Iparangarang ti Panagtalek ken Jehova—Babaen ti Panangtungpal kadagiti Bambanag a Naadalen
“Agtalekka ken Jehova ket agaramidka iti naimbag; agnaedka koma ditoy daga, ket agtaraonka iti kinamatalek.”—SALMO 37:3.
1, 2. (a) Ania komat’ rebbeng a matarigagayan a resulta ti personal a panagadal? (b) Ni Santiago ti nangted ania nga ilustrasion, ket ti aya panangkita a dineskribirna ket maysa a narabaw laeng?
TI PERSONAL a panagadal ti maysa iti Sao ti Dios ket saan laeng nga agpaay iti personal a pagragsakan. Ti panagadal ket rebbeng nga isut’ pamay-an a panangsukay ti panagtalek ken Jehova. (Proverbio 3:1-5) Ti sasao ti salmista nga adda iti ngato ipakitana a ti nadiosan a panagtalek, iti kasumbangirna, iparangarangna ti bagina iti tao babaen ti ‘panagaramidna ti naimbag.’
2 Inggunamgunam ni Santiago: “Ngem managtungpalkay koma iti sao, ket saan laeng a managdengngeg, nga allilawenyo dagiti bagbagiyo met laeng. Ta no adda managdengngeg iti sao ket dina aramiden, umasping iti maysa a tao a kitkitaenna ti nakayanakanna a rupa iti maysa a sarming. Ta kitaenna ti rupana, ket pumanaw ket malipatanna daras no ania ti kitana a tao idi.” (Santiago 1:22-24) Gapuna daytoy a panangmatmat ket saan a maysa laeng nga apagkanito a panangtaldiap. Ti sao a Griego para iti “panangkita” a nausar ditoy kangrunaan a kaipapananna “ti panagtignay ti isip a mangtarus kadagiti sumagmamano a kinapudno maipapan iti maysa a banag.”—An Expository Dictionary of New Testament Words, ni W. E. Vine; idiligyo iti Aramid 7:31, Kingdom Interlinear.
3. Kasano a ti maysa a tao a kumita iti sarming daras a malipatanna “no ania ti kitana a tao idi”?
3 Ngarud, panunotenyo ti maysa a tao mangsuksukimat ti bagina iti maysa a sarming, a nalabit nakitana ti langana kas maysa a di makaay-ayo. Mabalin nga isut’ makakita iti doble a timid gaput’ nalabes a pampannangan wenno panagin-inum, ti agbubussog iti baba ti mata gaput’ kinakurang ti turog, ken karkarenken iti kidkidayna gapu ti di pumampanaw a panagdanag. Gapu ta naipasango iti bagina met laeng, naikeddengna ti panagaramid ti nabayagen a panagbalbaliw kadagiti ugali ken estilo ti panagbiagna. Ket kalpasanna “pumanaw.” Gapu ta dagiti makariribuk a langana ti saannan a makitkita, dayta ti “malipatanna daras,” saan unay daydiay itsurana, no di ket “no ania ti kitana a tao idi.” Ti pangngeddengna a mangaramid ti panagbalbaliw ket naglabasen.
4. Kasano nga agaplikar ti ilustrasion ni Santiago iti panagadaltayo ti Kasuratan?
4 Umasping iti dayta, mabalin a maysakayo a nalaing nga estudiante ti Biblia. Ngem, kasanot’ panagtignayyo iti inkay makitkita iti sarming ti Sao ti Dios? No makita dagiti naespirituan a pagkapuyan ken pakatulawan, daytoy kadi ti mamataud ti apagkanito laeng a pannakaseknanyo, wenno agar-aramidkay aya ti nainget a pangngeddeng a mangkorehir kadagiti depekto? Innayon ni Santiago: “Ngem ti mangsukimat iti linteg a naan-anay nga isu ti linteg ti wayawaya ket pagtalinaedanna, ket saan a managdengngeg a makalipat, no di ket managaramid iti aramid, daytoy a tao naragsakto kadagiti ar-aramidna.” (Santiago 1:25) Gapuna inkararag ti salmista: “Isurom kaniak, O Jehova, ti dalan dagiti al-alagadem, ket salimetmetakto agpapan pagtungpalan.”—Salmo 119:33.
No Aniat’ Ibaga ti Ar-aramidtayo iti Kinasiasinotayo
5. (a) Aniat’ ibagbaga ti ar-aramidtayo maipapan kadatayo? (b) Ania a pagtungpalan ti agur-uray kadagidiay “agar-aramid iti kinadakes?
5 Pudno unay, aniaman ti ar-aramidtayo paneknekanna no siasinotayo iti unegtayo met laeng. Ket saan nga agbayag iparangarangto ti maysa a tao “ti kaunegan a paset” babaen ti panagaramidna ti naimbag wenno ti dakes. (Salmo 51:6) Kuna ni Salomon: “Uray ti ubing ipakaammona ti bagina kadagiti kababalinna, no nadalus man ti aramidna wenno nalinteg.” (Proverbio 20:11) Pudno daytoy ken Jacob ken ni Esau idi agtutuboda. Bayat ti panaglabas ti tiempo, imparangarang dagiti ar-aramid ni Esau ti kinakurang ti naespirituan a panangipategna. (Genesis 25:27-34; Hebreo 12:16) Pimmudno met daytoy kadagiti rinibo nga agkunkuna nga agtaltalekda ken Jehova ngem nagbalinda kas ti aw-awagan ti Biblia a “dagiti managaramid iti kinadangkes.” (Job 34:8) Insurat ti salmista: “Inton tumarubo dagiti nadangkes a kas iti ruot ken no lumapsak dagiti amin nga agar-aramid iti kinadakes, isu daytan ti pannakadadaeldanto nga agnanayon.”—Salmo 92:7.
6. Apay nga inkapilitan a ti panagtalektayo ken ni Jehova ti maiparangarang itattan?
6 Ti bilang dagiti tattao a nadangkes ti umad-adu, ket ti pannakadadaelda dandanin; dinto palubosan ti Dios nga agnanayon dagiti managdakdakes. (Proverbio 10:29) Ngarud inkapilitan nga iparangarangtayo nga agtalektayo ken ni Jehova babaen ti panagtungpaltay iti maad-adaltayo. “Pataknengenyo koma ti panagbibiagyo iti tengnga ti nasnasion,” impatigmaan ni Pedro. (1 Pedro 2:12) Kadagiti ania ngarud a paset ti mabalin a pangparang-ayantayo?
Ti Pannakilangenlangentayo kadagiti Dadduma
7. Apay a masapul a naannadtay koma iti pannakilanglangentayo “kadagiti adda iti ruar”?
7 Maysa a paset mabalin a ti wagas a pannakilangenlangentayo kadagiti dadduma. Pagannadennatayo ti Proverbio 13:20: “Ti makikuyog kadagiti maag pagsikorannanto.” Gaput’ saan a panangiyaplikar iti daytoy naipaltiing a balakad, dadduma nagbalinda a nasinged unay kadagiti tattao iti lubong idiay pagtrabahuan wenno pages-eskuelaanda. Gapuna maysa a kabsat a lalaki a kasado ti nairaman iti narugit nga aramid iti maysa a babai idiay panggedanna. Kimmuykuyog met kadagiti lallaki a katrabahuanna kadagiti lokal a pagiinuman, ket nagbanag iti pannakabartekna. Pudno unay, kasapulantayo ti “magna a nainsiriban iti imatang dagiti adda iti ruar.”—Colosas 4:5.
8. Kasano a dadduma mabalinda a parang-ayen ti pannakilanglangenda kadagiti padada a Kristiano?
8 Ngem komusta met ngay ti pannakilanglangentayo kadagiti padatayo a Kristiano? Kas pangarigan, nakautangkayo ti kuarta iti maysa a kabsat. Masapul aya a taktakenyo unay ti panagbayad kenkuana, nga irasrason nga agsipud ta nabakbaknang ti kabsat, ket dakdakkel ti pakasapulanyo ngem ti pannakasapulna? “Ti nadangkes umutang ket saan nga agbayaden,” kuna ti Salmo 37:21. Wenno no maysakayo nga amo, iyap-aplikaryo aya ti prinsipio a “Ti mangmangged maikari iti tangdanna” no maipapan ti panangsueldoyo kadagiti empleadoyo a Saksi? (1 Timoteo 5:18) Nabalinan ni Pablo a kinuna maipapan iti mismo a pannakikadkaduana: “Binuyogan ti kinasanto ken ti kinapudno a nadiosan. . . nagbiagkam ditoy lubong, a maipaay kadakayo a nangnangruna.”—2 Corinto 1:12.
Natakneng a Panagkawkawes ken Panagbubuok
9. Ania a pagannayasan iti panagkawkawes ken panagbubuok ti napaliiw dagiti dadduma a panglakayen?
9 Maysa nga agdaldaliasat a manangaywan idiay Alemania dineskribirna ti dadduma kadagiti lokal a Kristiano kas “ti kaputotan ti sapatos a tennis” gapu iti aglablabes a kinabogar a panagkawkawesda no panaggigimong. Innayon pay ti sanga nga opisina a dadduma a makigimgimong ti “as-asidegdan iti kinaburara,” nupay “ti kadakkelan a bilang dagiti kakabsattayo ti natakneng panagkawkawesda.” Ti sabali pay a pagilian ti nangireport met a ti “kinakurang ti personal a kinadalus ti problema ditoy. . . Dadduma kadagiti kakabsat saanda agus-usar ti nadalus a kawes. Baybay-anda ti buokda a di masagsagaysay ken narugit no mapanda makigimong wenno mapanda iti tay-ak ti serbisio.” Anian a nagpateg para kadagiti adipen ni Jehova ti panagbalinda a nadalimanek ken nadalus iti isuamin a banag!—1 Corinto 7:1.
10. (a) Ania a prinsipio ti rebbeng mangigiya ti panagpilitayo ti panagkawes ken panagbubuoktayo? (b) Kaano a maiyanatup ti panangbalakad, ken kasanot’ rebbeng a panangawattayo?
10 Kasapulan ti “panagkawestayo a nanakman, natakneng ken saan a kinapalalo,” nangnangruna no makiramramantayo kadagiti naespirituan nga ar-aramid. (1 Timoteo 2:9, New International Version) Ti isyu ket saan a no daydiay estilo ti aglablabes ti kinamodana no di ket no daytat’ maiyanatup para iti maysa nga agkunkuna a ministro ti Dios. (Roma 12:2; 2 Corinto 6:3) Ti aglablabes a kinabogar wenno nakail-ilet a bado ti makadadael iti mensahetayo. Dagiti estilo a nakakarkaro ken inggagara a mangpababai iti lalaki wenno mangpalalaki iti babai ti nalawag nga awan iti lugar. (Idiligyo iti Deuteronomio 22:5.) Siempre, agdudumaduma dagiti lokal a kustombre, sigun iti panniempona, dagiti pakasapulan iti panggedan, ken dadduma pay, gapuna ti kongregasion Kristiano ti saan nga agaramid kadagiti aglablabes kinaingetna a pagalagadan a mangsaklaw ti sangalubongan a panagkakabsat. Ket di met rebbeng a dagiti panglakayen ipapilitda dagiti personal a pagayatanda iti arban. Nupay kasta, no ti estilo ti agibumbunannag ti Pagarian maipapan iti panagbubuok ti makariribuk iti intero a kongregasion wenno kissayanna ti pateg ti ministerio, maikari ti naasi a panangbalakad. Abrasaenyonto aya dayta a balakad a sipapakumbaba, nga ipamatmat ti panagtalek ken Jehova?—Hebreo 12:7.
Panagtalek iti Dios nga Ipaayanna dagiti Mangbirbiruk ti Pagarian
11. Kasano a dadduma nakemmegda iti panangkamkamat kadagiti material a bambanag, ket apay a di nainsiriban daytoy?
11 “Itultuloyyo ngarud a biruken ti pagarian ken ti kinalintegna, ket isuamin dagitoy a bambanag mainayondanto kadakayo.” (Mateo 6:33) Anian a nakalkaldaang no dadduma mapaayda a mangipangag kadagidiay a sasao! Gaput’ panangalun-onda iti sarsarita ti pinansial a kinatalged, sibabara ti panangkamatda iti kinabaknang, nailubongan nga edukasion, ken nailubongan a karera, nga “agtalekda iti kinabaknangda.” (Salmo 49:6) Namakdaar ni Salomon: “Dika maringgoran a bumaknang. . . Itaengmonto aya dagiti matam iti daydiay awan? Ta dagiti kinabaknang pudno nga agkayabkabda kas iti aguila a tumayab nga agpalangit.”—Proverbio 23:4, 5.
12. Kasano a dagidiay kumamkamat ti kinabaknang ‘sinalputda ti bagbagida iti adu a ladladingit’?
12 Ni apostol Pablo ti namakdaar pay: “Ta ti ayat ti pirak isu ti maysa a ramut ti isuamin a kita ti kinadakes, isu nga idi inaguman dagiti dadduma nayaw-awanda iti pammati ket nasalputda kadagiti adu a ladladingit.” (1 Timoteo 6:10) Iti pananginterbio ti U.S.News & World Report, kuna ni Dr. Douglas LaBier nga adu kadagiti agtutubo a lallaki ken babbai a mangkamkamat iti kinabaknang “ti mangibagbaga kadagiti rikna ti di pannakapnek, dandanag, ladladingit, kinaongaong, kinaawan-talek, agraman ti nakaad-adu a pisikal a sagsagubanit—sakit ti ulo, sakit ti bukot, problema iti tian, di pannakaturog, problema ti pannangan.”
13. Apay a kasayaatan ti pannakapneken nga adda “pagtaraontayo ken pagkawestayo”?
13 Dagidiay agtalek ken Jehova nga isut’ mangipaay para kadakuada ilisida ti bagbagida manipud adu a ladingit ken panagdanag. Pudno, ti pannakapneken babaen laeng iti “pagtaraontayo ken pagkawestayo” mabalin kaipapananna ti nanumnumo nga estandarte ti panagbiag. (1 Timoteo 6:8) Ngem “ti kinabaknang awanto ti mamaayna inton aldaw ti pungtot.” (Proverbio 11:4) Mainayon pay, no parang-ayentayo ti serbisiotayo ken Jehova, ilinlineatay ti bagitayo a maipaay “ti bendision ni Jehova” nga isu “ti mangpabaknang, ket saanna nga anayan iti ladingit.”—Proverbio 10:22.
“Sapulen ti Talna ket Isut’ Suroten”
14, 15. (a) Ania a kita dagiti isyu no maminsan ti mangriribuk iti kinatalna dagiti kongregasion? (b) Kasano a masurot ti talna no mapasamak dagiti di pagkikinnaawatan?
14 Ti sabali pay a mabalintayo a panangiparangarang ti panagtalek ken Jehova ket isu ti “sapulenna koma ti talna ket isu ti surotenna” iti tengnga dagiti kapammatiantayo. (1 Pedro 3:10-12) Ngem, no maminsan, mapalpalubosan dagiti babassit a bambanag a pagtaudan dagiti napait a panaggiginnura kadagiti kakabsat: ti arkos ti Kingdom Hall, ti panagbalbaliw iti teritoria ti kongregasion, ti pakaitudingan a Panagadal ti Libro, ti panangtaming kadagiti abasto ti magasin ken literatura. Wenno, iti dadduma a kaso, imbes nga urnosen dagiti pagsusuppiatan a personal wenno iti negosio iti espiritu ti Mateo 18:15-17, saanen nga agtutungtong dagiti kakabsat iti maysa ken maysa wenno riniribukda ti kongregasion gapu iti panagsususikda.
15 Kuna ni Santiago: “Ket ti bunga ti kinalinteg maimula iti talna a maipaay kadagiti agar-aramid ti talna.” (Santiago 3:18) Ngarud, iti interes ti talna, sisasaganakay koma a tumulok iti pagayatan wenno opinion ti dadduma, nga isuko pay no mabalin dagiti personal a kalintegan. (Idiligyo iti Genesis 13:5-12.) Kas pangarigan, no dua a kongregasion ti agus-usar ti maymaysa a Kingdom Hall, saan koma nga alalaen ti maysa a kongregasion ti posision a “kukuana” ti hall ken isut’ addaan ti autoridad a mangidiktar kadagiti oras ti panaggigimong wenno dadduma pay a bambanag ti sabali a kongregasion. Ti panagraem ken kooperasion ti maysa ken maysa ti rebbeng a mataginayon.
16. Aniat’ pateg ti panangbigbig ti teokratiko nga urnos iti pagtaengan ken iti kongregasion?
16 Adu a sussusik ti maliklikan no bigbigentay laeng ti teokratiko nga urnos ken salimetmetantayo dagiti umiso a puestotayo. (1 Corinto 11:3; Efeso 5:22-27) No dagiti assawa a babbai pagraemanda ti tartarigagay ti lallakayda, ken dagiti annak ti bilbilin dagiti dadakkelda, dagiti ministerial nga adipen ti panangiturong manipud kadagiti panglakayen, dagiti tigtignayda “padakkelenna ti [kongregasion] tapno pakapatibkeranna met laeng ken ayat.” (Efeso 4:16) Ikabilyon, a no maminsan agbiddut met dagiti assawa a lallaki, dagiti nagannak, ken dagiti panglakayen. (Roma 3:23) Ngem ti kadi iyaalsa, panagtantanabutob, wenno panangsuppiat kadagiti nasayaat motibona a bilbilin parang-ayenna ti adda a situasion? Anian a nasaysayaat ti panagtalinaedtayo iti intuding ti Dios a puestotayo ket sapulen ti talna!
Panagreggettayo Idiay Tay-ak
17. (a) Aniat’ it-ited dagiti dadduma a rasonda iti panangit-ited laeng ti apagbassit a pannakiraman iti panangaskasaba? (b) Kasanot’ panangparegta ni Jesus kadagiti Kristiano a panangsango kadagiti pakarigatan itatta?
17 Iti kaaduan, nupay kasta, ti kadadakkelan a karit ket isut’ panangtungpal ti Nakristianuan a komision nga ikasaba ti naimbag a damag. (Mateo 24:14; 28:19, 20) Dadduma ti nakabasbassit ti pannakiramramanda iti tay-ak ti serbisio, a nalabit ikalkalinteganda a ti rigat ti panagsapul ti panagbiag ken ti panangpadakkel ti annak iti pamilia pagbalinenna a narigat ti panagaramidda ti ad-adu pay. Ikabilyon, dagiti pakarigatan “kadagiti maudi nga al-aldaw” ket nadagsen. (2 Timoteo 3:1) Ni Jesus, nupay kasta, namakdaar maibusor iti ‘pannakapunno kadagiti tartarigagay itoy a biag.’ Bayat a dumakdakes dagiti kasasaad, dagiti Kristiano rebbeng a ‘kumitada ken itangadda ti ul-uloda.’ (Lucas 21:28, 34) Maysa kadagiti kasayaatan a pamay-an tapno “bumileg” kontra kadagiti iraraut ni Satanas ket isu ti “panangkabal ti saksaka[tayo] kadagiti alikamen ti naimbag a damag”—ti regular a pannakiraman iti panangaskasaba!—Efeso 6:14, 15.
18. Aniat’ mabalin a rason a dadduma agkedkedda a makiraman a naan-anay iti panangaskasaba?
18 Idi kaaldawan ni Pablo, adu a Kristiano (uray kadagiti sumagmamano a kongregasion laeng) “sapsapulenda laeng ti kabukbukodanda nga interes, saan a dagiti sanikua ni Kristo Jesus.” (Filipos 2:21) Pudno kadi daytoy met iti sumagmamano nga adda iti tengngatayo itatta? Nalabit saandan a matmatmatan ti panangbiruk iti Pagarian kas iti daydiay tao a nakasarak ti maysa a “perlas a dakkel ti pategna” nga isut’ pagaramidanna ti panagsakripisio. (Mateo 13:45, 46) Gapu iti itutulokda iti kabukbukodan nga interes, sinurotdan ti kalalakaan a pamay-an ket mangipapaayda laeng ti nagbassit wenno sobsobrada laeng a serbisio. Ngem, laglagipenyo, ti panagayat ken Jehova ken iti pada a tao tignayenna dagiti pudno a Kristiano a mangasaba, uray no ti panangirugi ti pannakipatpatang kadagiti estranghero ket maibusor iti natural nga inklinasiontayo.—Mateo 22:37-39.
19. Apay a di maragsakan ni Jehova kadagiti nabaaw a panagregget, ket kasanotayo a tingitingen ti bukodtayo a serbisio kenkuana?
19 No ditay matignay a mangasaba, ngarud ti ayattayo ken Jehova ken panagtalektayo kenkuana ket nasursurok bassit ngem ti siririing a panunottayo. “Ammuem ti Dios ni amam ket agserbika kenkuana a buyogen ti maysa a puso a sipapalungdo,” impatigmaan ni David ken Salomon, “ta ni Jehova sukimatenna dagiti ar-arapaap dagiti pampanunot.” (1 Cronicas 28:9) Ni Jehova ti saan a maallilaw babaen iti nabaaw a panagregget. Uray ti regular a pannakiraman iti tay-ak ti serbisio ket saan a makapnek kenkuana no mangipapaaytayo laeng ti apagbassit iti kabaelantayo no ‘pagreggetantayo.’ (Lucas 13:24) Tunggal Kristiano ngarud ti masapul a mangaramid ti naimpusuan a panangtimbang iti pannakiramramanna iti tay-ak ket saludsodanna ti bagina: ‘Ar-aramidek aya amin a kabaelak?’ Nalabit a ti panagbalbaliw kadagiti panangipangpangrunatayo ti rebbeng a maaramid.
Matignay nga “Agaramid ti Naimbag” Babaen iti Ulidan dagiti Dadduma
20. Apay a maiyanatup ti panangsukimattay kadagiti naimbag nga ulidan nga ipakpakita ti padatayo a Kristiano?
20 Ti serbisiotayo iti Dios ket saan a maar-aramidan “a maiyasping iti sabali.” (Galacia 6:4) Nupay kasta, ti naimbag nga ulidan dagiti dadduma masansan tignayennatayo nga agaramid ti ad-adu pay. Ni apostol Pablo mismo kinunana: “Tuladendak koma, a kas met iti panangtuladko ken Kristo.” (1 Corinto 11:1) Ngarud, usigenyo, no kasano kaadu nga oras ti busbusbosen dagiti kakabsattayo iti tay-ak ti serbisio iti kada bulan. Idiay Estados Unidos, ti promedio nga oras para kadagiti agibumbunannag ti ngimmato manipud 8.3 oras idi 1979 ingganat’ 9.7 oras idi 1987! Dagiti kakabsattayo agtultuloy a parparangayenda ti busbusbosenda nga oras iti tay-ak. Pudno met aya dayta kadakayo?
21. Aniat’ nangtignay kadagiti adu a sumrek iti panagpayunir? Iyilustrar.
21 Gaput’ pannakatignayda iti naregta nga ulidan dagiti dadduma, ti di pay napadpadaan a bilang ti sumsumreken iti regular payunir a trabaho. Idiay California (E.U.A.) maysa nga agkabanuag a kabsat a babai nga agnagan Angela ti immawat ti makaay-ayo a panggedan, agraman panagbalin nga eskolar iti pilienna a kolehio. Ni Angela, nupay kasta, pinilina ti amin-tiempo a ministerio. Ti rasonna? “Babaen ti pannakikuykuyog kadagiti adu a payunir, talaga a makitak ti naun-uneg a rag-o ken pannakapnek saan laeng nga iti bagbagida no di ket iti pannakirelasionda ken Jehova. Kayatko a maaddaan iti daytoy nauneg a rag-o ken pannakapnek.”
22. Aniada dagiti gunggona iti panangaramid kadagiti bambanag a naadalen?
22 Kayatyo met aya “ti nauneg a rag-o ken pannakapnek”? Ngarud “agtalek ken Jehova ket agaramid ti naimbag”! Palubosanyo a ti ammoyo isut’ mangtignay kadakayo nga agaramid ti inggat’ kabaelanyo iti serbisio ni Jehova. Ti panangtungpal kadagiti bambanag a naadaltayon ti mangiparangarang iti isuamin ti naespirituan nga irarang-ayyo ket magunggonaanto dagiti dadduma iti makaispal-biag a pamay-an. (1 Timoteo 4:15, 16) Sapay koma ta amin, matignayda iti sasao ni Pablo idiay Filipos 4:9: “Dagiti bambanag nga inadalyo ken inawatyo ken nangngegyo ken nakitayo kaniak, aramidenyo ida; ket ti Dios ti talna addanto kadakayo.”
Dagiti Punto a Repasuen
◻ Ania komat’ rebbeng a kababalintayo iti ikikita ti sarming ti Sao ti Dios?
◻ Kasanot’ mabalin a panangparang-aytayo iti wagas a pannakilanglangentay kadagiti dadduma?
◻ Apay a saan a nainsiriban ti panangkamkamat ti material a bambanag?
◻ Kasanotay a sapulen ti talna iti kongregasion?
◻ Aniat’ rebbeng a mangtignay kadatayo a maaddaan ti naan-anay a pannakiraman iti tay-ak ti serbisio?
[Ladawan iti panid 16]
Saan nga umdas a makita dagiti naespirituan a pagkapuyan ken pagkatulawan. Masapul nga agtignaytayo a mangkorehir kadakuada!
[Ladawan iti panid 18]
Dagidiay mangkamkamat ti kinabaknang masansan yegda iti bagbagida ti “adu a ladladingit”