Manipud Managbasatayo
Ni Maria
Ti artikuloyo maipapan ken Maria, Nobiembre 8, 1988, ket, iti pagarupko, maysa a panangikagumaan a panangiladawan kadagiti Katoliko a kas managdaydayaw iti didiosen. Nangaramid kadagiti sumagmamano a panangtukoy kadagiti Katoliko a kas “managdaydayaw” ken ni Maria. Palubosandak koma a mangpalinteg iti rekord. Maysaakon a Katoliko iti 35 a tawtawen, ket awan ti ammok a Katoliko a “mangdaydayaw” ken Maria. Adu kadakami ti agkararag iti Dios babaen ken Maria. Awan kadakami ti mangrugi a mangipadis wenno mangidilig kenkuana iti Dios.
G. A. H., Estados Unidos
Ti “The Catholic Encyclopedia” (1912, Tomo 15, panid 463) kunaenna: “Dayta a nalatak a debosion iti Bendita a Birhen ket masansan a maaywanan [idi edad media] a buyogen iti kinamanaglablabes ken panangabuso, ta imposible nga ilibak.” Ti ibibisita kadagiti adu a luglugar kadagiti adu a Katoliko a dagdaga itatta ti mangpatalged ken G. A. H. a ti kasta a panaglablabes ket agtultuloy.—ED.
Dikay mangipato tapno dikay maipato. No dagiti Katoliko pudno a daydayawenda ni Maria iti kasta unay, bay-anyo nga ikeddeng ti Apotayo dayta inton aldaw ti panangukom. Laglagipenyo, agtalinaedto ti kinapudno. Isuratyo dagiti pagimbagan ken pagdaksan ti kasasaad ket bay-anyo ti managbasa a mangawat ti pannakaseknanyo.
R. W., Estados Unidos
Ti pamiliak ken siak ket napadakkelkami a Katoliko ken debotado ken Maria ngem, nupay kasta, iti adun a tawtawen nasarakanmi a makapainteres dagiti magasinyo ken makagunggona a basaen. Dagiti artikulo maipapan ken Maria ket, kankanayon, nga addaan panggep ken awan ti pananglaisna. Kayatmi a maammuan, nupay kasta, no apay a dikay unay inlawlawag dagiti detalye maipapan iti Lourdes ken Fatima? Ti kinapasnekyo iti panangusig kadagiti tema ken iti pannakagteng kadagiti konklusion ket nakalatlatak. Mabalin kadi a lablabsanyo dagiti bambanag maipapan iti Nakristianuan a pammati babaen ti panagkedkedyo a mangipaay iti panamati kadagiti panangipalgak kalpasan ti panawen ti Bilia?
P. O., Pederal a Republika ti Alemania
Ni P. O. mabalin a nakitanan ti Marso 8, 1989, a bilang, isu a nangusig iti pasamak iti Lourdes ken Fatima a detaliado.—ED.
Movimiento dagiti Babbai
Naipasngayak idi 1920. Tapno maawatan ti kasasaad dagiti agtartrabaho a babbai (Hulio 22, 1988) masapul nga umimdengkayo, saan a kadagiti umay-ayon kadagiti babbai, no di ket kadagiti konserbatibo, saan a managlablabes, nupay agtartrabaho, a babai. Kangrunaanna addada dua a rason no apay a dagiti babbai ket agtrabahoda. Ti umuna ket maipapan iti ekonomia. No ti maysa a lalaki dina masuportaran ti maysa a pamilia, ket masapul nga agtrabaho iti amin-tiempo ti babai, iti nainkalintegan a rason masapul nga aramidenna ti kagudua iti trabaho iti pagtaengan, ket ti parikut iti nalabes ti bannogna a babai dagdagus a mapukaw.
Ti sabali pay a rason no apay a pilien dagiti babbai ti agtrabaho isu ti kurang a pannakaapresiar iti pagtaengan. Maulit-uliten a nakakitaak ti ama ken anak a babai a nangbusor iti maysa nga asawa a babai, ket mariknana nga isut’ maipupuera iti pamilia. Wenno ad-adda a kaykayatna ti beerna wenno ti telebisionna ngem ti asawana. Gapu itoy a rason ti babai agsapul iti trabaho a sadiay makagun-od iti pannakapnek kas supapak iti bannogna. Napaliiwko iti kaputotan dagiti dadakkelko ti napukawen a kababalin. Dagidiay a lallaki saan laeng nga inay-ayatda dagiti assawada no di ket adda panagraemda ken konsiderasionda. Diak makasaraken kadagitoy a tallo iti daytoy a kaputotan. Agsubli koma dagiti lallaki iti ayat, kinasungdo, ken panagraem, ket makitayo dagiti babbai nga agsubli iti pagapuyan.
F. K., Canada
Dagiti komento ni F. K. maipapan iti “daytoy a kaputotan” ipalagipna ti “kaputotan” nga impadto ni Jesus ken ni Pablo a makapadasto ti pannakapukaw iti “gagangay a panagayat” iti pamilia. (Mateo 24:3, 34; 2 Timoteo 3:1-3)—ED.