Ania a Kita ti Tao ti Kayatmo a Pagbalinan?

TI HEPE ti polisia iti maysa nga ili iti Pilipinas ket nagimtuod iti maysa a payunir: “Ania ti inaramidmo a namagbalbaliw iti kababalin dayta a lalaki?” Intudo ti hepe ti namuntuon a papeles iti lamisaanna sana kinuna: “Ammom kadi nga amin dagitoy ket rekord dagiti kaso a nakaidarumanna? Napagbalbaliwmo ti maysa kadagiti buong ti ulomi iti daytoy nga ili.” Ti lalaki a pagsarsaritaanda ket maysa idi a naranggas a mammartek ken manangriribuk. Ania ti nangtignay kenkuana a mangaramid iti dakkel a panagbalbaliw iti biagna? Isu ti naipaltiing a mensahe ti Biblia a Sao ti Dios.

Adu a tattao ti mangipappapuso iti balakad ni apostol Pablo nga ‘ikkatenda ti daan a personalidad a mayannurot iti sigud a dana ti kababalinda ken ikawesda ti baro a personalidad a naparsua maitunos iti pagayatan ti Dios.’ (Efe. 4:22-24) Dadakkel man wenno babassit a panagbalbaliw ti nasken nga aramidentayo, ti panangikawes iti baro a personalidad ket paset ti panagbalin a Kristiano.

Nupay kasta, ti panagbalbaliw ken irarang-ay agingga a kualipikadotayon nga agpabautisar ket pangrugian laeng. No agpabautisartayo, kayarigantayo unay ti maysa a kayo a nakitikitan ngem saan pay a pulido. Malasinen no ania dayta sigun iti uhana, ngem adu pay ti nasken a maaramid. Adda pay dagiti aramiden ti kumikitikit a pangpasayaat tapno pumintas dayta. Iti tiempo ti bautismo, addaantayon kadagiti kangrunaan a galad a kasapulan tapno agbalintayo nga adipen ti Dios. Nupay kasta, nasken a parang-ayentayo pay ti baro a personalidadtayo. Masapul nga itultuloytayo a pasayaaten dayta babaen ti panangaramid kadagiti panagbalbaliw.

Uray ni Pablo ket naamirisna ti kinapateg ti panagbalbaliw. Inaminna: “No kayatko nga aramiden ti umiso, ti dakes ti adda kaniak.” (Roma 7:21) Talaga a binigbig ni Pablo no ania ti dati a kinataona ken ammona ti kayatna a pagbalinan. Kastatay met kadi? Nasken met a saludsodantayo ti bagbagitayo: ‘Ania ti adda kaniak? Aniaak a kita ti tao? Ken ania a kita ti tao ti kayatko a pagbalinan?’

Ania ti “Adda Kaniak”?

No tarimaanentayo ti maysa a daan a balay, saan nga umdas ti panangpintatayo laeng iti makinruar a pasetna no madaddadaelen dagiti tangbawna iti uneg. No ditay tarimaanen dagiti depekto iti uneg, ad-adunto ti parikut inton agangay. Umasping iti dayta, saan nga umdas ti pammarang a kinalinteg. Masapul a sukimatentayo no ania a talaga ti kinataotayo ken ilasintayo dagiti nasken a mabalbaliwan iti personalidadtayo. Ta no saan, agparangto manen ti daan a personalidadtayo. Masapul ngarud nga usigentayo a naimbag ti bagitayo. (2 Cor. 13:5) Nasken nga ilasintayo dagiti di makaay-ayo a kababalintayo ken baliwantayo dagitoy. Tapno maaramidtayo dayta, adda tulong nga ipapaay kadatayo ni Jehova.

Insurat ni Pablo: “Ti sao ti Dios nabiag ken adda bilegna ken natartarumamis ngem iti aniaman a kampilan a dua ti tademna ket sumalput uray agingga iti paglasinan ti kararua ken espiritu, ken kadagiti nagsusuopan ken iti patada, ket kabaelanna a lasinen dagiti panunot ken dagiti panagem ti puso.” (Heb. 4:12) Ti mensahe ti naisurat a Sao ti Dios a ti Biblia ket addaan iti nabileg nga impluensia iti biagtayo. Sumalput dayta iti kaunggantayo​—iti simboliko a nagsusuopan iti pata dagiti tulangtayo. Ipalgakna dagiti kapanunotan ken motibotayo, nga ibutaktakna no ania a talaga ti makin-uneg a kinataotayo no idilig iti makinruar wenno iti pagarupentayo a kinataotayo. Talaga a makatulong unay ti Sao ti Dios tapno maammuantayo dagiti nasken a mabalbaliwan iti personalidadtayo!

No tarimaanentayo ti daan a balay, mabalin a saan nga umdas ti panangsukat laeng kadagiti nadadaelen a materiales. Ti panangammo iti makagapu kadagiti depekto ket makatulong kadatayo tapno makaaramidtayo iti pamuspusan a manglapped iti itataud manen dagita a parikut. Umasping iti dayta, ti panangilasin kadagiti negatibo a kababalintayo agraman ti panangtukoy kadagiti makagapu kadagita ti makatulong tapno makontroltayo dagiti pagkapuyantayo. Adu a banag ti mangtubtubay iti personalidadtayo. Ti dadduma kadagita ket ti kasasaadtayo iti kagimongan ken ekonomia, ti aglawlawtayo, kultura, nagannak, kakadua, ken relihion. Uray dagiti programa iti telebision ken pelikula a buybuyaentayo agraman ti dadduma pay a kita ti paglinglingayan ket makaimpluensia iti personalidadtayo. No ammotayo dagiti banag a makadadael iti personalidadtayo, makaaramidtayo kadagiti pamuspusan tapno maksayan ti epekto dagita.

Kalpasan ti panangsukimattayo iti bagitayo, mabalin nga agannayastayo a mangibaga, ‘Talaga a kastoyakon.’ Saan a nasayaat ti kasta a panagrasrason. Idi dakdakamatenna dagiti kameng iti kongregasion ti Corinto a dati a mannakiabig, homoseksual, mammartek, ken dadduma pay nga umasping kadagita, kinuna ni Pablo: “Kasta idi ti sumagmamano kadakayo. Ngem naugasankayon . . . babaen iti espiritu ti Diostayo.” (1 Cor. 6:9-11) Babaen iti tulong ti nasantuan nga espiritu ni Jehova, makapagballigitayo met a mangaramid kadagiti nasken a panagbalbaliw.

Usigem ti kasasaad ni Marcosa nga agnanaed iti Pilipinas. Kinunana: “Agkaraapa idi dagiti dadakkelko isu a nagrebeldeak idi agtawenak iti 19.” Ni Marcos ket nagbalin a napeklan a sugador, mannanakaw, ken holdaper. Implanoda pay ketdi kadagiti kabarkadana ti mang-hijack iti maysa nga eroplano, ngem saan a natuloy dayta. Uray idi addaanen iti asawa, intultuloy latta ni Marcos dagiti dakes nga aramidna. Idi agangay, napukawna ti amin a kupkupikopanna gapu iti kinasugadorna. Di nagbayag, nakikadua ni Marcos ken baketna iti panagadal iti Biblia nga ikonkondukta dagiti Saksi ni Jehova. Idi damo, nariknana a di maikari nga agbalin a Saksi. Ngem nakatulong ken Marcos ti panangyaplikarna kadagiti maad-adalna ken ti pannakigimongna tapno maisardengna dagiti dakes nga aramidna. Ita, isu ket maysa a bautisadon a Kristiano a regular a mangisursuro iti sabsabali no kasanoda met a makapagbalbaliw.

Ania ti Kayatmo a Pagbalinan?

Ania a panagbalbaliw ti nasken nga aramidentayo tapno mapasayaattayo dagiti Nakristianuan a galadtayo? Kastoy ti imbalakad ni Pablo kadagiti Kristiano: “Iwaksiyo amin dagita manipud kadakayo, pungtot, unget, kinadakes, nabassawang a sasao, ken naalas a sasao manipud iti ngiwatyo. Dikay pagulbodan ti maysa ken maysa. Uksobenyo ti daan a personalidad agraman dagiti aramidna.” Innayon ti apostol: “Kawesanyo ti bagbagiyo iti baro a personalidad, a babaen iti umiso a pannakaammo mapabpabaro maitunos iti ladawan Daydiay nangparsua iti dayta.”​—Col. 3:8-10.

No kasta, ti kangrunaan a kalattayo ket uksobentayo ti daan a personalidadtayo ken ikawestayo ti baro. Ania dagiti galad a nasken a patanorentayo tapno maaramidtayo dayta? Kinuna ni Pablo: “Kawesanyo ti bagbagiyo kadagiti kinalailo ti pannakipagrikna, kinamanangngaasi, kinapakumbaba iti panagpampanunot, kinaalumamay, ken mabayag a panagitured. Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali. Kas iti sibubulos a panangpakawan kadakayo ni Jehova, kasta met ti aramidenyo. Ngem, malaksid kadagitoy amin a banag, kawesanyo ti bagbagiyo iti ayat, ta dayta ket naan-anay a singgalut ti panagkaykaysa.” (Col. 3:12-14) No ikagumaantayo a patanoren dagita a galad, agbalintayo nga “ad-adda a pagay-ayat agpadpada iti panangmatmat ni Jehova ken panangmatmat dagiti tattao.” (1 Sam. 2:26) Idi adda ni Jesus ditoy daga, naisangsangayan ti panangipakitana kadagiti nadiosan a galad. Babaen ti panagadal ken panangtuladtayo iti ulidan ni Jesus, ad-adda nga agbalintayo a kas kenkuana a “tumutulad iti Dios.”​—Efe. 5:1, 2.

Ti sabali pay a wagas tapno maammuantayo dagiti nasken a balbaliwantayo ket ti panangadal iti kababalin dagiti karakter a nadakamat iti Biblia ket usigentayo no ania dagiti makaay-ayo kadakuada ken no ania dagiti saan. Kas pagarigan, panunotem ni Jose nga anak ni patriarka a Jacob. Nupay napasaranna ti kinaawan hustisia, tinaginayon ni Jose ti positibo a kababalinna ken ti makaay-ayo a kinataona. (Gen. 45:1-15) Iti sabali a bangir, ni Absalom nga anak ni Ari David ket nagpammarang a maseknan unay kadagiti umili ket naidaydayaw gapu iti kinataerna. Ngem ti kinaagpaysuanna, isu ket traidor ken mammapatay. (2 Sam. 13:28, 29; 14:25; 15:1-12) Ti pammarang a kinasayaat ken ti pisikal a kinapintas ket saanda a pagbalinen ti maysa a pudpudno a makaay-ayo.

Kabaelantayo a Pasayaaten ti Personalidadtayo

Tapno mapasayaattayo ti personalidadtayo ken agbalintayo a makaay-ayo iti imatang ti Dios, masapul nga ipangpangrunatayo a pasayaaten ti makin-uneg a kinataotayo. (1 Ped. 3:3, 4) Tapno mabalbaliwantayo ti personalidadtayo, nasken nga ammuentayo dagiti negatibo a kababalintayo ken dagiti makagapu kadagita. Nasken met nga ammuentayo no kasanotay a mapatanor dagiti nadiosan a galad. Sigurado kadi nga agballigitayo no ikagumaantayo nga aramiden dayta?

Wen, kabaelantayo ti agbalbaliw babaen iti tulong ni Jehova. Kas iti salmista, mabalintay nga ikararag: “Parsuaem kaniak ti mismo a puso a nasin-aw, O Dios, ket ikabilmo iti unegko ti maysa a baro nga espiritu, daydiay natibker.” (Sal. 51:10) Mabalintay a kiddawen iti Dios ti tulong ti espirituna tapno mapabileg ti tarigagaytayo nga ad-adda a mangitunos a naan-anay iti biagtayo iti pagayatanna. Wen, kabaelantayo ti agballigi iti panagbalintayo nga ad-adda a makaay-ayo iti imatang ni Jehova!

[Footnote]

[Ladawan iti panid 4]

Umdas kadin ti panangpinta iti makinruar a paset daytoy a madaddadaelen a balay?

[Ladawan iti panid 5]

Kas ken Kristo kadin ti personalidadmo?