Selebraranyo iti Maiparbeng ti Panglaglagip

INYUSSUAT ni Jesus ti Panglaglagip idi rabii ti Nisan 14, 33 K.P.a Kalkalpasna laeng a rinambakan ti selebrasion ti Paskua a kadua ti 12 nga apostolna, gapuna a masiguradotayo ti petsa. Kalpasan ti panangpapanawna iti mangliliput, a ni Judas, “nangala [ni Jesus] iti tinapay, nangisao iti pamendision, pinispisina dayta ket intedna kadakuada, ket kinunana: ‘Alaenyo, daytoy kaipapananna ti bagik.’ Ket idi nangala iti kopa, nangipaay iti panagyaman ket intedna kadakuada, ket imminumda amin manipud iti dayta. Ket kinunana kadakuada: ‘Daytoy kaipapananna ti “darak iti tulag,” a maiparukpok maigapu iti adu.’”​—Marcos 14:22-24.

Binilin ni Jesus dagiti adalanna a laglagipenda ti ipapatayna gapu iti kinapategna. (Lucas 22:19; 1 Corinto 11:23-26) Ti sakripisiona ti kakaisuna a makasubbot iti sangatauan manipud iti lunod ti natawid a basol ken ipapatay. (Roma 5:12; 6:23) Ti tinapay ken arak nga inaramatna ti simbolo ti perpekto a bagi ken darana. Iti pannakaammotayo iti orihinal a petsa, mabalintayo a selebraran ti okasion iti katupagna nga aldaw tunggal tawen, a kas iti panangaramid iti Paskua dagiti Judio. Ngem kasapulan nga aramidentayo dayta iti maiparbeng. Apay?

Kinuna ni apostol Pablo a dagidiay makiramraman kadagiti emblema a tinapay ken arak ‘itultuloyda nga iwarwaragawag ti ipapatay ti Apo, agingga iti idadatengna.’ (1 Corinto 11:26) No kasta maipamaysa ti selebrasion iti ipapatay ni Jesus ken ti kaipapananna iti sangatauan. Ngarud pormal ti okasion, maysa a panawen tapno mennamennaen ti kinaimbag ti Dios ken ti panangapresiar a rumbeng a maadda kadatayo para ken Jehova ken iti Anakna. (Roma 5:8; Tito 2:14; 1 Juan 4:9, 10) Gapuna, namakdaar ni Pablo: “Iti kasta siasinoman a mangan iti tinapay wenno uminum iti kopa ti Apo a di maikari makabasolto maipapan iti bagi ken dara ti Apo.”​—1 Corinto 11:27.

Maiparbeng​—Kasano?

Sibabatad, saan a maragsakan ti Dios no tabbaawantayo ti okasion babaen ti pannakiraman kadagiti di maiparbeng nga aramid wenno babaen ti panangawat kadagiti pagano a kaugalian. (Santiago 1:27; 4:3, 4) Daytoy ti manglapped kadagiti popular a pasamak iti panawen ti Easter. Tapno masurot ti bilin ni Jesus a ‘panangitultuloy a panangaramid iti daytoy kas panglaglagip [kenkuana],’ kayattayo a rambakan ti Panglaglagip a kas iti panangyussuatna iti dayta. (Lucas 22:19; 1 Corinto 11:24, 25) Daytoy ti manglapped kadagiti bisti nga innayon dagiti iglesia iti Kakristianuan iti selebrasion. Bigbigen ti New Catholic Encyclopedia a “ti Misa ita naiduma unay iti nakasimsimple a seremonia a sinurot ni Kristo ken Dagiti Apostolna.” Ken babaen ti masansan a panangrambak iti Misa, nga inaldaw pay ketdi, simiasi ti Kakristianuan iti pinanggep ni Jesus ket pinagbalinda dayta a maysa a gagangay a pasamak.

Nagsurat ni Pablo kadagiti Kristiano a taga-Corinto maipapan iti pannakiraman iti di maiparbeng agsipud ta timmanor ti maysa a parikut iti kongregasion maipanggep iti Pangrabii ti Apo. Saan a rinaem ti dadduma ti kinasagradona. Intugotda ti pangrabiida ket kinnanda dayta iti kasakbayan wenno kabayatan ti gimong. Masansan a nangan ken imminumda iti aglablabes. Daytoy ti nangpadungsa kadakuada ken nangpakuneng kadagiti sentidoda. Gapu iti saan a kinaalerto iti mental ken naespirituan, ‘saanda a natarusan ti bagi’ ket iti kasta ‘nakabasolda maipapan iti bagi ken dara ti Apo.’ Kabayatanna, nagbisin ken nasinga met dagidiay di nangrabii. Kinapudnona, awan uray maysa kadakuada ti nakasagana a makiraman kadagiti emblema a buyogen ti panangapresiar ken naan-anay a pannakatarus iti kinaserioso ti okasion​—a ti selebrasion isut’ panglaglagip iti ipapatay ti Apo. Nagresulta daytoy iti pannakaukomda, agsipud ta nangipakitada iti kinaawan panagraem, panangtabbaaw pay ketdi, iti dayta.​—1 Corinto 11:27-34.

Masapul ti Pannakaawat

Dadduma ti nakiraman kadagiti emblema ti Panglaglagip nupay, kamaudiananna nautobda a dida koma inaramid ti kasta. Pinili ti Dios dagidiay maikari a makiraman kadagiti emblema ti Panglaglagip ket iti kasta addaandat’ pammaneknek iti espiritu ti Dios. (Roma 8:15-17; 2 Corinto 1:21, 22) Saan a ti personal a pangngeddeng wenno determinasionda ti mamagbalin kadakuada a maikari. Kinedngan ti Dios ti bilang dagidiay makipagturay ken Kristo kadagiti langit iti 144,000, maysa a bassit a bilang no maidilig kadagidiay amin a magunggonaan iti subbot ni Kristo. (Apocalipsis 14:1, 3) Nangrugi ti panagpili idi kaaldawan ni Jesus, isu nga ita bassit laengen dagiti makiramraman. Ken yantangay matmatay ti sumagmamano kadakuada, rebbeng a bumassit dayta a bilang.

Apay a ti maysa mabalin a sibibiddut a makiraman kadagiti emblema? Nalabit a daytat’ gapu kadagiti napalabas a narelihiosuan a panangmatmat​—nga amin a matalek mapan idiay langit. Wenno mabalin a daytat’ gapu iti ambision wenno kinaagum​—ti rikna a ti maysa ad-adda a maikari ngem iti dadduma​—ken ti panagtarigagay iti kinatan-ok. Nalabit bunga dayta iti nakaro nga emosion nga agtaud kadagiti nadagsen a parikut wenno trahedia a makagapu iti pannakapukaw ti interes ti maysa iti biag ditoy daga. Posible met a daytat’ gapu iti nadekket a pannakigayyem iti maysa nga addaan nailangitan a pannakaawag. Masapul a laglagipentayo amin a ti pangngeddeng agpannuray laeng iti Dios, saan a kadatayo. (Roma 9:16) Gapuna no nasarakan ti maysa a tao, “kalpasan ti naannad a panangsukimat,” nga isut’ talaga a saan a maiparbeng a makiraman kadagiti emblema, masapul a sumardeng itan.​—1 Corinto 11:28.

Ti namnama nga ituktukon ti Dios iti kaaduan iti sangatauan isut’ biag nga agnanayon iti paraiso a daga. Maysa dayta a dakkel a gunggona a namnamaen, ken maysa a silalaka a pakaawisantayo. (Genesis 1:28; Salmo 37:9, 11) Ditoy daga a makatakunaynayto manen dagiti matalek dagiti inay-ayatda a mapagungar ken maam-ammodanto dagiti nalinteg idi ugma, kas kada Abraham, Sara, Moises, Rahab, David, ken ni Juan a Mammautisar​—nga aminda ti pimmusay sakbay a linuktan ni Jesus ti dana nga agturong iti nailangitan a biag.​—Mateo 11:11; idiligyo ti 1 Corinto 15:20-23.

Dagidiay addaan naindagaan a namnama selebraranda a siuumiso ti Pangrabii ti Apo babaen ti itatabuno ken siraraem a panagdengngegda, uray no dida makiraman iti tinapay ken iti arak. Magunggonaanda met iti daton ni Kristo, a mamagbalin kadakuada a maaddaan iti naanamongan a takder iti sanguanan ti Dios. (Apocalipsis 7:14, 15) Bayat nga agdengngegda iti palawag, mapabileg ti panangapresiarda kadagiti sagrado a banag, ken rumang-ay ti tarigagayda nga agtalinaed a naikaykaysa iti ili ti Dios iti sadinoman.

Iti daytoy a tawen, kalpasan ti ilelennek ti init iti Martes, Abril 2, marambakanto ti Panglaglagip iti amin iti nasurok a 78,000 a kongregasion dagiti Saksi ni Jehova iti intero a daga. Tumabunokayto kadi?

[Footnote]

[Ladawan iti panid 8]

Tinawen a selebraran dagiti Saksi ni Jehova ti Panglaglagip