Malagipyo Kadi?

Nagustuanyo kadi ti nabasayo kadagiti kallabes a ruar ti Pagwanawanan? Bueno, kitaenyo no masungbatanyo dagiti sumaganad a saludsod:

• Apay a masiguradotayo a ti kaitungpalan ti padto iti Isaias 65:17-19 a “baro a langlangit ken baro a daga” ket saan la nga idi nagsubli dagiti Judio manipud pannakakautibo?

Agsipud ta iti surat da apostol Pedro ken Juan idi umuna a siglo K.P., impatuldoda ti masanguanan a kaitungpalanna, a pakairamanan dagiti dumtengto pay laeng a bendision. (2 Pedro 3:13; Apocalipsis 21:1-4)​—4/15, panid 10-12.

• Ania ti mabalin a namunganayan dagiti sarsarita ti nagkauna a Grecia maipapan kadagiti naranggas a tattao a madidios?

Mabalin a dagitoy dagiti napapintas ken naballikug a kinapudno maipapan kadagiti anghel a naglasag sakbay ti Layus sa naaddaan iti naranggas ken nalulok a panagbiag ditoy daga. (Genesis 6:1, 2)​—4/15, panid 27.

• Ania dagiti peggad a rumbeng a liklikan dagiti nataengan a Kristiano no adda kasar?

Nasken a liklikan dagiti naariwawa ken nalabes a ragragsak, a mabalin a resulta ti nawadwad unay nga arak ken naalas a sala agraman nakapigpigsa a musika. Malaksid no naibaga a maawis amin iti paboda, saan koma a dumar-ay dagiti di naawis. Siguraduen ti nobio a presente koma dagiti mapiar a Kristiano agingga a malpas ti rambak iti mayanatup nga oras.​—5/1, panid 19-22.

• Ania ti ipasimudaag ti panangdakamat ti Salmo 128:3 kadagiti annak a ‘kas saringit ti kaykayo ti olibo’ iti aglikmut ti lamisaan ti maysa a tao?

Masansan nga agsaringit ti kababaan a paset ti puon ti kayo nga olibo. No saanen a nabunga ti kangrunaan a puon gapu ta lakayen, mabalin nga agserbi dagiti saringitna kas natitibker a puon iti aglikmutna. Umasping iti dayta, maragsakan dagiti nagannak no kaduada dagiti nabunga nga annakda nga agserserbi ken Jehova.​—5/15, panid 27.

• Ania dagiti sumagmamano a pagimbaganna kadagiti ubbing no nasayaat ti kasasaad ti pamilia?

Agserbi dayta a pundasion iti umiso a panangmatmat iti autoridad, panangipateg kadagiti umiso a prinsipio, ken naragsak a relasion kadagiti sabsabali. Ti kasta a kasasaad ti tumulong met kadakuada nga agbalin a gayyem ti Dios.​—6/1, panid 18.

• Iti maysa a pagilian iti Adayo a Daya, ania ti naaramid tapno maipabigbig kadagiti amin a Kristiano nga agkakabsatda?

Naiparegta iti amin a kongregasion a dida koma awagan ti dadduma a tao kadagiti pammadayaw a titulo. Imbes ketdi, padapada koma a maawagan ti amin kas kakabsat.​—6/15, panid 21, 22.

• Awaten kadi dagiti Saksi ni Jehova dagiti agas a nagtaud iti dara?

Patien dagiti Saksi ni Jehova a ti bilin ti Biblia nga ‘umadayo iti dara’ iramanna ti di panangyalison iti interamente a dara wenno kadagiti kangrunaan a pasetna (plasma, nalabaga a selula, puraw a selula, ken platelet). (Aramid 15:28, 29) No maipapan kadagiti fraction a nagtaud kadagiti kangrunaan a paset ti dara, makaammo ti tunggal Kristiano nga agdesision, a laglagipenna ti bilin ti Biblia ken ti takderna iti Dios.​—6/15, panid 29-31.

• Posible kadi ita a masagrap ti talna ti panunot?

Wen. Babaen ti Biblia, iturturong ni Jesu-Kristo ti tattao iti dalan ti nasin-aw a panagdayaw ken iti talna a nadeskriber iti Isaias 32:18. Kanayonanna, dagidiay manggun-od iti kasta a talna ti addaan iti gundaway a mangtagiragsak iti manayon a talna ditoy daga kas kaitungpalan ti Salmo 37:11, 29.​—7/1, panid 7.

• Ania ti naibanag ni George Young iti moderno a teokratiko a historia?

Sipud idi 1917, insilnagna ti lawag ti naimbag a damag ti Pagarian iti adu a pagilian. Gapu iti panangasabana, nadanonna ti Canada, dagiti isla ti Caribbean, Brazil ken dadduma a pagilian ti South America agingga iti Central America, España, Portugal, ti maaw-awagan idi nga Union Soviet, ken ti Estados Unidos.​—7/1, panid 22-7.

• Ania ti kayat a sawen ti 1 Corinto 15:29 no kunana a dadduma ti “mababautisaran agpaay iti panggep a panagbalin a natnatay”?

Ti punto isu daytoy: no mapulotan dagiti Kristiano iti nasantuan nga espiritu, mairaremda iti panagbiag a mangiturong iti ipapatay ken panagungar iti nailangitan a biag.​—7/15, panid 17.

• Ania ti inaramid ni apostol Pablo kabayatan dagiti maaw-awagan kas naulimek a tawtawenna?

Mabalin a timmulong a nangipasdek wenno nangpabileg kadagiti kongregasion idiay Siria ken Cilicia. Mabalin nga iti daytoy a panawen a napasamak ti adu kadagiti rigat a nadakamat iti 2 Corinto 11:23-27, a mangipakita nga isut’ okupado iti ministeriona.​—7/15, panid 26, 27.

• Ania ti tumulong tapno agbalintayo a nainkalintegan kadagiti namnamaentayo?

Laglagipentayo a mannakaawat ni Jehova. Makatulong ti panagkararag kenkuana tapno agbalin a natimbeng ti panagpampanunottayo, ken panangipakita dayta iti kinaemma. Makatulong met no mangala iti sabali a kapanunotan babaen ti pannakisarita iti nataengan a gayyem.​—8/1, panid 29, 30.