Kapitulo 20—Sangalubongan a Kinatalged iti Sidong ti “Prinsipe ti Kappia”
Ti Naragsak a Natauan a Pamilia iti Sidong ti Baro nga Ama
1. Apay a ti tema maipapan ti baro a kinaama ket naimbag a damag iti natauan a pamilia?
KALPASAN ti Armagedon, ti maikadua a kinaama ti agur-uray iti intero a sangatauan. Talaga a daytat’ naimbag a damag! Ti baro a kinaama ti mamagbalin a posible ti biag nga awan inggana iti natauan a kinaperpekto iti maysa a sangalubongan a paraiso, ta ti baro nga Ama ti natauan a pamilia a mismo ket awan ipapatayna. Isut’ addaan ti pannakabalin a mangipaay iti perpekto a biag kadagidiay amin a tagibienna a kas annakna ditoy daga.
2. Apay a ti baro a kinaama ket kasapulan?
2 Ti baro a kinaama ket kasapulan agsipud ta ti sangatauan napukawna ti orihinal a kinaamana, ti kinaama ti Namarsua ti tao. Ti linea nga agtaray manipud ken ni Jesus nga agsubli iti umuna a tao, ni Adan, ti agpatingga babaen ti panangitedna kadatayo iti daytoy a listaan: “Ni Cainan, nga anak ni Enos, nga anak ni Set, nga anak ni Adan, nga anak ti Dios.”—Lucas 3:37, 38.
3. Kasano a nakalkaldaang ti pannakapukaw ti kinaama ni Jehova a Dios iti intero a sangatauan?
3 Ti pannakapukaw iti kinaama ni Jehova a Dios napaneknekan a nakalkaldaang iti isuamin a sangatauan. Dagiti kapuonan ni Adan natawidda ti panangilunod ni patay. Nalawag ti pannakaisalaysay dayta a banag idiay Roma 5:12: “Gapuna no kasano ti iseserrek ti basol ditoy lubong gapu iti maymaysa a tao, ken ti ipapatay gapu iti basol, ket iti kasta immay kadagiti isuamin a tattao agsipud ta isuda nagbasolda amin.” Dayta “maymaysa a tao” ket isu ni Adan, ket gapu iti sipapakinakem a panagbasolna, napukawna ti kinaama ti Namarsua, ni Jehova.
4. Iti sidong ti makin-kinaama ti immayan ni Adan ken ti sangatauan?
4 Makin-kinaama ngarud ti immayan ni Adan? Makin-kinaama ti nangiyeganna iti lubong ti sangatauan? Dayta ti kinaama daydiay nangallukoy kenkuana a rummuar iti pamilia ti amin a natulnog nga annak ti Dios idiay langit ken ditoy daga. Dayta ti kinaama daydiay nangibaga ti immuna a kinaulbod, ni Satanas a Diablo. Kasanot’ panangaramid dayta a bumusbusor ken ni Jehova iti daytoy?
5. (a) Ania nga ahensia ti inusar ni Satanas a Diablo tapno allilawen ti asawa ni Adan a sumukir iti Dios? (b) Apay ken kasano nga immay ni Adan iti sidong ti naan-anay a responsibilidad nga aggapu iti panagtignayna?
5 Idiay 2 Corinto 11:3 imbutaktak ni apostol Pablo dayta a banag, a nagsurat: “Kas iti panangulbod daydi uleg ken ni Eva iti kinasikapna, sisisikap, inusar ni Satanas ti maysa nga uleg idiay Eden a mangibaga ti immuna a kinaulbod ken awan panagsussuspetsana nga Eva, a siuulbod a pinabasolna ni Jehova a Dios iti panagulbod. (Genesis 3:1-7; Juan 8:44) Saan a tinubngar ni Adan ti asawana. Saan a nagkitakit a nakipangan a kadua ti asawana ket saanna nga insalbar ti adda a kasasaad. Ti ingagara a panagbasolna ti nakatnaganna kadagiti im-ima ti Uleg. Iti panangisaad ti basol iti rebbengna, kuna ti 1 Timoteo 2:14: “Ket ni Adan saan a pinaulbod, ngem ti babai idinto a naulbod nakaaramid ti basol.”
Daydiay Maikari iti Kinaama
6, 7. Iti ania a kinaama ti nangipakitaan ni Jesus a daytat’ mabalin a maitalek kenkuana, ket kasano a sinunuo daytoy ti padto ti Biblia?
6 Iti saanna a panagdayaw “iti dios daytoy a sistema,” pinaneknekan ni Jesus nga isu Daydiay pakaitalkan ti maikadua a kinaama ti natauan a pamilia. (2 Corinto 4:4; Mateo 4:1-11; Lucas 4:1-13) Manipud natauan a pannakaiyanakna idi 2 K.K.P., isu Daydiay pakaiyaplikaran ti padto ti Isaias 9:6:
7 “Ta naiyanak ti maysa nga ubing kadatayo, maysa nga anak a lalaki ti naited kadatayo; ket ti naprinsipean a panagturay maiparabawto iti abagana. Ket ti naganna magaladanto iti Nakaskasdaaw a Mammagbaga, Mannakabalin a Dios, Agnanayon nga Ama, Prinsipe ti Kappia.” Gapuna ti “Prinsipe ti Kappia” ti addaan sabali a nasken nga akem a maipaay iti sangatauan—daydiay panagbalin a kas “Agnanayon nga Ama.”
8. Apay a nabaelan ni Jesus ti nagtignay a nagbalin nga “Agnanayon nga Ama” iti sangatauan, ken kasano a pinatalgedan daytoy ni apostol Pablo?
8 Ti Anak ti Dios agbalinto nga “Agnanayon nga Ama” ti natauan a pamilia, nga isut’ nangipaayanna ti perpekto a natauan a biagna kas daton. Isut’ kas insurat ni apostol Pablo: “Ta no gapu iti babak daydi maysa matayda dagiti adu, ad-adda pay a ti di kaikarian a kinamanangngaasi ti Dios ken ti sagut gapu iti di kaikarian a kinamanangngaasi daydi maysa a tao a ni Jesu-Kristo wimmadwadda kadagiti adu. Iti kasta ngarud, gapu iti maysa a salungasing nagpaay kadagiti amin a tattao ti pannakadusa, kasta met gapu iti maysa nga aramid ti kinalinteg nagpaay kadagiti amin a tattao a pakapalintegan ti biag.”—Roma 5:15, 18.
9. Kasano a ni Jesus nagbalin a maikadua nga Adan iti sangatauan, ngem manipud iti ania a sakup ti pagtignayanna kas Ama ti sangatauan?
9 Gapuna, adda ti naan-anay a pannakatimbeng dagitoy napateg a bambanag. Daydiay nangaramid ti “maysa a salungasing” ket isu daydiay immuna a tao ditoy daga, ni Adan. Ti “maysa nga aramid ti kinalinteg” ket inaramid daydiay kakaisuna a sabali a perpekto a tao, ni Jesus. Daytoy ti nangipalubos ti pannagbalinna nga “Agnanayon nga Ama” iti kapuonan ni managsalungasing nga Adan. Iti daytoy a pamay-an isu ti nagbalin a maikadua nga Adan iti natauan a pamilia. Ti pannakaidaton ti perpekto a natauan a biagna ken ti panangidatagna iti dayta natauan a kalinteganna iti biag iti Naindaklan nga Ukom idiay langit ti mamagbalin nga imposible kenkuana ti pannakapagserbina ditoy daga kas agnanayon nga Ama ti sangatauan. Idi napagungar manipud kadagiti natay, isut’ nagsubli iti lugar dagiti espiritu ket naitan-ok iti makanawan ti Nangpagungar kenkuana. Gapuna adda a naibaga: “Kasta met nga adda a naisurat: ‘Ti umuna a tao, ni Adan, immay nagbalin a kararua a sibibiag.’ Ti maudi nga Adan nagbalin a maysa nga espiritu a mambiag.” (1 Corinto 15:45) Ti baro a manangtagibi nga Ama ti sangatauan, ti mangitedto iti dayta ti kasayaatan a pangrugian iti biag nga adda a mabalin.
Dagiti Immuna a Natauan a Parparsua a Maiputot
10. Asinoda dagiti umuna a natauan a parparsua nga imputot daytoy mangtagibi nga Ama?
10 Ti “Agnanayon nga Ama,” ni Jesu-Kristo nga Ari, idemostrananto no asino dagiti umuna nga iputotna. Kasano? Babaen ti panangispalna a mailasat “iti dakkel a rigat” ti dedikado a biag dagiti minilmilion nga adda a sibibiag ita. Isuda ti “dakkel a bunggoy” dagiti “sabsabali a karnero.”—Apocalipsis 7:9, 14.
11. Ania a naindagaan a gundaway ti adda iti sanguanan dagiti kimmarnero a makalasat “ti dakkel a rigat”?
11 Dinto maartapan ti naindagaan a gundaway a naikabil iti sanguanan ti “dakkel a bunggoy” kalpasan “ti dakkel a rigat.” Naisalaysay kas paset “ti pagilasinan” daytoy “panungpalan toy sistema dagiti bambanag,” dagiti piguratibo a kalding iti pangngarig ni Jesus magupeddanto manipud iti daytoy a daga, a kaipapananna ti agnanayon a pannakadadaelda. Ngem saanto a kasta ti “dakkel a bunggoy” dagiti kimmarnero a siayat ken sisungsungdo a nagaramid ti naimbag iti natda kadagiti naespirituan a “kakabsat” ni Kristo nga adda pay ditoy daga. (Mateo 25:31-46) Ti pannakaispal dagita a “karnero” a silalawag agingga iti ballasiw ti “dakkel a rigat” ken agingga iti Milenio a Panagturay ti naipadto a “Prinsipe ti Kappia” ti mamagbalinto a posible kadagitoy a makalasat a sumrek kadagiti bembendision iti sakupen ti Pagarian. Isudanto dagiti naindagaan nga iturayan ti “Prinsipe ti Kappia.”
12. Ania a sasao ni Jesus maipapan iti panagungar ti mangipamatmat a ti biag nga awan inggana ti naikabil iti sanguanan dagidiay makastrek iti naindagaan a sakup ti Pagarian?
12 Iti daytanto a tiempo dagiti sasao nga inyebkas ni Jesus sakbay a pinagungarna ni Lazaro manipud ken patay ti matungpalto kadagidiay sumrek ti naindagaan a sakupen ti Pagarian. Kunana: “Siak ti panagungar ken ti biag. Ti mamati kaniak, uray no matay, agbiagto pay; ket siasinoman nga agbiag ken mamati kaniak, saanto a matay a pulos.” (Juan 11:25, 26) Gapu ti panagtulnogda kenkuana, maragpatdanto ti perpekto a natauan a biag iti naindagaan a sakupen ti Ari. Uray pay daydiay simpatetiko a nagaramid ti dakes a natay a kaasibay ni Jesus idiay Kalbario ti maparaburanto ti gundaway a makastrek idiay Paraiso. (Lucas 23:43) Ni Jesus ti agbiagto a maitunos iti amin nga ipaspasimudaag ti naganna a “Agnanayon nga Ama.”
Ti Naragsak a Panginanamaan dagiti Natay
13. Ti panagungar dagiti natauan a natnatay pagbalinenna a posible para iti ania a nalatak a tattao idi ugma a makita iti naindagaan a sakup ti Pagarian?
13 Ni Jesus, ti katatan-okan unay a kapuonan ni Abraham, kunana a daytoy nga amana, ti anakna nga Isaac, ken ti apokona a Jacob ti makitanto iti naindagaan a sakop ti Pagarian ti Dios. (Mateo 22:31, 32) Daytoy ti mapagbalinto a posible babaen ti panagungar. Kas kinuna ni Jesus, amin dagiti natauan a natnatay kadagiti tanem a pakalaglagipan mangngegdanto ti timek ti Anak ti Dios ket rummuardanto. Ti masanguanandanto kalpasan dayta ti agpannuray iti kurso ti panagtignayna nga alaenda.—Juan 5:28, 29; Apocalipsis 20:12-15.
14. Ania ti maaramidan a nasapa a maipaay kadagidiay nakalinea iti naindagaan a panagungar, ken asino dagidiay makiraman nga umuna kadagitoy a panagsagana?
14 Dakkelto a panagsagana ti maaramid a maipaay kadagidiay iti sangatauan a rummuarto manipud kadagiti tanem nga agturong iti biag ditoy daga iti sidong ti Pagarian ti “Agnanayon nga Ama.” Dagitoy a panagsagana ti umunanto nga ibaklay dagiti makalasat “ti gubat ti dakkel nga aldaw ti Dios a Mannakabalin-amin” inton Armagedon. (Apocalipsis 16:14, 16) No manonto ti bilang ti “dakkel nga umariwekwek” dagiti “sabsabali a karnero” ti “Prinsipe ti Kappia” iti dayta a tiempo ditay pay ammo ita, ngem addanto met ti nawadwad a maipaay iti dayta a trabaho.
15. Adunto ti agserbi iti ania a naisangsangayan a kapasidad iti sidong ti manangtagibi nga Ama ti sangatauan?
15 Ti Salmo 45 ti naiturong iti daytoy a “Prinsipe ti Kappia” kas Ari, ket yantangay isunto ti agbalin nga “Agnanayon nga Ama” ti sangatauan, kuna daytoy a Salmo maipapan kenkuana: “Maisandi kadagiti dadakkelmo dagitinto annakmo, isuda a pagbalinemto a piprinsipe iti amin a daga.” (Salmo 45:15) Ngem uray pay sakbay ti panagungar dagidiay matalek nga “ammana,” dagiti lallaki a miembro ti “dakkel nga umariwekwek” dagiti makalasat ti Armagedon ti nadutokandanton kadagita a naprinsipean a saad. Rinibo kadagitoy manamnama a makalasat iti Armagedon ti agserserbi itan kas dagiti panglakayen kadagiti nasurok a 52,000 a kongregasion dagiti Saksi ni Jehova, a mangay-aywan kadagiti naespirituan nga intereses kadagiti bukodda a kongregasion.
16. (a) Iti sidong ti naprinsipean a panangaywan, dagiti makalasat iti Armagedon agserbidanto iti ania a trabaho? (b) Ania a salsaludsod ti rumsua maipapan ti urnos a panagsubli dagiti natay?
16 Iti sidong ti naprinsipean a panangaywan, dagiti makalasat iti Armagedon agserbidanto a buyogen ti naregta a panagtutunos. No anianto ti instruksion nga awatento “dagiti piprinsipe iti amin a daga” manipud iti nailangitan a “Prinsipe ti Kappia” ti makitanto pay, a mangtedto kadagiti makaparagsak a kapadasan nga agpaay kadagiti amin a padada a makalasat iti Armagedon. Panunotenyo amin dagiti kawes a masapul a maisagana a pagbado dagiti agsublinto a natay nga umno a pagan-anay! Panunotenyo amin dagiti abasto ti taraon a maipaay wenno maipempen kadagiti bodega! Dagiti luglugar a pagtaengan kasapulanto met a maisagana. Anian a makaparagsak a tiempo daytanto kadagidiay amin a makipaset iti daytoy a trabaho ti panagsagana! Asinodanto dagiti umuna nga agsubli? Agsublidanto aya iti paatras nga urnos iti ipapanda idiay tanem a pakalaglagipan? Dagitinto martir a da Abel ken Enoc, nga innala ti Dios, agraman kada Noe, Abraham, Isaac, Jacob, ken amin dagiti matalek a mammadto, magunggonaandanto aya a naisangsangayan babaen iti umuna a pannakapagungarda?
17. Asino ti mangikeddeng ti urnos a panagsubli dagiti natay iti biag ditoy daga, ket ania a titulo a naipadto maipapan kenkuana ti mangipamatmat iti abilidadna a mangtaming kadagiti responsabilidadna?
17 Ti “Prinsipe ti Kappia” ti makaammo ket isunto ti mangikeddeng iti daytoy. Ket isunton ti naan-anay a makabael iti responsabilidadna kas ti baro nga Ama iti nasubbot a sangatauan. Ti sabali pay kadagiti naipadto a titulona ket “Mannakabalin a Dios.” Ipasimudaag dayta nga isut’ agbalin a mannakabalin, Daydiay napigsa. Ti demostrasion ti kinadiosna ti mannakabalinto ta pagungarennanto amin dagiti nasubbot a natay, a malagip dagiti indibidual a nagnagan ken personalidadda. (Juan 5:28, 29; Aramid 10:42) Mawarwarnanto a naan-anay amin dagiti perdi a naaramidan ni Satanas a Diablo bayat ti napalabas a 6,000 a tawtawen a kaadda ti tao.
18. (a) Kasano a ti pannakasapul ti panagbalin ni Adan nga Ama ni Jesu-Kristo ti naikkat? (b) Kasano a napagbalin ni Jesus a maikadua nga ama dagiti putot ni Adan?
18 Ti immuna nga Adan impatawidna ti pannakailunod ken patay kadagiti isuamin a putotna. Ni kadi Adan nagbalin nga ama met daydi tao a Jesu-Kristo? Saan, ni Jesus ket awanan ti natauan nga ama no di ket naiyanak manipud iti maysa a birhen a napagsikog babaen ti panangiyalis ti Dios ti puersa ti biagna manipud yan dagiti espiritu. Gapuna ni Adan a managbasol ket saan a nagbalin nga ama dayta naindagaan nga Anak ti Dios. Ti maikadua nga Adan, nupay kasta, ti nagbalin a mambiag nga espiritu. Iti daytoy a kapasidad tinungpalna ti padto ni Isaias ket nagbalin a ti “Agnanayon nga Ama” kadagiti putot ti umuna Adan, nga isu ti ginatangna ken tinagibina nga agpaay ti panggep a panangted ti perpekto a natauan a biag iti paraiso a daga.
19. Iti ania a baro a pannakirelasion iti natauan a rasa ti umayan ni Jehova a Dios, ket ania a gakat ni Satanas a Diablo ti matungdayto?
19 Iti kasta a pamay-an ti nailangitan nga Ama ni Jesu-Kristo ket agbalinto a nailangitan a Lolo ti naisubli a natauan a pamilia. Gapu itoy a rason ti natauan a pamilia sumrekto iti baro a pannakirelasion iti Namarsua ti langit ken daga. Nikaanoman awanto uray bassit a posibilidad a mapaayto ni Jehova iti orihinal a panggepna. Gapuna natungdayto ni Jehova ti narungsot, nadangkes a gakat ni Satanas a Diablo. Amin dagiti nasubbot a natauan a pamilia ti maiyegto iti pannakaammo iti daytoy a kinapudno. Anian a nakaskasdaawto nga aldaw inton ni Jesu-Kristo alaennanto ti kinaama ti natauan a pamilia tapno padakkelennanto ti sangatauan idiay Paraiso a naisubli ditoy daga!