KINAGAGET
Agtultuloy ken awanan sarday a panagaramid; naanus a panagregget; kinasaet; kinaregta. Gagangay a daytoy a termino ipasimudaagna ti nainkalintegan ken makagunggona a panagbannog. Kasungani dayta ti kinaginad wenno kinasadut.
Iti Biblia, ti Griego a sao a naipatarus a “kinagaget” ket ad-adda a naipatarus a “kinapasnek,” “napudno a kinapasnek,” wenno “napasnek a panagregget.” No dadduma, ti kaipapanan dayta a sao ket ipaawat met ti patarus a “naganat,” “napartak,” wenno “kinaokupado.”
Naparegta dagiti Kristiano a saan koma a managbaybay-a ti imada wenno mabannogda iti panagaramid iti naimbag. Kinuna ni Pablo: “Tarigagayanmi a tunggal maysa kadakayo mangipakita iti isu met laeng a kinagaget [iti literal, “partakan”] tapno maaddaan iti naan-anay a pammasiguro iti namnama agingga iti panungpalan, tapno saankayo nga agbalin a nabuntog, no di ket agbalin a tumutulad kadagidiay a babaen ti pammati ken kinaanus tawidenda dagiti kari.” (Heb 6:11, 12; idiligyo ti Pr 10:4; 12:24; 18:9.) Imbaga ni Jesu-Kristo kadagiti adalanna: “Umagawakayo a sipipinget a sumrek iti akikid a ruangan, agsipud ta, ibagak kadakayo, adu ti agtarigagayto a sumrek ngem saandanto a kabalinan.” (Lu 13:24) Ni Pablo a mismo ket ulidan iti kasta a nainget a panagagawa. (Col 1:29; 2Te 3:7-9) Siempre, ni Jehova ken ti Anakna ti kangrunaan nga ulidan ti kinagaget.—Jn 5:17; Isa 40:26.
Tapno malapdan ti panagbalinda a di aktibo wenno di nabunga, masapul nga ‘ipaay [dagiti Kristiano] ti isuamin a napasnek a panagreggetda kas sungbat [kadagiti kari ti Dios],’ nga iti pammatida inayonda ti kinasingpet, pannakaammo, panagteppel, panagibtur, nadiosan a debosion, nainkabsatan a panagayat, ken ayat. (2Pe 1:4-8) Agkasapulan daytoy iti patinayon a panangiparangarang iti nagaget a panagregget (2Ti 2:15; Heb 4:11) ken di mabingay nga atension. (Heb 2:1) Kaaduan a bileg a maaramat iti daytoy ket dumteng babaen iti tulong ti espiritu ni Jehova. Awanen ti sasao nga ad-adda pay a makaipaganetget iti panagkasapulan nga agbalin a nagaget no di ti pammatigmaan ni apostol Pablo a: “Dikay agpalpallailang iti aramidyo. Nasgedkayo koma iti espiritu. Agpaadipenkayo ken Jehova.” Daytoy a panangikalikagum iti kinagaget ket agaplikar iti isuamin a ministro (“addatayo koma iti daytoy a ministerio”), ngem ad-adda a makalikaguman dayta kadagidiay mangidadaulo kadagiti gimong ken ar-aramid iti kongregasion, ta “ti mangidadaulo, aramidenna koma dayta iti napudno a kinapasnek.”—Ro 12:7, 8, 11.
Iti kongregasion Kristiano, masapul a nagaget dagidiay napanglaw a maipaayan iti namaterialan a tulong manipud kongregasion. Ti Nainkasuratan a prinsipio ket: “No ti asinoman saanna a kayat ti agtrabaho, saan met koma a mangan.” Dagidiay saan nga agtartrabaho ket nabagbagaan nga agbalin nga okupado, “a babaen ti panagtrabaho buyogen ti kinaulimek manganda koma iti taraon a mateggedda a mismo.” (2Te 3:10-12) Ti maysa nga agkunkuna a Kristiano nga agkedked wenno mangliway a mangipaay iti kasapulan ti sangakabbalayanna “pinaglikudanna ti pammati ket isu dakdakes ngem ti tao nga awanan pammati.” (1Ti 5:8) Uray dagiti balo a babbai a marigrigat, sakbay a maikabilda iti listaan ti kongregasion maipaay iti regular a probision ti namaterialan a tulong, kasapulan idi nga addaanda iti rekord ti Nakristianuan nga aramid, a ‘sinurotda a sigaganetget ti tunggal naimbag nga aramid.’—1Ti 5:9, 10.
Dagiti Gunggona ti Kinagaget. Agkakabaknang a gunggona ti dumteng iti daydiay nagaget a tao agpadpada iti agdama ken iti masanguanan. “Ti ima daydiay nasaet isunto ti mangpabaknang iti maysa.” (Pr 10:4) “Ti ima dagidiay nasaet isunto ti agturay.” (Pr 12:24) “Mapalukmegto” ti kararuada. (Pr 13:4) Ti annak ti nagaget nga asawa a babai ‘bumangonda ket kunaenda nga isu naragsak; ti makinkukua kenkuana bumangon, ket isu idaydayawna.’ Naiwaragawag maipapan kenkuana: “Ikkanyo iti bunga dagiti imana, ket isu idaydayaw koma dagiti aramidna uray kadagiti ruangan.” (Pr 31:28, 31) Kangrunaan iti amin, naibaga kadagiti naespirituan a kakabsat ni Kristo: “Aramidenyo ti amin a kabaelanyo tapno pagbalinen a sigurado maipaay iti bagbagiyo ti pannakaayab ken pannakapiliyo; ta no itultuloyyo nga aramiden dagitoy a banag saankayto a pulos mapaay. Iti kinapudnona, no kasta sibabaknang a pannakaipaayto kadakayo ti iseserrek iti agnanayon a pagarian ti Apo ken Manangisalakantayo a ni Jesu-Kristo.”—2Pe 1:10, 11.