Salsaludsod Dagiti Agbasbasa

Apay nga imbaga Ti Pagwanawanan nga Abril 1, 2002, iti panid 11, parapo 7, a ti pannakabautisar dagiti kabarbaro a manamati a Judio idi Pentecostes 33 K.P. ket simbolo ti “personal a panagdedikarda iti Dios babaen ken Kristo,” idinto ta iti dati a pannakaawat, ti pannakaitaneb dagiti Judio sipud idi 33 K.P. agingga 36 K.P. ket saan nga agkalikagum iti kasta a personal a dedikasion?

Idi 1513 K.K.P., inikkan ni Jehova a Dios dagiti Israelita iti gundaway nga agbalin a nasantuan a nasionna no la ket ta ‘siiinget nga agtulnogda iti timekna ken salimetmetanda ti tulagna.’ Simmungbatda: “Situtulokkami a mangaramid ken agtulnog iti isuamin a sinao ni Jehova.”​—Exodo 19:3-8; 24:1-8.

Gapu ta immanamongda a mangtungpal iti tulag ti Mosaiko a Linteg, nagdedikar dagiti Israelita iti Dios. Naipasngay dagiti simmaruno a kaputotan dagiti Judio iti daytoy nagdedikar a nasion. Ngem, ti pannakabautisar dagiti Judio a nagbalin a pasurot ni Jesu-Kristo sipud idi Pentecostes 33 K.P. ken agtultuloy ket ad-adu pay ti sapulenna ngem ti panangiparangda iti bagida iti Dios kas kameng ti naidedikar a nasion. Isimbolo dayta ti dedikasionda ken Jehova a Dios iti baro a relasionda kenkuana babaen ken Jesu-Kristo. Kasano a kasta?

Kalpasan a naibukbok ti nasantuan nga espiritu iti agarup 120 nga adalan a nagtitipon iti makinngato a siled idiay Jerusalem idi Pentecostes 33 K.P., timmakder ni apostol Pedro ket rinugianna ti nangasaba kadagiti umariwekwek a Judio ken proselita nga immay tapno maammuanda ti napasamak. Idi naipaaynan ti naan-anay a pammaneknek, kinunana kadagiti nakonsiensia a Judio: “Agbabawikayo, ket mabautisaran koma ti tunggal maysa kadakayo iti nagan ni Jesu-Kristo maipaay iti pannakapakawan dagiti basolyo.” Kas sungbat iti kanayonan a pammagbaga ni Pedro, “nabautisaran dagidiay naimpusuan a nangabrasa iti saona, ket iti dayta nga aldaw nainayon ti agarup tallo ribu a kararua.”​—Aramid 2:1-41.

Saan aya a dagidiay Judio a nabautisaran kalpasan ti pammagbaga ni Pedro ket kameng idan ti dedikado a nasion? Saan aya a dedikadodan iti Dios? Saan. Insurat ni apostol Pablo nga ‘inikkat ti Dios ti Linteg babaen ti panangilansana iti kayo a pagtutuokan.’ (Colosas 2:14) Babaen ti ipapatay ni Kristo idi 33 K.P., inikkat ni Jehova a Dios ti tulag ti Linteg​—ti nakaibatayan a mismo ti dedikado a relasion dagiti Israelita Kenkuana. Ti nasion a nangilaksid iti Anak ti Dios linaksid itan a mismo ti Dios. ‘Daydiay Israel nga adda iti nainlasagan a pamay-an’ saannan a mabalin ti agpabigbig kas nasion a naidedikar iti Dios.​—1 Corinto 10:18; Mateo 21:43.

Nawaswas ti tulag ti Linteg idi 33 K.P., ngem saan a nagpatingga ti naisangsangayan a pabor ken atension ti Dios kadagiti Judio iti daydi a tiempo.a Nagtultuloy dayta a panawen agingga idi 36 K.P., idi kinasabaan ni Pedro ti managbuteng-Dios nga Italiano a ni Cornelio ken ti sangakabbalayanna agraman ti dadduma pay a Gentil. (Aramid 10:1-48) Ania ti nakaibatayan daytoy a pabor?

“[Ti Mesias] ipaalagadnanto ti tulag kadagiti adu iti maysa a lawas,” kuna ti Daniel 9:27. Ti Abrahamiko a tulag isu ti tulag a maipaalagad iti pito a tawen, wenno “maysa a lawas,” manipud iti pannakabautisar ni Jesus ken ti panangrugi ti publiko a ministerio ti Mesias idi 29 K.P. Tapno magun-odan ti maysa a tao dayta a naitulag a relasion, masapul nga isu ket Hebreo a kaputotan ni Abraham. Dayta nga eksklusibo a tulag saanna nga ipaayan ti maysa a tao iti naidedikar a relasion ken Jehova. Gapuna, dagiti manamati a Judio a nabautisaran kalpasan ti panagpalawag ni Pedro idi Pentecostes 33 K.P. saandan a maibaga a dedikadoda iti Dios idi nawaswas ti tulag ti Linteg, nupay immawatda iti naisangsangayan nga atension kas natural a Judio. Masapul nga agdedikarda a personal iti Dios.

Nasken ti personal a dedikasion dagiti Judio ken proselita nga agpabautisar idi aldaw ti Pentecostes 33 K.P. gapu iti maysa pay a rason. Ni apostol Pedro binagbagaanna dagiti dimngeg kenkuana nga agbabawi ken mabautisaranda iti nagan ni Jesus. No aramidenda dayta masapul nga iwaksida ti ar-aramid ti lubong ken bigbigenda ni Jesus kas Apo ken Mesias, Nangato a Padi, ken kas daydiay agtugaw iti makannawan ti Dios idiay langit. Masapul nga umawagda iti nagan ni Jehova a Dios maipaay iti pannakaisalakan babaen ken Kristo Jesus, a ramanenna ti panangalagad iti pammati ken Kristo ken panangbigbig kenkuana kas Liderda. Nagbaliwen ti pakaibatayan ti pannakirelasion iti Dios ken ti pananggun-od iti pammakawan dagiti basol. Masapul nga awaten ti tunggal manamati a Judio daytoy baro nga urnos. Kasano? Babaen ti panagdedikarda iti Dios ken panangipakitada iti publiko a nagdedikarda babaen iti pannakaitaneb iti danum iti nagan ni Jesu-Kristo. Ti pannakabautisar iti danum ket simbolo ti dedikasionda iti Dios, a nangipaay iti baro a pannakirelasionda kenkuana babaen ken Jesu-Kristo.​—Aramid 2:21, 33-36; 3:19-23.

[Footnote]