Umuna a Siglo a Jerusalem

DAKKELEN ti nagbaliwan ti Jerusalem itatta no idilig iti kasasaadna idi umuna a siglo. Uray pay kasta, mabalin a pattapattaen a buklen manen ti sumagmamano a kangrunaan a paset ti siudad maibatay iti nasirarak ti arkeolohia. Makatulong daytoy kadagiti estudiante a mangiladawan kadagiti pasamak a naaramid sadiay mainaig iti ministerio ni Jesus ken iti ministerio dagiti apostolna.

No adda ni Jesus idiay Jerusalem kadagidi tiempo ti piesta, isu mangisuro iti disso ti templo nga ayan idi ti adu a tattao. (Jn 7:14, 28; 18:20) Kalpasan ti ipapatay ken panagungarna, ‘pinunno dagiti adalanna ti Jerusalem iti sursuroda.’ (Ara 5:28) Manipud Jerusalem, ti panangaskasabada nagsaknap idi agangay agingga iti “kaadaywan a paset ti daga.”​—Ara 1:8.

Ti aramid ni Jesus ken dagiti adalanna indatagna iti nasion ti maysa a napateg nga isyu: Awatenda aya daydiay imbaon ni Jehova kas Mesias? Bigbigenda kadi a kasapulanda ti Pagarian ti Dios? Nupay adda sumagmamano a naaddaan pammati ken Jesus, di nangipangag ti kaaduan. Ti kakaruan nga inaramid ti nasion a pakakitaan ti kaawan pammatida ket isu ti panangilansada ken Jesus, a kinanunongan ti kaaduan idiay Jerusalem. Kas nagbanaganna, ti pannakadadael dimteng iti siudad idi 70 K.P., kas impadto ni Jesus. ​—Lu 19:41-44.