‘Aramatem a Siuumiso ti Sao ti Dios’
“Aramidem ti amin a kabaelam a mangiparang iti bagim a naanamongan iti Dios, maysa a mangmangged nga awan ti aniaman nga ibainna, nga aramatem a siuumiso ti sao ti kinapudno.”—2 TIMOTEO 2:15.
1, 2. (a) Apay a dagiti trabahador kasapulanda dagiti remienta? (b) Ania ti trabaho dagiti Kristiano, ken kasanoda a maipakita a sapsapulenda nga umuna ti Pagarian?
DAGITI trabahador kasapulanda dagiti remienta tapno maibanag dagiti obrada. Ngem saan nga umdas nga adda remienta. Nasken a maitutop ti remienta ti trabahador, ken masapul nga umiso ti panangaramatna iti dayta. Kas pagarigan, no igipatakderka iti maysa a paglinongan a naaramid iti kayo, saan nga umdas nga adda martilio ken lansa. Masapul nga ammom no kasano ti agipalok a di makillo ti lansa. Narigat, makapadismaya pay ketdi ti agipalok no dimo met ammo ti agusar iti martilio. Ngem makapnek ti resulta ti trabahotayo no umiso ti panangaramat kadagiti remienta.
2 Kas Kristiano, adda trabaho a pakiramanantayo. Nagpateg dayta a trabaho. Indagadag ni Jesu-Kristo kadagiti pasurotna a ‘sapulenda nga umuna ti pagarian.’ (Mateo 6:33) Kasanotayo a maaramid dayta? Umuna, babaen ti naregta a panangikasaba iti Pagarian ken panagaramid iti adalan. Maikadua, ti ministeriotayo ket nasken a sititibker a naibatay iti Sao ti Dios. Maikatlo, nasken a taginayonen ti nasayaat a kondukta. (Mateo 24:14; 28:19, 20; Aramid 8:25; 1 Pedro 2:12) Tapno epektibo ken naragsaktayo iti daytoy a naipaannong a Nakristianuan a trabaho, kasapulantayo dagiti maitutop a remienta wenno alikamen agraman ti pannakaammo no kasano ti umiso a panangaramat kadagita. No maipapan iti dayta, nangidatag ni apostol Pablo iti nagsayaat nga ulidan kas Kristiano a trabahador, ken imparegtana a tuladen dagiti padana a manamati. (1 Corinto 11:1; 15:10) Ania ngarud ti maadaltayo ken ni Pablo, a padatayo a trabahador?
Ni Pablo—Naregta a Manangiwaragawag iti Pagarian
3.Apay a maikuna a naregta ni apostol Pablo kas trabahador iti Pagarian?
3 Ania a klase a trabahador ni Pablo? Awan duadua a naregta ni Pablo. Inkagumaanna nga insaknap ti naimbag a damag iti adu a paset ti aglawlaw ti Mediteraneo. No apay a kasta ti kinagagarna a mangiwaragawag iti Pagarian, kinuna ti nagaget nga apostol: “Ita, no idekdeklarak ti naimbag a damag, saan a rason dayta tapno agpasindayagak, ta ti panagkasapulan naipabaklay kaniak. Pudno unay, asiak pay no diak indeklara ti naimbag a damag!” (1 Corinto 9:16) Ti kadi laeng biagna ti pakaseknan ni Pablo? Saan a managimbubukodan a tao ni Pablo. Imbes ketdi, kayatna a dagiti sabsabali magunggonaanda met iti naimbag a damag. Insuratna: “Aramidek ti amin a bambanag maipagapu iti naimbag a damag, tapno agbalinak a manangiranud iti dayta iti sabsabali.”—1 Corinto 9:23.
4. Ania nga alikamen ti kapatgan kadagiti Kristiano a trabahador?
4 Napakumbaba a trabahador ni apostol Pablo. Bigbigenna a saan a makapagpannuray laeng iti bukodna a paglaingan. No kasano a ti maysa a karpintero kasapulanna ti martilio, kasapulan ni Pablo ti maitutop nga alikamen tapno ti kinapudno a naggapu iti Dios mayukuokna kadagiti puso dagiti agdengdengngeg kenkuana. Ania nga alikamen ti kangrunaan nga inaramatna? Ti Sao ti Dios, ti Nasantuan a Kasuratan. Uray met ita, ti intero a Biblia ti kangrunaan nga alikamen a makatulong kadatayo iti panagaramid kadagiti adalan.
5. Tapno agbalin nga epektibo a ministro, ania ti masapul nga aramidentayo malaksid iti panagadaw kadagiti teksto?
5 Ammo ni Pablo nga adda pay ramanen ti umiso a panangaramat iti Sao ti Dios ngem iti basta panagadaw iti dayta. ‘Makaguyugoy’ ti pamay-an ni Pablo. (Aramid 28:23) Kasano? Sieepektibo nga inusarna ti Sao ti Dios a nanggutugot iti adu tapno awatenda ti kinapudno ti Pagarian. Nakirinnason kadakuada. Iti tallo a bulan idiay sinagoga ti Efeso, ni Pablo ket ‘nangipaay kadagiti palawag ken nagusar iti panangguyugoy maipapan iti pagarian ti Dios.’ Nupay ti “sumagmamano pinatangkenda ti bagbagida ket saanda a namati,” adda dagidiay nangipangag. Kas resulta ti ministerio ni Pablo idiay Efeso, “nagtultuloy a rimmang-ay ken nagballigi ti sao ni Jehova.”—Aramid 19:8, 9, 20.
6, 7. Kasano a pinadayag ni Pablo ti ministeriona, ket kasanotayo a matulad dayta?
6 Kas naregta a manangiwaragawag iti Pagarian, ‘pinadayag ni Pablo ti ministeriona.’ (Roma 11:13) Kasano? Saanna nga intandudo ti bagina; wenno saan a mabain a nangyam-ammo iti bagina iti publiko kas maysa a katrabahuan ti Dios. Imbes ketdi, minatmatanna a kadakkelan a dayawna ti ministeriona. Sisisigo ken epektibo nga inaramat ni Pablo ti Sao ti Dios. Ti nabunga a trabahona nangyeg iti pagimbagan kadagiti dadduma, a nangtignay kadakuada a mangiringpas a naan-anay iti ministerioda. Maysa pay daytoy a pamay-an a naipadayag ti ministeriona.
7 Kas ken Pablo, maipadayagtayo ti trabahotayo kas ministro babaen ti masansan ken epektibo a panangusartayo iti Sao ti Dios. Iti amin a benneg ti ministeriotayo, ti kalattayo koma ket tapno makairanud iti Nainkasuratan nga impormasion kadagiti adu a tattao agingga iti kabaelantayo. Kasanotayo a maaramid dayta iti makaguyugoy a pamay-an? Usigen ti tallo a napateg a pamay-an: (1) Dakamaten ti linaon ti Sao ti Dios iti wagas a raemenda dayta. (2) Siaannad nga ilawlawag ken ipakita no kasano a mayaplikar ti linaon ti Biblia. (3) Makirinnason manipud iti Kasuratan iti wagas a makagutugot.
8. Ania ti adda kadatayo ita nga alikamen iti panangikasaba iti Pagarian, ken kasano ti panangaramatyo kadagita?
8 Dagiti agdama a mangiwarwaragawag iti Pagarian addaanda kadagiti alikamen nga awan idi kaaldawan ni Pablo. Karaman kadagita dagiti libro, magasin, broshur, handbill, tract, tape, ken video. Iti napalabas a siglo, naaramat dagiti testimony card, ponograpo, sound car, ken brodkas ti radio. Kaskasdi, ti Biblia ti kangrunaan nga alikamentayo, ket masapul nga usarentayo a naimbag ken siuumiso nga aramaten daytoy nakapatpateg nga alikamen.
Nasken a Naibatay ti Ministeriotayo iti Sao ti Dios
9, 10. No maipapan iti panangusar iti Sao ti Dios, ania ti maadaltayo iti balakad ni Pablo ken ni Timoteo?
9 Kasano a sieepektibo a mausartayo ti Sao ti Dios? Babaen ti panangyaplikar iti kinuna ni Pablo ken ni Timoteo: “Aramidem ti amin a kabaelam a mangiparang iti bagim a naanamongan iti Dios, maysa a mangmangged nga awan ti aniaman nga ibainna, nga aramatem a siuumiso ti sao ti kinapudno.” (2 Timoteo 2:15) Ania ti nairaman iti ‘umiso a panangaramat iti sao ti kinapudno’?
10 Ti Griego a sao a naipatarus kas “aramaten a siuumiso” literal a kaipapananna “diretso a tabas” wenno “agaramid iti nalinteg a dalan.” Iti Kristiano a Griego a Kasuratan, iti laeng balakad ni Pablo ken ni Timoteo a naaramat dayta a termino. Mabalin met nga usaren dayta a sao a mangtukoy iti nalinteg a gulis iti talon. Nakababain para iti maysa a nasigo a mannalon no saan a nalinteg dayta. Tapno agbalin a “maysa a mangmangged nga awan ti aniaman nga ibainna,” napalagipan ni Timoteo a saan koma a sumiasi kadagiti pudno a sursuro ti Sao ti Dios. Saan a ti personal a panangmatmatna ti isurona. Nasken a naan-anay a naibatay iti Kasuratan ti ikasaba ken isurona. (2 Timoteo 4:2-4) Iti kasta, dagiti nasingpet ti panagpuspusoda a tattao matuladda ti panangmatmat ni Jehova kadagiti bambanag, saan ket a ti nailubongan a pilosopia. (Colosas 2:4, 8) Kasta met laeng ita.
Nasken a Nasayaat ti Konduktatayo
11, 12. Ania ti pakainaigan ti konduktatayo iti umiso a panangaramattayo iti Sao ti Dios?
11 Saantayo laeng nga aramaten a siuumiso ti Sao ti Dios babaen ti panangipakaammo kadagiti linaonna a kinapudno. Nasken a maitunos iti dayta ti konduktatayo. ‘Katrabahuannatayo ti Dios,’ isu a ditay koma agbalin nga aginsisingpet a trabahador. (1 Corinto 3:9) Kuna ti Sao ti Dios: “Nupay kasta, sika a mangisursuro iti asinoman, dika aya isuro ta bagim? Sika, a mangikaskasaba iti ‘Dika agtakaw,’ agtakawka aya? Sika, nga agkunkuna iti ‘Dika makikamalala,’ makikamalalaka aya? Sika, a mangyeb-ebkas ti pannakarurod kadagiti idolo, takawam aya dagiti templo?” (Roma 2:21, 22) No kasta, kas agdama a trabahador ti Dios, ti maysa a pamay-an a maaramattayo a siuumiso ti Saona ket babaen ti panangipangag iti balakadna: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.”—Proverbio 3:5, 6.
12 Ania dagiti manamnamatayo a resulta no siuumiso nga aramatentayo ti Sao ti Dios? Usigenyo no kasano a ti naisurat a Sao ti Dios inapektaranna ti biag dagidiay nasingpet ti panagpuspusoda a tattao.
Nabileg a Mangbalbaliw ti Sao ti Dios
13. Ania ti epektona iti tao no iyaplikarna ti Sao ti Dios?
13 Ti panagpannuray iti Sao ti Dios ket nabileg nga impluensia a manggutugot kadagiti tattao nga agaramid iti dakkel a panagbalbaliw iti biagda. Nakita ni Pablo ti panagtignay ti sao ti Dios ken dagiti naimbag nga epektona kadagidiay nagbalin a Kristiano iti nagkauna a Tesalonica. Gapuna, kinunana kadakuada: “Agyamankami met a di agressat iti Dios, agsipud ta idi inawatyo ti sao ti Dios, a nangngegyo kadakami, inawatyo dayta, saan a kas sao dagiti tattao, no di ket, kas iti kinapudno daytoy, kas sao ti Dios, nga agtigtignay met kadakayo a manamati.” (1 Tesalonica 2:13) Para kadagidi a Kristiano—kinapudnona, para kadagiti amin a pudno a pasurot ni Kristo—ti narabaw a panagrasrason ti tao awan pakaimudinganna iti nakatantan-ok a sirib ti Dios. (Isaias 55:9) Dagiti taga Tesalonica ‘inawatda ti sao iti sidong ti adu a rigat buyogen ti rag-o ti nasantuan nga espiritu’ ket nagbalinda a mapagulidanan kadagiti padada a manamati.—1 Tesalonica 1:5-7.
14, 15. Kasano kabileg ti mensahe ti Sao ti Dios, ken apay?
14 Nabileg ti Sao ti Dios, no kasano a nabileg met ti Gubuayanna, ni Jehova. Naggapu dayta iti “sibibiag a Dios,” daydiay babaen ti saona “naaramid ti mismo a langlangit,” ken dayta a sao kanayon nga ‘agballigi iti banag a nakaibaonanna.’ (Hebreo 3:12; Salmo 33:6; Isaias 55:11) Kuna ti maysa nga eskolar ti Biblia: “Agtunos ti Dios ken ti Saona. Saanna nga ilibak dayta. . . . No kasta, dayta ket saan a banag nga awan mamaayna, a matungpal ti linaonna yantangay naisinggalut dayta iti sibibiag a Dios.”
15 Kasano kabileg ti mensahe ti Sao ti Dios? Nakabilbileg. Maitutop ti insurat ni Pablo: “Ti sao ti Dios nabiag ken adda bilegna ken natartarumamis ngem iti aniaman a kampilan a dua ti tademna ket sumalput uray agingga iti paglasinan ti kararua ken espiritu, ken kadagiti nagsusuopan ken iti patada, ket kabaelanna a lasinen dagiti panunot ken dagiti panagem ti puso.”—Hebreo 4:12.
16. Kasano kabileg ti Sao ti Dios a mangbalbaliw iti tao?
16 Ti mensahe iti naisurat a Sao ti Dios ket “natartarumamis ngem iti aniaman a kampilan a dua ti tademna.” Gapuna, talaga a sumarut ti bilegna, a lab-awanna ti aniaman nga alikamen wenno remienta ti tao. Ti Sao ti Dios salputenna dagiti kaunggan ti tao ken mabalbaliwanna ti kababalinna, nga impluensiaanna ti panagpampanunot ken tarigagayna, a mamagbalin kenkuana a makaay-ayo ken nadiosan a trabahador. Anian a nagbileg nga alikamen!
17. Ilawlawagyo ti bileg ti Sao ti Dios a mangbalbaliw.
17 Ti Sao ti Dios ipalgakna ti pudno a kinasiasino ti maysa a tao. Nalabit naiduma daytoy iti ipagarup ti tao a kinasiasinona wenno no ania ti ipakpakitana kadagiti sabsabali. (1 Samuel 16:7) No dadduma, mabalin nga ilimed ti dakes a tao ti kinasiasinona babaen ti panagpammarangna a nasingpet wenno relihioso. Agpammarang dagiti dakes a tattao gapu ta adda dakes a panggepda. Agimpapakumbaba dagiti natangsit a tattao gapu ta kayatda ti mapadayawan. Ngem babaen ti panangipalgakna no ania a talaga ti adda iti puso, nabileg ti Sao ti Dios a mangtignay iti napakumbaba a tao a manguksob iti daan a personalidadna ket ‘ikawesna ti baro a personalidad a naparsua maitunos iti pagayatan ti Dios iti pudno a kinalinteg ken kinasungdo.’ (Efeso 4:22-24) Dagiti sursuro ti Sao ti Dios mapagbalinna met ti managbabain a tao kas natured a Saksi ni Jehova ken naregta a manangiwaragawag iti Pagarian.—Jeremias 1:6-9.
18, 19. Maibasar kadagitoy a parapo wenno iti personal a kapadasanyo iti panangasaba, ipakitayo no kasano a ti kinapudno iti Kasuratan mabalbaliwanna ti kababalin ti maysa a tao.
18 Ti mamagbalbaliw a bileg ti Sao ti Dios nasayaat ti epektona kadagiti tattao iti sadinoman. Kas pagarigan, dagiti mangiwarwaragawag iti Pagarian idiay Phnom Penh, Cambodia, mamindua kada bulan a mangasabada iti probinsia ti Kompong Cham. Idi nangngegna ti dadduma a klero a nagsao maibusor kadagiti Saksi ni Jehova, maysa a lumugar a pastora ti nakitulag kadagiti Saksi iti sumaruno a panagsarungkarda iti dayta a probinsia. Nakaad-adu ti saludsodna maipapan iti pannakarambak dagiti piesta ket immimdeng a naimbag bayat a nakirinnasonda kenkuana manipud iti Kasuratan. Kalpasanna, kinunana: “Ammok itan a saan a pudno ti komento dagiti kakaduak a pastor maipapan kadakayo! Kunada a saanyo nga us-usaren ti Biblia, ngem ita a bigat, dayta laeng ti inusaryo!”
19 Intuloy daytoy a babai ti pannakipatangna kadagiti Saksi maipapan iti Biblia ket dina inkankano ti pangta a maikkat kas pastora. Ti pannakipatangna maipapan iti Kasuratan ket inestoriana iti maysa a gayyemna, a nangrugi metten a nakipagadal iti Biblia kadagiti Saksi. Magustuan unay ti gayyemna ti maad-adalna nga uray la naikunana iti maysa kadagiti sermonna, “Paregtaenkayo a makipagadal iti Biblia kadagiti Saksi ni Jehova!” Di nagbayag, isu ket naglusulos iti simbaan. Dayta a dati a pastora, ti gayyemna, ken dadduma pay nakipagadalda iti Biblia kadagiti Saksi ni Jehova.
20. Kasano a ti kapadasan ti maysa a babai a taga Ghana ipakitana ti bileg ti Sao ti Dios?
20 Agminar ti bileg ti Sao ti Dios iti kapadasan ni Paulina, maysa a babai a taga Ghana. Maysa nga amin-tiempo a manangiwaragawag iti Pagarian ti nangyadal kenkuana iti libro a Pannakaammo a Mangiturong iti Biag nga Agnanayon.a Makiramraman ni Paulina iti poligamia ket nabigbigna a kasapulanna ti agbalbaliw. Ngem siraranggas a binusor ni lakayna ken amin a kabagianna. Pinadas nga upayen ni lolona, a maysa a hues iti nangato a korte ken panglakayen iti iglesia, babaen ti panangballikugna iti aplikasion ti Mateo 19:4-6. Kasla husto ni lolona, ngem dagus a nabigbig ni Paulina a mayasping dayta iti panangtiritir ni Satanas iti Kasuratan idi pinadasna a sulisogen ni Jesu-Kristo. (Mateo 4:5-7) Malagipna ti kinuna ni Jesus maipapan iti panagasawa, a pinarsua ti Dios dagiti tattao kas lalaki ken babai, saan ket a kas lalaki ken babbai, ket isuda a dua, saan a tallo, ti agbalin a maymaysa a lasag. Tinakderanna ti desisionna ket napatgan met laeng ti kiddawna a makidiborsio iti asawana. Di nagbayag, maysa isunan a naragsak a bautisado a manangiwaragawag iti Pagarian.
Itultuloy nga Aramaten a Siuumiso ti Sao ti Dios
21, 22. (a) Ania koma ti determinasiontayo kas manangiwaragawag iti Pagarian? (b) Ania ti usigentayo iti sumaganad nga artikulo?
21 Ti naisurat a Sao ti Dios ket pudno a nabileg nga alikamen a mausartayo a tumulong kadagiti dadduma a mangbalbaliw iti biagda tapno mayadanida ken ni Jehova. (Santiago 4:8) No kasano a ti nasigo a trabahador mangaramat kadagiti remienta tapno nasayaat ti magapuananna, determinadotayo met koma a mangaramat a sisisigo iti Sao ti Dios, ti Biblia, mainaig iti inted-Dios a trabahotayo kas manangiwaragawag iti Pagarian.
22 Kasano nga ad-adda nga epektibo a maaramattayo ti Kasuratan iti trabahotayo a panagaramid iti adalan? Ti maysa a pamay-an ket babaen ti panangsukay kadagiti abilidadtayo nga agbalin a makaguyugoy a mannursuro. Pangngaasiyo ta imutektekanyo ti sumaganad nga artikulo, yantangay mangisingasing dayta kadagiti pamay-an ti panangisuro ken tumulong kadagiti dadduma a mangipangag iti mensahe ti Pagarian.
[Footnote]
a Impablaak dagiti Saksi ni Jehova.
Malagipyo Pay?
• Aniada nga alikamen ti us-usaren dagiti mangiwarwaragawag iti Pagarian?
• Kadagiti ania a wagas a mapagwadan ni Pablo kas trabahador iti Pagarian?
• Ania ti kalikaguman ti umiso a panangaramat iti Sao ti Dios?
• Kasano kabileg nga alikamen ti naisurat a Sao ni Jehova?
[Dagiti Ladawan iti panid 10]
Dagiti sumagmamano nga alikamen nga us-usaren dagiti Kristiano iti trabahoda a panangiwaragawag iti Pagarian