‘Sawen a Situtured ti Saot’ Dios’

NI Jehova a Dios mabalinna a pabilgen dagiti adipenna tapno ‘sawen ti Sao ti Dios a situtured.’ (Aramid 4:31) Uray dagiti ubing pay kadagiti kinapudno ti Biblia ken kurang pay kapadasanna iti panag-ebanghelio saanda koma nga agalikaka a mangisao ti naimbag a damag nga addaan tured. Idiay Côte d’Ivoire, dua nga agibumbunannag ti naiubag a damag addada iti ministerio a panagbalaybalay idi nasarakanda ti maysa a propesor ti unibersidad. Ti ub-ubing a Saksi, ni Seriki, mariknana a di kualipikado a makisao iti kasta nga edukado a tao, gapuna pinalubosanna daydiay kaduana a Saksi nga isut’ agsao.

Masikoran ti propesor iti panagil-ilem ti rasa ket pabpabasolenna ti Dios gapu kadagiti problema ti rasa, ta patienna nga isut’ namarsua kadagiti nagduduma a rasa. Kalpasan ti nakabaybayag a diskusion a kasla awan pagturturongannan, nakaurnong ni Seriki ti kalalainganna a tured a makapagsao, ket siraraem a bimmallaet iti tungtongan. (1 Tesalonica 2:2) Gapu ta nadlawna a ti balay ti propesor ket nadekorasionan kadagiti napipintas pannakapilina a kolor, sinaludsodan ni Seriki ti propesor, “Apay a diyo pinagbalin ti balayyo a parpareho iti kolor?’

“Aniat’ panangipagarupmo kaniak, agmauyong!” insungbat ti propesor. Simmungbat met ni Seriki: “Saan, ngem apay a namnamaentayo a ti Dios pagbalinenna ti isuamin ken tunggal maysa nga isu met laeng a kolor?” Nalawag ti punto. Dayta a simple nga ilustrasion ket epektibo, ket maysa a nasayaat a pammaneknek ti inted ti dati managbabain a ni Seriki.