Ti Panangmatmat ti Biblia

Kasano Kaan-anay ti Pammakawan ti Dios?

“Ammok a dinto mapakawan ti Dios dagiti basolko. Dinakto pulos kayat gapu iti naaramidak.”​—Gloria.

SAAN a marigatan ni Gloria a mangibaga iti sabsabali a mapakawan ni Jehova dagiti basolda.a Ngem no lagipenna dagiti bukodna a salungasing, marikna ni Gloria nga isut’ nakondenar. Kasla saanna a magun-odan ti pammakawan ni Jehova.

Ti panangbigbig iti maysa a naaramidan a biddut wenno wagas ti panagbiag ti mangriribuk iti konsiensia. “Dagiti tultulangko narmayda bayat ti panagungorko nga agpatnag ken agmalem,” insurat ni David kalpasan ti panagbasolna. “Naan-anay a naibusanak iti bileg.” (Salmo 32:3, 4, Today’s English Version; idiligyo ti Salmo 51:3.) Ngem makaparagsak ta pagay-ayatan ni Jehova ti mamakawan. Isut’ ‘sisasagana a mamakawan.’​—Salmo 86:5; Ezequiel 33:11.

Nupay kasta, ni Jehova kitaenna ti puso. Ti pammakawanna ket saan a naibatay iti panagladingit laeng. (Exodo 34:7; 1 Samuel 16:7) Masapul a sipapanayag a bigbigen ti nakabasol ti nagbiddutanna, ipakita ti napasnek a panagbabawi, ken iwaksi ti dakes a naaramidanna kas makarimon ken masubkar. (Salmo 32:5; Roma 12:9; 2 Corinto 7:11) Iti daytanto laeng a mapakawan ken matagiragsak ti nakabasol “dagiti aldaw ti bang-ar” manipud ken Jehova.​—Aramid 3:19.

Ngem uray pay kalpasan ti panagbabawi a kaskasdi a marikna ti dadduma a nakondenarda. Rumbeng kadi nga ibaklayda ti dadagsenda iti agnanayon? Aniat’ liwliwa nga ipaay ti Biblia kadagidiay a nagbabawiandan dagiti basolda ken inwaksidan ngem kaskasdi a mariribukan pay laeng ti riknada?​—Salmo 94:19.

Panangikkat iti Dadagsen

Gapu ta maladingitan kadagiti napalabas a salungasingna, inyararaw ni David ken Jehova: “Imatangam ti dukotko ken ti bannogko, ket pakawanem amin dagiti basolko.” (Salmo 25:18) Saan laeng a pammakawan ti impakpakaasi ni David iti daytoy. Kiniddawna a ‘pakawanen’ ni Jehova dagiti basolna, nga ikkatenna wenno bagkatenna idan, ipanawna idan. Adda nakaro nga ibunga ti basol, ket di pagduaduaan a para ken David inraman daytoy ti maysa a mariribukan a konsiensia.

Kada tawen maipakita kadagiti Israelita ti pammalagip ti panangpunas ni Jehova kadagiti basol ti nasion. No Aldaw ti Panangabbong, ipatay ti nangato a padi dagiti imana iti ulo ti maysa a kalding, ket ipudnona iti rabawna dagiti amin a basol ti ili, sana bulosan ti kalding a mapan iti let-ang. Makita ti asinoman a presente ti pannakaikkat dagiti basol ti nasion.​—Levitico 16:20-22.

Maliwliwa ngarud dagidiay nakapagbabawin kadagiti basolda. Dagiti maannurot no Aldaw ti Panangabbong idi inladawanda ti kasayaatan a probision a mangpunas iti basol​—ti daton a subbot ni Jesu-Kristo. Impadto ni Isaias maipapan ken Jesus: “Inawitna ti basol dagiti adu.” (Isaias 53:12) Gapuna, saan koman a mariribukan ti konsiensia gapu kadagiti napalabas a basol. Ngem lagipento pay kadi ni Jehova dagitoy a basol?

Panangkanselar iti Utang

Iti modelo a kararag, kinuna ni Jesus: “Pakawanem dagiti utangmi.” (Mateo 6:12) Ti Griego a sao a naipatarus ditoy a “pakawanen” ket maysa a porma ti verbo a kaipapananna ti “pananglipat” iti dayta. Ngarud, naiyarig ti panangpakawan iti basol iti pananglipat, wenno panangkanselar, ti maysa nga utang.​—Idiligyo ti Mateo 18:23-35.

Daytoy ket lallalo a pinagminar ni Pedro idi kinunana: “Agbabawikayo, ngarud, ket agsublikayo tapno mapunas dagiti basolyo.” (Aramid 3:19) Ti ‘panangpunas’ kaipapananna ti panangdadael wenno panangpukaw. Isingasingna ti pannakapunas ti maysa a naisurat a rekord, a mangkanselar iti napalabas nga utang.​—Idiligyo ti Colosas 2:13, 14.

Gapuna, dagidiay nakapagbabawin dida koma pagamkan a kalikaguman ti Dios a bayadanda ti maysa nga utang a kinanselarnan. Kunana: “Diakto lagipenen dagiti basolmo.” (Isaias 43:25; Roma 4:7, 8) Aniat’ kaipapanan daytoy iti agbabbabawi a managbasol?

Panangikkat iti Mantsa

Babaen ken mammadto Isaias, kinuna ni Jehova: “Uray dagiti basolyo kasda la koma iti eskarlata, mapapudawdanto a kasla niebe; nupay no nalabbasitda a kasla karmesi, agbalindanto a kasla napapudaw a de lana.”​—Isaias 1:18.

Masansan nga awan mamaay dagiti panagregget nga ikkaten ti nakaro a mantsa ti maysa a kawes. Kumupas met ketdi ti mantsa ngem kaskasdi a madlawto latta. Anian a makaliwliwa a maammuan a maikkat ni Jehova dagiti basol a kas iti natayengteng nga eskarlata wenno nalabaga sana mapapudaw ida a kas iti niebe.​—Idiligyo ti Salmo 51:7.

Ngarud, saan koma nga ipapan ti agbabbabawi a managbasol nga aw-awitenna ti salungasingna aginggat’ tungpal biagna. Saan a basta pagkupasen ni Jehova dagiti salungasing, a mangituggod iti maysa nga agbabbabawi nga agbiag iti naynay a pannakaibabain.​—Idiligyo ti Aramid 22:16.

Tulong Manipud Dadduma

Nupay ikkaten ni Jehova ti dadagsen, kanselarenna ti utang, ken ikkatenna ti mantsa ti basol, mabalin nga adda tiempo a malapunos pay laeng iti ladingit ti maysa nga agbabbabawi. Nagsurat ni Pablo maipapan iti maysa nga agbabbabawi a managbasol idiay kongregasion ti Corinto a pinakawanen ti Dios ngem ‘malmalmes [pay laeng] iti aglablabes a liday [“nagliday iti kasta unay a kaslattay naan-anayen a maupay,” TEV].’​—2 Corinto 2:7.

Kasano a matulongan daytoy a tao? Ituloy ni Pablo: “Dawatek kadakayo a paneknekanyo ti panagayatyo kenkuana.” (2 Corinto 2:8) Ti sao nga inusar ni Pablo agpaay iti ‘paneknekan’ ket maysa a legal a termino a kaipapananna “pasingkedan.” Wen, dagiti agbabbabawi a pinakawanen ni Jehova kasapulanda met ti pammasingked, wenno timbre ti pananganamong, manipud padada a Kristiano.

Nalawag a medio mabayag daytoy. Masapul nga ikkaten ti agbabbabawi ti panangibabain ti basolna ken mangaramid iti maysa a makakumbinsir a rekord ti kinalinteg. Masapul nga an-anusanna nga ibturan ti rikrikna ti asinoman nga inapektaran a mismo dagiti napalabas a basolna. Kabayatanna, isut’ makapagtalek iti naan-anay a pammakawan ni Jehova, a kas idi ken David: “Kas panagaddayo ti daya ken ti laud, kasta ti nangyadayuan [ni Jehova] kadagiti salungasingtayo.”​—Salmo 103:12.

[Footnote]

[Picture Credit Line iti panid 18]

Panagsubli ti Anak a Barayuboy ni Rembrandt, Scala/Art Resource