Agtalinaed a Sititibker Maipaay iti Inted-Dios a Wayawaya!
“Maipaay iti kasta a wayawaya linuk-atannatayo ni Kristo. Agtalinaedkayo ngarud a sititibker, ket dikay paisangol manen iti babaen ti sangol ti pannakaadipen.”—GALACIA 5:1.
1, 2. Kasano a napukaw ti inted-Dios a wayawaya?
TI ILI ni Jehova ket nawaya. Ngem saanda a sapulen ti panagwaywayas manipud iti Dios, ta kaipapanan dayta ti pannakaadipen ken Satanas. Tagipatgenda ti nasinged a relasionda ken Jehova ket agrag-oda iti wayawaya nga itedna kadakuada.
2 Dagiti immuna a nagannaktayo, da Adan ken Eva, napukawda ti inted-Dios a wayawaya babaen panagbasolda ken panagbalinda nga adipen ti basol, ipapatay, ken ti Diablo. (Genesis 3:1-19; Roma 5:12) Ay ket, inkabil ni Satanas ti intero a lubong iti managbasol a dalan agturong iti pannakadadael! Ngem dagidiay agtalinaed a sititibker maipaay iti inted-Dios a wayawaya magnada iti dalan agturong iti biag nga agnanayon.—Mateo 7:13, 14; 1 Juan 5:19.
Wayawaya Manipud Pannakaadipen
3. Ania a namnama ti intukon ti Dios idiay Eden?
3 Pinanggep ni Jehova a dagiti tattao a mangdaydayaw iti naganna nawayada koma manipud pannakaadipen ken Satanas, basol, ken ipapatay. Naidatag dayta a namnama idi imbaga ti Dios iti uleg nga inusar ni Satanas idiay Eden: “Pagginnuraenkayto iti babai ken ti kaputotam ken ti kaputotanna. Isu sugatennanto ta ulom ket sika sugatemto iti mukodna.” (Genesis 3:14, 15) Ni Jesu-Kristo, ti Bin-i manipud nailangitan nga organisasion ni Jehova, nagsagaba iti nasugat a mukod idi nga isut’ natay iti kayo, ngem impaay ngarud ti Dios ti daton a subbot tapno wayawayaanna ti mamati a sangatauan manipud basol ken ipapatay. (Mateo 20:28; Juan 3:16) Inton agangay, sugaten ni Jesus ti ulo ni Satanas, ti kadaanan nga Uleg.—Apocalipsis 12:9.
4. Ania a wayawaya ti tinagiragsak ni Abraham, ken aniat’ inkari kenkuana ni Jehova?
4 Agarup 2,000 a tawen kalpasan ti kari a naited idiay Eden, ti “gayyem ni Jehova” a ni Abraham tinungpalna ti Dios ket pinanawanna ti siudad ti Ur maipaay iti sabali a lugar. (Santiago 2:23; Hebreo 11:8) Inawatna ngarud ti inted-Dios a wayawaya ket isut’ din nagbiag kas maysa nga adipen ti lubong ti ulbod a relihion ni Satanas, narugit a politika, ken naagum a komersio. Iti Edeniko a padto, innayon ti Dios dagiti kari nga amin a pamilia ken nasion bendisionandanto dagiti bagbagida babaen ken Abraham ken ti Bin-ina. (Genesis 12:3; 22:17, 18) Ni Abraham ket adayo manipud pannakakondenar gapu ta ‘namati ken Jehova, a nangibilang kenkuana daytoy a kinalinteg.’ (Genesis 15:6) Ita, ti nasinged a pannakirelasion ken Jehova umasping unay a mangipaay iti inted-Dios a wayawaya nga adayo manipud pannakakondenar ken manipud pannakaadipen iti lubong nga adda iti pannakabalin ni Satanas.
Maysa a Makapikapik a Simboliko a Drama
5. Ti pannakaipasngay ni Isaac ket nainaig kadagiti ania a kasasaad?
5 Tapno maaddaan ni Abraham iti bin-i, ti lupes nga asawana, ni Sara, intukonna kenkuana ti adipenna a babai, ni Agar, a mangipaay kenkuana iti anak. Babaen kenkuana, pinutot ni Abraham ni Ismael, ngem isut’ saan a pinili ti Dios kas ti naikari a Bin-i. Imbes ketdi, idi ni Abraham ket agtawen ti 100 ken ni Sara ket agtawen iti 90, pinamagbalin ni Jehova a maadaanda iti maysa nga anak a lalaki a managan Isaac. Idi rinabrabak ni Ismael ni Isaac, napagtalaw ni Agar ken ti anakna, ket nabati ti putot ni Abraham ken nawaya a babai a ni Sara kas awan kainnagawna a bin-i ni Abraham. Kas ken Abraham, inalagad met ni Isaac ti pammati ket tinagiragsakna ti inted-Dios a wayawaya—Genesis 16:1-16; 21:1-21; 25:5-11.
6, 7. Iti ania ti nangallukoyan dagiti ulbod a mannursuro kadagiti dadduma a Kristiano a taga Galacia, ngem aniat’ inlawlawag ni Pablo?
6 Dagitoy a pasamak inyaniniwanda dagiti napateg unay a bambanag kadagiti managayat iti inted-Dios a wayawaya. Naibaga daytoy iti surat ni apostol Pablo kadagiti kongregasion ti Galacia agarup 50 aginggat’ 52 K.P. Idi ti bagi a manarawidwid inkeddengna a ti pannakakugit ket saan a makalikaguman kadagiti Kristiano. Ngem dagiti ulbod a mannursuro inallukoyda ti sumagmamano kadagiti taga Galacia a daytat’ napateg a parupa ti Kinakristiano.
7 Kuna ni Pablo kadagiti taga Galacia: Ti maysa a tao maibilang a nalinteg baeten iti pammati ken Kristo, saan a babaen kadagiti aramid ti Mosaiko a Linteg. (Ga 1:1–3:14) Ti Linteg dina dinadael ti kari a nainaig iti Abrahamiko a tulag no di ket imparangarangna dagiti basol ket nagserbi kas mannursuro agturong ken Kristo. (Ga 3:15-25) Babaen ipapatayna, binulosan ni Jesus dagidiay adda iti babaen ti Linteg, a namagbalin kadakuada nga annak ti Dios. Ngarud, ti isusubli iti urnos a panangrambak kadagiti aldaw, bulan, panawen, ken tawen kaipapananna ti isusubli iti pannakaadipen. (Ga 4:1-20) Kalpasanna insuraten ni Pablo:
8, 9. (a) Iti bukodyo a sasao, ilawlawag iti mabiit ti kuna ni Pablo idiay Galacia 4:21-26. (b) Iti daytoy a simboliko a drama, asino wenno ania ti inladawan ni Abraham ken ni Sara, ken asino ti naikari a Bin-i?
8 “Ibagayo kaniak, dakayo nga agtarigagay nga agbiag iti babaen ti linteg, Dikay kadi nangngeg ti Linteg? Kas pangarigan, naisurat a ni Abraham adda idi dua nga annakna a lallaki, maysa [ni Ismael] babaen iti tagabo a babai [ni Agar] ken maysa [ni Isaac] babaen iti siwayawaya a babai [ni Sara]; ngem daydi anak ti tagabo a babai naiyanak kas iti lasag, ngem daydi anak ti siwayawaya a babai gapu iti kari. Dagitoy a bambanag mangiladawanda a drama; ta dagitoy a babbai kaipapananda ti dua a tulag, ti maysa [ti Linteg ti tulag] manipud Bantay Sinai [a nangirugian ti Dios dayta a tulag kadagiti Israelitas], a mangipasngay kadagiti annak maipaay iti pannakatagabo, ket isu ni Agar. [Ti sabali a tulag ket daydiay naaramid ken Abraham maipanggep iti Bin-ina.] Ita daytoy nga Agar kaipapananna ti Sinai, bantay idiay Arabia, ket katupag ti Jerusalem ita, ta isut’ adda iti pannakatagabo agraman dagiti annakna [dagiti inapo ni Abraham, Isaac, ken Jacob]. Ngem ti Jerusalem sadi ngato ket nawaya, ket isu ti inatayo.”—Galacia 4:21-26.
9 Iti daytoy a simboliko a drama, ni Abraham inladawanna ni Jehova. “Ti agwayawaya a babai,” ni Sara, inladawanna ti “babai” ti Dios, wenno ti nasantuan nga unibersal nga organisasion. Daytat’ nangpataud ken Kristo, ti Bin-i dayta a simboliko a babai ken ti Dakdakkel nga Abraham. (Galacia 3:16) Tapno ipakitana kadagiti tattao ti dalan ti pannakaluk-at manipud narugit a panagdayaw, basol, ken ni Satanas, insuro ni Jesus ti kinapudno ken imbutaktakna ti ulbod a relihion, ngem ti Jerusalem ken dagiti annakna nagtalinaedda iti narelihiusuan a pannakaadipen gapu ta isut’ linaksidda. (Mateo 23:37, 38) Dagiti Judio a pasurot ni Jesus nagbalinda a siwayawaya manipud Linteg, a nangipabigbig iti pannakaadipenda iti kinaimperpekto, basol, ken ipapatay. Nawaya la ketdi amin a tao a mangawat ken Jesus kas Daydiay impasngay ti “babai” ti Dios nga agbalin a Mesianiko nga Ari ken ti Manangluk-at a ‘mangipakpakaammo iti wayawaya kadagiti nakayawan’!—Isaias 61:1, 2; Lucas 4:18, 19.
Liklikan ti Makaadipen a Sangol
10, 11. Manipud ania a sangol ti pannakaadipen ti nangluk-atan ni Jesus kadagiti pasurotna, ken aniada a kaas-aspingna ti makita ita?
10 Kadagidiay mangbukel iti bin-i ni Abraham a kadua ni Kristo, ti Dakdakkel nga Isaac, kuna ni Pablo: “Ti Jerusalem sadi ngato ket nawaya, ket isu ti inatayo. . . . Datayo, kakabsat, annaktayo a maipaay iti kari kas met ken Isaac idi. Ngem kas idi a ti naiyanak kas iti lasag [ni Ismael] indadanesna daydi naiyanak kas iti espiritu [ni Isaac], kasta met ita. . . . Annaknatayo, saan a ti maysa a tagabo a babai, no di ket ti babai a siwayawaya. Maipaay iti kasta a wayawaya [manipud Linteg] linuk-atannatayo ni Kristo. Agtalinaedkayo ngarud a sititibker, ket dikay paisangol manen iti sangol ti pannakaadipen.”—Galacia 4:26–5:1.
11 Asinoman kadagiti pasurot ni Jesus ti mabalin a naigalut iti sangol ti pannakaadipen no dida nagpasakop iti Linteg. Ti ulbod a relihion ket maysa nga agdama a makaadipen a sangol, ket ti Kakristianuan katupagna ti kadaanan a Jerusalem ken dagiti annakna. Ngem dagiti napulotan ket annak ida ti Jerusalem sadi ngato, ti nawaya a nailangitan nga organisasion ti Dios. Isuda ken dagiti padada a manamati nga addaan naindagaan a namnama ket saan ida a paset ti lubong ken awanda iti pannakaadipen ken Satanas. (Juan 14:30; 15:19; 17:14, 16) Gapu ta nawayawayaantayon babaen iti kinapudno ken ti daton ni Jesus, agtalinaedtayo a sititibker maipaay iti inted-Dios a wayawayatayo.
Panangala iti Takder Maipaay iti Inted-Dios a Wayawaya
12. Ania a kurso ti innala dagiti manamati, ket aniat’ masalaysay itan?
12 Minilion itan ti mangtagtagiragsak iti pudno a wayawaya kas dagiti Saksi ni Jehova. Maang-angay itan dagiti panangiyadal ti Biblia kadagiti sabsabali pay a minilion, adu kadakuada ti “naituding maipaay iti biag nga agnanayon.” Apaman panagbalinda a manamati, mangalada iti takder maipaay iti inted-Dios a wayawaya babaen panagpabautisarda. (Aramid 13:48; 18:8) Ngem aniada nga addang ti mangun-una iti Nakristianuan a panagbautisar?
13. Aniat’ nagnaigan ti pannakaammo ken bautismo?
13 Sakbay panagpabautisar, ti maysa a tao masapul a gumun-od ken agtignay maitunos iti umiso a pannakaammo kadagiti Kasuratan. (Efeso 4:13) Ngarud, kuna ni Jesus kadagiti pasurotna: “Inkayo . . . ket agaramidkayo kadagiti adalan manipud kadagiti tattao iti amin a nasion, ket bautisaranyo ida iti nagan ti Ama ken ti Anak ken ti nasantuan nga espiritu, nga isursuroyo kadakuada a salimetmetanda dagiti bambanag nga imbilinko kadakayo.”—Mateo 28:19, 20.
14. Ti pannakabautisar iti nagan ti Ama, ti Anak, ken ti nasantuan nga espiritu kalikagumanna ti ania a pannakaammo?
14 Ti pannakabautisar iti nagan ti Ama kaipapananna ti panangbigbig iti saad ni Jehova ken autoridadna kas Dios, Namarsua, ken Soberano ti Uniberso. (Genesis 17:1; 2 Ar-ari 19:15; Apocalipsis 4:11) Ti pannakabautisar iti nagan ti Anak kalikagumanna ti panangbigbig iti saad ken autoridad ni Jesus kas naitan-ok nga espiritu a parsua, ti Mesianiko nga Ari, ken daydiay baeten kenkuana ti Dios nangipaay iti “maitutop a subbot.” (1 Timoteo 2:5, 6; Daniel 7:13, 14; Filipos 2:9-11) Ti maysa a tao a nabautisaran iti nagan ti nasantuan nga espiritu bigbigenna a ti aktibo a puersa ti Dios isu ti inusar ni Jehova iti panamarsua ken iti panangpaltiingna kadagiti mannurat ti Biblia, kasta met kadagiti sabsabali pay a pamay-an. (Genesis 1:2; 2 Pedro 1:21) Siempre, adu pay ti masursuro maipapan iti Dios, ken Kristo, ken iti nasantuan nga espiritu.
15. Apay a masapul a ti maysa a tao alagadenna ti pammati sakbay pannakabautisarna?
15 Sakbay ti panagpabautisar, ti maysa a tao masapul nga alagadenna ti pammati a naibatay iti umiso a pannakaammo. “No awan ti pammati saan a mabalin nga ay-aywen [ni Jehova].” (Hebreo 11:6) Ti indibidual a mangal-alagad pammati iti Dios, ken Kristo, ken ti nadiosan a panggep tarigagayanna ti agbalin a maysa kadagiti Saksi ni Jehova, nga agbibiag maitunos iti Sao ti Dios ken addaan aduan-kaipapanan a pannakipaset iti panangikasaba iti naimbag a damag. Isut’ agsao maipapan iti dayag ti kinaari ni Jehova.—Salmo 145:10-13; Mateo 24:14.
16. Ania ti panagbabawi, ken kasano a nainaig daytoy iti Nakristianuan a panagbautisar?
16 Ti panagbabawi ket sabali pay a makiddaw sakbay panagbautisar. Ti panagbabawi kaipapananna ti “panagbalbaliw ti panunot ti maysa a tao no maipanggep iti napalabas (wenno ginagara) a tignay, wenno kababalin, maigapu iti pannakaupay wenno di pannakapnek,” wenno “panagladingit, panangbigbig iti basol, wenno pannakariribuk gapu iti inaramidna wenno dina inaramid.” Dagidi umuna-siglo a Judio kinasapulanda ti agbabawi kadagiti basolda maibusor ken Jesu-Kristo. (Aramid 3:11-26) Dadduma a manamati idiay Corinto nagbabawianda ti pannakiabig, idolatria, pannakikamalala, homoseksualidad, panagtakaw, kinaagum, kinamanagbartek, panagtabbaaw, ken panagpaanak. Kas nagbanaganna, “nadalusanda” iti dara ni Jesus, “napagsantipikarda” kas dagidiay naisina maipaay iti serbisio ni Jehova, ken “naibilangda a nalinteg” iti nagan ni Jesu-Kristo ken iti espiritu ti Dios. (1 Corinto 6:9-11) Gapuna a ti panagbabawi ket maysa nga addang maipaay iti nasayaat a konsiensia ken inted-Dios a wayawaya manipud mangsaplit a panagsungbat gapu iti basol.—1 Pedro 3:21.
17. Ti pannakakumberte kaipapananna ti ania, ken aniat’ kalikaguman dayta iti maysa nga agngayngayangay a pabautisaran?
17 Ti pannakakumberte masapul a maaramid met sakbay a mabautisaran ti maysa a tao kas maysa a Saksi ni Jehova. Ti pannakakumberte ti maysa a managbabawi nga indibidual ket maaramid kalpasan nga iwaksina ti dakes a kursona ket determinado nga aramidenna ti umiso. Dagiti Hebreo ken Griego a verbo a mangtuktukoy iti pannakakumberte kaipapananda ti “panagtallikud, panagbaw-ing, wenno isusubli.” No maaramat iti nasayaat a naespirituan a pannakaawat, tuktukoyen daytoy ti panagbaw-ing maipaay iti Dios manipud dakes a dalan. (1 Ar-ari 8:33, 34) Ti pannakakumberte kalikagumanna “dagiti ar-aramid a tumutop iti panagbabawi,” nga aramidentayo ti ibilin ti Dios, panawan ti ulbod a relihion, ken di sumiasi nga iturongtayo ti pusotayo ken Jehova tapno isu laeng ti pagserbiantayo. (Aramid 26:20; Deuteronomio 30:2, 8, 10; 1 Samuel 7:3) Kalikaguman daytoy ti “maysa a baro a puso ken baro nga espiritu,” maipaay iti nabalbaliwan a panagpanunot, takder, ken panagem iti biag. (Ezequiel 18:31) Ti agbanag a baro a personalidad sukatanna dagiti di nadiosan nga ugali kadagiti nadiosan a galad. (Colosas 3:5-14) Wen, ti pudno a panagbabawi “pagbaw-ingenna” la ketdi ti maysa.—Aramid 3:19.
18. Apay a mangaramid iti dedikasion iti Dios iti kararag, ken aniat’ pateg daytoy nga addang?
18 Ti dedikasion iti Dios iti kararag masapul nga un-unaanna ti bautismo. (Idiligyo ti Lucas 3:21, 22.) Ti dedikasion kaipapananna ti pannakaisina maipaay iti sagrado a panggep. Nakapatpateg unay daytoy nga addang a rebbeng nga iyebkastayo iti Dios iti kararag ti pangngeddengtayo nga itedtayo kenkuana ti naipamaysa a debosion ken agserbi kenkuana nga agnanayon. (Deuteronomio 5:8, 9; 1 Cronicas 29:10-13) Siempre, ti dedikasiontayo ket saan a maipaay iti maysa a trabaho no di ket iti Dios a mismo. Dayta a punto ket napagminar iti pumpon ti presidente ti Watch Tower Society, ni Charles Taze Russel. Iti dayta a pasken idi 1916, ti sekretario-tesorero ti Sosiedad, ni W. E. Van Amburgh, kunana: “Daytoy a naindaklan a sangalubongan a trabaho ket saan a trabaho ti maymaysa a tao. Daytat’ nakadakdakkel unay para iti dayta. Dayta ket trabaho ti Dios ket daytat’ saan nga agbaliw. Adu nga adipen ti inusar ti Dios iti napalabas ket awan duadua nga adut’ aramatenna iti masanguanan. Ti dedikasiontayo ket saan a maipaay iti tao, wenno iti trabaho ti tao, no di ket tapno aramiden ti pagayatan ti Dios, bayat nga ipaltiingna dayta kadatayo baeten iti Saona ken nadiosan a panangidalan. Ti Dios pay laeng ti makintengngel.” Ngem ania pay ti maaramidan maipapan iti dedikasion iti Dios?
19. (a) Kasano a mangted dagiti indibidual iti publiko a pammaneknek ti dedikasionda ken Jehova? (b) Iti ania a ti bautismo iti danum ket maysa a simbolo?
19 Ti publiko a pammaneknek iti dedikasion ken Jehova ket maipaay no ti maysa a tao ket mabautisaran. Ti bautismo ket maysa a simbolo a mangipampamatmat a ti tao a lumasat iti pannakaitaneb iti danum ket nakaaramiden iti awan panangliklikna a dedikasion ken Jehova a Dios baeten ken Jesu-Kristo. (Idiligyo ti Mateo 16:24.) No ti maysa a kandidato iti bautismo ket maitaneb iti danum ket kalpasanna maaon, isut’ matay a piguratibo no iti dati a kursona iti biag ken mapagungar iti maysa a wagas ti biag, tapno awan-panagpambarna nga aramidenna itan ti pagayatan ti Dios. (Idiligyo ti Roma 6:4-6.) Idi nabautisaran ni Jesus, indatagna ti bagina iti nailangitan nga Amana iti awan-panagpambarna a pamay-an. (Mateo 3:13-17) Ken maulit-ulit nga ipakita dagiti Kasuratan a dagiti kualipikado a manamati rebbeng a mabautisaranda. (Aramid 8:13; 16:27-34; 18:8) Tapno agbalin a maysa a Saksi ni Jehova ita, ngarud, ti maysa a tao masapul nga agbalin a manamati a pudpudno a mangal-alagad iti pammati ken mabautisaran.—Idiligyo ti Aramid 8:26-39.
Agtalinaed a Sititibker!
20. Ania dagiti sumagmamano a Biblikal a pangarigan a mangpampaneknek a mabendisionantayo gapu iti panangala iti takder maipaay iti inted-Dios a wayawaya kas dagiti nabautisaran a Saksi ni Jehova?
20 No innalayon ti natibker a takder maipaay iti inted-Dios a wayawaya babaen panagbalinyo a nabautisaran a Saksi ni Jehova, bendisionannakayo kas panangbendisionna kadagiti adipenna iti napalabas. Kas pangarigan, ni Jehova binendisionanna da nataenganen nga Abraham ken Sara iti maysa a managbuteng-Dios nga anak, ni Isaac. Babaen pammati pinili ni mammadto a Moises ti mauyaw kaduana ti ili ti Dios “imbes a maaddaan temporario a panangtagiragsak iti basol, gapu ta impategna unay ti pannakaumsi ti [panagbalin a kadaanan a tipo] ni Kristo [wenno Daydiay Pinulotan ti Dios] kas kinabaknang a dakdakkel ngem kadagiti kinabaknang ti Egipto.” (Hebreo 11:24-26) Naaddaan ni Moises iti pribilehio nga usaren ni Jehova tapno idaualanna dagiti Israelitas a rummuar manipud panangadipen ti Egipto. Kasta pay met, gapu ta simamatalek a nagserbianna ti Dios, isut’ mapagungarto ken agserbi kas maysa kadagiti “prinsipe iti amin a daga” iti sidong ti Dakdakkel a Moises, ni Jesu-Kristo.—Salmo 45:16; Deuteronomio 18:17-19.
21. Aniada a makaparegta nga ulidan ti naited maipanggep kadagiti nadiosan a babbai kadagiti nagkauna a panawen?
21 Dagiti dedikado a Kristiano ita maparegtada met babaen panangusigda kadagiti babbai a nagbalin a pudpudno a nawaya ken narag-o. Maibilang kadakuada ni Moabita a Ruth, a nakapasar agpada iti leddaang ti kinabalo ken ti rag-o ti inted-Dios a wayawaya manipud ulbod a relihion. Iti panangpanawna iti ilina ken dagiti didiosna, isut’ nakipagtaeng ken nabalo a katuganganna a babai, ni Noemi. “No sadino ti papanam isunto ti papanak,” kuna ni Ruth, “no sadino ti pagturogam isunto ti pagturogak. Ti ilim isunto ti ilik, ken ti Diosmo isunto ti Diosko.” (Ruth 1:16) Kas asawa ni Booz, ni Ruth nagbalin nga ina ti lelang ni David a ni Obed. (Ruth 4:13-17) Ay ket, ginunggonaan ni Jehova dayta a napakumbaba a di-Israelita a babai iti “maysa a naan-anay a subad” babaen panangipalubosna kenkuana nga agbalin nga inapo a babai ni Jesus a Mesias! (Ruth 2:12) Anian a nagrag-onto ni Ruth inton isut’ mapagungar ket maammuanna nga isut’ naaddaan kasta a pribilehio! Awan duadua nga umasping a rag-o ti mangpunno iti puso ti mapagungarto a dati a balangkantis a ni Rahab, a nawayawayaan manipud imoralidad ken ulbod a panagdayaw, kasta met ken managbasol ngem managbabawi a Batsheba, gapu ta maammuandanto met a pinalubosan ida ni Jehova nga agbalin nga inapo a babbai ni Jesu-Kristo.—Mateo 1:1-6, 16.
22. Aniantot’ mausig iti sumaganad nga artikulo?
22 Ti panangusig kadagiti nakagun-od iti inted-Dios a wayawaya ket awan patinggana. Kas pangarigan, ti bilangda iramanna dagiti lallaki ken babbai iti pammati a nadakamat idiay Hebreo kapitulo 11. Naglak-amda iti rigat ken pannakaibabain, “ken ti lubong saan idi a maikari kadakuada.” Inayontayo iti bilangda dagiti nasungdo nga umuna-siglo a pasurot ni Kristo ken sabsabali pay a matalek a tattao manipud idi, agraman dagiti minilion nga agserserbi itan ken Jehova kas dagiti Saksina. Kas sumaruno a makitatayo, no innalayon ti takder a kaduada maipaay iti inted-Dios a wayawaya, addaankayo iti adu a rason maipaay iti rag-o.
Kasanot’ Panangsungbatmo?
◻ Ania a namnama ti intukon ti Dios idi napukaw ti inted-Dios a wayawaya?
◻ Manipud ania a “sangol ti pannakaadipen” ti nangluk-atan ni Jesus kadagiti pasurotna?
◻ Aniada nga addang ti mangun-una iti panagbautisar kas maysa a Saksi ni Jehova?
◻ Aniada a Nainkasuratan a pangarigan ti mangpaneknek a mabendisionantayo gapu iti panangala iti takder maipaay iti inted-Dios a wayawaya?
[Ladawan iti panid 16]
Ammoyo kadi no ania dagiti addang a mangun-una iti panagbautisar kas maysa a Saksi ni Jehova?