Ania ti Ugaliyo?
1 Dagiti Kristiano a gimong isudat’ nasken a paset iti panagdayawtayo ken Jehova. Maitutop iti panagkiddaw ni Pablo kadatayo a ditay tallikudan ti panaggigimongtayo iti maysa ken maysa a “kas ugali dagiti dadduma.”—Heb. 10:25.
2 Kasta met kadi ti mariknayo maipapan iti itatabuno kadagiti Kristiano a gimong? Ania ti ipalnaad iti ugaliyo maipapan iti daytoy a banag? Regular kadi ti panangtabunoyo iti amin a gimong, agraman iti Panagadal ti Libro iti Kongregasion? Wenno masarakantayo a naipaugalin kadakayo ti panaglangan? Parparegtaenyo met laeng dagiti sabsabali babaen iti regular a pannakigimongyo?
3 Uray ania iti inaldaw a rikostayo, ti balakad ni Pablo ket saan koma a laglag-anen. Nupay kaawatan a ti maysa a Kristiano ket sagpaminsan nga aglangan iti gimong gapu iti nalaad a salun-at ken gapu iti dadduma a di maliklikan a kasasaad, masapul a saanna koma nga ugalien dayta. (Roma 2:21) Gapu iti kaadu dagiti obligasion a tamingen, ti maysa a Kristiano masapul a siguruenna dagiti mas napateg a bambanag. (Fil. 1:10) Nairaman dagiti gimong kadagiti mas napatpateg a bambanag ken naskenda a maipaay iti espiritual a salun-attayo.
AGPIPINNAREGTA ITI MAYSA KEN MAYSA
4 Idi a nagsurat ni Pablo kadagiti taga Roma, kinunana a mailiw a kumita kadakuada. Apay? Tapno pasarabuanna ida iti espiritual a sagut ket iti kasta “mapatibkerda.” (Roma 1:11) Saan a mapnek iti basta mangipatulod laeng iti surat a basaenda, ngem nariknana nga ti asosasion ket nasken, agsipud ta intuloyna a kinuna: “Tapno adda panagsusukat iti pammaregta.” (Roma 1:12) Uray ni Pablo, kas apostol, nailasinna iti panagkasapulanna ti pammaregta babaen iti Kristiano nga asosasion wenno timpuyog.
5 Kaasping daytoy, kadagiti gimongtayo masapul ti panagpipinnaregta iti maysa ken maysa iti ayat ken naimbag nga ar-aramid. Ti nainggayyeman nga isem ken nabara a kablaaw isudat’ addaan iti positibo nga epekto iti dadduma. Dagiti makapatibker a komento, nasayaat ti pannakaisaganada a paset iti programa, ti pannakakita iti espiritual a progreso dagiti dadduma, ken uray iti kaadda laeng iti nagbabaetan dagiti kakabsat iti gimong ket pudno a makaparegta unay. Agpapan pay nabannogantayo iti ngudo ti aldaw, masansan a nasalibukag iti riknatayo kalpasan iti itatabunotayo iti gimong. Ti Kristiano a panaggagayyem ken iti ayat a maiyebkas dagiti kakabsat kadatayo isudat’ mamaregta kadatayo nga “agtaray a buyogen iti panagibtor iti tarayen a naipasango kadatayo.” (Heb. 12:1) Babaen ti panagimdeng nga atentibo iti Sao ti Dios, agbanag a nakasaganatayo a mangsalimetmet iti publiko a panangipaduyakyak iti namnamatayo nga awan panagduadua. Pudno unay, aglaplapusanan dagiti bendision a masagrap manipud iti kaaddatayo kadagiti gimong.
6 Itan a nakarkaro ngem iti napalabas, masapul nga agsaldettayo a tumabuno iti amin a gimong iti kongregasion. Ditay kayat iti agtinnag idiay ugali a managliway iti panaggigimongtayo iti maysa ken maysa. Masapul a paregtaen ken tulongan dagiti dadduma a tumabuno, nga ipakita iti ayat ken panangipategtayo kadagiti Kristiano a gimgimong.