Watchtower ONLINE A LIBRARIA
Watchtower
ONLINE A LIBRARIA
Iloko
  • BIBLIA
  • PUBLIKASION
  • GIMONG
  • g91 7/8 pp. 12-13
  • Ti Panangidepensa iti Bagi—Pagpatinggaan ti Kristiano?

Awan video-na ti napilim.

Pasensiakan, adda problema iti pannakai-load ti video.

  • Ti Panangidepensa iti Bagi—Pagpatinggaan ti Kristiano?
  • Agriingkayo!—1991
  • Subtitulo
  • Umasping a Material
  • Sarangten ti Ranggas Babaen ti Ranggas?
  • Tiempo iti Pannakilaban?
  • Kaano a Nainkalintegan ti Panangidepensa iti Bagi?
    Agriingkayo!—2008
  • Rumbeng Kadi nga Adalek ti “Self-Defense”?
    Agriingkayo!—1995
  • Salsaludsod Dagiti Agbasbasa
    Ti Pagwanawanan Mangibumbunannag iti Pagarian ni Jehova (Pagadalan)—2017
  • Kinaranggas—Masalaknibanyo ti Bagiyo
    Agriingkayo!—1989
Kitaen ti Ad-adu Pay
Agriingkayo!—1991
g91 7/8 pp. 12-13

Ti Panangmatmat ti Biblia

Ti Panangidepensa iti Bagi—Pagpatinggaan ti Kristiano?

“Apay agbiag iti buteng? Adalem dagiti praktikal a pamay-an iti panangidepensam iti bagim ken tapno malisiam ti maysa a dumarop. Dagiti nalaka ken epektibo a teknik iti panangidepensa ket detaliado a naidemostrada. Daytoy makaisuro a video ti mamaggiddiat iti panagbalin a biktima wenno makalasat.”—Pakaammo iti video para ti panangidepensa iti bagi.

DI MASAPUL nga ilawlawag ti bileg ti kasta a video nga aglako itatta. Idiay siudad ti Philadelphia, Pennsylvania, E.U.A., adu a grupo dagiti agtutubo ti mangipukpukkaw iti “Maluen, maluen, maluen” bayat a sukisukenda dagiti lansangan iti panagsapsapul kadagiti biktima a takawanda. “Ti panagbuteng iti krimen apektaranna wenno impluensiaanna ti kababalin ti intero a siudad” ti Rio de Janeiro, inreport ti magasin a Time. Idiay Hong Kong dagiti naarmasan a panagtakaw ken panangpaltog mapaspasamaken kadagiti lugar a sadiay dandani di pagaammo ti naranggas a krimen—uray pay itatta.

Mangngeg met dagiti umas-asping a report iti sangalubongan. Agraman ania a resulta? “Us-usigen dagiti umili ti risgo iti ibabales,” kuna ti Newsweek. Dagiti Kristiano saanda a natalged manipud kadagitoy “napeggad a panawen a narigat a pakilangenan,” ngem ti ibabales pudno kadi nga ipakitana “ti naggiddiatan iti panagbalin a biktima wenno makalasat”?—2 Timoteo 3:1.

Sarangten ti Ranggas Babaen ti Ranggas?

‘No agawitak iti paltog,’ patien dagiti dadduma, ‘natalgedakto. Isut’ unaak sakbay a siak ti unaanna. Nalabit isut’ makigtotko!’ Nupay kasta, saan a kastat’ kasimplena.

Ni George Napper, taga Atlanta, Georgia, E.U.A., komisionado iti talged ti publiko, kunana: “Ti panangikut iti paltog kaipapananna ti panagsagana a mangibtur iti resulta ti panangpapatay iti sabali a tao.” Sisasagana kadi ti maysa a Kristiano a mangibtur ti kasta a pagbanagan, a mangiraman iti panagbasol iti dara?—Idiligyo ti Numeros 35:11, 12.

Kasta met, ibilin ti Sao ti Dios, ‘Pitpitenyo dagiti kampilanyo a tadtadem ti arado’ ken “Sapulenyo ti talna ket surotenyo dayta.” (Mikias 4:3; 1 Pedro 3:11) Kasano a sapulen dagiti Kristiano ti pannalaknib dagiti armas ket kagiddan dayta agbiagda a maitunos kadagiti pagalagadan ti Biblia? Iti aniaman a kaso, mabalin nga al-alisto ti dumardarup iti iyaatakena ngem ti biktima.

Iniddian ni Jesus ti naarmasan nga ibabales. Pudno, binilinna dagiti apostolna nga agawitda iti dua a kampilan idiay minuyongan ti Getsemane, ti lugar a pakaarestuanna. Ngem apay nga inaramidna daytoy? Ti kaadda dagiti armas, ngem saan a panangusar kadagitoy, sibibileg nga indemostrana a dagiti pasurot ni Jesus saanda nga agtungpal iti panangusar kadagiti makapapatay nga ig-igam. Mabigbig a gapu ta ik-ikutanna ti maysa nga igam, siraranggas nga inusar ni Pedro dayta. Isut’ sipipigsa a binabalaw ni Jesus gapu iti daytoy a nadarasudos a tignay kadagiti sasao nga: “Amin dagidiay agaramat iti kampilan mapapataydanto iti kampilan.”—Mateo 26:36, 47-56; Lucas 22:36-38, 49-51.

‘Dayta amin ket naimbag ken agaplikar iti panangikut iti armas,’ mabalin a kunaen ti maysa. ‘Ngem ti ngay panangadal iti martial arts maipaay ti panangidepensa iti bagi, kas ti judo, karate, ken kendo?’ Imtuodenyo ti bagiyo, saan kadi a ti panggep daytoy nga adal ket makilaban wenno saktan dagiti dadduma? Ken saan aya a ti kasta a panagsanay talaga a katupagna ti panangarmas iti maysa iti makapapatay? (1 Timoteo 3:3) Uray dagiti sesion ti panagsanay nagbanag kadagiti serioso a pannakadangran ken ipapatay.

Ti Roma 12:17-19 itukonna ti nainsiriban a balakad maipapan itoy: “Saanyo ibales iti uray siasino ti dakes iti dakes. . . . No mabalin, ken kas iti kabaelanyo, agbiagkayo a makikappia iti isuamin a tattao. Saankayo a bumalbales, ay-ayatek, no di ket bay-anyo laeng ti pungtot; ta adda a naisurat: ‘Kuak ti pammales; Siak supapakakto, kuna ni Jehova.’” Ti Griego a sao nga inusar ni Pablo para ti “dakes” (ka·kosʹ) mabalin a kaipapananna met ti “makapapatay, makadadael.” Gapuna, dagiti Kristiano masapul a liklikanda ti amin a panangpampanunot a mangdadael wenno mangdangran iti sabali a tao.

Imbes a siraranggas nga iyebkas ti pungtotna, ti maysa a Kristiano naan-anay nga agtalek iti Dios, a nangikuna iti ilina: “Ta daydiay a mangsagid kenka sagidenna ti bukel ti matak.” Maitunos iti daytoy, ikari ti Dios a ‘pukawenna ti dakes’ iti naikeddeng a tiempona.—Zacarias 2:8; Salmo 145:20.

Tiempo iti Pannakilaban?

‘Diak isuko ti kuartak no diak makilaban!’ situtured nga ipukkaw ti dadduma. Ni Dick Mellard, manedier ti edukasion idiay National Crime Prevention Institute, impakdaarna: “Ti lumaban ket kasisigud ti tao, ngem ti kasisigud ti tao ket mapapataynaka iti di umiso a kasasaad.” Adu a manangsada ti sipepeggad a naarmasan ken madandanagan ken nerbioso. Mabalin a mapasubli ti napukaw a kuarta, ngem ti ngay napukaw a biag? Maikari aya dayta iti risgo?

Ipaay ni George Napper daytoy a balakad: “Nalabit ti kasayaatan a pamay-an a panangsalaknib iti bagi ket babaen ti panangirisgoyo iti sanikuayo imbes a ti biagyo. Kaaduan a mannanakaw ken birkog addada tapno agtakaw, saan a tapno pumatay.” Kadagiti kasasaad a ti maysa a tao ket basta agresibo a naasitgan wenno no ti kuartana ti makalikaguman, ti nainsiriban a prinsipio ket: “Ti adipen ti Apo saanna a rebbeng ti mannakiringgor.”—2 Timoteo 2:24.a

Saan a pacifismo daytoy, ti paglintegan iti di ibabales iti sidong ti aniaman a kasasaad. Idiay Exodo 22:2, 3, nailadawan ti maysa a situasion a sadiay ti maysa a mannanakaw ti napapatay bayat a sumsumrek iti pagtaengan ti maysa kabayatan ti aldaw. Ti kakasta a panangidepensa naibilang a katupag ti pammapatay, yantangay mabalin koma a nabigbig ti mannanakaw ken naiyeg iti umiso a pangukoman tapno mabista. Ngem kabayatan ti rabii, mabalin a narigat a mabigbig ti bumalay ti manangloob tapno siguruenna dagiti panggepna. Gapuna, ti tao a mangpapatay iti manangloob idiay kasipngetan ket naibilang a di nakabasol.

Gapuna, ti Biblia dina itandudo dagiti naranggas a panangpanggep a mangidepensa iti bagina. Iti dina panangsuporta iti pacifismo, nupay kasta, ipakita ti Biblia nga adda tiempo iti panangidepensa ti maysa iti bagi. Mabalin a salakniban dagiti Kristiano ti bagbagida, dagiti pamiliada, wenno dadduma nga agkasapulan ti panangidepensa a maibusor kadagiti agresibo a pisikal nga iyaatake.b Ngem saanda nga umun-una nga umatake, ken saanda met a bumales iti pisikal tapno isalakan dagiti sanikuada. Saanda nga agawit kadagiti armas iti pananginanama iti maysa a pannakaatake; imbes ketdi, ikagumaanda ti “agbiag a mannakikappia.”—2 Corinto 13:11.

[Dagiti Footnote]

a Nupay ti konteksto ipakitana a ni Pablo tuktukoyenna ditoy dagiti insao a pannakiringgor, ti orihinal a sao a naipatarus a “pannakiringgor” (maʹkhe·sthai) ket gagangay a naitimpuyog iti naarmasan wenno mano-mano a pannakilaban.

b Ti maysa a babai nga agpegpeggad iti pannakarames rebbeng nga agikkis ken usarenna ti aniaman a pamay-an a kabaelanna a mangresistir iti panagdenna iti sekso.—Deuteronomio 22:23-27.

[Ladawan iti panid 12]

Betrayal of Christ, by Albrecht Dürer, 1508

    Dagiti Publikasion iti Iloko (1984-2025)
    Ag-log out
    Ag-log in
    • Iloko
    • I-share
    • Ti Kayatmo a Setting
    • Copyright © 2025 Watch Tower Bible and Tract Society of Pennsylvania
    • Pagannurotan iti Panagusar
    • Pagannurotan iti Kinapribado
    • Privacy Settings
    • JW.ORG
    • Ag-log in
    I-share