APPIO, PLASA NI

Maysa a plasa nga 64 km (40 mi) iti abagatan a daya ti Roma. Pagaammo unay a pagsardengan iti nalatak a kalsada ti Roma a Via Appia, nga aglayon manipud Roma agingga iti Brundisium (maaw-awagan ita iti Brindisi) a dumalan iti Capua. Ti nagan ti dalan ken ti plasa ket agpada a naala iti nangaramid kadagita a ni Appius Claudius Caecus, a nagbiag idi maikapat a siglo K.K.P.

Gapu ta ditoy ti gagangay a pagsardengan dagiti managdaliasat iti ngudo ti umuna nga aldaw ti panagbaniagada manipud Roma, daytoy a disso ket nagbalin a paglakuan a kanayon nga aduan iti tattao. Ti nangnayon iti kinapategna ket ti kaaddana iti makin-amianan nga ungto ti maysa a kanal a nayasibay iti dalan, a lumasat iti Al-aluguog ti Pontine. Naikuna a limmasat dagiti managbiahe iti daytoy a kanal bayat ti rabii babaen kadagiti lantsa a guyoden dagiti mulo. Deskribiren ti Romano a dumadaniw a ni Horace ti kinarigat ti panagbaniaga, nga agrekreklamo gapu kadagiti tukak ken sepsep ken inladawanna ti Plasa ni Appio kas napusek kadagiti “bangkero ken nakirmet nga agay-aywan iti taberna.”​—Satires, I, V, 1-6.

Iti daytoy a nagsapalan ti dimmalanan ni apostol Pablo idi agdaldaliasat manipud Puteoli nga agturong idiay Roma kas maysa a balud. Ditoy, damo a nasabetna ti pannakabagi dagiti kakabsat a Kristiano a nagbaniaga manipud Roma a sumabet kenkuana idi nadamagda a dumteng. Sumagmamano kadagitoy ti naguray idiay Tallo a Taberna (15 km [9.5 mi] nga as-asideg iti Roma) idinto ta dagiti dadduma napanda iti Plasa ni Appio.​—Ara 28:15.

Iti agdama, adda lugar a pagaammo pay laeng kas Foro Appio, wenno Appian Forum, iti Kalsada ni Appio. Ti maysa a senial a poste ipasimudaagna ti lugar a nagsaadan idi ti Plasa ni Appio. Adda maysa a bassit nga ili a naawagan Faiti iti ballasiw ti Kalsada ni Appio.