Kasapulan Dagiti Kristiano ti Maysa ken Maysa

“Datayo ket kamkameng nga agpaay iti maysa ken maysa.”​—EFESO 4:25.

1. Ania ti kuna ti maysa nga ensiklopedia maipapan iti bagi ti tao?

NAKASKASDAAW a parsua ti bagi ti tao! Kuna ti The World Book Encyclopedia: “No dadduma, dagiti tattao awaganda ti natauan a bagi kas maysa a makina​—ti kasayaatan ti pannakaaramidna a makina. Siempre, saan a makina ti bagi ti tao. Ngem adu ti nagpadaanda. Kas iti makina, adu ti paset ti bagi. Adda naisangsangayan a trabaho ti tunggal paset ti bagi, kas iti tunggal paset ti makina. Ngem sangsangkamaysa nga agtrabaho ti amin a pasetna, isu a naannayas ti panagandar ti bagi wenno ti makina.”

2. Kadagiti ania a wagas nga agpada ti bagi ti tao ken ti kongregasion Kristiano?

² Wen, adu ti paset wenno kameng ti bagi ti tao, ket adda magapuanan ti tunggal kamengna. Awan ti uray maysa nga urat, masel, wenno aniaman a kameng ti bagi nga awan ti usarna. Umasping iti dayta, tunggal kameng ti kongregasion Kristiano ket makatulong iti naespirituan a salun-at ken pintasna. (1 Corinto 12:14-26) Nupay awan kadagiti kameng ti kongregasion ti rumbeng a mangipato a nangatngato ti bagina ngem iti dadduma, awan met koma ti mangibilang a saan a napateg ti bagina.​—Roma 12:3.

3. Kasano nga ipamatmat ti Efeso 4:25 a kasapulan dagiti Kristiano ti maysa ken maysa?

³ Kas kadagiti kameng ti bagi ti tao nga agpannuray iti tunggal maysa, kasapulan dagiti Kristiano ti maysa ken maysa. Kinuna ni apostol Pablo kadagiti napulotan iti espiritu a pada a manamati: “Ita ta inwaksiyon ti kinaulbod, sawenyo ti kinapudno tunggal maysa kadakayo iti padana a tao, agsipud ta datayo ket kamkameng nga agpaay iti maysa ken maysa.” (Efeso 4:25) Gapu ta ‘agpaayda iti maysa ken maysa,’ adda napudno a komunikasion ken naan-anay a panagtutunos dagiti kameng ti naespirituan nga Israel​—“ti bagi ni Kristo.” Wen, tunggal maysa kadakuada ket agpaay iti amin a kameng. (Efeso 4:11-13) Siraragsak a naikaykaysa kadakuada dagiti napudno, mannakitunos a Kristiano nga addaan iti naindagaan a namnama.

4. Kadagiti ania a wagas a mabalin a tulongan dagiti kabbaro?

⁴ Kada tawen, mababautisaran ti rinibu a tattao a mangnamnama nga agbiag iti paraiso a daga. Dadduma a kameng ti kongregasion ti siraragsak a tumultulong kadakuada a “rumang-ay iti kinanataengan.” (Hebreo 6:1-3) Nalabit iraman dayta a tulong ti panangsungbat kadagiti Nainkasuratan a saludsod wenno panangipaay iti praktikal a suporta iti ministerio. Matulongantayo dagiti kabbaro no mangipasdektayo iti nasayaat nga ulidan babaen ti regular a pannakipaset kadagiti Nakristianuan a gimong. Kadagiti panawen ti pakadukotan, makaipaaytayo met iti pammaregta wenno nalabit liwliwa. (1 Tesalonica 5:14, 15) Nasken a mangbiroktayo kadagiti wagas a tumulong iti dadduma nga ‘agtultuloy a magna iti kinapudno.’ (3 Juan 4) Ubbingtayo man wenno nataengan, agdadamo man wenno nabayagen a magmagna iti kinapudno, maitandudotayo ti naespirituan a pagimbagan dagiti kapammatiantayo​—wen, kasapulandatayo.

Impaayda ti Kasapulan a Tulong

5. Kasano a tinulongan da Aquila ken Priscila ni Pablo?

⁵ Makarikna iti pannakapnek dagiti Kristiano a pagassawaan no tumulongda kadagiti pada a manamati. Kas pagarigan, ni Pablo ket tinulongan ti agassawa nga Aquila ken Priscila (Prisca). Pinadagusda ni Pablo iti pagtaenganda, nakipagtrabahoda kenkuana iti panagaramid iti tolda, ken tinulonganda a nangpabileg iti baro a kongregasion idiay Corinto. (Aramid 18:1-4) Nupay saan a detalyado, adda dagiti gundaway nga uray la inrisgoda ti biagda gapu ken Pablo. Agnanaedda idiay Roma idi kinuna ni Pablo kadagiti Kristiano sadiay: “Idanonyo dagiti kablaawko kada Prisca ken Aquila a katrabahuak ken Kristo Jesus, isuda a nangirisgo kadagiti bukodda a tengnged maipaay iti kararuak, a kadakuada saan laeng a siak no di ket kasta met dagiti amin a kongregasion dagiti nasion ti mangipaay iti panagyaman.” (Roma 16:3, 4) Kas kada Aquila ken Priscila, adda dagiti moderno-aldaw a Kristiano a mangpabileg kadagiti kongregasion ken tumulong iti nadumaduma a pamay-an kadagiti pada nga agdaydayaw, a no dadduma irisgoda pay ti mismo a biagda tapno ti dadduma nga agdaydayaw iti Dios mailiklikda manipud panangparigat wenno panangpapatay dagiti manangidadanes.

6. Ania a tulong ti naited ken ni Apolos?

⁶ Tinulongan met da Aquila ken Priscila ti nalaing nga agpalawag a Kristiano a ni Apolos, a mangisursuro kadagiti umili ti Efeso maipapan ken Jesu-Kristo. Iti daydi a panawen, ti laeng bautismo nga ammo ni Apolos isu ti bautismo nga inaramid ni Juan kas simbolo ti panagbabawi kadagiti basol iti Linteg ti tulag. Idi makitada a kasapulan ni Apolos ti tulong, da Aquila ken Priscila “ad-adda a siuumiso nga imbinsabinsada kenkuana ti dalan ti Dios.” Mabalin nga inlawlawagda a karaman iti Nakristianuan a bautismo ti panagpaitaneb iti danum ken panangawat iti naiparukpok a nasantuan nga espiritu. Impangag ni Apolos ti naadalna. Idi agangay idiay Acaya, “tinulonganna iti kasta unay dagidiay namati maigapu iti di kaikarian a kinamanangngaasi ti Dios; ta buyogen ti kinanasged naan-anay a pinaneknekanna iti publiko a dagiti Judio saanda nga umiso, bayat nga imparangarangna babaen kadagiti Kasuratan a ni Jesus isu daydi Kristo.” (Aramid 18:24-28) Dagiti komento dagiti pada nga agdaydayaw ti masansan a tumulong a mangpauneg iti pannakaawattayo iti Sao ti Dios. Iti daytoy a banag, kasapulantayo ti tunggal maysa.

Panangipaay iti Material a Tulong

7. Ania ti inaramid dagiti taga Filipos idi nagkasapulan iti material a tulong dagiti pada a Kristiano?

⁷ Dagiti kameng ti kongregasion Kristiano idiay Filipos impategda ni Pablo ket pinatulodanda kadagiti material a kasapulanna bayat ti panagnaedna idiay Tesalonica. (Filipos 4:15, 16) Idi agkasapulan iti material a tulong dagiti kakabsat idiay Jerusalem, impakita dagiti taga Filipos a sidadaanda nga agdonar uray iti labes ti kabaelanda. Kasta unay ti panangapresiar ni Pablo iti nagsayaat nga espiritu dagiti kakabsat idiay Filipos nga uray la inusarna ida kas ulidan para kadagiti dadduma a manamati.​—2 Corinto 8:1-6.

8. Ania a kababalin ti imparangarang ni Epafrodito?

⁸ Idi naibalud ni Pablo, saan laeng a nangipatulod dagiti taga Filipos kadagiti material a sagut no di pay ket personal nga imbaonda ni Epafrodito. “Maigapu iti trabaho ti Apo [ni Epafrodito ket] nganngani natay, nga isarsarangna ti kararuana iti peggad,” kinuna ni Pablo, “tapno naan-anay a masandianna ti kaawanyo ditoy a mangipaay iti pribado a panagserbi kaniak.” (Filipos 2:25-30; 4:18) Saan a naibaga kadatayo no ni Epafrodito ket maysa a panglakayen wenno ministerial nga adipen. Kaskasdi, isu ket managsakripisio ken manangtulong a Kristiano, a talaga a kasapulan ni Pablo. Adda kadi ti kas ken Epafrodito iti kongregasionyo?

‘Makapabilegda a Tulong’

9. Ania ti matuladtayo ken ni Aristarco?

⁹ Iti aniaman a kongregasion, maapresiar unay dagiti naayat a kakabsat a kas kada Aquila, Priscila, ken Epafrodito. Adda dagiti pada nga agdaydayaw a mayasping unay ken ni Aristarco, maysa a Kristiano idi umuna a siglo. “Makapabileg a tulong” ni Aristarco ken ti dadduma, a nalabit gubuayan ti liwliwa wenno tulong no kadagiti simple, praktikal a bambanag. (Colosas 4:10, 11) Babaen ti panangsaranayna ken ni Pablo, napaneknekan a pudno a gayyem ni Aristarco iti panawen ti panagkasapulan. Isu ti kita ti tao a nadakamat iti Proverbio 17:17: “Ti pudno a kadua agayat iti isuamin a tiempo, ken ti kabsat a mayanak no adda rigat.” Saan kadi a rumbeng nga ikagumaantayo amin ti agbalin a “makapabileg a tulong” kadagiti pada a Kristiano? Nangnangruna a nasken a tulongantayo dagidiay agsagsagaba iti rigat.

10. Ania ti inyulidan ni Pedro kadagiti Kristiano a panglakayen?

¹⁰ Dagiti Kristiano a panglakayen ti nangnangruna a rumbeng nga agbalin a makapabileg a tulong kadagiti kapammatianda. Kinuna ni Kristo ken ni apostol Pedro: “Pabilgem ti kakabsatmo.” (Lucas 22:32) Naaramidan dayta ni Pedro gapu ta imparangarangna dagiti natibker, nabileg a galad, nangnangruna kalpasan ti panagungar ni Jesus. Dakayo a panglakayen, aramidenyo ti amin a kabaelanyo a mangaramid iti dayta a sidadaan ken siaayat gapu ta kasapulandakayo dagiti kapammatianyo.​—Aramid 20:28-30; 1 Pedro 5:2, 3.

11. Kasano a magunggonaantayo no usigentayo ti kababalin ni Timoteo?

¹¹ Ni Timoteo, a kadua ni Pablo iti panagdaliasatna, ket maysa a panglakayen a maseknan unay kadagiti Kristiano. Nupay adda dagiti problemana iti salun-at, impakita ni Timoteo ti natibker a pammati ken ‘nagpaadipen a kadua ni Pablo iti pannakaidur-as ti naimbag a damag.’ Gapuna, maikuna ti apostol kadagiti taga Filipos: “Awanen kaniak ti sabali pay nga addaan kababalin a kas kenkuana a sipupudno a mangisakitto iti bambanag maipapan kadakayo.” (Filipos 2:20, 22; 1 Timoteo 5:23; 2 Timoteo 1:5) Agbalintayo a bendision kadagiti pada nga agdaydayaw ken ni Jehova no iparangarangtayo ti kababalin a kas ken Timoteo. Pudno, masapul nga andurantayo dagiti natauan a pagkapuyantayo ken ti nadumaduma a suot, ngem mabalin ken nasken nga iparangarangtayo ti nabileg a pammati ken naayat a pannakaseknan kadagiti kapammatiantayo. Kanayon koma a laglagipentayo a kasapulandatayo.

Babbai a Nangipateg Kadagiti Sabsabali

12. Ania ti maadaltayo iti ulidan ni Dorcas?

¹² Ni Dorcas ti maysa kadagiti nadiosan a babbai a nangipateg iti sabsabali. Idi natay ni Dorcas, dagiti adalan inayabanda ni Pedro ket inturongda iti makinngato a siled. Sadiay “amin dagiti balo nagparangda kenkuana nga agsangsangitda ken ipakpakitada ti adu a makin-uneg a kawkawes ken makinruar a kawkawes nga inar-aramid ni Dorcas bayat ti kaaddana idi kadakuada.” Napagungar ni Dorcas ket awan duadua a nagtultuloy nga “aduan iti naimbag nga ar-aramid ken sagsagut ti asi.” Iti agdama a kongregasion Kristiano, adda dagiti babbai a kas ken Dorcas nga agaramid kadagiti pagan-anay wenno dadduma a makaay-ayo a banag para kadagidiay agkasapulan. Siempre, ti kangrunaan a naimbag nga aramidda isu ti panangitandudo kadagiti interes ti Pagarian ken pannakiraman iti panagaramid kadagiti adalan.​—Aramid 9:36-42; Mateo 6:33; 28:19, 20.

13. Kasano nga impakita ni Lidia ti panangipategna kadagiti pada a Kristiano?

¹³ Ni Lidia, maysa a babai nga addaan iti panagbuteng iti Dios, impategna ti sabsabali. Isu ket katutubo iti Tiatira, ngem agnanaed idiay Filipos idi nangasaba sadiay ni Pablo idi agarup 50 K.P. Nalabit maysa ni Lidia a Judio a proselita, ngem mabalin a manmano ti Judio ken awan ti sinagoga idiay Filipos. Iti igid ti karayan, kaduana a naguummong dagiti debotado a babbai tapno agdayaw idi impakaammo kadakuada ti apostol ti naimbag a damag. Kuna ti salaysay: “Ti puso [ni Lidia] linuktan a silalawa ni Jehova tapno imdenganna ti bambanag a sasawen ni Pablo. Ita idi isu ken ti sangakabbalayanna nabautisaranda, kinunana nga impakpakaasi: ‘No impatoyo a matalekak ken Jehova, sumrekkayo iti balayko ket agyankayo.’ Ket impapilitna nga umaykami.” (Aramid 16:12-15) Gapu ta kayat ni Lidia nga agaramid iti naimbag kadagiti sabsabali, nakombinsirna nga agdagus iti balayna da Pablo ken ti kakaduana. Anian a panangapresiartayo no ipakita dagiti naasi ken naayat a Kristiano ita ti kasta a kinamanagpadagus!​—Roma 12:13; 1 Pedro 4:9.

Dakayo nga Agtutubo​—Kasapulandakayo Met

14. Kasano a trinato ni Jesu-Kristo dagiti agtutubo?

¹⁴ Namunganay ti kongregasion Kristiano babaen ken Jesu-Kristo, ti naasi ken nadungngo nga Anak ti Dios. Nalag-an ti rikna kenkuana dagiti tattao gapu ta naayat ken mannakipagrikna. Idi adda nangyasideg kadagiti ubbing ken ni Jesus, pinadas a papanawen dagiti adalanna. Ngem kinuna ni Jesus: “Bay-anyo dagiti ubbing nga umay kaniak; dikay padasen a pawilan ida, ta ti pagarian ti Dios kukua dagiti kasta. Pudno kunak kadakayo, Siasinoman a saan nga umawat iti pagarian ti Dios a kas iti maysa nga ubing saanto a pulos makastrek iti dayta.” (Marcos 10:13-15) Tapno awatentayo dagiti bendision ti Pagarian, masapul nga agbalintayo a napakumbaba ken nalaka a maisuro kas kadagiti ubbing. Impakita ni Jesus ti panagayatna kadagiti ubbing babaen ti panangalana kadakuada iti takiagna ket binendisionanna ida. (Marcos 10:16) Komustakayo met nga agtutubo ita? Manamnamayo nga ay-ayaten ken kasapulandakayo ti kongregasion.

15. Ania nga impormasion maipapan iti biag ni Jesus ti nairekord iti Lucas 2:40-52, ken ania ti inyulidanna kadagiti agtutubo?

¹⁵ Idi ubing pay ni Jesus, impakitana ti panagayatna iti Dios ken iti Kasuratan. Idi agtawen iti 12, kaduana dagiti dadakkelna, da Jose ken Maria, a napan idiay Jerusalem manipud iti ilida a Nazaret tapno rambakanda ti Paskua. Idi agawiddan, nadlaw dagiti dadakkelna a dida kadua ni Jesus. Idi agangay, nasarakanda a nakatugaw iti maysa kadagiti siled ti templo, nga agdengdengngeg ken agim-imtuod kadagiti Judio a mannursuro. Gapu ta masdaaw a di ammo da Jose ken Maria no sadino ti pangbirokanda kenkuana, inyimtuod ni Jesus: “Saanyo aya nga ammo a masapul nga addaak iti balay ni Amak?” Nakiawid kadagiti dadakkelna, nagtalinaed a nagpasakup kadakuada, ket nagtultuloy a rimmang-ay iti kinasirib agingga a nagbaro. (Lucas 2:40-52) Anian a nagsayaat nga ulidan ti impasdek ni Jesus kadagiti agtutubotayo! Sigurado a nasken nga agtulnogda kadagiti dadakkelda ken aginteres nga agadal kadagiti naespirituan a bambanag.​—Deuteronomio 5:16; Efeso 6:1-3.

16. (a) Ania ti inyikkis dagiti ubbing idi mangaskasaba ni Jesus idiay templo? (b) Ania ti pribilehio dagiti agtutubo a Kristiano ita?

¹⁶ Kas maysa nga agtutubo, mabalin nga ikaskasabayo ti maipapan ken ni Jehova idiay eskuelaan ken iti binalaybalay a kadua dagiti dadakkelyo. (Isaias 43:10-12; Aramid 20:20, 21) Idi mangaskasaba ken mangpapaimbag ni Jesus idiay templo sakbay unay ti ipapatayna, inyikkis ti dadduma nga ubbing: “Mangisalakanka, ikararagmi, iti Anak ni David!” Nakapungtot dagiti panguluen a papadi ken eskriba gapu iti dayta, isu nga inyasugda: “Mangngegmo kadi ti sasawen dagitoy?” “Wen,” insungbat ni Jesus. “Saanyo aya a pulos nabasa daytoy, ‘Manipud iti ngiwat dagiti ubbing ken agsussuso nangipaayka iti dayaw’?” (Mateo 21:15-17) Kas kadagidi nga ubbing, addaankayo dakayo nga agtutubo iti naindaklan a pribilehio a mangidaydayaw iti Dios ken iti Anakna. Tarigagayan ken kasapulandakayo a makipagtrabaho kadakami kas manangiwaragawag iti Pagarian.

No Dumteng ti Pakarigatan

17, 18. (a) Apay a nangyurnos ni Pablo iti panagur-or iti donasion para kadagiti Kristiano idiay Judea? (b) Ania ti epektona kadagiti Judio ken Gentil a Kristiano ti boluntario a donasion para kadagiti manamati a taga Judea?

¹⁷ Aniaman ti kasasaadtayo, tignayennatayo ti ayat a tumulong kadagiti pada a Kristiano nga agkasapulan. (Juan 13:34, 35; Santiago 2:14-17) Ti panagayatna kadagiti kakabsat idiay Judea ti nangtignay ken ni Pablo a mangyurnos iti panagur-or iti donasion para kadakuada manipud kadagiti kongregasion idiay Acaya, Galacia, Macedonia, ken ti distrito ti Asia. Ti pannakaidadanes, nariribuk a kagimongan, ken bisin a napasaran dagiti adalan idiay Jerusalem ti nalabit nagresulta iti inawagan ni Pablo a “panagsagaba,” “rigrigat,” ken “pannakasamsam dagiti sanikua[da].” (Hebreo 10:32-34; Aramid 11:27–12:1) Immatonanna ngarud ti pannakaurnong ti pondo para kadagiti napanglaw a Kristiano idiay Judea.​—1 Corinto 16:1-3; 2 Corinto 8:1-4, 13-15; 9:1, 2, 7.

¹⁸ Dagiti boluntario a donasion para kadagiti nasantuan idiay Judea pinaneknekanna ti nainkabsatan a singgalut dagiti Judio ken Gentil nga agdaydayaw ken ni Jehova. Gapu kadagiti pinansial a tulongda, naipakita met dagiti Kristiano a Gentil ti panagyamanda kadagiti padada nga agdaydayaw idiay Judea a nangiranud idi kadakuada iti naespirituan a kinabaknang. Gapuna, adda panagririnnanud agpadpada iti material ken naespirituan a bambanag. (Roma 15:26, 27) Dagiti kontribusion kadagiti agkasapulan a kapammatian ita ket boluntario met ken tinignay ti ayat. (Marcos 12:28-31) Iti daytoy a banag, kasapulantayo met ti tunggal maysa tapno adda panagpapada ‘ket ti tao a bassitan saan nga addaan iti bassit unay.’​—2 Corinto 8:15.

19, 20. Mangted iti pagarigan a mangipakita no kasano a tumulong dagiti adipen ni Jehova kadagiti panawen ti didigra.

¹⁹ Gapu ta ammotayo a kasapulan dagiti Kristiano ti tunggal maysa, alistotayo a tumulong kadagiti kakabsattayo iti pammati. Kas pagarigan, usigenyo ti napasamak idi a ti El Salvador ket dinadael ti ginggined ken panagreggay idi rugrugi ti 2001. Kinuna ti maysa a report: “Simmaranay dagiti kakabsat manipud iti amin a paset ti El Salvador. Tinulongandakami dagiti kakabsat manipud Guatemala, Estados Unidos, ken Canada. . . . Napartak a nabangon ti nasurok a 500 a balay ken 3 a napintas a Kingdom Hall. Dakkel a pammaneknek ti imbunga ti kinaanep ken kooperasion dagitoy a managsakripisio a kakabsat.”

²⁰ Kinuna ti maysa a report manipud South Africa: “Dagiti nakaro a layus a nangdadael iti dakkel a paset ti Mozambique inapektaranna met ti adu kadagiti Kristiano a kakabsattayo. Inyurnos ti sanga nga opisina idiay Mozambique ti pannakaasikaso dagiti kangrunaan a kasapulanda. Ngem kiniddaw ti sanga nga opisina nga itedmi dagiti nausaren ngem napintas pay a kawes kadagiti kakabsat nga agkasapulan. Nakaurnongkami iti umdas a kawes ket nakaipatulodkami iti 12 metro a kahon a napno iti kawes para kadagiti kakabsattayo idiay Mozambique.” Wen, uray kadagita a kasasaad, kasapulantayo ti maysa ken maysa.

21. Ania ti mausig iti sumaruno nga artikulo?

²¹ Kas nadakamat itay, napateg ti amin a paset ti bagi ti tao. Kasta met laeng ti kongregasion Kristiano. Kasapulan ti amin a kamengna ti tunggal maysa. Masapul met nga itultuloyda ti agserbi a sangsangkamaysa. Mausig iti sumaruno nga artikulo no ania ti sumagmamano a banag a namagbalin a posible daytoy.

Ania ti Sungbatyo?

• Ania ti nagpadaan ti bagi ti tao ken kongregasion Kristiano?

• Ania ti inaramid dagiti nagkauna a Kristiano idi nagkasapulan iti tulong dagiti kapammatianda?

• Ania ti sumagmamano a Nainkasuratan a pagarigan a mangipakita a kasapulan ken tinulongan dagiti Kristiano ti maysa ken maysa?

[Ladawan iti panid 10]

Impateg da Aquila ken Priscila dagiti sabsabali

[Dagiti Ladawan iti panid 12]

Dagiti adipen ni Jehova tulonganda ti tunggal maysa ken ti sabsabali no dumteng ti pakarigatan