Panagannad iti Biddut a Kinamanangaasi
1 Agdindinamag dagiti tattao ni Jehova iti managparabur nga espirituda. Masansan a maipakita daytoy iti material a wagas no tuladentayo daydiay Samaritano iti pangngarig ni Jesus. (Luc. 10:29-37) Kaskasdi, adda dadduma a saan a maikari iti tulong ti mangpadpadas a manggundaway iti kinamanangaasitayo. Gapuna, ti ayattayo iti sabsabali ti masapul a matimbang babaen iti “umiso a pannakaammo ken pannakaawat.”—Fil. 1:9.
2 Iti Uneg ti Kongregasion: Kas ehemplo, nalabit nga adda agkuna nga awan iti panggedanna wenno mangted iti rason a pagkiddawanna ti tulong. No dadduma dagitoy a tattao ket saanda a kayat ti agtrabaho ngem kayatda nga ipaayan dagiti dadduma iti kasapulanda ti biag. Kadakuada ti nagkunaan ni Pablo: “No adda madi nga agtrabaho, saan met koma a mangan.”—2 Tes. 3:10.
3 “Ti tiempo ken di mapakadaan a pasamak” ti mapagteng kadatayo amin, gapuna a no agkasapulantayo iti material, nga agkurang ti “tinapaytayo iti inaldaw,” ditay koma aglagaw unay, idinto ta ipaay ni Jehova dayta kadagidiay agayat kenkuana. (Ecl. 9:11; Mat. 6:11, 31, 32) Imbes nga agkiddawtayo ti kuarta kadagiti kakabsat iti kongregasion, nasaysayaat no makisaokayo ti maysa kadagiti panglakayen. Isu, kalpasanna, ti sililimed a makisao iti bagi dagiti panglakayen. Dagitoy a papanglakayen ti nalabit a makaammo iti programa ti gobierno no kasano a maipaay iti tulong ken mabalinda a tulongan dagidiay mabalin a magunggonaan babaen dayta a programa. Iti aniaman a mapagteng, tingitingen ti bagi dagiti panglakayen iti kasasaad ti tunggal maysa nga agkiddaw iti tulong ken usigenda no kasano met a makatulong ti kongregasion iti kasayaatan.
4 Dagiti Agakar-akar nga Impostor: Agtultuloy a makaawat ti Sosiedad iti report a dadduma kadagiti kongregasion ti nakusit iti kuarta ken material a bambanag babaen dagiti agakar-akar nga impostor wenno manglimlimo. Saantayo koma a masdaaw iti daytoy, idinto ta ti Kasuratan ket namakdaar nga adda “dakes a tattao ken impostor a dumakes a dumakes, a mangallilaw ken maallilawda.” (2 Tim. 3:13) Masansan a dagitoy nga impostor ket kunaenda a naisagmakda ken kasapulanda ti kuarta a maipaay iti transportasion ken taraon nga agawid idiay taengda. Nupay agparang a napudnoda, iti kaaduan a kaso saanda a talaga a Saksi ni Jehova ngem agpammarangda a kasta.
5 No ti ganggannaet ket agkiddaw iti tulong, nainsiriban no agkonsultakayo iti maysa kadagiti panglakayen, isu a makaikeddeng no daytoy a tao ket kabsat. Mabalin a mateleponuan daydiay kongregasionna tapno makompirma iti takder daytoy a tao. Dagiti napudno a kakabsat nga agkasapulan ket maawatanda dayta a panagimtuod a pakasaluadan dagiti amin a maseknan. Iti sabali a bangir, dagiti impostor ti maibutaktak babaen iti panagpalutpot. Saan a kasapulan iti nalabes a panagsuspetsa kadagiti amin a ditay am-ammo, ngem masapul nga agannadtayo kadagiti impostor wenno manglimlimo.
6 Imbalakad ni masirib nga Ari Solomon: “Dikay ikedked iti naimbag kadagidiay a pakaikarianna, no mapasamak a kabaelan ta imam nga aramiden dayta.” (Prov. 3:27) Babaen ti masirib a pannakaawattayo, maitultuloytayo ti mangaasi bayat a masaluadantayo iti biddut a panangaasi.