No Apay a Kasapulan ti Sangatauan ti Katulongan

‘NAKUSPAGAK idi a manangidadanes.’ Kasta ti inamin ti maysa idi a natangsit ken naranggas a tao. Nakaro idi a managtabbaaw ken sidadangkok a pinarigat ken inrurumenna dagiti managbuteng iti Dios a pasurot ni Jesu-Kristo. Ngem siyayaman a kinunana: “Nupay kasta, naipakitaanak iti asi.” Nupay kasla narigat a patien, daytoy panatiko ken manangidadanes a tao ket nagbalin a matalek a Kristiano, ni apostol Pablo.​—1 Timoteo 1:12-16; Aramid 9:1-19.

Saan nga amin ket nakaaramid kadagiti bambanag nga inaramid idi ni Pablo. Ngem aglabsingtayo amin kadagiti pagalagadan ti Dios. Apay? Gapu ta “amin nagbasol ken agkurang iti dayag ti Dios.” (Roma 3:23) Maysa pay, nalaka ti malapunos iti pannakaupay, a nalabit panunotentayo a nagdakestayo tapno kaasian ti Dios. Bayat nga ut-utobenna dagiti dakes a tarigagayna, kinuna a mismo ni Pablo: “Nakaay-ay-ayak a tao! Siasinonto ti mangalaw kaniak iti bagi nga agpaspasar itoy nga ipapatay?” Sinungbatanna met la ti saludsodna idi insuratna: “Pagyamanan iti Dios baeten ken Jesu-Kristo nga Apotayo!”​—Roma 7:24, 25.

Kasano a maawat ti nalinteg a Namarsua dagiti managbasol? (Salmo 5:4) Imutektekanyo ta kinuna ni Pablo: “Pagyamanan iti Dios baeten ken Jesu-Kristo nga Apotayo.” Maysa pay a kinaasian ti Dios ti nagkuna: “No ti asinoman makaaramid iti basol, addaantayo ti katulongan iti Ama, ni Jesu-Kristo, daydiay nalinteg. Ket isu maysa a pangikappia a sakripisio a maipaay kadagiti basoltayo, ngem saan a maipaay kadatayo laeng no di ket maipaay met iti intero a lubong.”​—1 Juan 2:1, 2.

Apay a naawagan ni Jesu-Kristo a “katulongan iti Ama”? Ken kasano a ni Jesus ti “pangikappia a sakripisio” nga agpaay kadagiti basol?

No Apay a Kasapulan ti Katulongan

Immay ni Jesus ditoy daga “tapno itedna ti kararuana a subbot a kasukat dagiti adu.” (Mateo 20:28) Ti subbot ket gatad a maibayad tapno maisubli, wenno maruk-atan, ti maysa a tao wenno banag. Ti Hebreo a verbo a naipatarus kas “subbot” ipasimudaagna ti panangabbong kadagiti basol. (Salmo 78:38) Ti Griego a sao, kas iti masarakan iti Mateo 20:28, ket nausar kangrunaanna a tumukoy iti gatad a maibayad tapno masubbot dagiti naibalud gapu iti gubat wenno tapno mawayawayaan dagiti tagabo. Tapno mataginayon ti kinahustisia, mabayadan ti maysa a banag iti katupagna a gatad.

Nagbalin nga ad-adipen ti sangatauan gapu iti iyaalsa ti immuna a tao iti Dios. Kas insalaysay ti Genesis kapitulo 3, pinili ti perpekto a tao a ni Adan ti agsukir ken Jehova a Dios. Iti dayta nga inaramidna, inlakona ti bagina ken dagiti di pay naipasngay a kaputotanna iti pannakaadipen iti basol ken ipapatay. Napukaw ngarud ni Adan ti sagut a perpekto a biag nga agpaay koma kenkuana ken iti amin nga annakna.​—Roma 5:12, 18, 19; 7:14.

Iti nagkauna nga Israel, inyurnos ti Dios a maidaton dagiti animal kas pangabbong iti basbasol dagiti tattao. (Levitico 1:4; 4:20, 35) Agparang a ti biag ti naidaton nga animal ti kasukat ti biag ti nakabasol. (Levitico 17:11) Gapuna, “ti aldaw ti pannakaabbong” ket maawagan met kas “aldaw ti pannakasubbot.”​—Levitico 23:26-28.

Yantangay nababbaba dagiti animal no maidilig iti tao, “ti dara dagiti toro ken dagiti kalding saanna a mabalin nga ikkaten [a naan-anay] dagiti basol.” (Hebreo 10:1-4) Masapul a ti sakripisio ket katupag ti pateg ti napukaw ni Adan tapno umdas ken permanente a mangabbong wenno mangikkat iti basbasol. Kalikaguman ti pagtimbangan ti hustisia nga adda maysa a perpekto a tao (ni Jesu-Kristo) a mangbalanse iti napukaw ti maysa pay a perpekto a tao (ni Adan). Ti laeng biag ti maysa a perpekto a tao ti makasubbot kadagiti annak ni Adan iti nakaadipenanda a nangilakuan kadakuada ti immuna nga amada. Mataginayon ti pudno a kinahustisia no maipaay ti “biag iti biag.”​—Exodo 21:23-25.

Nasentensiaan ni Adan iti ipapatay idi nagbasol. Yantangay isu ti pagtaudan dagiti di pay naipasngay nga annakna, matayda met ngarud a kas kenkuana. Situtulok a di nagpamilia ti perpekto a tao a ni Jesus, “ti maudi nga Adan.” (1 Corinto 15:45) Idi natay kas perpekto a tao a daton, adda kenkuana dagiti posible koma nga annakna. No kasta, maikuna a kaduana a natay dagiti tattao nga agtaud koma kenkuana. Imbilang ni Jesus a kas annakna dagiti managbasol ken matmatay a kaputotan ni Adan. Insakripisiona ti kalinteganna a maaddaan iti bukod a pamilia. Iti panangidatonna iti perpekto a biagna kas tao, sinubbot ni Jesus ti sangatauan a nagtaud ken Adan tapno agbalinda kas pamiliana, ket Isu ti “Agnanayon nga Ama[da].”​—Isaias 9:6, 7.

Ti pangsubbot a daton ni Jesus ti nangiwaya iti dalan tapno magun-od ti sangatauan ti asi ti Dios ken ti biag nga agnanayon. Gapuna, insurat ni apostol Pablo: “Dagiti isupapak ti basol isu ti ipapatay, ngem ti sagut nga ipaay ti Dios isu ti agnanayon a biag babaen ken Kristo Jesus nga Apotayo.” (Roma 6:23) Ditay malapdan ti mangidayaw ken Jehova gapu iti ayat ken asina a nainaig iti subbot, nga impaayna babaen ti dakkel a panagsakripisio iti biangna ken iti dungdungnguenna nga Anak. (Juan 3:16) Ket sigurado a nagbalin ni Jesus a “katulongan iti Ama” idi a napagungar iti nailangitan a biag ken indatagna iti Dios idiay langit ti pateg ti daton a pangsubbotna.a (Hebreo 9:11, 12, 24; 1 Pedro 3:18) Ngem kasano a katulongantayo ita ni Jesu-Kristo idiay langit?

[Footnote]

[Ladawan iti panid 4]

Ti perpekto a natauan a biag ni Jesus ti nagbalin a pangsubbot kadagiti annak ni Adan