Ginutugot “ti Natan-ok a Bambanag ti Dios”

“Mangmangngegtayo ida nga agsasao kadagiti pagsasaotayo maipapan iti natan-ok a bambanag ti Dios.”​—ARAMID 2:11.

1, 2. Ania ti nakaskasdaaw a napasamak idiay Jerusalem idi Pentecostes 33 K.P.?

ITI maysa nga agsapa ti naladaw a primavera idi tawen 33 K.P., adda nakaskasdaaw a napasamak iti maysa a grupo dagiti lallaki ken babbai, dagiti adalan ni Jesu-Kristo a naurnong iti maysa a pribado a pagtaengan idiay Jerusalem. “Pagammuan adda dimteng manipud langit nga ungor a kaasping ti ungor ti bumanesbes a napigsa a puyupoy, ket pinunnona ti intero a balay nga ayanda a pagtugtugawan. Ket nagparang kadakuada ti dildila a kasla iti apuy . . . , ket napnoda amin iti nasantuan nga espiritu ket nangrugida nga agsao iti nagduduma a pagsasao.”​—Aramid 2:2-4, 15.

² Naguurnong ti adu a tattao iti sanguanan ti balay. Karaman kadakuada dagiti Judio a nayanak kadagiti sabali a pagilian, dagiti “nadayaw a lallaki” a napan sadi Jerusalem tapno rambakanda ti piesta ti Pentecostes. Nasdaawda amin a nakangngeg kadagiti adalan nga agsasao iti nakayanakanda a pagsasao “maipapan iti natan-ok a bambanag ti Dios.” Kasano a napasamak ti kasta idinto ta bin-ig a taga Galilea dagidiay agsasao?​—Aramid 2:5-8, 11.

3. Ania a mensahe ti impakaammo ni apostol Pedro iti umariwekwek a tattao idi Pentecostes?

³ Maysa ni apostol Pedro kadagidiay a taga Galilea. Inlawlawagna a sumagmamano a lawas sakbayna, ni Jesu-Kristo ket pinapatay dagiti nakillo a tattao. Nupay kasta, ti Dios pinagungarna ti Anakna. Kalpasanna, nagparang ni Jesus iti adu kadagiti adalanna, a pakairamanan ni Pedro ken dadduma pay nga adda sadiay. Sangapulo pay laeng nga aldaw ti napalabas manipud idi nagpalangit ni Jesus. Isu ti nangiparukpok iti nasantuan nga espiritu kadagiti adalanna. Adda kadi kaipapanan daytoy kadagidiay nangrambak iti Pentecostes? Wen, adda. Ti ipapatay ni Jesus ti nanglukat iti gundaway tapno mapakawan dagiti basolda ken umawatda iti “awan bayadna a sagut ti nasantuan nga espiritu” no la ket ta mamatida kenkuana. (Aramid 2:22-24, 32, 33, 38) Gapuna, ania ti inaramid dagiti agpalpaliiw idi mangngegda ti “natan-ok a bambanag ti Dios”? Ket kasano a matulongannatayo daytoy a salaysay a mangutob iti panagserbitayo ken Jehova?

Nagutugot nga Agtignay!

4. Ania a padto ni Joel ti natungpal iti aldaw ti Pentecostes idi 33 K.P.?

⁴ Idi naiparukpok ti nasantuan nga espiritu kadagiti adalan idiay Jerusalem, inrugida a dagus nga inranud kadagiti sabsabali ti naimbag a damag maipapan iti pannakaisalakan. Immuna a kinasabaanda dagiti tattao a naguurnong iti daydi nga agsapa. Dayta a panangasabada ti kaitungpalan ti naisangsangayan a padto, nga insurat ni Joel nga anak ni Petuel, walo a siglo sakbayna: “Iparukpokko ti espirituk iti tunggal kita ti lasag, ket ti annakyo a lallaki ken ti annakyo a babbai sigurado nga agipadtodanto. No maipapan kadagiti lallakay kadakayo, agtagtagainepdanto kadagiti tagtagainep. No maipapan kadagiti agtutuboyo a lallaki, makakitadanto kadagiti sirmata. Ket uray kadagiti adipen a lallaki ken kadagiti adipen a babbai kadagidiay nga aldaw iparukpokkonto ti espirituk . . . sakbay ti iyaay ti naindaklan ken nakaam-amak nga aldaw ni Jehova.”​—Joel 1:1; 2:28, 29, 31; Aramid 2:17, 18, 20.

5. Iti ania nga anag a nagipadto dagiti Kristiano idi umuna a siglo? (Kitaenyo ti footnote.)

⁵ Kayat kadi a sawen daytoy a mangibaon ti Dios iti maysa a kaputotan dagiti propeta, lallaki ken babbai, nga umasping kada David, Joel, ken Debora, ket usarenna ida a mangipadto kadagiti mapasamak iti masanguanan? Saan. Dagiti Kristiano nga ‘annak a lallaki ken babbai, adipen a lallaki ken adipen a babbai’ ket agipadtoda iti anag a tignayen ida ti espiritu ni Jehova a mangiwaragawag iti “natan-ok a bambanag” nga inaramid ken aramidento pay ni Jehova. No kasta, agserbida a pannakangiwat ti Kangatuan.a Ngem ania ti inaramid dagiti tattao?​—Hebreo 1:1, 2.

6. Idi nangngegda ti palawag ni Pedro, natignay ti adu a tattao a nangaramid iti ania?

⁶ Idi mangngeg dagiti tattao ti palawag ni Pedro, adu kadakuada ti nagtignay. ‘Naimpusuan nga inabrasada ti sao’ ken ‘nabautisaranda, ket iti dayta nga aldaw nainayon ti agarup tallo ribu a kararua.’ (Aramid 2:41) Kas Judio ken proselita a Judio, adda ammodan maipapan kadagiti Kasuratan. Dayta a pannakaammo, buyogen ti pammatida iti nasursuroda ken Pedro, ti nakaibatayan ti pannakabautisarda “iti nagan ti Ama ken ti Anak ken ti nasantuan nga espiritu.” (Mateo 28:19) Idi nabautisarandan, “intuloyda nga impamaysa ti bagbagida iti sursuro dagiti apostol.” Kasta met, inrugida nga inranud kadagiti sabsabali ti baro a pammatida. Kinapudnona, “iti inaldaw-aldaw naynay a nagserserbida idiay templo buyogen ti panagkaykaysa, . . . nga indaydayawda ti Dios ket nakasarakda iti pabor kadagiti amin a tattao.” Gapu iti daytoy a panangasabada, “intultuloy ni Jehova nga itipon kadakuada iti inaldaw dagidiay maisalsalakan.” (Aramid 2:42, 46, 47) Nabiit a nabuangay dagiti kongregasion Kristiano iti adu a pagilian a pagnanaedan dagitoy baro a manamati. No maipapan iti daytoy a panagrang-ay, awan duadua nga adda naitulong ti naregget a panangikasabada iti “naimbag a damag” idi nagsublida kadagiti pagilianda.​—Colosas 1:23.

Nabileg ti Sao ti Dios

7. (a) Ania ti pakatignayan dagiti tattao iti amin a nasion nga agturong iti organisasion ni Jehova iti kaaldawantayo? (b) Ania ti makitayo a panagrang-ay iti sangalubongan a tay-ak ken iti lugaryo? (Kitaenyo ti footnote.)

⁷ Komusta met ngay dagidiay agtarigagay nga agbalin nga adipen ti Dios iti kaaldawantayo? Nasken met nga adalenda a naimbag ti Sao ti Dios. No aramidenda dayta, maam-ammoda ni Jehova kas Dios a “naasi ken managparabur, nabannayat nga agunget ken naruay iti naayat a kinamanangngaasi ken kinapudno.” (Exodo 34:6; Aramid 13:48) Maammuanda ti maipapan iti subbot a siaayat nga impaay ni Jehova babaen ken Jesu-Kristo, a ti naiparukpok a darana madalusanna ida iti amin a basol. (1 Juan 1:7) Maragsakanda met a makaammo iti panggep ti Dios a ‘mangpagungar agpadpada kadagiti nalinteg ken nakillo.’ (Aramid 24:15) Agubbog iti pusoda ti panagayat iti Gubuayan dagitoy a “natan-ok a bambanag,” ket matignayda a mangikasaba kadagitoy a napateg a kinapudno. Iti kasta, agbalinda a dedikado, bautisado nga ad-adipen ti Dios ken itultuloyda ti “rumang-ay iti umiso a pannakaammo iti Dios.”b​—Colosas 1:10b; 2 Corinto 5:14.

8-10. (a) Kasano a ti kapadasan ti maysa a Kristiano a babai paneknekanna nga “adda bileg” ti Sao ti Dios? (b) Ania ti masursuroyo iti daytoy a kapadasan maipapan ken ni Jehova ken iti pannakilangenna kadagiti adipenna? (Exodo 4:12)

⁸ Saan a sinsinan a pannakaammo ti magun-od dagiti adipen ti Dios iti panagadalda iti Biblia. Ti kasta a pannakaammo gutugotenna ti pusoda, balbaliwanna ti panagpampanunotda, ken agtalinaed kadakuada. (Hebreo 4:12) Kas pagarigan, para-aywan kadagiti lallakay ken babbaket ti maysa a babai nga agnagan Camille. Maysa kadagiti ay-aywananna ni Martha, a maysa kadagiti Saksi ni Jehova. Yantangay nakaro ti sakit ti isip ni Martha, kasapulanna ti naynay a pannakataripato. Nasken a mapalagipan a mangan ken uray agtilmon. Nupay kasta, adda di pulos nalipatan ni Martha, kas makitatayo.

⁹ Naminsan, nakita ni Martha nga agsangsangit ni Camille gapu kadagiti personal a problema. Sinallabayna ni Camille ket inawisna a makipagadal iti Biblia kenkuana. Ngem kabaelan kadi ti maysa a tao a kas ken Martha ti mangikondukta iti panagadal iti Biblia? Wen, kabaelanna! Nupay adu ti dinan malagip, saan a nalipatan ni Martha ti naindaklan a Diosna; saanna met a nalipatan dagiti napateg a kinapudno a nasursurona iti Biblia. Iti panagadalda, kiniddawna a basaen ni Camille ti tunggal parapo, kitaenna dagiti nadakamat a Kasuratan, basaenna ti saludsod iti baba ti panid, sa sungbatanna. Nabayag a kasta ti pamay-anda, ket iti laksid dagiti limitasion ni Martha, rimmang-ay ti pannakaammo ni Camille iti Biblia. Ammo ni Martha a nasken a makitimpuyog ni Camille kadagiti sabsabali nga agtarigagay nga agserbi iti Dios. Gapuna, inikkanna ti iyad-adalanna iti kawes ken sapatos, tapno adda maitutop nga aruaten ni Camille iti damo a pannakigimongna idiay Kingdom Hall.

¹⁰ Natukay ti rikna ni Camille iti naayat a pannakaseknan, ulidan, ken pammati ni Martha. Nautobna a nakapatpateg dagiti banag nga adda iti Biblia nga ikagkagumaan ni Martha nga isuro kenkuana, agsipud ta nupay gistay awanen a pulos ti matandaanan ni Martha, saanna a nalipatan dagiti naadalna iti Kasuratan. Idi agangay, idi nayakar ni Camille iti sabali a pasilidad, nabigbigna a panawenen tapno agtignay. Iti umuna a gundaway, napan iti Kingdom Hall, nga aruatna ti kawes ken sapatos nga inted kenkuana ni Martha, ket kiniddawna a mayadalan koma iti Biblia. Nasayaat ti panagrang-ay ni Camille ket nabautisaran idi agangay.

Nagutugot a Mangyanninaw Kadagiti Pagalagadan ni Jehova

11. Malaksid iti naregta a panangasabatayo, kasanotayo a maipakita a ginutugotnatayo ti mensahe ti Pagarian?

¹¹ Nasurok itan nga innem a milion dagiti Saksi ni Jehova a, kas kada Martha ken Camille, mangikaskasaba iti “naimbag a damag ti pagarian” iti intero a lubong. (Mateo 24:14; 28:19, 20) Kas kadagiti Kristiano idi umuna a siglo, ginutugot ida iti kasta unay ti “natan-ok a bambanag ti Dios.” Maragsakanda a mangawit iti nagan ni Jehova ken gapu ta imparukpokna ti espirituna kadakuada. Gapuna, ikagkagumaanda ti ‘magna a maikari ken Jehova iti panggep a panangay-ayo a naan-anay kenkuana,’ nga agbiagda a mayannurot kadagiti pagalagadanna. Karaman iti dayta ti panangraemda kadagiti pagalagadan ti Dios mainaig iti panagkawkawes ken panaglanglanga.​—Colosas 1:10a; Tito 2:10.

12. Ania nga espesipiko a balakad maipapan iti panagkawkawes ken panaglanglanga ti masarakantayo a nailanad iti 1 Timoteo 2:9, 10?

¹² Wen, nangipasdek ni Jehova kadagiti pagalagadan no maipapan iti personal a panaglanglangatayo. Dinakamat ni apostol Pablo ti dadduma kadagiti pagannurotan ti Dios iti daytoy a banag. “Tarigagayak a dagiti babbai arkosanda ti bagbagida iti naimbag-pannakaurnosna a kawes, buyogen ti kinaemma ken kinasimbeng ti panunot, saan a kadagiti estilo a panangsallapid iti buok ken balitok wenno kadagiti perlas wenno nangina unay a lupot, no di ket iti wagas a maitutop kadagiti babbai nga agkunkuna nga agraemda unay iti Dios, awan sabali, babaen iti naimbag nga ar-aramid.”c Ania ti masursurotayo kadagitoy a sasao?​—1 Timoteo 2:9, 10.

13. (a) Ania ti kayat a sawen ti “naimbag-pannakaurnosna a kawes”? (b) Apay a maikunatayo a rasonable dagiti pagalagadan ni Jehova?

¹³ Ipakita ti sasao ni Pablo a dagiti Kristiano masapul nga “arkosanda ti bagbagida iti naimbag-pannakaurnosna a kawes.” Saan koma nga uray ania lattan ti panaglanglangada. Yantangay rasonable dagita a pagalagadan, kabaelan ti gistay amin, uray dagidiay nakurapay, ti agkawes iti nanakman, nadalus, ken presentable. Kas pagarigan, iti maysa a pagilian idiay Abagatan nga America, kada tawen adu a kilometro ti pagnaen dagiti Saksi iti kabakiran sada agbilog iti adu nga oras tapno makatabunoda iti kombension distrito. Gagangay nga adda maitabsaw iti karayan wenno mapisangan iti kawes iti kabakiran bayat ti panagdaliasatda. Isu a no sumangpet dagiti kombensionista iti lugar a pakaangayan ti kombension, masansan a saan a naurnos ti langada. Gapuna, idaitda dagiti butones, tarimnenda dagiti zipper, ken labaan ken plantsaenda dagiti kawes a pakikombensionda. Ipatpategda ti awis a mangan iti lamisaan ni Jehova, ket kayatda a maitutop ti panagkawkawesda.

14. (a) Ania ti kayat a sawen ti panagkawes a buyogen ti “kinaemma ken kinasimbeng ti panunot”? (b) Ania ti ramanen ti panagkawestayo ‘kas tattao nga agkunkuna nga agraem unay iti Dios’?

¹⁴ Impakita pay ni Pablo a ti panagkawkawestayo ket nabuyogan koma iti “kinaemma ken kinasimbeng ti panunot.” Kayat a sawen daytoy a ti panaglanglangatayo ket saan koma a naparammag, nakadidillaw, makagargari, wenno naestilo. Maysa pay, agkawestayo koma iti wagas a mangyanninaw iti ‘panagraem iti Dios.’ Saan kadi a rumbeng a pagpanunotantayo dayta? Saan koma laeng a no addatayo kadagiti gimong ti kongregasion a nanakman ti panagkawkawestayo. Kanayon koma a nadayaw ken natakneng ti panaglanglangatayo agsipud ta Kristiano ken ministrotayo iti amin a tiempo. Siempre, ti kawestayo a pagtrabaho ken pageskuela ket rumbeng a maitutop iti kasasaad. Nupay kasta, naemma ken nanakman koma ti panagkawkawestayo. No kanayon nga iyanninaw ti kawestayo ti pammatitayo iti Dios, pulos a ditay bumdeng a mangasaba iti di pormal ta ditay ibain ti panaglanglangatayo.​—1 Pedro 3:15.

‘Diyo Ayaten ti Lubong’

15, 16. (a) Apay a napateg a ditay tuladen ti lubong no maipapan iti panagkawkawes ken panaglanglanga? (1 Juan 5:19) (b) Ania ti praktikal a rason a ditay sumurot kadagiti uso iti panagkawkawes ken panaglanglanga?

¹⁵ Ti balakad a nailanad iti 1 Juan 2:15, 16 iwanwannatayo met no maipapan iti panagkawkawes ken panaglanglangatayo. Kastoy ti mabasatayo: “Dikay ayaten ti lubong wenno uray ti bambanag nga adda iti lubong. No ti asinoman ayatenna ti lubong, ti ayat ti Ama awan kenkuana; agsipud ta amin a banag iti lubong​—ti derrep ti lasag ken ti derrep dagiti mata ken ti panangiparammag iti sanikua a pagbiag ti maysa​—saan nga agtaud iti Ama, no di ket agtaud iti lubong.”

¹⁶ Anian a naintiempuan dayta a balakad! Iti daytoy panawen a napigsa ti impluensia dagiti kapatadan, ditay koma ipabulos nga impluensiaan ti lubong ti panagkawkawestayo. Kadagiti kallabes a tawen, bimmaban dagiti estandarte iti estilo ti panagkawkawes ken panaglanglanga. Uray dagiti pagannurotan iti panagkawkawes dagiti agtartrabaho ken propesional a tattao saanda a kanayon a makaipaay iti mapagtalkan nga estandarte no ania ti maitutop kadagiti Kristiano. Maysa pay a rason daytoy no apay a kanayon a sipapanunottayo koma a masapul a ‘ditay agpaisukog iti daytoy a sistema ti bambanag’ tapno makapagbiagtayo a mayannurot kadagiti pagalagadan ti Dios ket iti kasta, ‘maarkosantayo ti sursuro ti Manangisalakantayo, ti Dios, iti amin a bambanag.’​—Roma 12:2; Tito 2:10.

17. (a) Ania dagiti saludsod nga usigentayo no gumatangtayo iti kawes wenno agpili iti estilo? (b) Apay a maseknan koma dagiti ulo ti pamilia iti personal a panaglanglanga dagiti kameng ti pamiliada?

¹⁷ Sakbay nga ikeddengyo ti gumatang iti kawes, nainsiriban nga isaludsodyo iti bagiyo: ‘Apay a magustuak daytoy nga estilo? Gapu aya ta dayta ti estilo ti nalatak ken paboritok nga artista? Kasta aya ti panagkawkawes ti maysa a bunggoy dagiti butangero wenno ti maysa a grupo a mangiparparegta iti espiritu ti panagwaywayas ken kinarebelioso?’ Kitaentay met koma a naimbag ti kawes a mismo. No bestida wenno palda, nakiting aya? Ti ngay tabasna? Nanakman aya, maitutop, ken natakneng, wenno nakipet, makagargari, wenno naalas? Isaludsodyo iti bagiyo, ‘Adda ngata maitibkol no kastoy ti kawesko?’ (2 Corinto 6:3, 4) Apay a pakaseknantayo dayta? Agsipud ta kuna ti Biblia: “Uray ti Kristo saanna nga inay-ayo ti bagina.” (Roma 15:3) Ti ulo ti Kristiano a pamilia masapul a maseknan koma iti panaglanglanga dagiti kameng ti pamiliana. Gapu iti panagraem iti nadayag a Dios a pagdaydayawanda, saan koma a bumdeng dagiti ulo ti pamilia a mangipaay iti natibker, naayat a balakad no kasapulan.​—Santiago 3:13.

18. Ania ti manggutugot kadakayo a mangusig a naimbag iti panagkawkawes ken panaglanglangayo?

¹⁸ Ti mensahe nga ipakpakaammotayo ket nagtaud ken Jehova, ti mismo a ladawan ti kinatakneng ken kinasanto. (Isaias 6:3) Idagadag ti Biblia a tuladentayo ni Jehova “kas annak a dungdungnguen.” (Efeso 5:1) Mabalin a pakaidayawan wenno pakaumsian ti nailangitan nga Amatayo ti panagkawkawes ken panaglanglangatayo. Awan duadua a kayattayo a paragsaken ti pusona!​—Proverbio 27:11.

19. Kasano nga agpaay a pagimbagantayo ti panangipakaammo iti “natan-ok a bambanag ti Dios”?

¹⁹ Ania ti panagriknayo maipapan iti “natan-ok a bambanag ti Dios” a naadalyo? Wen, anian a pribilehio ti pannakasursurotayo iti kinapudno! Gapu iti pammatitayo iti naiparukpok a dara ni Jesu-Kristo, mapakawan dagiti basoltayo. (Aramid 2:38) Kas resultana, addaantayo iti wayawaya nga agsao iti imatang ti Dios. Ditay kabuteng ni patay a kas kadagidiay awanan iti namnama. Imbes ketdi, impanamnama kadatayo ni Jesus a dumtengto ti aldaw nga “amin dagidiay adda kadagiti pakalaglagipan a tanem mangngegdanto ti timekna ket rummuarda.” (Juan 5:28, 29) Nagsayaat ni Jehova ta impalgakna dagitoy a banag kadatayo. Kanayonanna, imparukpokna ti espirituna kadatayo. Gapuna, ti panagyaman kadagitoy amin nga agkakaimbag a sagut tignayennatayo koma a mangraem kadagiti nangato a pagalagadanna ken sireregta a mangidaydayaw kenkuana, nga ipakaammotayo kadagiti sabsabali dagitoy a “natan-ok a bambanag.”

[Footnotes]

Ania ti Sungbatyo?

• Ania dagiti “natan-ok a bambanag” a nangngeg dagiti tattao idi Pentecostes 33 K.P., ket ania ti inaramidda?

• Kasano nga agbalin nga adalan ni Jesu-Kristo ti maysa a tao, ket ania ti ramanen ti panagbalin nga adalan?

• Apay a nasken a maseknantayo iti panagkawkawes ken panaglanglangatayo?

• Ania dagiti banag a rumbeng nga ikonsiderartayo iti panangikeddeng no maitutop met laeng ti maysa a kawes wenno estilo?

[Ladawan iti panid 15]

Impakaammo ni Pedro a napagungaren ni Jesus

[Dagiti Ladawan iti panid 17]

Pakaidayawan kadi ti Dios a pagdaydayawanyo ti personal a panaglanglangayo?

[Dagiti Ladawan iti panid 18]

Dagiti Kristiano a nagannak masapul a maseknanda iti panaglanglanga dagiti kameng ti pamiliada