Ti Kongregasion Idaydayawna Koma ni Jehova
“Ideklarakto ti naganmo iti kakabsatko; iti tengnga ti kongregasion idaydayawkanto babaen iti kanta.”—HEBREO 2:12.
1, 2. Apay a makagunggona unay ti kongregasion, ken ania ti kangrunaan nga akem dayta?
ITI intero a pakasaritaan ti tao, dagiti indibidual ket naaddaanda iti kakadua ken nakasarakda iti kinatalged iti uneg ti kangrunaan a grupo—ti pamilia. Ngem tinukoy ti Biblia ti sabali pay a grupo a sadiay, riniwriw nga indibidual iti intero a lubong ti mangtagtagiragsak iti kasayaatan a panagkakadua ken kinatalged. Dayta ti kongregasion Kristiano. Pasetka man wenno saan ti pamilia nga addaan iti kinasinged ken panagtitinnulong, maapresiarmo ken rumbeng nga apresiarem ti impaay ti Dios iti kongregasion wenno ti impaayna babaen dayta nga urnos. Siempre, no makitimtimpuyogkan iti maysa a kongregasion dagiti Saksi ni Jehova, mapaneknekam la ketdi ti nabara a panagkakadua ken kinatalged a tagtagiragsakem sadiay.
2 Ti kongregasion ket saan laeng a sosial a grupo. Dayta ket saan a maysa a timpuyog iti komunidad wenno gunglo a buklen dagiti tattao nga addaan iti agpapada a kasasaad iti biag, pagesman nga isport, wenno pagpalpaliwaan. Imbes ketdi, ti kangrunaan a makagapu a nayurnos ti kongregasion ket tapno maidaydayaw ni Jehova a Dios. Nabayagen a kasta ti akemna, kas ipaganetget ti libro a Salmo. Iti Salmo 35:18, mabasatayo: “Idayawkanto iti dakkel a kongregasion; iti tengnga ti ili a nakaad-adu idaydayawkanto.” Maitunos iti dayta, paregtaennatayo ti Salmo 107:31, 32: “O dagiti tattao agyamanda koma ken Jehova gapu iti naayat a kinamanangngaasina ken gapu iti nakaskasdaaw nga ar-aramidna iti annak ti tattao. Ket isu idayawda koma iti kongregasion dagiti umili.”
3. Sigun ken Pablo, ania ti akem ti kongregasion?
3 Ti Kristiano a ni apostol Pablo intampokna ti sabali pay a napateg nga akem ti kongregasion idi tinukoyna ti “sangakabbalayan ti Dios, nga isu ti kongregasion ti sibibiag a Dios, maysa nga adigi ken sadiri ti kinapudno.” (1 Timoteo 3:15) Ania a kongregasion ti tuktukoyen ni Pablo? Kadagiti ania nga anag nga inusar ti Biblia ti sao a “kongregasion”? Ania ti rumbeng nga impluensia ti kongregasion iti biag ken kadagiti inanamaentayo? Tapno maammuantayo, sukimatentayo nga umuna dagiti nakausaran ti sao a “kongregasion” iti Sao ti Dios.
4. Iti ania nga anag a kaaduanna a nausar ti sao a “kongregasion” iti Hebreo a Kasuratan?
4 Ti nagtaudan ti Hebreo a sao a masansan a maipatarus a “kongregasion” kaipapananna ti “agtataripnong” wenno ‘aguummong.’ (Deuteronomio 4:10; 9:10) Ti salmista inusarna ti “kongregasion” mainaig kadagiti anghel sadi langit, ken mabalin a mausar dayta a mangdeskribir iti grupo dagiti nadangkes a tattao. (Salmo 26:5; 89:5-7) Nupay kasta, kaaduanna nga usaren dayta ti Hebreo a Kasuratan a mangtukoy kadagiti Israelita. Kinuna ti Dios nga ‘agbalinto ni Jacob a kongregasion dagiti ili,’ ket napasamak dayta. (Genesis 28:3; 35:11; 48:4) Naayaban wenno napili dagiti Israelita tapno agbalinda a “kongregasion ni Jehova,” ti “kongregasion ti pudno a Dios.”—Numeros 20:4; Nehemias 13:1; Josue 8:35; 1 Samuel 17:47; Mikias 2:5.
5. Ania a Griego a sao ti kaaduanna a naipatarus a “kongregasion,” ken iti ania nga anag a mabalin a mausar dayta a sao?
5 Ti Griego a sao para iti kongregasion ket ek·kle·siʹa, a nagtaud iti dua a Griego a sao a kaipapananna naayaban wenno naummong. Mabalin a tumukoy dayta iti sekular a grupo, kas iti “gimong” nga insungsong ni Demetrio maibusor ken Pablo idiay Efeso. (Aramid 19:32, 39, 41) Ngem ti Biblia kaaduanna nga usarenna dayta a pangtukoy iti kongregasion Kristiano. Dadduma nga agipatpatarus inusarda ti sao a “simbaan” para iti dayta a sao, ngem ibaga ti The Imperial Bible-Dictionary a dayta a sao “dina pulos . . . tukoyen ti aktual a pasdek a paggigimongan dagiti Kristiano para iti publiko a panagdayawda.” Ngem makapainteres ta iti Kristiano a Griego a Kasuratan, maammuantayo a di kumurang nga uppat nga anag ti nakausaran ti sao a “kongregasion.”
Ti Napulotan a Kongregasion ti Dios
6. Ania ti inaramid da David ken Jesus iti kongregasion?
6 Iti panangtukoyna ken Jesus babaen iti kinuna ni David a masarakan iti Salmo 22:22, insurat ni apostol Pablo: “‘Ideklarakto ti naganmo iti kakabsatko; iti tengnga ti kongregasion idaydayawkanto babaen iti kanta.’ Gapuna [ni Jesus] rebbengenna ti agbalin a kas iti ‘kakabsatna’ iti amin a bambanag, tapno isu agbalin a naasi ken matalek a nangato a padi iti bambanag maipapan iti Dios.” (Hebreo 2:12, 17) Ni David intan-okna ti Dios iti tengnga ti kongregasion ti nagkauna nga Israel. (Salmo 40:9) Ngem ania a kongregasion ti tuktukoyen ni Pablo idi kinunana a ni Jesus intan-okna ti Dios “iti tengnga ti kongregasion”? Ania a kongregasion?
7. Iti ania a kangrunaan nga anag nga inusar ti Kristiano a Griego a Kasuratan ti sao a “kongregasion”?
7 Napateg ti mabasatayo iti Hebreo 2:12, 17. Ipakitana a nairaman ni Kristo kas kameng ti maysa a kongregasion a nangipakaammuanna iti nagan ti Dios kadagiti kakabsatna. Siasino dagita a kakabsat? Isuda dagidiay mangbukel iti paset ti “bin-i ni Abraham,” dagiti napulotan iti espiritu a kakabsat ni Kristo, a “makiramraman iti nailangitan a pannakaayab.” (Hebreo 2:16–3:1; Mateo 25:40) Wen, ti kangrunaan a tukoyen ti “kongregasion” iti Kristiano a Griego a Kasuratan ket isu ti ragup a grupo dagiti napulotan iti espiritu a pasurot ni Kristo. Dagitoy a 144,000 a napulotan ti mangbukel iti “kongregasion dagiti inauna a naipasalistan iti langlangit.”—Hebreo 12:23.
8. Kasano nga impakpakauna ni Jesus ti pannakabuangay ti kongregasion Kristiano?
8 Impasimudaag ni Jesus a mabuangayto dayta a “kongregasion” Kristiano. Agarup makatawen sakbay ti ipapatayna, kinuna ni Jesus iti maysa nga apostol: “Sika Pedroka, ket iti daytoy a dakkel a bato bangonekto ti kongregasionko, ket dagiti ruangan ti Hades saandanto a maringbawan dayta.” (Mateo 16:18) Agpadpada a naawatan a siuumiso da Pedro ken Pablo a ni Jesus a mismo ti naipadto a dakkel a bato. Insurat ni Pedro a dagidiay naibangon kas “sibibiag a batbato” ti maysa a naespirituan a balay iti rabaw ti dakkel a bato, ni Kristo, ket ‘maysa nga ili nga agpaay a naisangsangayan a sanikua tapno ideklarada a sisasaknap dagiti kinatan-ok’ Daydiay nangayab kadakuada.—1 Pedro 2:4-9; Salmo 118:22; Isaias 8:14; 1 Corinto 10:1-4.
9. Kaano a nangrugi a mabuangay ti kongregasion ti Dios?
9 Kaano a nangrugi a nabuangay kas kongregasion Kristiano dayta nga “ili nga agpaay a naisangsangayan a sanikua”? Idi Pentecostes 33 K.P., idi imparukpok ti Dios ti nasantuan nga espirituna kadagiti adalan a naummong idiay Jerusalem. Iti dayta nga aldaw, nangipaay ni Pedro iti makagutugot a palawag iti maysa a grupo dagiti Judio ken proselita. Adu ti natignay ti pusoda gapu iti ipapatay ni Jesus; nagbabawida ket nabautisaranda. Mabasatayo iti salaysay ti Biblia a tallo ribu ti nangaramid iti dayta, ket insigida a nagbalinda a paset ti baro ken dumakdakkel a kongregasion ti Dios. (Aramid 2:1-4, 14, 37-47) Nagtultuloy a dimmakkel dayta agsipud ta umad-adu a Judio ken proselita ti nangawat iti kinapudno a saanen a ti nainlasagan nga Israel ti kongregasion ti Dios. Imbes ketdi, dagiti napulotan a Kristiano a mangbukel iti naespirituan nga “Israel ti Dios” ti nagbalin a pudno a kongregasion ti Dios.—Galacia 6:16; Aramid 20:28.
10. Ania ti relasion ni Jesus iti kongregasion ti Dios?
10 Ti Biblia masansan nga idumana ni Jesus kadagiti napulotan, kas iti sasao a “maipapan ken Kristo ken iti kongregasion.” Ni Jesus ti Ulo dayta a kongregasion dagiti Kristiano a napulotan iti espiritu. Insurat ni Pablo a ti Dios “pinagbalinna [ni Jesus] nga ulo iti amin a bambanag iti kongregasion, a dayta ti bagina.” (Efeso 1:22, 23; 5:23, 32; Colosas 1:18, 24) Iti agdama, bassit laengen a natda dagiti napulotan a kameng dayta a kongregasion ti adda ditoy daga. Ngem masiguradotayo nga ay-ayaten ida ni Jesu-Kristo, nga Ulo dayta a kongregasion. Ti riknana kadakuada ket nadeskribir iti Efeso 5:25: “Ti Kristo inayatna met ti kongregasion ken inyawatna ti bagina a maipaay iti dayta.” Ay-ayatenna ida agsipud ta sireregta nga idatdatonda iti Dios “ti sakripisio ti panagdaydayaw, kayatna a sawen, ti bunga dagiti bibig a mangaramid iti publiko a panangideklara iti naganna,” a kas iti inaramid ni Jesus idi adda ditoy daga.—Hebreo 13:15.
“Kongregasion”—ti Dadduma Pay nga Anagna
11. Iti ania a maikadua nga anag a nausar ti sao a “kongregasion” iti Kristiano a Griego a Kasuratan?
11 No dadduma, usaren ti Biblia ti sao a “kongregasion” iti mas limitado wenno espesipiko nga anag, a saan nga agaplikar iti intero a grupo ti 144,000 a napulotan a mangbukel iti “kongregasion ti Dios.” Kas pagarigan, kastoy ti insurat ni Pablo iti maysa a grupo dagiti Kristiano: “Liklikanyo ti agbalin a pakaigapuan ti pannakaitibkol kadagiti Judio kasta met kadagiti Griego ken iti kongregasion ti Dios.” (1 Corinto 10:32) Nalawag a no adda idi di umiso a maaramid ti maysa a Kristiano iti nagkauna a Corinto, mabalin a pakaitibkolan dayta ti dadduma. Ngem mabalin kadi a pakaitibkolan dayta ti siasinoman wenno ti amin a Griego, Judio, wenno napulotan iti dayta a tiempo agingga iti kaaldawantayo? Siempre saan. Agparang ngarud nga iti dayta a bersikulo, “ti kongregasion ti Dios” ket agaplikar kadagiti Kristiano nga agbibiag iti maysa a partikular a tiempo. Maitunos iti dayta, ti maysa mabalin nga ibagana a ti Dios iwanwanwan, tultulongan, wenno bembendisionanna ti kongregasion, kayatna a sawen, ti amin a Kristiano iti maysa a partikular a tiempo, sadinoman ti ayanda. Wenno mabalintayo a tukoyen ti kinaragsak ken talna a gagangay iti kongregasion ti Dios ita, kayatna a sawen, iti intero a panagkakabsat dagiti Kristiano.
12. Iti ania a maikatlo nga anag ti nakausaran ti “kongregasion” iti Biblia?
12 Ti maikatlo nga anag nga inusar ti Biblia ti sao a “kongregasion” ket agaplikar iti amin a Kristiano iti maysa a lugar. Mabasatayo: “Ti kongregasion iti intero a Judea ken Galilea ken Samaria simrek iti maysa a panawen ti talna.” (Aramid 9:31) Saan la a maymaysa ti grupo dagiti Kristiano iti dayta a nalawa a lugar, no di ket amin dagita a grupo a masarakan iti Judea, Galilea, ken Samaria ket natukoy kas “ti kongregasion.” Gapu iti kaadu dagiti nabautisaran idi Pentecostes 33 K.P. ken di nagbayag kalpasanna, mabalin a saan la a maysa a grupo ti regular a naggigimong iti lugar ti Jerusalem. (Aramid 2:41, 46, 47; 4:4; 6:1, 7) Ni Herodes Agripa I inturayanna ti Judea agingga iti ipapatayna idi 44 K.P., ken nalawag iti 1 Tesalonica 2:14 nga adu la ketdin ti kongregasion iti Judea idi 50 K.P. Gapuna, no mabasatayo a ni Herodes ‘rangranggasanna ti sumagmamano kadagiti kameng ti kongregasion,’ mabalin a tukoyen dayta ti nasursurok ngem maysa a grupo a nagtataripnong idiay Jerusalem.—Aramid 12:1.
13. Ania ti maikapat ken gagangay nga anag ti “kongregasion” kas pannakausarna iti Biblia?
13 Maikapat, ti mas limitado ken gagangay a pakausaran ti sao a “kongregasion” ket tumukoy kadagiti Kristiano a mangbukel iti maysa laeng a lokal a kongregasion, a kas iti adda iti maysa a pagtaengan. Dinakamat ni Pablo ‘dagiti kongregasion ti Galacia.’ Saan la a maymaysa ti kongregasion iti dayta a nalawa a probinsia ti Roma. Namindua nga inusar ni Pablo ti termino a ‘dagiti kongregasion’ mainaig iti Galacia, a pakairamanan dagiti adda iti Antioquia, Derbe, Listra, ken Iconio. Nadutokan dagiti kualipikado a lallakay, wenno manangaywan, tapno agserbida kadagitoy a lokal a kongregasion. (1 Corinto 16:1; Galacia 1:2; Aramid 14:19-23) Maitunos iti Kasuratan, amin dagitoy ket “kongregasion ti Dios.”—1 Corinto 11:16; 2 Tesalonica 1:4.
14. Ania ti maikunatayo iti anag ti “kongregasion” iti sumagmamano a teksto?
14 Iti dadduma a kasasaad, babassit la ketdi dagiti grupo kadagiti Nakristianuan a gimong ta makaanayda iti maysa a pribado a pagtaengan. Kaskasdi, ti sao a “kongregasion” ket nausar a pangawag iti dadduma kadagiti kasta a grupo. Dagiti ammotayo a kasta a kongregasion ket dagiti masarakan iti balay da Aquila ken Prisca, Nimfa, ken Filemon. (Roma 16:3-5; Colosas 4:15; Filemon 2) Pakaparegtaan koma dayta dagiti medio babassit a lokal a kongregasion ita a nalabit regular nga aggigimong iti maysa a pribado a pagtaengan. Binigbig ni Jehova dagiti kasta a babassit a kongregasion idi umuna a siglo, ket sigurado nga uray met dagiti kasta a kongregasion ita, a bembendisionanna ida babaen ti espirituna.
Dagiti Kongregasion Dayawenda ni Jehova
15. Kasano a naiparangarang ti panagtignay ti nasantuan nga espiritu iti dadduma a nagkauna a kongregasion?
15 Nadakamattayo itay a kas kaitungpalan ti Salmo 22:22, dinaydayaw ni Jesus ti Dios iti tengnga ti kongregasion. (Hebreo 2:12) Kasta met ti aramiden dagiti matalek a pasurotna. Idi umuna a siglo, idi a dagiti pudno a Kristiano ket napulotan iti espiritu tapno agbalinda nga annak ti Dios ken kakabsat ni Kristo, nangrugi nga agtignay ti espiritu iti dadduma kadakuada iti dadduma pay ken naisangsangayan a pamay-an. Immawatda kadagiti milagro a sagut ti espiritu. Dadduma a pakakitaan iti kasta a sagut ket ti naisangsangayan a panagsaoda buyogen ti kinasirib wenno pannakaammo, ti pannakabalinda a mangpaimbag wenno agipadto, wenno uray pay ti abilidadda nga agsao iti dida ammo a lenguahe.—1 Corinto 12:4-11.
16. Ania ti maysa a panggep dagiti milagro a sagut ti espiritu?
16 Maipapan iti panagsao, kinuna ni Pablo: “Agkantaakto iti dayaw buyogen ti sagut ti espiritu, ngem agkantaakto met iti dayaw buyogen ti panunotko.” (1 Corinto 14:15) Nabigbigna a napateg a maawatan dagiti sabsabali ti ibagbagana tapno makasursuroda. Ti kalat ni Pablo ket tapno dayawenna ni Jehova iti kongregasion. Kastoy ti indagadagna iti sabsabali nga addaan kadagiti sagut ti espiritu: “Ikagumaanyo ti umadu kadakuada maipaay iti pannakapabileg ti kongregasion,” kayatna a sawen ti lokal a kongregasion a nangusaranda iti sagut. (1 Corinto 14:4, 5, 12, 23) Nalawag a maseknan ni Pablo kadagiti lokal a kongregasion, ta ammona nga iti tunggal maysa kadagita, maaddaan dagiti Kristiano kadagiti gundaway a mangidayaw iti Dios.
17. No maipapan kadagiti lokal a kongregasion ita, ania ti masiguradotayo?
17 Agtultuloy ti panangusar ken panangtulong ni Jehova iti kongregasion. Bembendisionanna ita ti ragup a grupo dagiti napulotan a Kristiano ditoy daga. Dayta ti ipamatmat ti nawadwad a suplay ti naespirituan a taraon nga aw-awaten ti ili ti Dios. (Lucas 12:42) Bembendisionanna ti intero a panagkakabsat iti intero a lubong. Ken bembendisionanna dagiti lokal a kongregasion, a pagdaydayawantayo iti Namarsua kadatayo babaen kadagiti aramid ken makapabileg a naespirituan a komento. Kadagita a maisursuro ken masansanaytayo tapno maidaydayawtayo ti Dios iti dadduma pay a gundaway malaksid kadagiti tiempo ti gimong iti lokal a kongregasiontayo.
18, 19. Ania ti kayat nga aramiden dagiti napasnek a Kristiano iti aniaman a lokal a kongregasion?
18 Lagipenyo nga indagadag ni apostol Pablo kadagiti Kristiano iti lokal a kongregasion ti Filipos idiay Macedonia: “Daytoy ti agtultuloy nga ikarkararagko a . . . mapnokayo koma iti nalinteg a bunga, a dayta ket babaen ken Jesu-Kristo, a pakaipadayagan ken pakaidayawan ti Dios.” Iramanna dayta ti pannakisaritada iti sabsabali, kadagiti awan pay iti uneg ti kongregasion, maipapan iti pammatida ken Jesus ken ti nakaskasdaaw a namnamada. (Filipos 1:9-11; 3:8-11) Maitunos iti dayta, kastoy ti indagadag ni Pablo kadagiti padana a Kristiano: “Baeten [ken Jesus] kankanayon koma nga idatontayo iti Dios ti sakripisio ti panagdaydayaw, kayatna a sawen, ti bunga dagiti bibig a mangaramid iti publiko a panangideklara iti naganna.”—Hebreo 13:15.
19 Maragsakankayo kadi a mangidaydayaw iti Dios “iti tengnga ti kongregasion,” kas inaramid ni Jesus, ken iti panangusar kadagiti bibigyo a mangidayaw ken Jehova kadagidiay di pay makaam-ammo ken agdaydayaw kenkuana? (Hebreo 2:12; Roma 15:9-11) No dadduma, ti personal a sungbattayo ket mabalin nga agpannuray iti panangmatmattayo maipapan iti akem ti lokal a kongregasiontayo iti panggep ti Dios. Iti sumaganad nga artikulo, usigentayo no kasano nga iturturong ken us-usaren ni Jehova ti lokal a kongregasion ken no ania ita ti rumbeng nga akem dayta iti biagtayo.
Malagipyo Kadi?
• Kasano a timmaud “ti kongregasion ti Dios” a buklen dagiti napulotan a Kristiano?
• Ania ti tallo pay nga anag ti sao a “kongregasion” kas pannakausarna iti Biblia?
• Maipapan iti kongregasion, ania ti kayat nga aramiden ni David, ni Jesus, ken dagiti Kristiano idi umuna a siglo, ken ania ti rumbeng nga epekto dayta kadatayo?
[Ladawan iti panid 21]
Ni Jesus ti pamuon ti ania a kongregasion?
[Ladawan iti panid 23]
Nagtataripnong dagiti lokal a grupo dagiti Kristiano kas “dagiti kongregasion ti Dios”
[Ladawan iti panid 24]
Kas kadagiti Kristiano idiay Benin, mabalintayo a dayawen ni Jehova kadagiti panagtataripnongtayo