iti disiplina ken panangiturong-panunot ni Jehova” ket ebkas ti ayat dagiti nagannak. (Efeso 6:4) Iti kasta, ipakpakita dagiti nagannak a maseknanda iti agnanayon a pagimbagan dagiti annakda. No mangipangag dagitoy, dakkel a rag-o ken pannakapnek ti mapasaran dagiti nagannak.
4. Ania a kapadasan ti mangidemostra iti rag-o nga itden ti naespirituan a panangted?
4 Ni Dell ket maysa nga amin-tiempo a payunir ken lima ti annakna. Kunana: “Matarusak a naimbag ti sasao ni apostol Juan ta agyamanak unay a ti uppat nga annakko ‘magmagnada iti kinapudno.’ Ammok a pakaitan-okan ken pakaidayawan ni Jehova no agkaykaysa dagiti pamilia iti pudno a panagdayaw, isu a mariknak ti nauneg a pannakapnek ta makitkitak a bembendisionanna ti panagreggetko a mangitukit iti kinapudno kadagiti annakko. Ti nagimnas a gundaway a panagbiag nga agnanayon idiay Paraiso a kaduak ti pamiliak punnuennak iti namnama ken tignayennak nga agibtur iti laksid dagiti pakarigatan ken tuben.” Makapaladingit, nailaksid ti maysa kadagiti babbalasang ni Dell manipud iti kongregasion gapu iti di Nakristianuan nga aramid. Kaskasdi, ikagkagumaanan ni Dell a taginayonen ti positibo a kababalin. “Manginanamaak a ti balasangko ket sipapakumbaba ken sipapasnek nga agsublinto met laeng ken Jehova,” kinunana. “Ngem agyamanak iti Dios ta agtultuloy a simamatalek nga agserserbi kenkuana ti kaaduan kadagiti annakko. Ti rag-o a mariknak ket pudpudno a gubuayan ti bilegko.”—Nehemias 8:10.
Pananggun-od Kadagiti Agnanayon a Gagayyem
5. Bayat nga umagawatayo iti trabaho a panangaramid kadagiti adalan, ania a pannakaammo ti mangted kadatayo iti pannakapnek?
5 Binilin ni Jesus dagiti pasurotna a mangaramidda kadagiti Kristiano nga adalan ket isuroda ida maipapan ken ni Jehova ken kadagiti bilbilinna. (Mateo 28:19, 20) Agpada a madadaan ni Jehova ken ni Jesus a tumulong kadagiti tattao a mangammo iti kinapudno. Gapuna, no umagawatayo iti trabaho a panangaramid kadagiti adalan, pagrag-oennatay dayta ta ammotayo a tultuladentayo ti ulidan ni Jehova ken ni Jesus, a kas met laeng kadagidi nagkauna a Kristiano. (1 Corinto 11:1) No ngarud makitinnulongtayo iti Mannakabalin-amin a Dios ken iti dungdungnguenna nga Anak, maaddaan ti biagtayo iti pudpudno a kaipapanan. Anian a bendision ti pannakaibilang kas ‘katrabahuan ti Dios’! (1 Corinto 3:9) Ket saan kadi a makaparagsak ta makipaspaset met dagiti anghel iti daytoy a trabaho a panangikasaba iti naimbag a damag?—Apocalipsis 14:6, 7.
6. No makiramantayo iti naespirituan a panangted, asino dagiti agbalin a gagayyemtayo?
6 Kinapudnona, babaen ti pannakiraman iti daytoy trabaho a naespirituan a panangted, agbalintay nga ad-adda pay ngem basta katrabahuan ti Dios—mabalintay ti makigayyem kenkuana iti agnanayon. Gapu iti pammatina, naawagan ni Abraham a gayyem ni Jehova. (Santiago 2:23) Bayat nga ikagumaantay nga aramiden ti pagayatan ti Dios, mabalintay met ti makigayyem iti Dios. No kasta ti aramidentayo, agbalintayo met a gagayyem ni Jesus. Kinunana kadagiti adalanna: “Inawagankay iti gagayyem, agsipud ta amin a bambanag a nangngegko iti Amak impakaammok kadakayo.” (Juan 15:15) Adu a tattao ti maragsakan no maibilangda a gagayyem dagiti naimpluensia a tattao wenno nangangato nga opisial, ngem mabalintay ti maibilang a gagayyem dagiti dua a katan-okan a persona iti intero nga uniberso!
7. (a) Kasano a naaddaan ti maysa a babai iti pudpudno a gayyem? (b) Addaankay met kadi iti umasping a kapadasan?
7 Kanayonanna, no tulongantay dagiti tattao a mangammo iti Dios, agbalinda met a gagayyemtayo, ket mangyeg dayta iti naisangsangayan a kinaragsak. Ni Joan, nga agnanaed idiay Estados Unidos, inyadalanna iti Biblia ti maysa a babai nga agnagan Thelma. Nupay ni Thelma ket binusor ti pamiliana gapu iti panagadalna, nagan-anus ket nabautisaran kalpasan ti makatawen. Insurat ni Joan: “Saan a nagpatingga dita ti panagkaduami; imbes ketdi, nagbalinkami nga aggayyem iti nasurok a 35 a tawen itan. Masansan nga agkaduakami a mapan mangasaba ken makikombension. Idi agangay, immakarak iti baro a pagtaengak a 800 kilometro ti kaadayona. Ngem intultuloy ni Thelma ti nangipatulod kadagiti naayat ken makaliwliwa a surat, a sangkaibagana a maragsakan a mangpampanunot kaniak ken agyamyaman ta nagbalinak a gayyem ken pagulidananna ken gapu ta insurok kenkuana dagiti kinapudno nga adda iti Biblia. Ti kaadda ti kasta a nasinged ken maipatpateg a gayyem ket nakaay-ayat a gunggona iti panagreggetko a timmulong kenkuana a mangammo iti maipapan ken Jehova.”
8. Ania a positibo a kababalin ti makatulong kadatayo iti ministerio?
8 Ti inanama a makasapul iti maysa a tao a mayat a mangammo iti kinapudno tulongannatay nga agibtur uray no adu kadagiti tattao a masarakantayo ti saan unay wenno saan a pulos nga interesado iti Sao ni Jehova. Ti kasta a kinaaleng-aleng ket mabalin a karit iti pammati ken panagibturtayo. Ngem makatulong kadatayo ti positibo a kababalin. Kinuna ni Fausto, a taga Guatemala: “No mangasabaak kadagiti sabsabali, panunotek nga anian a nakaay-ayat no agbalin a naespirituan a kabsat ti tao a kasarsaritak. Kunkunak nga addanto latta masabetko a mangawat iti kinapudno iti Sao ti Dios. Ti kasta a kapanunotan ti manggutugot kaniak nga agtultuloy ken mangyeg kaniak iti pudpudno a rag-o.”
Panagurnong Kadagiti Gameng Sadi Langit
9. Ania ti kinuna ni Jesus maipapan kadagiti gameng sadi langit, ket ania ti maadaltayo iti daytoy?
9 Saan a kanayon a nalaka ti panagaramid kadagiti adalan, annaktayo man ida wenno sabali a tao. Mabalin a kasapulan ti panawen, anus, ken kinapinget. Ngem laglagipenyo nga adu ti situtulok nga agbannog tapno makapagurnongda iti adu a material a bambanag a masansan a saan a makaiyeg kadakuada iti rag-o ken saan nga agpaut. Imbaga ni Jesus kadagiti agim-imdeng kenkuana a nasaysayaat a ti naespirituan a bambanag ti gun-odenda. Kinunana: “Isardengyo ti agurnong maipaay iti bagbagiyo kadagiti gameng iti daga, sadiay nga ibusen ti sanga ken lati, ken sadiay a serken ken takawen dagiti mannanakaw. Imbes ketdi, agurnongkayo maipaay iti bagbagiyo kadagiti gameng idiay langit, sadiay a saan nga ibusen ti sanga wenno uray lati, ken sadiay a saan a serreken ken takawen dagiti mannanakaw.” (Mateo 6:19, 20) Babaen ti panangragpat kadagiti naespirituan a kalat—a pakairamanan ti pannakipaset iti napateg a trabaho a panangaramid kadagiti adalan—maaddaantay iti pannakapnek iti pannakaammo nga ar-aramidentay ti pagayatan ti Dios ken gunggonaannatayto. Insurat ni apostol Pablo: “Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna.”—Hebreo 6:10.
10. (a) Apay a naaddaan ni Jesus kadagiti naespirituan a gameng? (b) Kasano a nagsakripisio ni Jesus, ken kasano a nagunggonaan unay dagiti sabsabali?
10 No ganetgetantay ti agaramid kadagiti adalan, makaurnongtayo maipaay iti bagbagitayo “kadagiti gameng idiay langit,” maitunos iti kinuna ni Jesus. Mangyeg daytoy kadatayo iti rag-o iti panangawat. No madadaantay a mangted, agbanag dayta iti pannakapabaknangtayo. Simamatalek a nagserbi ni Jesus ken Jehova iti binilion a tawen. Panunotenyo laengen dagiti gameng a naurnongna sadi langit! Nupay kasta, saan a sinapul ni Jesus dagiti bukodna nga interes. Insurat ni apostol Pablo: “Inted [ni Jesus] ti bagina maipaay iti basbasoltayo tapno maispalnatayo manipud agdama a nadangkes a sistema ti bambanag maitunos iti pagayatan ti Dios ken Amatayo.” (Galacia 1:4) Saan laeng a madadaan ni Jesus a nagsakripisio iti ministeriona no di ket impaayna ti mismo a biagna kas subbot tapno maaddaan dagiti dadduma iti gundaway nga agurnong kadagiti gameng sadi langit.
11. Apay a nasaysayaat dagiti naespirituan a sagut ngem dagiti namaterialan?
11 Babaen ti panangisuro kadagiti tattao maipapan iti Dios, matulongantay ida a makakita no kasano a makapagurnongda met kadagiti manayon a naespirituan a gameng. Adda kadi pay dakdakkel a sagut a mabalinyo nga iburay? No ikkanyo ti gayyemyo iti nangina a relo, kotse, wenno uray pagtaengan, mabalin nga agyaman ken maragsakan dayta a gayyem, ket addaankayo iti rag-o iti panangted. Ngem anianto ngata ti kasasaad dayta a sagut kalpasan ti 20 a tawen? 200 a tawen? 2,000 a tawen? Iti sabali a bangir, no agsakripisiokayo tapno matulonganyo ti maysa a tao nga agserbi ken Jehova, magunggonaanto iti dayta a sagut iti agnanayon.
Panangsapul Kadagidiay Agtarigagay iti Kinapudno
12. Kasano a nagsakripisio ti adu tapno matulonganda dagiti sabsabali iti naespirituan?
12 Tapno masagrapda ti rag-o iti naespirituan a panangted, napan dagiti adipen ni Jehova agingga kadagiti ungto ti daga. Rinibu ti nangpanaw kadagiti pagtaengan ken pamiliada tapno agmisioneroda kadagiti pagilian a sadiay masapul nga agsursuroda kadagiti pagsasao ken makibagayda iti kultura. Immakar dagiti dadduma kadagiti sabali a lugar iti pagilianda a sadiay adda dakdakkel a panagkasapulan kadagiti manangiwaragawag iti Pagarian. Adda met dagiti nagadal iti sabali a pagsasao tapno makasabaanda dagiti ganggannaet iti bukodda a lugar. Kas pagarigan, kalpasan a napadakkelda ti dua nga annak nga agserserbi itan iti sangalubongan a hedkuarter dagiti Saksi ni Jehova, maysa a pagassawaan idiay New Jersey, E.U.A., ti nagpayunir ken nagadal iti Tsino. Iti las-ud ti tallo a tawen, nakaikonduktada iti panagadal iti Biblia kadagiti 74 a Tsino ti pagsasaona nga agad-adal iti kolehio iti asidegda. Kabaelanyo kadi a palawaen ti ministerioyo iti sabali a wagas tapno makasarakkayo iti dakdakkel a rag-o iti trabaho a panangaramid kadagiti adalan?
13. Ania ti mabalinyo nga aramiden no kayatyo a nabungbunga ti ministerioyo?
13 Nalabit il-iliwenyo ti mangikondukta iti panagadal iti Biblia ngem saanyo pay a naaramidan dayta. Iti dadduma a pagilian, narigat ti agsapul kadagiti interesado a tattao. Nalabit saan nga interesado iti Biblia dagiti tattao a masabetyo. No kasta ti kasasaad, mabalin a sansanenyo a dakamaten dayta a tarigagayyo no agkararagkayo, yantangay ammoyo nga agpada a maseknan unay ni Jehova ken ni Jesus iti daytoy a trabaho ken mabalindakayo nga iturong iti marakarnero a tao. Dumawatkayo kadagiti singasing kadagiti kakongregasionyo nga ad-adu ti kapadasanna wenno nabungbunga ti ministeriona. Aprobetsarenyo ti panagsanay ken dagiti maipapaay a singasing kadagiti Nakristianuan a gimong. Mabenepisiarankayo iti balakad dagiti agdaldaliasat a manangaywan ken dagiti assawada. Kangrunaan iti amin, dikay sumuko. Insurat ti masirib a tao: “Iti bigat imulam ti bin-im ket agingga iti rabii saanmo a paginanaen ta imam; ta saanmo nga ammo no sadino nga agballiginto daytoy.” (Eclesiastes 11:6) Kabayatanna, lagipenyo dagiti matalek a lallaki a kas kada Noe ken Jeremias. Manmano ti nangipangag iti inkasabada, ngem naballigi ti ministerioda. Kangrunaan iti amin, naay-ayoda ni Jehova.
Aramidenyo ti Amin a Kabaelanyo
14. Kasano ti panangmatmat ni Jehova kadagidiay limmakayen nga agserserbi kenkuana?
14 Nalabit a gapu iti kasasaadyo, bassit laengen ti maaramidanyo iti ministerio. Kas pagarigan, mabalin a ti kinalakay limitaranna ti maaramidanyo iti panagserbi ken Jehova. Ngem laglagipenyo ti insurat ti masirib a tao: “Ti kinaubanan ket korona ti kinapintas no masarakan dayta iti dalan ti kinalinteg.” (Proverbio 16:31) Makaay-ayo ken Jehova ti biag a nausar iti panagserbi kenkuana. Kanayonanna, kuna ti Kasuratan: “Uray iti kinalakay ti maysa siak met laeng Daydiay; ket iti kinaubanan ti maysa agtultuloyakto a mangimet. Sigurado nga agtignayakto, tapno mangawitak ken tapno mangimetak ken mangipaayak iti itatalaw.” (Isaias 46:4) Inkari ti nailangitan nga Amatayo a saranayen ken suportaranna dagiti nasungdo kenkuana.
15. Patienyo kadi a maawatan ni Jehova ti kasasaadyo? Apay?
15 Nalabit agib-ibturkayo gapu iti sakit, ibubusor ti di manamati nga asawa, nadadagsen a responsabilidad iti pamilia, wenno dadduma pay a narikut a problema. Ammo ni Jehova dagiti pagkapuyan ken kasasaadtayo, ket ay-ayatennatayo gapu iti panangikagumaantayo nga agserbi kenkuana. Pudno dayta uray pay no basbassit ti maaramidantayo ngem ti dadduma. (Galacia 6:4) Pagaammo ni Jehova nga imperpektotayo, ket realistiko iti inanamaenna kadatayo. (Salmo 147:11) No aramidentay ti amin a kabaelantayo, masiguradotayo a napategtayo iti imatang ti Dios ket saannanto a lipaten dagiti aramid a pakakitaan ti pammatitayo.—Lucas 21:1-4.
16. Iti ania a wagas a makiramraman ti intero a kongregasion iti panangaramid iti adalan?
16 Laglagipenyo met a ti trabaho a panangaramid kadagiti adalan ket ar-aramidentayo kas grupo. Awan agmaymaysa nga indibidual a makaaramid iti adalan, no kasano a ti maysa a tedted ti tudo dina mabiag ti maysa a mula. Agpayso a mabalin a makasarak ti maysa a Saksi iti interesado a tao ket mayadalanna iti Biblia. Ngem no dayta a kabbaro ket umayen iti Kingdom Hall, ti intero a kongregasion ti tumulong kenkuana a mangilasin iti kinapudno. Ti kinabara ti panagkakabsat ti mangipasimudaag iti impluensia ti espiritu ti Dios. (1 Corinto 14:24, 25) Dagiti makatukay a komento dagiti ubbing ken tin-edyer ti mangipakita iti kabbaro a tao a naiduma dagiti agtutubotayo kadagiti agtutubo iti lubong. Dagiti masaksakit, addaan an-annayen, lallakay ken babbaket iti kongregasion ti mangisuro kadagiti kabbaro no ania ti ramanen ti panagibtur. Aniaman ti edad wenno limitasiontayo, addaantay amin iti napateg nga akmen iti panangtulong kadagiti kabbaro bayat nga umun-uneg ti panagayatda iti kinapudno iti Biblia ken rumangrang-ayda nga agturong iti bautismo. Tunggal oras a busbosentay iti ministerio, tunggal panagsarungkar, tunggal pannakisarita iti maysa nga interesado a tao iti Kingdom Hall, ket mabalin a kasla awan kaimudinganna, ngem paset dayta ti nabileg nga aramid ni Jehova.
17, 18. (a) Malaksid iti pannakiraman iti trabaho a panangaramid kadagiti adalan, kasanotay a masagrap ti rag-o iti panangted? (b) Babaen ti pannakiraman iti rag-o iti panangted, asino ti tultuladentayo?
17 Siempre, malaksid iti pannakiraman iti napateg a trabaho a panangaramid iti adalan, kas Kristiano, addada pay sabali a wagas a masagraptayo ti rag-o iti panangted. Mabalintay ti mangilasin iti kuarta kas kontribusiontayo a pangsuportar iti nadalus a panagdayaw ken pangtulong kadagidiay agkasapulan. (Lucas 16:9; 1 Corinto 16:1, 2) Mabalintay ti agsapul kadagiti gundaway a mangipakita iti kinamanagpadagus kadagiti sabali. (Roma 12:13) Mabalintay nga ikagumaan ti ‘agaramid iti naimbag kadagiti amin, ngem nangnangruna kadagidiay nainaig kadatayo iti pammati.’ (Galacia 6:10) Ken, babaen kadagiti simple ngem napateg a wagas, makaitedtayo kadagiti sabali—panagsurat, panagtelepono, panagregalo, panangipaay iti praktikal a tulong, sao a pammaregta.
18 Babaen ti panangted, ipakpakitatayo a tultuladentay ti nailangitan nga Amatayo. Iparparangarangtay met ti nainkabsatan nga ayattayo, nga isu ti pakailasinan dagiti pudno a Kristiano. (Juan 13:35) Ti pananglaglagip kadagitoy a banag ket makatulong kadatayo a mangsagrap iti rag-o iti panangted.
Mailawlawagyo Kadi?
• Kasano a nangipaay ni Jehova ken ni Jesus iti ulidan iti naespirituan a panangted?
• Kasanotay a makagun-od kadagiti agnanayon a gagayyem?
• Aniada nga addang ti mabalintay nga aramiden tapno ad-adda a naballigi ti ministeriotayo?
• Kasano a makiraman amin a miembro ti kongregasion iti rag-o iti panangted?
[Dagiti Ladawan iti panid 13]
Dakkel a rag-o ken pannakapnek ti sagrapen dagiti nagannak no ipangag dagiti annak ti panangsanayda kadakuada
[Ladawan iti panid 15]
Iti panangaramid kadagiti adalan, makagun-odtayo kadagiti pudno a gagayyem
[Ladawan iti panid 16]
Aywanannatayo ni Jehova bayat ti kinalakay
[Dagiti Ladawan iti panid 17]
Kadagiti simple ngem napateg a wagas, makasaraktayo iti rag-o iti panangted