Panagbiag a Maitunos iti Panggep ti Dios

“[Ni Kristo] natay maipaay iti isuamin tapno dagidiay nga agbiag saanda koman nga agbiag nga agpaay iti bagbagida.”​—2 CORINTO 5:15.

1. Isalaysayyo ti kapadasan ti maysa a misionero iti teritoriana.

“TI LUGANMI ti kaunaan a simrek iti nasulinek a purok ti Africa kalpasan a nagpatingga ti guerra sibil,” malagip pay ti maysa a misionero a ni Aaron.a “Awan ti komunikasionmi iti bassit a kongregasion sadiay, ket masapul a maammuanmi no ania ti kasapulan dagiti kakabsat. Malaksid iti taraon, kawes, ken literatura iti Biblia, nangitugotkami iti video a Jehovah’s Witnesses​—The Organization Behind the Name.b Nakaad-adu nga interesado ti immay nagbuya iti ‘pagsinean’ ti purok​—maysa a kalapaw nga addaan iti video player ken telebision​—isu a namindua nga impabuyami dayta. Saan a nasayang ti panagsakripisiomi ta adu ti nagpayadal iti Biblia gapu iti dayta a pabuya.”

2. (a) Apay a determinado dagiti Kristiano a mangusar iti biagda nga agserbi iti Dios? (b) Ania dagiti saludsod nga usigentayo ita?

² Apay nga inaramid da Aaron ken dagiti kakaduana dayta a narigat a mision? Gapu ta indedikarda ti biagda iti Dios, kayatda nga usaren dayta maitunos iti panggepna, ken apresiarenda ti pangsubbot a daton ni Jesu-Kristo. Kas kadakuada, determinado ti amin a dedikado a Kristiano a ‘saan nga agbiag nga agpaay iti bagbagida,’ no di ket aramidenda ti amin a kabaelanda “maipagapu iti naimbag a damag.” (2 Corinto 5:15; 1 Corinto 9:23) Ammoda nga awanton ti serserbi ti kuarta ken dayaw iti daytoy a lubong inton agpatingga daytoy a sistema ti bambanag. Gapuna, kayatda nga usaren ti biag ken salun-atda nga agserbi iti Dios. (Eclesiastes 12:1) Kasanotayo a maaramid dayta? Pakasarakantayo iti tured ken bileg a mangaramid iti dayta? Ken ania dagiti pribilehio iti panagserbi a silulukat kadatayo?

Agtultuloy ken Praktikal nga Addang

3. Ania dagiti umuna nga addang a ramanen ti panangaramid iti pagayatan ti Dios?

³ Kadagiti pudno a Kristiano, tungpal-biag ti panangaramid iti pagayatan ti Dios. Kadawyan a mangrugi dayta iti panagpasalista iti Teokratiko nga Eskuelaan ti Panagministro, inaldaw a panagbasa iti Biblia, ken panangasaba, agingga nga agpabautisar. Bayat a rumangrang-aytayo, laglagipentayo dagiti sasao ni apostol Pablo: “Utobem dagitoy a banag; maipamaysaka kadakuada, tapno ti panagrang-aymo maiparangarang iti amin a tattao.” (1 Timoteo 4:15) Saan a panangitan-ok iti bagi ti kasta a panagrang-ay, no di ket mangipakita dayta a naimpusuan ken determinadotayo a mangaramid iti pagayatan ti Dios. No kasta ti aramidentayo, ipakpakitatayo nga agpapaiwanwantayo iti Dios iti amin nga aspeto ti biagtayo, ken Isu a talaga ti kasayaatan a mangiwanwan kadatayo.​—Salmo 32:8.

4. Kasano a maiwaksitayo dagiti pakadanagantayo?

⁴ Ngem ti panagkedked wenno nalabes a pannakaseknan iti bagitayo mabalin a lapdanna ti panagrang-aytayo iti naespirituan. (Eclesiastes 11:4) Ngarud, sakbay a masagraptayo ti pudno a rag-o nga itden ti panagserbi iti Dios ken iti sabsabali, masapul a daerantayo nga umuna dagiti mismo a pakadanagantayo. Kas pagarigan, pampanunoten idi ni Erik ti agserbi iti kongregasion nga agus-usar iti ganggannaet a pagsasao. Ngem madanagan: ‘Mabagayakto ngata dagiti kakabsat ken maay-ayodanto met ngata kaniak?’ Kinunana: “Idi agangay, nabigbigko a masapul nga ad-adda a maseknanak kadagiti kakabsat ngem iti bagik. Inkeddengko nga iwaksi dagita a pakadanagan ket ipaayko ti amin a kabaelak nga agserbi kadagiti sabsabali. Inkararagko ti tulong ti Dios ket intungpalko ti planok. Ita, nakaragragsakakon nga agserserbi sadiay.” (Roma 4:20) Wen, no aramidentayo ti amin a kabaelantayo nga agserbi iti Dios ken iti sabsabali, makariknatayo iti rag-o ken pannakapnek.

5. Apay a ti panagplano a naimbag matulongannatayo nga agbiag a maitunos iti panggep ti Dios? Iyilustraryo.

⁵ Tapno makapagbiagtayo a maitunos iti panggep ti Dios, masapul a planuentayo a naimbag dagiti aramidentayo. Nainsiriban a liklikantayo ti mailumlom iti utang a mangadipen kadatayo iti daytoy a sistema ken manglapped iti panagserbitayo iti Dios. Ipalagip ti Biblia kadatayo: “Ti nakabulod adipen iti tao nga agpapautang.” (Proverbio 22:7) Mataginayon ti natimbeng a panangmatmattayo kadagiti bambanag no agtalektayo kenni Jehova ken iyun-unatayo ti panagserbi kenkuana. Kas pagarigan, ni Guoming ken dagiti dua a kakabsatna nakipagnaedda kenni nanangda iti lugar a nangina ti abang ti balay ken narigat ti agbirok iti permanente a trabaho. Ngem ammoda ti agbadyet ken nagtitinnulongda kadagiti paggastuan isu a saanda a nagkurang kadagiti kasapulanda. “No dadduma, agpapadakami nga awanan iti trabaho,” kuna ni Guoming. “Kaskasdi, nakapagtultuloykami a payunir ken maay-aywananmi pay ni Nanang. Maragragsakankami ta saan a kayat ni Nanang nga isardengmi ti agpayunir tapno laeng maipaayanmi iti nanam-ay a biag.”​—2 Corinto 12:14; Hebreo 13:5.

6. Ania a kapadasan ti mangipakita a mabalintayo nga itunos ti biagtayo iti panggep ti Dios?

⁶ No okupadokayo kadagiti sekular a kalat​—panagbirok man iti kuarta wenno dadduma a banag​—mabalin a kasapulan ti dakkel a panagbalbaliw tapno mayun-unayo ti panangitungpal iti panggep ti Dios. Saan a kaskarina dagita a panagbalbaliw, ken saanyo koma a matmatan a pannakapaay no di agballigi ti damo a panangikagumaanyo. Usigentayo ni Koichi, a mangbusbusbos iti nakaad-adu a panawen iti paglinglingayan. Tin-edyer pay laeng ni Koichi idi inrugina ti nagadal iti Biblia, ngem ti panagay-ayam iti video ti ad-adda nga impangpangrunana. Naminsan, pinampanunot ni Koichi: ‘Ania ti ar-aramidek? Nasurok a 30 ti tawenkon, ngem awan man la ti direksion ti biagko!’ Intuloy ni Koichi ti nagadal iti Biblia ken nagpatulong iti kongregasion. Saan a simmuko nupay in-inut laeng ti panagrang-ayna. Babaen ti panagkarkararag ken naayat a panangandingay, naisardengna met laengen ti pannakaigamerna iti panagay-ayam iti video. (Lucas 11:9) Siraragsak nga agserserbi itan ni Koichi kas ministerial nga adipen.

Agbalinkayo Koma a Natimbeng

7. Apay a masapul a natimbengtayo a mangitungpal iti trabaho nga intalek ti Dios?

⁷ Masapul nga aramidentayo ti amin a kabaelantayo nga agbiag a maitunos iti panggep ti Dios. Ditay koma bumdeng wenno agsadsadut a mangitungpal iti panggep ti Dios. (Hebreo 6:11, 12) Nupay kasta, saan met a kayat ni Jehova a naan-anay a mapaksuyan ti bagi, isip, ken riknatayo. Pakaidayawan ti Dios ken mangipakita a natimbengtayo no sipapakumbaba a bigbigentayo a ditay kabaelan nga itungpal ti trabaho nga intalek ti Dios iti bukodtayo a pigsa. (1 Pedro 4:11) Inkari ni Jehova a pabilgennatayo a mangaramid iti pagayatanna, ngem ditay koma piliten nga aramiden ti saantay a kabaelan ken ti saanna a namnamaen kadatayo. (2 Corinto 4:7) Tapno maitultuloytayo ti naregta a panagserbi iti Dios, usarentayo a nainsiriban ti pigsatayo.

8. Ania ti naamiris ti maysa nga agtutubo a Kristiano maipapan iti kasasaadna ken ania a panagbalbaliw ti inaramidna?

⁸ Kas pagarigan, dua a tawen a nagtrabaho bayat nga agpaypayunir ni Ji Hye, nga agnanaed idiay Makindaya nga Asia. “Inaramidko ti amin a kabaelak para kenni Jehova ken iti trabahok,” ngem gapu ta makaibus iti tiempo ken pigsa ti trabahona, kinunana, “lima laeng nga oras ti turogko iti kada aldaw. Idi agangay, awanen ti panawenko nga agadal ken nakissayanen ti rag-ok nga agserbi ken Jehova.” Tapno makapagserbi ken Jehova iti ‘amin a puso, kararua, isip, ken pigsa,’ nagbirok ni Ji Hye iti trabaho nga agkalikagum iti basbassit a tiempo ken pigsa. (Marcos 12:30) “Nupay indagadag ti pamiliak nga ipangpangrunak ti agbirok iti adu a kuarta, inyun-unak ti panggep ti Dios,” kinunana. “Umdas met latta ti mabirbirokak agpaay kadagiti kangrunaan a kasapulak, kas iti desente a kawes. Ken nagangganaygayak itan ta napapaut ti turogko! Naragsakak iti ministeriok ken naregregtaak itan. Basbassit ngaminen ti pakaipasanguak nga awis ken pakasingaan iti daytoy a lubong.”​—Eclesiastes 4:6; Mateo 6:24, 28-30.

9. Ania ti mabalin nga epektona kadagiti dadduma ti panangasabatayo?

⁹ Pudno, saan nga amin ket makapagpayunir. Ngem uray maysakay a nataenganen, masaksakit, wenno addaan iti dadduma pay a parikut, laglagipenyo nga ipatpateg ni Jehova ti kinamatalekyo ken ti aniaman a maipaayyo a naimpusuan a panagserbi. (Lucas 21:2, 3) Gapuna, ditay koma pampanunoten nga awan ti epektona kadagiti dadduma ti panagserbitayo iti Dios, uray bassit laeng dayta. Kas pagarigan, nangasabatayo ngem kasla awan ti interesado iti mensahetayo. Ngem idi nakapanawtayon, nalabit nga iti sumagmamano nga oras wenno aldaw nagtutungtongan dagiti bumalay ti isasarungkartayo! Nupay ditay manamnama nga amin ket umawat iti naimbag a damag, adda latta dagiti mangipangag. (Mateo 13:19-23) Mabalin a dumngeg ti dadduma no adda mapasamak a panagbalbaliw iti lubong wenno iti mismo a biagda. Aniaman kadagita, itungtungpaltayo ti trabaho nga intalek ti Dios no ar-aramidentayo ti amin a kabaelantayo a mangasaba. Wen, ‘katrabahuannatayo ti Dios.’​—1 Corinto 3:9.

10. Ania ti maaramidan ti amin a kameng ti kongregasion?

¹⁰ Maysa pay, adda maaramidantayo amin a tumulong kadagiti miembro ti pamiliatayo ken kadagiti kapammatiantayo. (Galacia 6:10) Dakkel ken agpaut ti epektona kadagiti sabsabali ti nasayaat nga ulidantayo. (Eclesiastes 11:1, 6) No siaanep nga itungpal dagiti panglakayen ken ministerial nga adipen dagiti rebbengenda, matulonganda a tumibker ken rumang-ay ti espiritualidad ti kongregasion ken agbalin a nabunga ti panagserbida iti Dios. Maipanamnama kadatayo a no ‘aduantayo iti aramiden iti trabaho ti Apo, saan nga ubbaw’ dagiti panagreggettayo.​—1 Corinto 15:58.

Agbiagtayo a Maitunos iti Panggep ti Dios

11. Ania dagiti gundaway a silulukat kadatayo malaksid iti panagserbi iti kongregasiontayo?

¹¹ Kas Kristiano, ipatpategtayo ti biag ken kayattayo a pakaidayawan koma ti Dios ti aniaman nga aramidentayo. (1 Corinto 10:31) Adu a pribilehio ti silulukat kadatayo no nagagettayo a mangikasaba iti naimbag a damag ti Pagarian ken mangisuro kadagiti sabsabali a mangtungpal kadagiti imbilin ni Jesus. (Mateo 24:14; 28:19, 20) Malaksid iti panagserbi iti kongregasiontayo, nalabit adda gundawaytayo nga agserbi iti kongregasion nga addaan iti dakdakkel a panagkasapulan, iti man sabali a dialekto, teritoria, wenno pagilian. Mabalin a maawis nga ageskuela iti Ministerial Training School dagiti kualipikado a panglakayen ken ministerial nga adipen a di kasado. Kalpasanna, mabalinda ti agserbi kadagiti kongregasion nga agkasapulan iti tulong dagiti nataengan a Kristiano, iti man pagilianda wenno iti ballasiw taaw. Mabalin met a makualipikar nga agsanay iti Gilead kas misionero dagiti agassawa a payunir sa kalpasanna agserbida iti sabali a pagilian. Ken agtultuloy ti panagkasapulan ita kadagiti boluntario nga agtrabaho iti Bethel ken iti panagibangon ken panangmantener kadagiti Assembly Hall, Kingdom Hall, ken sanga nga opisina.

12, 13. (a) Kasano a maikeddengyo no ania a pribilehio ti ragpatenyo? (b) Iyilustraryo no kasano a ti pannakasanay a nagun-od iti maysa a pribilehio ket mausar iti sabali pay a benneg ti panagserbi.

¹² Ania a pribilehio ti kayatyo a ragpaten? Kas dedikado nga adipen ni Jehova, kanayon koma nga agpaiwanwankayo kenkuana ken iti organisasionna. Tumulong ti ‘naimbag nga espirituna’ tapno makaaramidkayo iti umiso a pangngeddeng. (Nehemias 9:20) Masansan a ti maysa a pribilehio ket agturong iti sabali pay a pribilehio, ken mabalin a mausaryonto dagiti kapadasan ken pannakasanay a nagun-odyo iti sabali pay a pribilehio.

¹³ Kas pagarigan, regular a tumultulong da Dennis ken ti baketna a ni Jenny iti panagibangon kadagiti Kingdom Hall. Kalpasan a dinalapus ti bagyo a Katrina ti makin-abagatan a paset ti Estados Unidos, nagboluntarioda iti trabaho a panangsaranay. Kinuna ni Dennis: “Nangted iti dakkel a rag-o ti panangusarmi kadagiti pannakasanay a nagun-odmi iti panagibangon kadagiti Kingdom Hall tapno matulonganmi dagiti kakabsat. Talaga a makatukay iti rikna ti panagyaman nga inyebkas dagidiay natulonganmi. Saan a kasta kaballigi ti kaaduan a grupo a mangsarsaranay. Ngem no kadagiti Saksi ni Jehova, nasuroken a 5,300 a pagtaengan ken adu a Kingdom Hall ti tinarimaan wenno binangonda manen. Mapalpaliiw dayta dagiti tattao ket nagbalinda nga interesado iti mensahetayo.”

14. Ania ti mabalinyo nga aramiden no kayatyo ti agpayunir?

¹⁴ Mabalinyo kadi a pagbalinen a karera ti panagpayunir tapno matungpalyo ti panggep ti Dios? No aramidenyo dayta, sigurado nga umawatkayo iti adu a bendision. Ngem no saan nga ipalubos ti agdama a kasasaadyo, nalabit a kasapulan a mangaramidkayo iti sumagmamano a panagbalbaliw. Tuladenyo ni Nehemias a nangikararag iti napateg nga annongenna: “Jehova, pangngaasim, . . . pagballigiem ti adipenmo.” (Nehemias 1:11) Buyogen iti panagtalek iti “Managdengngeg iti kararag,” agtignaykayo koma a maitunos iti kararagyo. (Salmo 65:2) Kasapulan ti panagreggetyo tapno bendisionan ni Jehova ti panangikagumaanyo nga agserbi kenkuana a naan-anay. Apaman a naikeddengyo ti agpayunir, itungpalyo koma dayta. Bayat ti panaglabas ti panawen, umadunto ti kapadasanyo, iti kasta, naragragsakkayto.

Makagunggona a Biag

15. (a) Apay a makagunggona ti pannakisarita ken panagbasa kadagiti pakasaritaan dagiti nabayagen nga agserserbi iti Dios? (b) Mangisalaysaykayo iti pakasaritaan ti biag a makaparegta kadakayo.

¹⁵ Ania dagiti manamnamayo a resulta no agbiagkayo a maitunos iti panggep ti Dios? Kasaritayo dagiti nabaybayagen nga adipen ni Jehova, nangnangruna dagiti nabayagen a payunir. Anian a makagunggona ken nakaragragsak ti biagda! (Proverbio 10:22) Ibagada kadakayo no kasano a sinaranay ida ni Jehova uray kadagiti panawen a narigat a magun-odan dagiti kasapulanda ken ad-adu pay ti impaayna. (Filipos 4:11-13) Kadagiti naglabas a dekada agingga ita, mangipabpablaak Ti Pagwanawanan kadagiti pakasaritaan ti biag dagiti matalek nga adipenna. Tunggal pakasaritaan ket mangyanninaw iti kinaregta ken kinaragsak dagiti adipen ti Dios a nadakamat iti libro ti Biblia nga Aramid. No mabasayo dagita a pakasaritaan maikunayo, ‘Kasta ti kayatko a biag!’

16. Ania ti mamagbalin iti biag ti maysa a Kristiano a makagunggona ken naragsak?

¹⁶ Ni Aaron, a nadakamat itay, kinunana: “Idiay Africa, adda dagiti nakasarsaritak nga agtutubo a mapan iti nadumaduma a paset ti pagilian gapu ta kayatda a maammuan no ania ti panggep ti biag. Ngem napaay ti kaaduan. Iti sabali a bangir, ikagkagumaantayo ti agbiag a maitunos iti panggep ti Dios babaen ti panangiwaragawag iti naimbag a damag ti Pagarian, ken tagtagiragsakentayo ti makagunggona a biag. Mapaspasarantayo a mismo ti kinapudno a naragragsak ti mangted ngem iti umawat.”​—Aramid 20:35.

17. Apay a nasken nga agbiagtayo ita a maitunos iti panggep ti Dios?

¹⁷ Komustaka met? Ania ti kalat a ragragpatem? No awan ti espesipiko a kalatmo mainaig iti panggep ti Dios, mabalin a maibus ti tiempo ken pigsam kadagiti dadduma a kalat. Apay koma a sayangem ti napateg a biagmo kadagiti pangawis ti lubong ni Satanas? Iti mabiiten, inton umablat ti “dakkel a rigat,” awanto ti serserbi dagiti material a kinabaknang ken nailubongan a saad. Gapuna, ti relasiontayo ken Jehova ti talaga a napateg. Anian a yamantayo a pinilitayo ti agserbi iti Dios ken kadagiti sabsabali, ken naan-anay nga agbibiagtayo a maitunos iti panggep ti Dios!​—Mateo 24:21; Apocalipsis 7:14, 15.

[Footnotes]

Mailawlawagyo Kadi?

• Ania ti panangmatmat ni Jehova iti panagserbitayo kenkuana?

• Kasano a ti panagbalin a praktikal ken natimbeng tulongannatayo nga agserbi iti Dios ken kadagiti sabsabali?

• Ania dagiti pribilehio a silulukat kadatayo?

• Kasano a maaddaantayo iti makagunggona a biag ita?

[Dagiti Ladawan iti panid 23]

Kasapulan nga agbalintayo a natimbeng tapno makapagtultuloytayo nga agserbi ken Jehova iti amin a kararua

[Dagiti Ladawan iti panid 24]

Makapagserbitayo iti Dios iti nagduduma a pamay-an