Report Dagiti Manangiwaragawag ti Pagarian

Ti Kinapudno ti Biblia Napigsa

DAYTOY a lubong ti mangbusbusbos ti adu a panawen ken kuarta a mangpadpadas a mangkontrol ti panagtignay dagiti dakes a tattao. Adu dagiti maar-aramid a linteg a maibusor iti krimen kas iti panangabuso ti droga, panagtakaw, ken panangpapatay; ngem dagitoy a linlinteg dina pagbalinen a naimbag dagiti dakes a tattao. Iti kasumbangirna, ti Sao ti Dios, ti Biblia, ti addaan pannakabalin a mamagbalbaliw, ket dagiti tattao a mangiyaplikar kadagiti linlinteg ken prinsipiona agbalinda a nalinteg, nasingpet, ken naemma a tattao.​—Roma 12:2.

◻ Kas pangarigan, dua a Saksi idiay Australia ti simmarungkar iti sumagmamano nga agtutubo, ngem awan panggedanda a lallaki. Idi simrekda iti balay nga ayan dagiti lallaki. Idi simrekda iti balay nga ayan dagiti lallaki, simrekda iti maysa a nasipnget, napunno ti asuk a kuarto. Addada dagiti alikamen ti marihuana iti rabaw ti lamisaan ken dadakkel a poster iti rock a nakalinea kadagiti didingda. Iti maysa a dasig ti kuarto adda dagiti nagdadakkel nga amplifiers dagiti guitara a de koriente. Dayta gayam ti siled a pagin-insayuan ti banda ti rock. Nakairugida ti panagadal ti Biblia iti tallo kadagitoy a lallaki nga agkakabsat iti lasag. Sumagmamano a tawtawen sakbayna nakipagad-adal ti inada iti Biblia kadagiti Saksi, ket babaen ti tulong ti libro a Mabalinyo ti Agbiag nga Agnanayon iti Paraiso a Daga, sinursuruanna dagiti annakna a lallaki maipapan iti kari ti Dios a maysa a paraiso iti masanguanan. Kalpasanna immakar ti pamilia, ket naisardeng ti panagadal. Ita, gapu ta napabaro ti ayatda iti kinapudno, di nagbayag isudan ti nakikaduaan dagiti dua a gagayyemda iti panagad-adalda.

Iti uneg ti tallo a bulan, maysa kadakuadan ti mangaskasaba, ket maysa a bulan kamaudiananna isu ti kinaduaan manen dagiti dua pay. Pinanawanda ti banda, ket iti las-ud ti uppat a bulan, amin dagiti tallo ket makiramramanen iti trabaho a panangasaba. Kabayatanna, ti inada, ti ub-ubing a kabsatda a lalaki, ken ti natataengan a kabsatda a babai a naasawaanen ti nangrugi met a makipagadal ti Biblia. Di nagbayag kalpasanna sabali manen a gayyemda ti nagkalikagum iti panagadal ti Biblia. Anian a ragsak ti pannakakita a lima kadakuada ti nabautisaran iti isu met laeng nga aldaw iti maysa nga asamblea sirkito! Dua pay ti agngayngayangay iti panagbautisar, bayat a ti ina ken ti anak a babai ti agtultuloy a rumangrang-ay met. Pudno unay, ti Sao ti Dios ket nabiag ken adda puersana.

◻ Maysa a lalaki idiay Argentina ti addaan empleado a nakasadsadut ken nakusit ken adu a kuarta ti nautangna kenkuana. Maysa nga aldaw nagawan ti trabahador. Kalpasanna, adu a tawtawen ti naglabas, idiay kalye nga asideg ti pagtaenganna, ti lalaki nasabetna ti dati nga empleadona. Ti napalabas nga empleado ti nangkablaaw kenkuana, a kunkunana: “Mapmapanakon iti balayyo tapno bayadak ti kuarta a nabulodko kenka. Adtoy ti kuartam. Pagyamanan unay, ket pangngaasim ta pakawanennak iti diak panangisubli a nasapsapa iti dayta.” Nakellaat, insaludsod it lalaki kenkuana no apay nga ar-aramidenna daytoy. Isut’ simmungbat: “Makipagad-adalak itan ti Biblia, ket maysaakon kadagiti Saksi ni Jehova. Kuna ti Biblia a ditay makaut-utang iti asino man malaksid ti ayat. Gapuna nga isubsublik ti kukuam.” Insaludsod ti lalaki: “Ania a pannakabalin ti adda iti Biblia a makapataud iti kasta a panagbalbaliw iti maysa a tao?” Nairugi ti panagadal ti Biblia kenkuana, ket itan maad-adalnan ti kinapudno, amin gapu iti dakkel a panagbalbaliw nga inaramid ti kinapudno ti Biblia iti dati nga empleadona.

Adu a nasingpet panagpuspusona a tattao idiay Argentina ti umaw-awat iti makapagbalbaliw a kinapudno ti Biblia ken balbaliwanda metten ti wagas ti panagbiagda, kas ipakita ti sumaganad a kapadasan.

◻ “Maysa nga aldaw idi timmuktokkami iti maysa a ruangan bayat nga addakami iti serbisio,” insalaysay ti maysa a Saksi, “nakangngegkami iti panagik-ikkis nga agapgaput’ uneg ti balay. Iti isusungbat iti panagtuktokmi, maysa a lalaki ti rimmuar, a makapungtot unay. Rinugianmi nga insalaysay ti panggep ti isasarungkarmi, ngem kinellaatna-kami a pappapanawen manipud iti sanikuana. Intultuloymi ti nakisao a siuulimek ken sikakalma. Nagin-inot nga isu met ti nagkalma. Idi makitami daytoy, inlawlawagmi kenkuana ti ad-adu pay maipapan iti nakaskasdaaw a panggep ni Jehova a maipaay iti sangatauan. Iti panagsiddaawna iti daytoy, kinellaatnakami ti lalaki babaen ti panagkunana: ‘Ti Dios ti nangibaon kadakayo ditoy.’ Kalpasanna inawisnakami iti uneg ti balayda. Sadiay, naur-urnong iti maysa a suli ti balayda, ti ‘asawana’ ken dagiti annakda, nga agsangsangit. Kalpasanna impudnona: ‘Idi immaykayo, ngangngani papatayekon ti pamiliak ken ti bagik. Desperadoak! Napukawko ti trabahok, ket itan pagtalawendakamin iti paggigiananmi a balay, ket nagadut’ utangko a babayadak.’”

Daytoy a kapadasan ket addaan naragsak a nagtungpalan. Maysa a kabsat a babai ti nakakita ti trabaho nga agpaay iti lalaki, ket isu ti nakaala ti sabali a balay. Isu ken ti “asawana” ti nangrugi a makipagadal ti Biblia ket kalpasanna nagpakasarda kalpasan ti panagtiptipondan iti 15 a tawtawen.

Ti kinapudno ti Biblia “ti napigsa” kas ipakita dagitoy a kapadasan, ket daytat’ makaaramid met iti kasta iti asinoman nga addaan ti naemma a puso nga agadal iti Biblia a mangiyaplikar iti dayta.

[Blurb iti panid 7]

“Ti sao ti Dios ti nabiag ken napigsa.”​—HEBREO 4:12