Inayonyo iti Panagibturyo ti Nadiosan a Debosion

“Inayonyo iti pammatiyo . . . ti panagibtur; iti panagibturyo, ti nadiosan a debosion.”​—2 PEDRO 1:5, 6.

1, 2. (a) Nangrugi idi 1930’s, ania ti napasamak kadagiti Saksi ni Jehova kadagiti pagilian a kontrolado dagiti Nazi, ken apay? (b) Ania ti nagmaayan dagiti tattao ni Jehova iti sidong daytoy a naulpit a pannakatrato?

NALIDEM daydi a periodo iti historia iti maika-20 a siglo. Nangrugi idi 1930’s, rinibo a Saksi ni Jehova kadagiti pagilian a kontrolado dagiti Nazi ti di nainkalintegan a naaresto ken naipisok kadagiti kampo konsentrasion. Apay? Agsipud ta situtured a nagtalinaedda a neutral ken saanda nga indaydayaw ni Hitler. Kasano ti pannakatratoda? “Awan sabali a grupo dagiti balud . . . ti nagsagaba iti kinasadista dagiti soldado nga SS a kas kakaro iti linak-am dagiti Estudiante ti Biblia [dagiti Saksi ni Jehova]. Kinasadista daydi nga awan sardayna a panangtutuok iti pisikal ken mental, a ti kakas-ang dagita awan pagsasao ditoy lubong a makailadawan.”​—Karl Wittig, dati nga opisial ti gobierno ti Alemania.

² Ania ti nagmaayan dagiti Saksi? Iti librona a The Nazi State and the New Religions: Five Case Studies in Non-Conformity, kinuna ni Dr. Christine E. King: “Kadagiti laeng Saksi [no idilig kadagiti dadduma a relihiuso a grupo] a di nagballigi ti gobierno.” Wen, nagtalinaed a natibker dagiti Saksi ni Jehova, nupay ginasut kadakuada ti nagibtur agingga ken patay.

3. Ania ti nakatulong kadagiti Saksi ni Jehova a nangibtur kadagiti nakaro a pakasuotan?

³ Ania ti nakatulong kadagiti Saksi ni Jehova a nangibtur iti kakasta a pakasuotan saan laeng nga idiay Alemania a Nazi no di ket iti intero a lubong? Tinulongan ida ti nailangitan nga Amada nga agibtur gapu iti nadiosan a debosionda. “Ammo ni Jehova nga isalakan dagiti tattao nga addaan nadiosan a debosion manipud iti pakasuotan,” inlawlawag ni apostol Pedro. (2 Pedro 2:9) Sakbay dayta iti isu met la a surat, binalakadan ni Pedro dagiti Kristiano: “Inayonyo iti pammatiyo . . . ti panagibtur; iti panagibturyo, ti nadiosan a debosion.” (2 Pedro 1:5, 6) Isu nga agkanaig unay ti panagibtur ken ti nadiosan a debosion. Kinapudnona, tapno makapagibturtayo agingga iti panungpalan, masapul a ‘surotentayo ti nadiosan a debosion’ ken iparangarang dayta. (1 Timoteo 6:11) Ngem ania kadi a talaga ti nadiosan a debosion?

Ti Kaipapanan ti Nadiosan a Debosion

4, 5. Ania ti nadiosan a debosion?

⁴ Ti Griego a nombre para iti “nadiosan a debosion” (eu·seʹbei·a) mabalin a literal a maipatarus kas “umno a panagraem.”a (2 Pedro 1:6, Kingdom Interlinear) Kaipapananna ti nabara ken naimpusuan a rikna a naiturong iti Dios. Sigun ken W. E. Vine, ti adjetivo nga eu·se·besʹ, nga iti literal kaipapananna “naraem unay,” ipasimudaagna “ti bileg a, babaen ti panangiturong ti nasantuan a panagbuteng iti Dios, mayebkas iti napasnek nga aramid.”​—2 Pedro 2:9, Int.

⁵ Gapuna, ti ebkas a “nadiosan a debosion” tuktukoyenna ti panagraem wenno debosion ken ni Jehova a mangtignay kadatayo a mangaramid iti makaay-ayo kenkuana. Aramidentayo daytoy uray pay maipasangotayo kadagiti narigat a pakasuotan agsipud ta naimpusuan nga ay-ayatentayo ti Dios. Maysa dayta a napudno, personal a pannakirelasion ken Jehova a mayebkas babaen ti panagbibiagtayo. Naidagadag kadagiti pudno a Kristiano nga ikararagda nga “agbiag[da koma] a natalna ken naulimek a buyogen ti naan-anay a nadiosan a debosion.” (1 Timoteo 2:1, 2) Sigun kada leksikograpo a J. P. Louw ken E. A. Nida, “iti sumagmamano a pagsasao, ti [eu·seʹbei·a] iti 1 Tm 2.2 mabalin a siuumiso a maipatarus kas ‘agbiag iti wagas a kayat ti Dios a panagbiagtayo’ wenno ‘agbiag iti wagas nga imbaga ti Dios kadatayo a rumbeng a panagbiagtayo.’”

6. Ania ti pakainaigan ti nadiosan a debosion iti panagibtur?

⁶ Ad-adda itan a maawatantayo ti pakainaigan ti nadiosan a debosion iti panagibtur. Gapu ta agbibiagtayo iti wagas a kayat ti Dios a panagbiagtayo​—buyogen ti nadiosan a debosion​—kaguranatayo ti lubong, a mangsusuot iti pammatitayo iti nadumaduma a pamay-an. (2 Timoteo 3:12) Ngem awan pakatignayantayo a mangibtur iti kakasta a pakasuotan no saan a gapu iti personal a pannakirelasiontayo iti nailangitan nga Amatayo. Maysa pay, ipangag ni Jehova ti kasta a naimpusuan a debosion. Panunotenyo laengen ti riknana a mangmatmatmat manipud langit kadagidiay mangikagkagumaan a mangay-ayo kenkuana iti baet ti amin a kita ti ibubusor gapu iti debosionda kenkuana. Di ngad pakasdaawan nga “isalakan[na] dagiti tattao nga addaan nadiosan a debosion manipud iti pakasuotan”!

7. Apay a masapul a patanoren ti nadiosan a debosion?

⁷ Nupay kasta, saantay a nayanak nga addaan nadiosan a debosion, ken saantay met nga automatiko a matawid dayta kadagiti managbuteng-Dios a nagannak. (Genesis 8:21) Imbes ketdi, masapul a patanoren dayta. (1 Timoteo 4:7, 10) Masapul a reggetantayo nga inayon ti nadiosan a debosion iti panagibtur ken pammatitayo. Kinuna ni Pedro a sapulen daytoy ti “napasnek a panagregget.” (2 Pedro 1:5) Ngarud, kasanotay a mapatanor ti nadiosan a debosion?

Kasanotay a Mapatanor ti Nadiosan a Debosion?

8. Sigun ken apostol Pedro, ania ti tulbek iti panangpatanor ti nadiosan a debosion?

⁸ Inlawlawag ni apostol Pedro ti tulbek iti panangpatanor ti nadiosan a debosion. Kinunana: “Sapay koma ta ti di kaikarian a kinamanangaasi ken talna umadu kadakayo babaen ti umiso a pannakaammo iti Dios ken ni Jesus nga Apotayo, idinto ta ti nadiosan a pannakabalinna ti sibubulos a nangted kadatayo iti isuamin a banag a maipaay iti biag ken nadiosan a debosion, babaen ti umiso a pannakaammo kenkuana a nangayab kadatayo babaen ti dayag ken kinaimbag.” (2 Pedro 1:2, 3) Isu a tapno mainayon ti nadiosan a debosion iti pammati ken panagibturtayo, masapul a rumang-aytayo iti pannakaammo, kayatna a sawen, awan pagkuranganna, wenno naan-anay a pannakaammo ken Jehova a Dios ken ni Jesu-Kristo.

9. Kasano a mayilustrar a ti pananggun-od iti umiso a pannakaammo iti Dios ken ni Kristo ket saan laeng a ti panangammo iti kinasiasinoda ti ramanenna?

⁹ Ania ti kayat a sawen ti pananggun-od iti umiso a pannakaammo iti Dios ken ni Kristo? Nalawag a saan laeng a ti panangammo iti kinasiasinoda ti ramanen dayta. Tapno iyilustrar: Mabalin nga am-ammoyo ti kaarrubayo ken mabalin a kablaawanyo pay ketdi iti naganna. Ngem pautanganyo aya iti dakkel a gatad? Saan malaksid no pudpudno nga ammoyo ti kinataona. (Idiligyo ti Proverbio 11:15.) Umarngi iti dayta, saan laeng a ti panamati nga addada ken ti pannakaammo iti naganda ti kaipapanan ti umiso, wenno naan-anay a panangammo ken Jehova ken ni Jesus. Tapno situtulok a maibturantayo dagiti pakasuotan gapu kadakuada uray pay agingga ken patay, masapul a pudpudno nga am-ammotay ida. (Juan 17:3) Ania ti ramanen daytoy?

10. Ania dagiti dua a banag a ramanen ti pananggun-od iti umiso a pannakaammo ken Jehova ken ni Jesus, ken apay?

¹⁰ Dua a banag ti ramanen ti pananggun-od iti umiso, wenno naan-anay a pannakaammo ken Jehova ken ni Jesus: (1) ammuen ida kas persona​—dagiti galad, rikrikna, ken daldalanda​—ken (2) tuladen ti ulidanda. Ti nadiosan a debosion ramanenna ti naimpusuan, personal a pannakirelasion ken Jehova ket maiparangarang dayta babaen ti panagbibiagtayo. Gapuna, tapno mapatanortay dayta masapul a personal nga ammuentayo ni Jehova ken sursuruen a naimbag ti pagayatanna ken dagiti daldalanna iti amin a kabaelantayo. Tapno pudpudno nga am-ammotayo ni Jehova, nga iti ladawanna naparsuatayo, masapul nga usarentay ti kasta a pannakaammo ken ikagumaantay a tuladen. (Genesis 1:26-28; Colosas 3:10) Ket yantangay naan-anay a tinulad ni Jesus ni Jehova iti sao ken aramid, makatulong unay iti panangpatanor ti nadiosan a debosion ti umiso a pannakaammo ken ni Jesus.​—Hebreo 1:3.

11. (a) Kasanotay a magun-od ti umiso a pannakaammo iti Dios ken ni Kristo? (b) Apay a nagpateg ti panangmennamenna iti mabasbasatayo?

¹¹ Nupay kasta, kasanotay a magun-od ti umiso a pannakaammo iti Dios ken ni Kristo? Babaen ti naanep a panagadal iti Biblia ken kadagiti naibatay-Biblia a publikasion.b Ngem, tapno agresulta iti pannakapatanor ti nadiosan a debosion ti personal a panagadaltayo iti Biblia, nasken a mennamennaentayo, kayatna a sawen, pampanunoten, wenno ut-utoben, ti mabasbasatayo. (Idiligyo ti Josue 1:8.) Apay a nagpateg daytoy? Laglagipenyo a ti nadiosan a debosion kaipapananna ti nabara, naimpusuan a rikna a naiturong iti Dios. Iti Kasuratan, maulit-ulit a nainaig ti panagmennamenna iti piguratibo a puso​—ti akin-uneg a kinatao. (Salmo 19:14; 49:3; Proverbio 15:28) No ut-utobentayo a buyogen ti panangapresiar ti mabasbasatayo, sumagepsep dayta iti kaunggantayo, a mangtukay iti rikriknatayo, mangsagid iti emosiontayo, ken mangimpluensia iti pampanunottayo. Iti kasta, mapatibker ti panagadaltayo ti personal a pannakirelasiontayo ken Jehova ken matignaytayo nga agbiag iti wagas a makaay-ayo iti Dios uray pay maipasangotayo kadagiti makakarit a sirkumstansia wenno narigat a pakasuotan.

Panangalagad iti Nadiosan a Debosion iti Pagtaengan

12. (a) Sigun ken Pablo, kasano a maalagad ti maysa a Kristiano ti nadiosan a debosion iti pagtaengan? (b) Apay nga aywanan dagiti pudno a Kristiano dagiti nataenganen a nagannak?

¹² Ti nadiosan a debosion rumbeng a maipakita nga umuna iti pagtaengan. Kuna ni apostol Pablo: “No adda annak wenno appoko ti maysa a balo, sursuruen koma dagitoy nga umuna nga alagaden ti nadiosan a debosion iti sangakabbalayanda met laeng ken subadanda dagiti nagannak kadakuada ken apongda, ta daytoy makaay-ayo iti imatang ti Dios.” (1 Timoteo 5:4) Kas impakita ni Pablo, ti panangaywan kadagiti nataenganen a nagannak ket maysa nga ebkas ti nadiosan a debosion. Aywanan dagiti pudno a Kristiano dagiti nagannak kadakuada saan laeng a gapu ta rebbengenda dayta no di ket gapu ta patpatgenda ida. Ngem, saan la a dayta, bigbigenda a ti panangaywan iti pamilia ket ibilang ni Jehova a napateg. Pagaammoda unay a ti panangbaybay-a kadagiti dadakkelda iti kanito ti panagkasapulan kaipapananna ti ‘panangtallikud iti Nakristianuan a pammati.’​—1 Timoteo 5:8.

13. Apay a mabalin a pudno a maysa a karit ti panangalagad iti nadiosan a debosion iti pagtaengan, ngem ania a pannakapnek ti agtaud iti panangaywan kadagiti nagannak?

¹³ Agpayso, saan a kanayon a nalaka ti panangalagad iti nadiosan a debosion iti pagtaengan. Mabalin nga agaaddayo dagiti kameng ti pamilia. Mabalin nga addan pamilia a sungsungbatan dagiti nataengan nga annak ken mabalin nga ikarkarigatanda ti agbiruk iti pagbiag. Ti kita wenno rukod ti panangaywan a kasapulan dagiti nagannak mabalin a pakapsutenna ti pisikal, mental, ken emosional a salun-at dagidiay mangay-aywan. Nupay kasta, mabalin a mangyeg iti pudpudno a pannakapnek ti pannakaammo a ti panangaywan kadagiti nagannak ket saan laeng a ‘panangsubad’ no di pay ket makaay-ayo iti Daydiay ‘pangalaan ti nagan ti tunggal pamilia idiay langit ken ditoy daga.’​—Efeso 3:14, 15.

14, 15. Mangtedkayo iti pangarigan ti nadiosan a panangaywan dagiti annak iti nagannak.

¹⁴ Usigenyo daytoy makasagid-rikna a pasamak. Naipasango da Ellis ken dagiti lima a kakabsatna a lallaki ken babbai iti napaypayso a karit iti panangaywan ken ni tatangda iti pagtaengan. “Idi 1986, naistrok ni tatang, a namagbalin kenkuana a paralitiko,” kinuna ni Ellis. Agtitinnulong dagiti innem nga annak a mangasikaso kadagiti kasapulan ni tatangda, kas iti panangdigos ken regular a panangibalikid kenkuana tapno saan nga agluptak ti bukotna. “Ibasaanmi, kasaritami, tokaranmi. Dimi masinunuo no ammona ti maar-aramid iti aglawlawna, ngem tratuenmi a kas man la ammona ti amin a mapaspasamak.”

¹⁵ Apay a kasta la unay ti panangtaripato dagiti annak iti amada? Intuloy a kinuna ni Ellis: “Idi natay ni nanang idi 1964, bukbukoden ni Tatang a nangtaraken kadakami. Iti daydi a tiempo, 5 ti tawen ti buridekmi ket 14 ti inaunaanmi. Madadaan idi a tumulong kadakami; madadaankami met ita a tumulong kenkuana.” Nalawag, saan a nalaka ti mangaywan, ket no dadduma maupay dagiti annak. “Ngem ammomi nga apagbiit laeng a parikut ti sasaaden ni tatang,” kuna ni Ellis. “Siinanamakami iti tiempo inton kumaradkad ni tatang ken makadennaminto manen ni nanang.” (Isaias 33:24; Juan 5:28, 29) Makaay-ayo la ketdi ti kasta a napasnek a panangaywan iti nagannak iti Daydiay nangibilin kadagiti annak a raemenda dagiti dadakkelda!c​—Efeso 6:1, 2.

Nadiosan a Debosion ken ti Ministerio

16. Ania ti rumbeng a kangrunaan a rason iti aramidentayo iti ministerio?

¹⁶ No awatentayo ti awis ni Jesus a ‘surotentayo a kanayon,’ addaantayo iti annongen nga inted ti Dios, nga isu ti panangikaskasaba ti naimbag a damag ti Pagarian ken panangaramid kadagiti adalan. (Mateo 16:24; 24:14; 28:19, 20) Nalawag, pagrebbengan dagiti Kristiano ti makiraman iti ministerio kadagitoy “maudi nga al-aldaw.” (2 Timoteo 3:1) Nupay kasta, ti motibotayo a mangasaba ken mangisuro ket saan laeng a gapu ta rebbengen wenno obligasiontayo dayta. Ti nauneg a panagayat ken Jehova ti rumbeng a kangrunaan a rason iti aramidentayo ken iti kaadu ti aramidentayo iti ministerio. “Ti naruay ti puso sawen ti ngiwat,” kinuna ni Jesus. (Mateo 12:34) Wen, no agliplippias iti pusotayo ti ayat ken Jehova, awan makalapped kadatayo a mangpaneknek maipapan kenkuana kadagiti sabsabali. No ti ayat iti Dios ti motibotayo, ti ministeriotayo ket maysa a nabagas nga ebkas ti nadiosan a debosiontayo.

17. Kasanotay a mapatanor ti umiso a motibo iti ministerio?

¹⁷ Kasanotay a mapatanor ti umiso a motibo iti ministerio? Panunotenyo a buyogen ti panangapresiar dagiti tallo a rason nga inted ni Jehova kadatayo no apay a rumbeng nga isut’ ayatentayo. (1) Ay-ayatentayo ni Jehova gapu kadagiti inaramidna a maipaay kadatayo. Awanen dakdakkel pay nga ayat a naipakita ngem iti panangipaayna iti subbot. (Mateo 20:28; Juan 15:13) (2) Ay-ayatentayo ni Jehova gapu iti madama nga ar-aramidenna a maipaay kadatayo. Addaantayo iti wayawaya a makisao ken Jehova, a mangsungbat kadagiti kararagtayo. (Salmo 65:2; Hebreo 4:14-16) Bayat a yun-unatayo ti intereses ti Pagarian, sagsagrapentayo dagiti kangrunaan a kasapulan iti biag. (Mateo 6:25-33) Umaw-awattayo iti nawadwad a naespirituan a taraon a makatulong kadatayo a mangsaranget kadagiti parikut a pakaipasanguantayo. (Mateo 24:45) Ken naparaburantayo iti panagbalin a paset ti sangalubongan a Nakristianuan a panagkakabsat a pudno a mangiduma kadatayo iti lubong. (1 Pedro 2:17) (3) Ay-ayatentayo met ni Jehova gapu iti aramidennanto pay a maipaay kadatayo. Gapu iti ayatna, ‘petpetpetantayo ti napaypayso a biag’​—biag nga agnanayon iti masanguanan. (1 Timoteo 6:12, 19) No panunotentayo ti panagayat ni Jehova kadatayo, tignayennatay la ketdi ti pusotayo a sipapasnek a mangisarsarita kadagiti sabsabali ti maipapan kenkuana ken kadagiti napateg a panggepna! Saanen a nasken pay nga ibaga dagiti dadduma no ania ti aramidentayo wenno no kasano kaadu ti aramidentayo iti ministerio. Tignayennatay ti pusotayo a mangaramid iti amin a kabaelantayo.

18, 19. Ania a lapped ti pinagballigian ti maysa a kabsat a babai tapno mabalinanna ti makiraman iti ministerio?

¹⁸ Uray iti sango dagiti makakarit a sirkumstansia, ti puso a napnuan nadiosan a debosion ket matignay nga agsao. (Idiligyo ti Jeremias 20:9.) Naipakita daytoy iti kapadasan ni Stella, maysa a managbabain unay a Kristiano a babai. Idi damona ti agadal iti Biblia, kinunana iti nakemna, ‘Pulos a diak mabalinan ti mamalaybalay!’ Inlawlawagna: “Nakataltalnaak idi. Pulos a diak maitured ti umasideg ken makisarita kadagiti sabsabali.” Bayat ti panagad-adalna, dimmakkel ti panagayatna ken Jehova, ket rimmayray ti tarigagayna a mangisarsarita maipapan kenkuana kadagiti sabsabali. “Malagipko ti imbagak iti nangisuro kaniak iti Biblia, ‘Tarigagayak unay ti agsao, ngem diak kabaelan, ket talaga a pakasikorak dayta.’ Pulos a diak malipatan ti imbagana kaniak: ‘Stella, agyamanka ta kayatmo ti agsao.’”

¹⁹ Di nagbayag, nabaelan ni Stella a kinasabaan ti kaarrubana. Kalpasanna nakiramanen iti panangasaba iti binalaybalay iti kaunaan a gundaway. Para kenkuana, maysa dayta a dakkel nga addang. (Aramid 20:20, 21) Malagipna: “Insuratko ti presentasionko. Ngem kasta unay ti amakko ta uray pay no adda iti sangok, napalalo ti nerbiosko a mangtaldiap iti notak!” Itatta, nasurok a 35 a tawenen ti napalabas, managbabain pay laeng ni Stella. Ngem, pagaayatna ti ministerio iti tay-ak ken addaan iti makapnek a paset iti dayta.

20. Ania a pangarigan ti mangipakita nga uray ti pannakaidadanes wenno pannakaibalud dina mapagulimek dagiti nasungdo a Saksi ni Jehova?

²⁰ Uray ti pannakaidadanes wenno pannakaibalud dina mapagulimek dagiti nasungdo a Saksi ni Jehova. Usigenyo ti kapadasan da Ernst ken Hildegard Seliger ti Alemania. Gapu iti pammatida, no pagtiponen, nasurok nga 40 a tawen a naipupokda kadagiti kampo konsentrasion dagiti Nazi ken kadagiti pagbaludan dagiti Komunista. Uray pay addada iti uneg ti pagbaludan, intuloyda ti nangpaneknek kadagiti dadduma a balud. Linagip ni Hildegard: “Imbilangdak dagiti opisial ti pagbaludan a napeggad unay, gapu ta, kas kinuna ti maysa a guardia a babai, agmalmalem a nangpaneknekak maipapan iti Biblia. Isu nga impisokdak iti bartolina.” Idi naruk-atandan, binusbos da Brother ken Sister Seliger ti amin a tiempoda iti Nakristianuan a ministerio. Agpadada a simamatalek a nagserbi agingga iti ipapatayda. Pimmusay ni Brother Seliger idi 1985 ket ni baketna idi 1992.

21. Ania ti masapul nga aramidentayo tapno mainayon ti nadiosan a debosion iti panagibturtayo?

²¹ No siaanep nga adalentayo ti Sao ti Dios ken ut-utobentayo a buyogen ti panangapresiar ti maad-adaltayo, rumang-aytayo iti umiso a pannakaammo ken Jehova a Dios ken ni Jesu-Kristo. Iti kastoy a wagas, maparayraytayo dayta nagpateg a galad​—nadiosan a debosion. No awan ti nadiosan a debosion saantay a maibturan dagiti nadumaduma a pakasuotan a dumteng kadatayo kas Kristiano. Gapuna, surotentayo ti balakad ni apostol Pedro, nga itultuloytayo nga ‘inayon iti pammatitayo ti panagibtur ket iti panagibturtayo, ti nadiosan a debosion.’​—2 Pedro 1:5, 6.

[Dagiti Footnote]

Ania ti Sungbatyo?

◻ Ania ti nadiosan a debosion?

◻ Ania ti pakainaigan ti nadiosan a debosion iti panagibtur?

◻ Ania ti tulbek iti panangpatanor ti nadiosan a debosion?

◻ Kasano a maalagad ti maysa a Kristiano ti nadiosan a debosion iti pagtaengan?

◻ Ania ti rumbeng a kangrunaan a rason iti aramidentayo iti ministerio?

[Ladawan iti panid 10]

Impakita dagiti Saksi ni Jehova a naibalud iti kampo konsentrasion dagiti Nazi idiay Rabensbrück ti panagibtur ken nadiosan a debosion