Dagiti Saludsod Manipud Kadagiti Managbasa

◼ Apay a dagiti Saksi ni Jehova ilaklaksidda gapu iti apostasia ti dadduma a tattao a kaskasdi pay met laeng a mamati iti Dios, ti Biblia, ken ni Jesu-Kristo?

Dagidiay mangiyeb-ebkas iti kasta nga isusuppiat itudtudoda nga adu dagiti organisasion nga agkunkuna a Kristianoda a mangipalpalubos kadagiti panangmatmat a kontra. Uray pay dadduma kadagiti klero ti di umanamong kadagiti pamunganayan a sursuro ti relihionda, kaskasdi nagtalinaedda iti nasayaat a takderda. Iti ngangngani amin a denominasion ti Kakristianuan, addada dagiti modernista ken pundamentalista a nagkaro ti panagsusuppiatda iti maysa ken maysa maipapan iti pannakaipaltiing ti Kasuratan.

Nupay kasta, dagita a pangarigan dida mangted ti pakaibatayan ti panagaramidtayo met iti kasta. Apay a saan? Adu kadagita a denominasion ti mangipalpalubos iti nagadu a nagduduma a panangmatmat kadagiti klero ken iti pasurot agsipud ta patienda a saanda a makasiguro no ania a talaga ti kinapudno ti Biblia. Naiyarigda kas kadagiti eskribas ken Pariseo idi kaaldawan ni Jesus a dida makapagsao kas tattao nga addaan autoridad, a kastat’ panangisuro ni Jesus. (Mateo 7:29) Mainayon pay, gapu iti panamati dagiti relihiunista iti panaglalaok dagiti pammati, obligadoda a di unay mamati kadagiti nagduduma a pammati.

Ngem ti panangala iti kasta a panangmatmat kadagiti bambanag ket awan pakaibatayanna iti Kasuratan. Saan a pimmada ni Jesus iti aniaman kadagiti sekta ti Judaismo. Kuna dagiti Judio kadagidiay a sekta a mamatida iti Dios ti panamarsua ken iti Kasuratan a Hebreo, nangnangruna ti Linteg ni Moises. Kaskasdi, imbaga ni Jesus kadagiti adalanna nga “agaluadkayo . . . iti sursuro dagiti Pariseo ken Saduseo.” (Mateo 16:11, 12; 23:15) Kitaenyo no kasano met ti kainget ti panagsao ni apostol Pablo kadagiti bambanag: “Ngem uray dakam met laeng wenno maysa nga anghel a naggapu idiay langit ikaskasabana koma kadakayo ti maysa a naimbag a damag a naiduma iti daydiay inkaskasabami kadakayo, mailunod koma.” Kalpasanna inulit ni Pablo dagita a sasao kas panangipaganetget.​—Galacia 1:8, 9.

Ti panangisursuro iti kontra wenno nagduduma a panangmatmat ket saan a maitunos iti pudno a Kinakristiano, kas pinagbalin a nalawag ni Pablo idiay 1 Corinto 1:10: “Dawatek ngarud kadakayo, kakabsat, gapu iti nagan ni Apotayo a Jesu-Kristo, a sawenyo amin koma ti maymaysa a banag ket awan koma dagiti panaglalasin kadakayo, no di ket naan-anay koma ti panagtitimpuyogyo iti maymaysa a panunot ken maymaysa a panagrikna.” (New International Version) Idiay Efeso 4:3-6 innayonna pay a kinuna a dagiti Kristiano rebbeng nga ‘agawaanda a salimetmetan ti panagmaymaysa ti espiritu iti singgalut ti talna. Adda maysa a bagi ken maysa nga espiritu, a kas met iti pannakaawisyo iti maysa nga inanama iti pannakaayabyo; maysa nga Apo, maysa a pammati, maysa a pammautisar; maysa a Dios ken Ama dagiti isuamin.’

Daytoy kadi a panagkaykaysa ti rebbeng a ragpaten ken taginayonen babaen iti agwaywayas laeng a panagsukimat ti maysa iti Kasuratan, a dumteng ti kabukbukodanna a konklusion ken kalpasanna isuronanto dagitoy? Nikaanoman! Babaen ken Jesu-Kristo, ni Jehova inkabilna maipaay iti daytoy a panggep “dagiti dadduma nga apostol, . . . dadduma mammadto, ket dagiti dadduma ebangelista, ket dagiti sabsabali papastor ken mannursuro . . . agingga iti makagtengtay amin iti panagmaymaysa ti pammati ken iti umiso a pannakaammo iti Anak ti Dios, ti kasasaad ti tao a nataengan.” Wen, babaen iti tulong dagita a ministro, ti panagkaykaysa ti kongregasion​—panagkaykaysa ti mannursuro ken ar-aramid​—ti mabalin a mapasamak.​—Efeso 4:11-13.

Nalawag, ti pangibatayan iti naanamongan a pannakikadua kadagiti Saksi ni Jehova ket saan a mabalin nga agbatay laeng iti pammati iti Dios, iti Biblia, ken Jesu-Kristo, ken dadduma pay. Ti papa a Romano Katoliko, agraman ti Arsobispo nga Anglicano idiay Canterbury, ti mamatpati met kadagita, kaskasdi dagiti kamkameng ti iglesiada napamaysada iti maysa ken maysa. Kasta met, ti basta panangikuna nga addaan iti kasta a pammati ket saanna nga autorisaran ti maysa nga agballigi a makunkuna a maysa kadagiti Saksi ni Jehova.

Ti naanamongan a pannakitimpuyog kadagiti Saksi ni Jehova kasapulanna ti panangakseptar iti interamente a pudno a pannursuro ti Biblia agraman dagidiay Nainkasuratan a pammati a naisalsalumina laeng kadagiti Saksi ni Jehova. Ania ti iraman dagiti kakasta a pammati?

Dayta naindaklan nga isyu iti imatang ti sangatauan isu ti kinanainkalintegan ti kinasoberano ni Jehova, isu dayta ti makagapu a nangipalubosanna iti kinadakes iti nakabaybayag. (Ezequiel 25:17) A ni Jesu-Kristo nagbiagen sakbay ti kinataona ken isut’ nababbaba ngem ti nailangitan nga Amana. (Juan 14:28) Nga adda ti “matalek ken nasirib nga adipen” ditoy daga itatta a ‘nakaitalkan dagiti amin a naindagaan nga intereses ni Jesus,’ a dayta nga adipen ti naitimpuyog iti Bagi a Manarawidwid dagiti Saksi ni Jehova. (Mateo 24:45-47) A ti 1914 tinandaanna ti panungpalan ti Panawen Gentil ken ti pannakaipasdek ti Pagarian ti Dios kadagiti langlangit agraman ti naipadto a kaadda ni Kristo. (Lucas 21:7-24; Apocalipsis 11:15–12:10) A 144,000 laeng a Kristiano ti umawat ti nailangitan a gunggona. (Apocalipsis 14:1, 3) A ti Armagedon, a tuktukoyenna ti gubat ti dakkel nga aldaw ti Dios a Mannakabalin-amin, ket asidegen. (Apocalipsis 16:14, 16; 19:11-21) A dayta ti sarunuento ti Milenial a Panagturay ni Kristo, nga isuntot’ mangisubli iti Paraiso iti intero a daga. A ti umuna a mangtagiragsak iti dayta isunto ti agdama a “dakkel a bunggoy” dagiti “sabsabali a karnero” ni Jesus.​—Juan 10:16; Apocalipsis 7:9-17; 21:3, 4.

Addaantay kadi ti Nainkasuratan a pagwadan iti panangala iti kasta nga istrikto a saad? Pudno nga addaantayo! Nagsurat ni Pablo maipapan iti dadduma iti kaaldawanna: “Ket ti saoda agdadaelto a kasla iti gangrena. Ket kadakuada adda da Himeneo ken Fileto. Dagitoy naisiasida iti kinapudno a kunkunada, ti panagungar napalabasen; ket riribukenda ti pammati dagiti dadduma.” (2 Timoteo 2:17, 18; kitaenyo met ti Mateo 18:6.) Awan aniaman a mangipamatmat a dagitoy a tattao ket dida namati iti Dios, ti Biblia, iti daton ni Jesus. Kaskasdi, iti daytoy maysa a pamunganayan a punto, ti sursuroda maipapan iti panawen ti panagungar, nainkalintegan ti panangmarka ni Pablo kadakuada kas apostata, a di rebbeng a pakikaduaan dagiti matalek a Kristiano.

Umas-asping met, inawagan ni apostol Juan kas antikristo dagidiay di namati a ni Jesus ket immay iti lasag. Mabalin a namatida met iti Dios, iti Hebreo a Kasuratan, namatida ken Jesus kas Anak ti Dios, ken dadduma pay. Ngem iti daytoy a punto, a ti kinapudnona immay ni Jesus iti lasag, dida immanamong ket iti kasta naawaganda nga “antikristo.” Intuloy pay a kinuna ni Juan maipapan kadagidiay mangsalsalimetmet kadagiti naiduma a panangmatmat: “No adda umay kadakayo ket saanna nga itugot daytoy a sursuro, dikay awaten iti balayyo wenno dikay met kablaawan. Ta ti mangkablaaw kenkuana mairaman kadagiti dakes nga ar-aramidna.”​—2 Juan 7, 10, 11.

Iti panangsurot iti kasta a Nainkasuratan a padron, no ti maysa a Kristiano (a mabalin nga agkunkuna a mamati iti Dios, iti Biblia, ken ni Jesus) ti di agbabawi a mangisayangkat kadagiti ulbod a pannursuro, mabalin a nasesita ti pannakailaksidna manipud iti kongregasion. (Kitaenyo ti Tito 3:10, 11.) Siempre, no ti tao adda laeng panagduaduana wenno dina laeng maawatan ti maysa a punto, dagiti kualipikado a ministro ti siayat a mangtulong kenkuana. Maitunos daytoy iti balakad a: “Kaasianyo dagiti dadduma nga adda iti panagduadua; ket isalakanyo dagiti dadduma nga iyadayuyo ida iti apuy.” (Judas 22, 23) Gapuna, saan a nainkalintegan a maakusar a dogmatiko ti pudno a kongregasion Kristiano nga awanan asi, no di ket ipatpategna unay ken pagregreggetanna ti panagkaykaysa nga iparparegta ti Sao ti Dios.