No Apay nga Asidegen nga Agpatingga ti Amin a Panagsagaba
“Ti Bato, naan-anay ti aramidna.”—DEUTERONOMIO 32:4.
1, 2. (a) Apay a nakapatpateg kadakayo ti namnama nga agbiag nga agnanayon? (b) Apay nga adu a tattao ti di mamati iti Dios a nagkari iti agkakaimbag a bambanag agpaay iti masanguanan?
KAAY-AYOYO kadi a panunoten ti biag idiay Paraiso? Nalabit makitkitayo ti bagiyo nga agsuksukisok iti daytoy nakaskasdaaw a planeta ken agad-adal maipapan iti dandani awan inggana a kinanadumaduma dagiti sibibiag a bambanag nga adda iti dayta. Wenno nalabit pampanunotenyo ti mariknayo a pannakapnek bayat a makipagtartrabahokayo iti sabsabali a mangaywan iti daga ken tumultulong a mamagbalin iti dayta kas sangalubongan a minuyongan. Wenno nalabit pampanunotenyo dagiti saguday a mabalinyo a parang-ayen iti arte, arkitektura, musika, wenno dadduma pay a kalat a diyo maragpat iti agdama a biag a napnuan iti pakakumikoman. Aniaman ti kasasaad, ipatpategyo ti namnama a maaddaan iti aw-awagan ti Biblia a “ti pudpudno a biag”—ti biag a pinanggep ni Jehova agpaay kadatayo, a tagiragsakentayo iti agnanayon.—1 Timoteo 6:19.
2 Saan kadi a makaparagsak ken maysa a napateg a pribilehio ti mangiranud iti dayta a naibasar-Biblia a namnama? Nupay kasta, adu ti di mamati iti dayta a namnama. Ipagarupda nga ilusion laeng dayta, maysa a di pulos pumayso nga arapaap dagiti nakuneng. Mabalin a narigatda pay a patien nga adda Dios a nangikari iti biag nga agnanayon iti Paraiso. Apay? Para kadagiti dadduma, mariribukanda maipapan iti kinadakes. Para kadakuada, no talaga nga adda Dios ken no isu ket mannakabalin-amin ken naayat, apay ngarud nga adda kinadakes ken panagsagaba? Patienda nga awan ti Dios a mangpanuynoy iti kinadakes—wenno no adda man, isu ket saan a mannakabalin-amin wenno di maseknan kadatayo. Para iti dadduma, kasla makakombinsir dayta a kita ti panagrasrason. Talaga a nakalalaing ni Satanas a mangbulsek iti isip dagiti tattao.—2 Corinto 4:4.
3. Matulongantayo dagiti tattao a mangsungbat iti ania a narigat a saludsod, ken apay nga addaantayo iti naisangsangayan a gundaway a mangaramid iti kasta?
3 Kas dagiti Saksi ni Jehova, addaantayo iti naisangsangayan a gundaway a tumulong kadagiti tattao nga inallilaw ni Satanas ken ti sirib daytoy a lubong. (1 Corinto 1:20; 3:19) Ammotayo no apay nga adu ti di mamati kadagiti kari ti Biblia. Dida ngamin am-ammo ni Jehova. Mabalin a dida ammo ti naganna wenno ti kinapateg dayta a nagan, ken mabalin a bassit wenno awan pay ketdi ti ammoda maipapan kadagiti galadna wenno ti pakasarsaritaanna kas daydiay manangtungpal kadagiti karina. Agyamantayo agsipud ta ammotayo dagita. Makagunggona no pasaray repasuentayo no kasano a matulongantayo dagiti tattao nga adda iti “kinasipnget no maipapan iti isip” tapno masungbatantayo ti maysa kadagiti karirigatan a saludsod nga iyim-imtuod ti tattao, “Apay nga ipalpalubos ti Dios ti kinadakes ken panagsagaba?” (Efeso 4:18) Umuna, usigentayo no kasano a maipaaytayo ti pakaibasaran ti makapnek a sungbat. Kalpasanna, ilawlawagtayo no kasano a dagiti galad ni Jehova ket nagminar iti wagas a panangrisutna iti kinadakes.
Panangbirok iti Umiso a Wagas ti Panangsungbat
4, 5. Ania ti mabalin nga umuna nga aramidentayo no adda mangyimtuod no apay nga ipalpalubos ti Dios ti panagsagaba? Ilawlawagyo.
4 No adda mangyimtuod no apay nga ipalpalubos ti Dios ti panagsagaba, kasano ti panangsungbattayo? Nalabit kayattayo a dagus nga ipaayan ida iti detalyado a panangilawlawag, a mangrugitayo iti napasamak idiay minuyongan ti Eden. Iti dadduma a kasasaad, mabalin a nasayaat dayta. Ngem kas pammalagip, mabalin a nasken a maipasdek pay laeng ti pundasion. (Proverbio 25:11; Colosas 4:6) Usigentayo ti tallo a punto a makatulong kadatayo a mangasistir iti kasarsaritatayo sakbay a sungbatantayo dayta a saludsod.
5 Umuna, no mariribukan unay dayta a tao gapu iti panagraira ti kinadakes ditoy lubong, mabalin nga isu ket nagbalin a biktima ti kinadakes wenno napasaran a mismon dayta dagiti ay-ayatenna. Mabalin a nainsiriban ngarud a mangrugitayo babaen ti panangipakitatayo iti napudno a pannakipagrikna. Kastoy ti imbalakad ni apostol Pablo kadagiti Kristiano: “Makipagsangitkayo kadagiti tattao nga agsangit.” (Roma 12:15) Ti pannakipagriknatayo, wenno ti panangipakitatayo iti “pannakipagmaymaysa ti rikna,” mabalin a gutugotenna dayta a tao. (1 Pedro 3:8) No mariknana a maseknantayo kenkuana, ad-adda a denggenna ti ibagatayo.
6, 7. Apay a mabalin a makatulong no komendarantayo ti maysa a napasnek a tao iti panangyimtuodna iti nabagas a Nainkasuratan a saludsod a mangrirriribuk kenkuana?
6 Maikadua, mabalin a komendarantayo ti maysa a napasnek a tao gapu iti panangyimtuodna iti dayta a saludsod. Pagarupen ti dadduma a tattao a no iyimtuodda dagita a saludsod, awan pammatida wenno awan panagraemda iti Dios. Nalabit a kasta pay ngamin ti imbaga kadakuada ti panguluen ti relihionda. Ngem saan a kanayon a kasta ti kasasaad. Ngamin, inyimtuod met idin dagiti matalek a tattao idi panawen ti Biblia dagiti umasping a saludsod. Kas pagarigan, kastoy ti inyimtuod idi ni David: “Apay, O Jehova, nga agtalinaedka a sitatakder iti adayo? Apay nga agtalinaedka a silelemmeng kadagiti tiempo ti riribuk?” (Salmo 10:1) Umasping iti dayta, inyimtuod ni mammadto Habakuk: “Kasano kabayag, O Jehova, a masapul nga agpatulongak, ket saanka a dumngeg? Kasano kabayag nga umasugakto kenka iti tulong manipud kinaranggas, ket saanka a mangisalakan? Apay nga ipakitam kaniak ti makapasakit, ket kumitkitaka iti riribuk laeng? Ket apay nga adda iti sangok ti panangagaw ken kinaranggas, ket apay a mapasamak ti panagririri, ket apay a tumanor ti ringgor?”—Habakuk 1:2, 3.
7 Dagitoy ket matalek a lallaki nga addaan iti nauneg a panagraem iti Dios. Nakondenarda kadi gapu iti panangyimtuodda kadagita a saludsod a pakariribukanda? Imbes a kasta, impaisurat ni Jehova iti Saona dagita a napasnek a saludsodda. Iti kaaldawantayo, ti maysa a tao a mariribukan iti panagraira ti kinadakes ket mabalin a talaga a mabisin iti naespirituan—isu ket agsapsapul kadagiti sungbat a ti laeng Biblia ti makaipaay. Laglagipenyo a kinomendaran ni Jesus dagidiay mabisin iti naespirituan, wenno dagidiay “sipapanunot iti naespirituan a kasapulanda.” (Mateo 5:3) Anian a pribilehio ti tumulong kadagita a tattao tapno masagrapda ti kinaragsak nga inkari ni Jesus!
8. Aniada a makariribuk a pannursuro ti pamatian ti tattao a ti Dios ti makinggapuanan iti panagsagaba, ken kasanotayo a matulongan ida?
8 Maikatlo, mabalin a nasken a tulongantayo ti maysa a tao tapno maawatanna a saan a ti Dios ti mapabasol iti kinadakes a nakasaksaknap iti lubong. Adu a tattao ti nasursuruan a ti Dios ti agturturay iti daytoy lubong a pagnanaedantayo, ket nabayagen nga inkeddengna ti amin a mapaspasamak kadatayo, ken adda dagiti misterioso ken di maawatan a rason iti panangparigatna iti sangatauan. Palso dagita a pannursuro. Ibabainda ti Dios ken pagparparangen dagita nga isu ti makin-utek iti kinadakes ken panagsagaba iti lubong. Isu a nasken nga usarentayo ti Sao ti Dios tapno mailinteg dagita a banag. (2 Timoteo 3:16) Saan a ni Jehova ti agturturay iti daytoy dakes a sistema ti bambanag no di ket ni Satanas a Diablo. (1 Juan 5:19) Saan a nasaksakbay nga inkeddeng ni Jehova ti pagbanagan dagiti intelihente a parsuana; ik-ikkanna ida iti wayawaya ken gundaway nga agpili iti naimbag ken dakes, umiso ken di umiso. (Deuteronomio 30:19) Pulos a saan met a ni Jehova ti gubuayan ti kinadakes; karimonna ti kinadakes ken maseknan kadagidiay mailupitlupit.—Job 34:10; Proverbio 6:16-19; 1 Pedro 5:7.
9. Ania ti dadduma nga instrumento nga impaay ”ti matalek ken masirib nga adipen” a makatulong kadagiti tattao tapno maawatanda no apay nga ipalpalubos ni Jehova a Dios ti panagsagaba?
9 Apaman a naipasdekyon ti kasta a pundasion, mabalin a sisasaganan ti dumdumngeg kadakayo a mangammo no apay nga ipalpalubos ti Dios ti panagtultuloy ti panagsagaba. Adu nga instrumento ti impaay “ti matalek ken masirib nga adipen” kas pangtulong kadakayo. (Mateo 24:45-47) Kas pagarigan, iti “Panagtulnog iti Dios” a Kombension Distrito idi 2005/06, adda nairuar a polieto a napauluan iti, Asidegen nga Agpatingga ti Amin a Panagsagaba! No magun-odan iti pagsasaoyo dayta a polieto, apay a diyo kabesaduen dagiti linaonna? Umasping iti dayta, ti libro nga Ania a Talaga ti Isursuro ti Biblia?, a magun-odan itan iti 157 a pagsasao, ket addaan iti maysa a kapitulo a mangsungbat iti daytoy napateg a saludsod. Naan-anay koma nga usarenyo dagita nga instrumento. Ilawlawagda a naimbag ti Nainkasuratan a kasasaad a nangitunda iti itataud ti isyu maipapan iti sapasap a kinasoberano a napataud idiay Eden ken no apay a tinaming ni Jehova dayta maitunos iti pamay-anna. Laglagipenyo met a bayat nga ilawlawagyo dayta a suheto, ipalpalgakyo iti agim-imdeng kadakayo ti kapatgan a kita ti pannakaammo nga isu ti pannakaammo maipapan ken Jehova ken kadagiti nagsayaat a galadna.
Ipaganetgetyo Dagiti Galad ni Jehova
10. Ania ti saan a maawatan ti adu a tattao maipapan iti no apay nga impalubos ti Dios ti panagsagaba, ken ania a pannakaammo ti mabalin a makatulong kadakuada?
10 Bayat a tultulonganyo dagiti tattao a mangtarus no apay nga impalubos ni Jehova nga iturayan dagiti tattao ti bagida iti sidong ti impluensia ni Satanas, ipaganetgetyo dagiti nagsayaat a galad ni Jehova. Ammo ti adu a tattao a mannakabalin ti Dios; nairuamdan a makangkangngeg nga isu ti Mannakabalin-amin a Dios. Nupay kasta, mabalin a narigatda a maawatan no apay a dina usaren ti dakkel a pannakabalinna tapno pagpatinggaenna a dagus ti kinaawan hustisia ken panagsagaba. Nalabit kurang ti pannakaawatda iti dadduma pay a galad ni Jehova, kas iti kinasanto, kinahustisia, sirib, ken ayat. Ipakpakita ni Jehova dagitoy a galadna iti perpekto ken balanse a wagas. Isu a kuna ti Biblia: “Naan-anay ti aramidna.” (Deuteronomio 32:4) Kasanoyo a maipaganetget dagita a galad bayat a sungsungbatanyo dagiti saludsod a masansan a maibangon iti dayta nga isyu? Usigentayo ti sumagmamano a pagarigan.
11, 12. (a) Idi nagbasol da Adan ken Eva, apay a saanda a mabalin a mapakawan? (b) Apay a ti basol ket saan nga agnanayon a panuynoyan ni Jehova?
11 Apay a saan a basta pinakawan latta koman ni Jehova da Adan ken Eva? Saan a pulos nga agaplikar ti pammakawan iti kaso da Adan ken Eva. Nagbasolda a sipapakinakem yantangay perpektoda idi inkeddengda a laksiden ti kinasoberano ni Jehova ken akseptaren ti panangiwanwan ni Satanas. Di pakasdaawan nga awan man la ti pagilasinan a nagbabawi dagita a rebelde. Nupay kasta, no agimtuod dagiti tattao no apay a saan ida a pinakawan ni Jehova, mabalin a pampanunotenda no apay a di pay la inkompromiso bassit ni Jehova dagiti pagalagadanna sa binaybay-anna latta koman ti basol ken iyaalsa. Ti sungbat ket nainaig unay iti galad a nagpateg iti mismo a kinadios ni Jehova—ti kinasantona.—Exodo 28:36; 39:30.
12 Namin-adun nga ipagpaganetget ti Biblia ti kinasanto ni Jehova. Ngem nakalkaldaang ta manmano a tattao iti daytoy dakes a lubong ti addaan pannakaawat iti dayta a galad. Ni Jehova ket nadalus, nasin-aw, ken naisina manipud iti amin a basol. (Isaias 6:3; 59:2) No maipapan iti basol, inyurnosna ti maysa a pamay-an a mangabbong iti dayta, a mangpunas iti dayta, ngem dina panuynoyan dayta iti agnanayon. No ti basol ket agnanayon a panuynoyan ni Jehova, awan ti namnamatayo iti masanguanan. (Proverbio 14:12) Iti tiempo nga inkeddengna, isublinto ni Jehova ti nasantuan a kasasaad ti intero a sangaparsuaan. Sigurado dayta agsipud ta dayta ti pagayatan Daydiay Nasantuan.
13, 14. Apay nga inkeddeng ni Jehova a saanna nga insigida a papatayen dagiti rebelde idiay Eden?
13 Saan kadi a kabaelan ni Jehova a dadaelen latta koman dagiti rebelde idiay Eden sa mangparsua manen iti kasukatda? Kabaelanna la ketdi nga aramiden dayta; ket asidegen nga usarenna ti pannakabalinna a mangdadael iti amin a nadangkes. Ngem nalabit pampanunoten ti dadduma, ‘Apay ngarud a dina inaramid dayta idinto ta taltallo pay la idi ti managbasol iti uniberso? Saan kadi a dayta koma ti nanglapped iti panagsaknap ti basol ken iti amin a rigat a makitkitatayo iti lubong?’ Apay a saan nga inkeddeng ni Jehova nga aramiden dayta? Kuna ti Deuteronomio 32:4: “Amin a daldalanna kinahustisia.” Talaga a nakapatpateg ken Jehova ti kinahustisia. Kinapudnona, “ni Jehova ket managayat iti kinahustisia.” (Salmo 37:28) Gapu iti panagayatna iti kinahustisia, saan nga insigida a dinadael ni Jehova dagiti rebelde idiay Eden. Apay?
14 Ti iyaalsa ni Satanas ti nangkuestion iti kinaumiso ti kinasoberano ti Dios. Ti kinahustisia ni Jehova ti nangtignay kenkuana a mangted iti gundaway tapno ti karit ni Satanas ket masungbatan iti wagas a naibasar iti kinahustisia. Saan koma a nasungbatan dayta a karit no insigida a pinatayna dagiti rebelde, nupay nainkalintegan koma dayta. Dayta ti ad-adda koma a mangpaneknek a mannakabalin-amin ni Jehova, ngem saan a ti pannakabalinna ti makukuestion. Kanayonanna, imbaga ni Jehova ti panggepna kada Adan ken Eva. Maaddaanda iti annak ken punnuenda ti daga, iturayanda dayta, agraman dagiti amin a parsua iti dayta. (Genesis 1:28) No basta dinadael lattan ni Jehova da Adan ken Eva, awanen ti pagmamaayan ti impakaammona a panggepna maipapan kadagiti tattao. Saan a pulos nga ipalubos ni Jehova nga agbanag a kasta gapu ta isu ket Dios ti kinahustisia, kanayon a matungpal ti panggepna.—Isaias 55:10, 11.
15, 16. No mangisingasing dagiti tattao kadagiti dadduma a “solusion” iti karit a napataud idiay Eden, kasanotay a matulongan ida?
15 Adda kadi siasinoman iti uniberso a nasirsirib ngem ni Jehova, a makabael a mangrisut iti dayta nga iyaalsa? Nalabit mangisingasing ti dadduma a tattao kadagiti bukodda a “solusion” a pangrisut iti iyaalsa idiay Eden. Ngem no kasta ti aramidenda, saan kadi nga ipaspasimudaagda a nalalaingda nga agpanunot kadagiti nasaysayaat a pamay-an a mangrisut iti dayta nga isyu? Nalabit nga aramidenda dayta buyogen ti nasayaat a motibo, ngem awananda iti pannakaawat ken nakaskasdaaw a kinasirib nga adda ken Jehova. Idi nagsurat ni apostol Pablo kadagiti Kristiano idiay Roma, imbuksilanna ti kinasirib ti Dios, agraman ti “sagrado a palimed” maipapan ti panggep ni Jehova a mangusar iti Mesianiko a Pagarian a mangsubbot iti matalek a sangatauan ken mangsantipikar iti nasantuan a naganna. Aniat’ panangmatmat ni Pablo iti kinasirib ti Dios a nangbukel iti dayta a panggep? Ingngudo ti apostol ti suratna babaen kadagitoy a sasao: “Iti Dios, a maymaysa a masirib, maadda koma ti dayag baeten ken Jesu-Kristo iti agnanayon. Amen.”—Roma 11:25; 16:25-27.
16 Naawatan ni Pablo a ni Jehova ket “maymaysa a masirib”—ti mismo a kasisiriban iti uniberso. Siasino ngata nga imperpekto a tao ti makapanunot iti nasaysayaat a pamay-an tapno marisut ti aniaman a problema—nangruna iti karirigatan a karit maipapan iti kinaumiso ti kinasoberano ni Jehova? Masapul ngarud a tulongantayo dagiti tattao a maaddaan met iti nauneg a panagraem iti Dios a “masirib iti puso.” (Job 9:4) No naun-uneg ti pannakaawattayo iti kinasirib ni Jehova, ad-adda nga agtalektayo a naan-anay a ti wagas ti panangrisutna iti bambanag ti kasayaatan.—Proverbio 3:5, 6.
Panangapresiar iti Kangrunaan a Galad ti Dios
17. Kasano a ti naun-uneg a pannakaawat iti panagayat ni Jehova tulonganna dagidiay saan a makatarus no apay nga ipalpalubos ti Dios ti panagsagaba?
17 “Ti Dios ket ayat.” (1 Juan 4:8) Babaen kadagita a nabagas a sasao, inyam-ammo ti Biblia ti kangrunaan a galad ni Jehova, ti galad a makaay-ayo nga ad-adda ngem iti dadduma a galadna ken ti nangnangruna a makaliwliwa kadagiti marigrigatan gapu iti panagraira ti kinadakes. Impakita ni Jehova ti ayatna iti tunggal wagas ti panangrisutna iti makadadael unay nga epekto ti basol kadagiti pinarsuana. Ti ayat ti nangtignay ken Jehova a mangted iti namnama iti managbasol nga annak da Adan ken Eva, isu nga impaayanna ida iti pamay-an tapno makaadanida Kenkuana ken maaddaanda iti naanamongan a relasion Kenkuana. Ayat ti nangtignay iti Dios a mangipaay iti subbot a mangiruangan iti naan-anay a pannakapakawan dagiti basol ken pannakaisubli ti perpekto ken agnanayon a biag. (Juan 3:16) Ayat met laeng ti nangtignay kenkuana tapno anusanna ti sangatauan ken ipaayanna ti adu a tattao iti gundaway tapno laksidenda ni Satanas ken pilienda ni Jehova kas ti Soberanoda.—2 Pedro 3:9.
18. Naparaburantayo a maaddaan iti ania a nauneg a pannakaawat, ket ania ti usigentayo iti sumaganad nga artikulo?
18 Idi nagbitla ti maysa a pastor iti tallaong a nanglagip iti anibersario ti maysa a makadidigra nga iyaatake dagiti terorista, kinunana: “Ditay ammo no apay nga ipalpalubos ti Dios nga agtultuloy ti kinadakes ken panagsagaba.” Anian a nakalkaldaang! Ditay kadi maragsakan ta naparaburantayo iti nauneg a pannakaawat iti dayta a banag? (Deuteronomio 29:29) Ken yantangay masirib, nalinteg, ken naayat ni Jehova, ammotayo nga asidegen a pagpatinggaenna ti amin a panagsagaba. Kinapudnona, inkarina nga aramidenna dayta. (Apocalipsis 21:3, 4) Ngem kasano ngay dagiti natayen kabayatan ti adun a siglo? Awan kadin ti namnama agpaay kadakuada gapu iti wagas ti panangrisut ni Jehova iti isyu a napataud idiay Eden? Adda. Ti ayat ti nangtignay kenkuana a mangbendision met kadakuada babaen ti panagungar. Dayta ti mausig iti sumaganad nga artikulo.
Ania ti Sungbatyo?
• Ania ti mabalintay nga ibaga iti maysa a tao a mangyimtuod no apay nga ipalpalubos ti Dios ti panagsagaba?
• Kasano a maiparangarang ti kinasanto ken kinahustisia ni Jehova iti wagas a panangtamingna kadagiti rebelde idiay Eden?
• Apay a rumbeng a tulongantayo dagiti tattao a maaddaan iti naun-uneg a pannakaawat iti ayat ni Jehova?
[Ladawan iti panid 21]
Birokenyo dagidiay marirriribukan gapu iti panagsagaba ditoy lubong
[Dagiti Ladawan iti panid 23]
Dagiti matalek a kas kada David ken Habakuk nangyimtuodda kadagiti napasnek a saludsod iti Dios