Siasino Dagiti Ministro ti Dios Ita?

“Ti panagbalinmi a makaanayen a kualipikado agtaud iti Dios, a pudno unay a namagbalin kadakami a makaanayen a kualipikado a ministro ti maysa a baro a tulag.”​—2 CORINTO 3:5, 6.

1, 2. Ania ti rebbengen dagiti amin a Kristiano idi umuna a siglo, ngem kasano a nagbaliw ti kasasaad?

IDI umuna a siglo ti Kadawyan a Panawentayo, addaan dagiti amin a Kristiano iti napateg a rebbengen​—ti annongen a mangikasaba iti naimbag a damag. Bin-igda a napulotan ken ministro ti baro a tulag. Addaan ti dadduma iti kanayonan a rebbengen, kas ti panangisuro iti kongregasion. (1 Corinto 12:27-29; Efeso 4:11) Addaan dagiti nagannak iti nadadagsen nga obligasion iti pamilia. (Colosas 3:18-21) Ngem nakiramanda amin iti kangrunaan ken napateg a trabaho a panangasaba. Iti orihinal a Griego a Kristiano a Kasuratan, maawagan a di·a·ko·niʹa daytoy a rebbengen​—maysa a serbisio, wenno ministerio.​— Colosas 4:17.

² Iti panaglabas ti panawen, nagbalbaliw ti kasasaad. Timmaud ti maysa a klase a maaw-awagan klero, ket binukbukodanda ti pribilehio a mangasaba. (Aramid 20:30) Kadagiti agkunkuna a Kristiano, manmano dagiti klero. Pasurot ti kaaduan kadakuada. Nupay naisuro kadagiti pasurot nga adda obligasionda, a pakairamanan ti panagkontribusion para iti pannakamantener ti klero, agdengngeg laeng ti ar-aramiden ti kaaduan no maipapan iti panangasaba.

3, 4. (a) Kasano ti panagbalin a ministro dagidiay adda iti Kakristianuan? (b) Siasino ti maibilang a ministro iti Kakristianuan, ket apay a naiduma dagiti Saksi ni Jehova?

³ Ibagbaga dagiti klero a ministroda (manipud iti minister, Latin a patarus ti di·aʹko·nos, “adipen”).a Naggraduarda ngamin kadagiti kolehio wenno seminario ken naordenanda. Kuna ti The International Standard Bible Encyclopedia: “Kadawyanna, ti ‘panangorden’ ken ‘ordinasion’ tuktukoyenna ti naisangsangayan a saad a naited kadagiti ministro wenno papadi babaen dagiti opisial a naipasdek a seremonia, nangnangruna ti autoridadda a mangiwaragawag iti Sao wenno mangannong kadagiti sakramento, wenno mangaramid kadagita a dua.” Siasino ti mangorden kadagiti ministro? Kuna ti The New Encyclopædia Britannica: “Kadagiti simbaan nga addaan iti obispo a kas idi un-unana, kanayon a ti obispo ti ministro a para-orden. Kadagiti Presbyterian a simbaan, dagiti ministro ti presbiteria ti mangorden.”

⁴ No kasta, kadagiti simbaan ti Kakristianuan, manmano laeng dagiti mabalin nga agserbi kas ministro. Ngem saan a kastoy kadagiti Saksi ni Jehova. Apay a saan? Agsipud ta saan a kasta iti kongregasion Kristiano idi umuna a siglo.

Siasino a Talaga Dagiti Ministro ti Dios?

5. Sigun iti Biblia, siasino ti karaman kadagidiay agserserbi kas ministro?

⁵ Sigun iti Biblia, ministro dagiti amin nga agdaydayaw ken Jehova​—idiay langit ken ditoy daga. Nagserbi dagiti anghel ken Jesus. (Mateo 4:11; 26:53; Lucas 22:43) ‘Agserserbi [met dagiti anghel] kadagidiay agtawidto iti pannakaisalakan.’ (Hebreo 1:14; Mateo 18:10) Maysa ni Jesus a ministro. Kinunana: “Ti Anak ti tao immay, saan a tapno pagserbian, no di ket tapno agserbi.” (Mateo 20:28; Roma 15:8) Gapuna, yantangay rumbeng a ‘suroten a sisisinged [dagiti pasurot ni Jesus] dagiti addangna,’ di pakasdaawan a masapul nga agbalinda met a ministro.​—1 Pedro 2:21.

6. Kasano nga impakita ni Jesus a rumbeng nga agbalin a ministro dagiti adalanna?

⁶ Sakbay a nagpalangit, kinuna ni Jesus kadagiti adalanna: “Inkayo . . . ket mangaramidkayo kadagiti adalan a tattao iti isuamin a nasnasion, a bautisaranyo ida iti nagan ti Ama ken ti Anak ken ti nasantuan nga espiritu, nga isursuroyo kadakuada a tungpalenda dagiti isuamin a bambanag nga imbilinko kadakayo.” (Mateo 28:19, 20) Dagiti adalan ni Jesus masapul a mangaramidda kadagiti adalan​—kas ministro. Dagiti napagbalinda a baro nga adalan masursuruanda nga agtulnog iti amin a banag nga imbilin ni Jesus, a pakairamanan ti bilin a mapan mangaramid kadagiti adalan. Maysa a ministro ti tunggal pudno nga adalan ni Jesu-Kristo, lalaki man wenno babai, nataengan wenno ubing.​—Joel 2:28, 29.

7, 8. (a) Aniada a teksto ti mangipakita a ministro dagiti amin a pudno a Kristiano? (b) Aniada a saludsod ti tumaud maipapan iti ordinasion?

⁷ Maitunos iti daytoy, iti aldaw ti Pentecostes idi 33 K.P., dagiti amin nga adalan ni Jesus nga adda sadiay, lallaki ken babbai, sangsangkamaysa nga impakaammoda ‘dagiti natan-ok a bambanag ti Dios.’ (Aramid 2:1-11) Maysa pay, insurat ni apostol Pablo: “Buyogen iti puso ti maysa alagadenna ti pammati maipaay iti kinalinteg, ngem buyogen iti ngiwat ti maysa mangaramid iti publiko a panangideklara maipaay iti pannakaisalakan.” (Roma 10:10) Inturong ni Pablo dagita a sasao, saan nga iti bassit a grupo dagiti klero, no di ket “kadagidiay amin nga adda idiay Roma kas dagiti dungdungnguen ti Dios.” (Roma 1:1, 7) Umasping iti dayta, amin dagiti ‘sasanto nga adda idiay Efeso ken dagiti matalek a naikaykaysa ken Kristo Jesus’ nasken a ‘masapatosanda iti naimbag a damag ti kappia.’ (Efeso 1:1; 6:15) Ket amin dagidiay nakangngeg iti surat a naiturong kadagiti Hebreo, nasken a ‘petpetanda a siiirut ti publiko a panangideklara iti namnamada nga awanan panagpangpangadua.’​—Hebreo 10:23.

⁸ Ngem kaano nga agbalin a ministro ti maysa a tao? Iti sabali a pannao, kaano a maordenan? Ken siasino ti mangorden kenkuana?

Pannakaorden Kas Ministro​—Kaano?

9. Kaano a naordenan ni Jesus, ken siasino ti nangorden kenkuana?

⁹ No kaano a maordenan ti maysa a tao ken no siasino ti mangorden kenkuana, alaentay a pagarigan ni Jesu-Kristo. Saan a nagturpos iti seminario ken awan sertipikona a mangpaneknek nga isu ket maysa nga ordinado a ministro. Saan a tao ti nangorden kenkuana. Apay ngarud a maikunatayo nga isu ket maysa a ministro? Agsipud ta natungpal kenkuana ti naipaltiing a sasao ni Isaias: “Ti Espiritu ni Apo Jehova adda kaniak; ta ni Jehova pinulotannak a mangikasaba kadagiti naimbag a damdamag.” (Lucas 4:17-19; Isaias 61:1) Nalawag nga ipakita dagita a sasao a natudingan ni Jesus a mangipakaammo iti naimbag a damag. Siasino ti nangtuding kenkuana? Yantangay ti espiritu ni Jehova ti nangpulot kenkuana a mangaramid iti dayta a trabaho, nalawag a ni Jehova a Dios ti nangorden ken Jesus. Kaano a napasamak daytoy? Dimteng ti espiritu ni Jehova ken Jesus idi nabautisaran. (Lucas 3:21, 22) Naordenan ngarud ni Jesus idi nabautisaran.

10. Siasino ti mamagbalin iti maysa a Kristiano a ministro a ‘naan-anay a kualipikado’?

¹⁰ Dagiti met ngay pasurot ni Jesus idi umuna a siglo? Naggapu met ken Jehova ti saadda kas ministro. Kinuna ni Pablo: “Ti panagbalinmi a makaanayen a kualipikado agtaud iti Dios, a pudno unay a namagbalin kadakami a makaanayen a kualipikado a ministro ti maysa a baro a tulag.” (2 Corinto 3:5, 6) Kasano a pagbalinen ni Jehova dagiti agdaydayaw kenkuana a kualipikado nga agbalin a ministro? Alaentay a pagarigan ni Timoteo, nga inawagan ni Pablo a “ministro ti Dios iti naimbag a damag maipapan iti Kristo.”​—1 Tesalonica 3:2.

11, 12. Kasano a nagbalin a ministro ni Timoteo?

¹¹ Dagiti sumaganad a sasao a naiturong ken Timoteo tulongannatayo a mangtarus no kasano a nagbalin a ministro: “Nupay kasta, agtultuloyka kadagiti bambanag a nasursurom ken nakaguyugoyam a patien, yantangay ammom no kadagiti ania a tattao ti nakasursuruam kadagita ket manipud kinamaladaga naammuam dagiti nasantuan a sursurat, a makabael a mamagsirib kenka maipaay ti pannakaisalakan babaen ti pammati a mainaig ken Kristo Jesus.” (2 Timoteo 3:14, 15) Ti pundasion ti pammati ni Timoteo, a nangtignay kenkuana a mangasaba, isu ti pannakaammona iti Kasuratan. Ti personal a panagbasa laeng aya ti kasapulan ditoy? Saan. Kasapulan ni Timoteo ti tulong tapno makagun-od iti umiso a pannakaammo ken naespirituan a pannakaawat maipapan kadagiti nabasana. (Colosas 1:9) No kasta, ‘naguyugoy a mamati’ ni Timoteo. Yantangay naammuanna ti Kasuratan “manipud kinamaladaga,” ti ina ken ni apongna a baket ti umuna la ketdi a nangisuro kenkuana, ta nabatad a saan a manamati ti amana.​—2 Timoteo 1:5.

¹² Nupay kasta, saan la a dayta ti nakatulong iti panagbalin ni Timoteo a ministro. Napabileg pay ti pammatina babaen ti pannakitimpuyogna kadagiti Kristiano kadagiti kabangibang a kongregasion. Kasanotay nga ammo? Agsipud ta idi damo a naam-ammo ni Pablo ni Timoteo, ‘naimbag ti damag [ni Timoteo] kadagiti kakabsat idiay Listra ken Iconio.’ (Aramid 16:2) Mainayon pay, kadagidi a tiempo adda dagiti kakabsat a nagsurat kadagiti kongregasion tapno mapabilegda. Sa adda dagiti manangaywan a simmarungkar tapno maparegtada. Nakatulong dagita nga urnos iti naespirituan a panagrang-ay dagiti Kristiano kas ken Timoteo.​—Aramid 15:22-32; 1 Pedro 1:1.

13. Kaano a naordenan kas ministro ni Timoteo, ket apay a maikunayo a saan a nagpatingga dita ti irarang-ayna iti naespirituan?

¹³ Gapu iti bilin ni Jesus a nailanad iti Mateo 28:19, 20, masiguradotayo nga adda tiempo a natignay ni Timoteo a mangtulad ken Jesus ket nagpabautisar gapu iti pammatina. (Mateo 3:15-17; Hebreo 10:5-9) Simbolo daytoy ti amin-kararua a panagdedikar ni Timoteo iti Dios. Idi nabautisaran, nagbalin a ministro ni Timoteo. Manipud idin, ti Dios ti makinkukua iti biag, pigsa, ken amin nga adda kenkuana. Napateg daytoy a paset ti panagdayawna, “maysa a sagrado a panagserbi.” Nupay kasta, saan a basta napnek ni Timoteo iti kinaministrona. Nagtultuloy a rimmang-ay iti naespirituan, a nagbalin a nataengan a Kristiano a ministro. Napasamak daytoy gapu iti nadekket a pannakitimpuyog ni Timoteo kadagiti nataengan a Kristiano kas ken Pablo, personal a panagadal, ken naregta a panangaskasabana.​—1 Timoteo 4:14; 2 Timoteo 2:2; Hebreo 6:1.

14. Iti kaaldawantayo, kasano nga agbalin a ministro ti maysa a “maikari iti biag nga agnanayon”?

¹⁴ Iti kaaldawantayo, kasta met laeng ti pannakaorden dagiti Kristiano a ministro. Ti tao a “siuumiso a maikari iti agnanayon a biag” ket matulongan nga agsursuro maipapan iti Dios ken kadagiti panggepna babaen ti panagadal iti Biblia. (Aramid 13:48) Masursurona nga iyaplikar dagiti prinsipio ti Biblia iti biagna ken agkararag a sipapasnek iti Dios. (Salmo 1:1-3; Proverbio 2:1-9; 1 Tesalonica 5:17, 18) Makitimpuyog kadagiti dadduma pay a manamati ken aprobetsarenna dagiti probision ken urnos nga ipapaay ti “matalek ken masirib nga adipen.” (Mateo 24:45-47; Proverbio 13:20; Hebreo 10:23-25) Iti kasta, rumang-ay babaen ti sistematiko a panagsursuro.

15. Ania ti mapasamak no mabautisaran ti maysa a tao? (Kitaenyo met ti footnote.)

¹⁵ Inton agangay, gapu ta masursurona nga ayaten ni Jehova a Dios ken mapabileg ti pammatina iti daton a sakripisio, tarigagayan ti estudiante ti Biblia nga idedikar a naan-anay ti bagina iti nailangitan nga Amana. (Juan 14:1) Aramidenna dayta a dedikasion iti personal a kararag sa agpabautisar kas napanayag a simbolo dayta a pribado a panagdedikar. Ti panagpabautisarna ket isu ti seremonia ti pannakaordenna agsipud ta iti dayta a kanito a maipabigbig kas naan-anay a dedikado nga adipen, di·aʹko·nos, ti Dios. Masapul nga agtalinaed a saan a paset ti lubong. (Juan 17:16; Santiago 4:4) Impaayna ti intero a bagina kas “sakripisio a sibibiag, nasantuan, makaay-ayo iti Dios” a naan-anay wenno awan kondisionna. (Roma 12:1)b Isu ket ministro ti Dios, kas ken Kristo.

Ania ti Nakristianuan a Ministerio?

16. Ania ti dadduma kadagiti rebbengen ni Timoteo kas ministro?

¹⁶ Ania ti karaman iti ministerio ni Timoteo? Naisangsangayan dagiti annongenna idi kas kadua ni Pablo iti panagdaliasatna. Ket idi nagbalinen a panglakayen, inggaed ni Timoteo ti nangisuro ken nangpabileg kadagiti padana a Kristiano. Ngem ti kangrunaan a paset ti ministeriona, kas kada Jesus ken Pablo, isu ti panangikasaba iti naimbag a damag ken panangaramid kadagiti adalan. (Mateo 4:23; 1 Corinto 3:5) Kinuna ni Pablo ken Timoteo: “Nupay kasta, agtalinaedka a sipupuot iti isuamin a bambanag, anusam ti dakes, aramidem ti trabaho ti managebanghelio, naan-anay nga itungpalmo ti ministeriom.”​—2 Timoteo 4:5.

17, 18. (a) Ania a ministerio ti ar-aramiden dagiti Kristiano? (b) Kasano kapateg iti maysa a Kristiano a ministro ti trabaho a panangasaba?

¹⁷ Kasta met laeng kadagiti Kristiano a ministro ita. Makipasetda iti panagministerio iti publiko, iti trabaho a panagebanghelio, nga ipakaammoda kadagiti sabsabali a ti pannakaisalakan ket naibatay iti sakripisio ni Jesus ken isuroda dagiti naemma nga umawag iti nagan ni Jehova. (Aramid 2:21; 4:10-12; Roma 10:13) Paneknekanda iti Biblia a ti Pagarian ti kakaisuna a namnama ti agsagsagaba a sangatauan ken ipakitada nga uray ita nasaysayaat ti kasasaad no agbiagtayo a mayannurot kadagiti nadiosan a prinsipio. (Salmo 15:1-5; Marcos 13:10) Ngem saan a sosial nga ebanghelio ti ikasaba ti maysa a Kristiano a ministro. Imbes ketdi, isurona a ti ‘nadiosan a debosion addaan kari a biag ita ken daydiay umayto.’​—1 Timoteo 4:8.

¹⁸ Pudno, kaaduan a ministro ti addaan kadagiti kanayonan a pamay-an ti panagserbi, a nalabit nadumaduma iti tunggal Kristiano. Adu ti addaan kadagiti obligasion iti pamilia. (Efeso 5:21–6:4) Addaan dagiti panglakayen ken ministerial nga adipen kadagiti annongen iti kongregasion. (1 Timoteo 3:1, 12, 13; Tito 1:5; Hebreo 13:7) Adu a Kristiano ti tumultulong a mangbangon kadagiti Kingdom Hall. Addaan ti dadduma iti naisangsangayan a pribilehio nga agtrabaho kas boluntario iti maysa kadagiti pagtaengan a Bethel ti Watch Tower Society. Nupay kasta, makiramraman ti amin a Kristiano a ministro iti panangikasaba iti naimbag a damag. Awan ti maipuera. Ti pannakiraman iti daytoy a trabaho ti pakailasinan ti maysa iti publiko kas pudpudno a Kristiano a ministro.

Ti Kababalin ti Maysa a Kristiano a Ministro

19, 20. Ania a kababalin ti masapul a patanoren dagiti Kristiano a ministro?

¹⁹ Namnamaen ti kaaduan kadagiti ministro ti Kakristianuan a maipaayanda iti naisangsangayan a respeto, ket kayatda ti maawagan a “reberendo” ken “padre.” Nupay kasta, ammo ti Kristiano a ministro a ni laeng Jehova ti maikari a dayawen. (1 Timoteo 2:9, 10) Ti Kristiano a ministro dina kalikaguman ti kasta a natan-ok a pammadayaw wenno agtarigagay kadagiti naisangsangayan a titulo. (Mateo 23:8-12) Ammona a “serbisio” ti kangrunaan a kaipapanan ti di·a·ko·niʹa. Ti berbo a nainaig iti dayta ket maaramat no dadduma iti Biblia mainaig kadagiti personal a panagserbi, kas ti panagbalin a serbidor. (Lucas 4:39; 17:8; Juan 2:5) Nupay natantan-ok ti pannakaaramatna mainaig iti Nakristianuan a ministerio, kaskasdi a maysa nga adipen ti di·aʹko·nos.

²⁰ Awan ngarud ti panggapuan ti Kristiano a ministro a mangitan-ok iti bagina. Napakumbaba nga ad-adipen dagiti pudno a Kristiano a ministro, uray dagidiay addaan kadagiti naisangsangayan a rebbengen iti kongregasion. Kinuna ni Jesus: “Siasinoman nga agtarigagay nga agbalin a naindaklan kadakayo masapul nga agserbi kadakayo.” (Mateo 20:26, 27) Idi impakitana kadagiti adalanna ti umiso a kababalin a maadda koma kadakuada, binugguan ni Jesus dagiti sakada, nga inaramidna ti trabaho ti kanunumuan nga adipen. (Juan 13:1-15) Anian a kinapakumbaba! No kasta, dagiti Kristiano a ministro sipapakumbaba nga agserbida ken Jehova a Dios ken ni Jesu-Kristo. (2 Corinto 6:4; 11:23) Sieemma nga agserbida iti maysa ken maysa. Ket no ikasabada ti naimbag a damag, awanan panagimbubukod a pagserbianda dagiti di manamati a kaarrubada.​—Roma 1:14, 15; Efeso 3:1-7.

Panagibtur iti Ministerio

21. Kasano a nagunggonaan ni Pablo gapu iti panagibturna iti ministerio?

²¹ Para ken Pablo, ti panagbalin a ministro kalikagumanna ti panagibtur. Kinunana kadagiti taga Colosas nga adu ti sinagabana tapno maikasabana kadakuada ti naimbag a damag. (Colosas 1:24, 25) Ngem gapu ta nagibtur, adu ti nangawat iti naimbag a damag ken nagbalin a ministro. Nagbalinda nga annak ti Dios ken kakabsat ni Jesu-Kristo, nga addaan namnama nga agbalin nga espiritu a parparsua a kaduana idiay langit. Anian a nagdayag a gunggona gapu iti panagibturda!

22, 23. (a) Apay a nasken nga agibtur dagiti Kristiano a ministro iti kaaldawantayo? (b) Ania ti nagsayaat a bunga ti panagibturtayo kas Kristiano?

²² Nasken nga agibtur dagiti pudno a ministro ti Dios iti kaaldawantayo. Adu ti inaldaw a mangib-ibtur iti sakit wenno kadagiti parikut a kakuyog ti panaglakay. Igagaed dagiti nagannak ti agtrabaho​—nga adu kadakuada ti awanan iti katakunaynay a mangpadakkel kadagiti annakda. Situtured a sarsarangten dagiti ubbing idiay eskuelaan dagiti impluensia nga adda iti aglawlawda. Adu dagiti Kristiano a narigat ti kasasaad ti biagda. Ken adu ti maidaddadanes wenno marigrigatan gapu iti agdama a “napeggad a tiempo a narigat a pakilangenan”! (2 Timoteo 3:1) Wen, kas ken apostol Pablo, maikuna ti agarup innem a milion a ministro ni Jehova ita: “Iti tunggal pamay-an irekomendami ti bagbagimi kas ministro ti Dios, babaen ti panagibtur iti kasta unay.” (2 Corinto 6:4) Saan a sumuko dagiti Kristiano a ministro. Talaga a makomendaranda gapu iti panagibturda.

²³ Maysa pay, kas ken Pablo, nagsayaat ti ibunga ti panagibtur. No agibturtayo, mataginayon ti nasinged a relasiontayo ken ni Jehova ken maparagsaktayo ti pusona. (Proverbio 27:11) Bumileg ti pammatitayo ken makaaramidtayo kadagiti adalan, a mangnayon iti timpuyogtayo kas Kristiano nga agkakabsat. (1 Timoteo 4:16) Tultulongan ni Jehova dagiti ministrona ken bembendisionanna ti ministerioda kadagitoy maudi nga al-aldaw. Kas resultana, naurnongen ti natda kadagiti 144,000, ket minilion pay ti addaan iti natalged a namnama a mangsagrap iti biag nga agnanayon iti paraiso a daga. (Lucas 23:43; Apocalipsis 14:1) Pudno unay, ti Nakristianuan a ministerio ket ebkas ti asi ni Jehova. (2 Corinto 4:1) Sapay koma ta ipategtay amin dayta ken agyamantayo ta agtalinaed iti agnanayon ti bungana.​—1 Juan 2:17.

[Footnotes]

Mailawlawagyo Kadi?

• Ania ti rebbengen dagiti amin a Kristiano idi umuna a siglo?

• Kaano a maordenan ti maysa a Kristiano a ministro ken siasino ti mangorden kenkuana?

• Ania a kababalin ti nasken a patanoren ti maysa a Kristiano a ministro?

• Apay a nasken nga agibtur ti maysa a Kristiano a ministro iti baet dagiti pakarigatan?

[Dagiti Ladawan iti panid 16, 17]

Naisuro ken Timoteo ti Sao ti Dios manipud iti kinamaladaga. Naordenan a ministro idi nabautisaran

[Ladawan iti panid 18]

Ti bautismo isimbolona ti panagdedikar iti Dios ken pannakaorden ti maysa a tao kas ministro

[Ladawan iti panid 20]

Madadaan nga agserbi dagiti Kristiano a ministro