Panangiparang ti Naimbag a Damag—Babaen Dagiti Broshur
1 Anian a ragsak ti mangiranud iti naimbag a damag ti Pagarian kadagiti tattao! (Ara. 15:3) Ngem ti tiempotayo a mangaramid iti daytoy ket limitadon. Nainsiriban, ni Jehova babaen ti organisasionna nangipaay kadagiti ekselente a katulongan iti panagadal ti Biblia a mabalin nga ibati kadagiti interesado a tattao tapno tumulong kadakuada iti naespirituan.
2 Bayat ti Hulio ken Agosto usarentayo iti baro a Topiko a Pagsasaritaan nga, “No Aniat’ Aramiden ti Pagarian,” ken itukontayo iti uray ania kadagiti broshur a nadakamat iti daytoy nga artikulo. Masapul nga ammotayo no kasano a maiyammo dagitoy a broshur a sieepektibo kas maitunos iti Topiko a Pagsasaritaan maipapan iti Pagarian ti Dios.
SUMAGMAMANO A SINGASING
3 Tagiragsakenyo ti Biag nga Agnanayon Ditoy Daga!: Daytoy a broshur ti addaan iti ekselente nga apelo kadagiti agtutubo a tattao agraman kadagidiay limitado laeng ti abilidadda a bumasa. Kasanoyo nga iyammo? No ingudoyo ti diskusion maipapan iti Pagarian, mabalinyo a kunaen: “Dikay kadi kayat ti agbiag iti paraiso a daga iti sidong ti Pagarian ti Dios? [Palubosanyo a sumungbat.] Kitaenyo daytoy nagpintas a ladawan ti paraiso iti daytoy a broshur. [Iturongyo iti panid 49, ken basaen dagiti komento iti ngatuen ti ladawan.] Daytoy a broshur ti tumulong kadakayo a mangadal no kasanokayo nga agbiag nga agnanayon ditoy daga a kadua dagiti naragsak a tattao. Kukuayon dayta iti kontribusionyo a ₱4.20.”
4 Ti Gobierno a Mangiyegto iti Paraiso: Daytoy a broshur ti mangiturong iti asikaso maipapan iti Pagarian ti Dios, nga isu dayta ti Topiko iti sumaruno a bulan. Kastoy ti maysa a wagas a panangisilpo iti daytoy a broshur idiay Topiko a Pagsasaritaan: “Dagitoy a bendision a kalkalpastayo a napagsaritaan isudat’ maiyeg babaen iti Pagarian ti Dios, nga isut’ insuro ni Jesus a kararagen. Imutektekanyo dagiti panglukat a sasao daytoy a broshur iti panid 3. [Basaen ti umuna a paset iti parapo.] Kalpasanna idiay panid 29 inladawanmi dagiti bendision nga iyeg iti Pagarian ti Dios iti sangatauan. [Saggaysaen nga ipakita dagiti puntos.] Kas kunaenna ditoy panid 30, kasapulantayo ti agadal iti Biblia tapno maammuan pay iti ad-adu maipapan iti Pagarian ti Dios ket daytoy a makaisuro a broshur ti bumadang kadakayo iti daytoy. Kukuayon daytoy babaen laeng iti ₱4.20.”
5 Ti Nasantuan a Nagan nga Agtalinaed iti Agnanayon: Sigurado a dagiti managsapul iti bendision iti Pagarian ti Dios ket masapul a maam-ammoda ni Jehova, ti Dios iti kinaragsak. Gapuna a maiyammoyo daytoy a broshur a kastoy: “Tapno masagrap dagitoy a bendision masapul a ti maysa a tao ket pudno a maam-ammona a naimbag iti Dios a mismo. Dayta ti maysa a rason no apay nga ituktukonmi kadagiti tattao daytoy impormatibo a katulongan iti panagadal ti Biblia. [Ipakita ti broshur.] Saan laeng nga ilawlawagna no ania iti nagan ti Dios ngem ipakitana met ditoy panid 31 iti pateg ti panangammo iti nagan ti Dios. [Basaen ti parapo 1.] Matagikuayo daytoy a kopia iti kontribusionyo a ₱4.20.”
6 “Adtoy! Pagbalinek Dagiti Isuamin a Bambanag a Baro”: Daytoy a broshur ti ekselente a mangted iti aglawlaw a ladawan iti pangpanggep ti Dios ken mausar met a pangirugi iti panagadal ti Biblia. Gapuna, kalpasan a malawlawagan dagiti kasuratan iti Topiko a Pagsasaritaan, nasayaat no kunaen iti umasping kadagitoy: “Tapno lalo pay a masirmata iti nakaskasdaaw a kasasaad nga iyeg ti Pagarian iti Dios ditoy daga, kayatko nga ipakita kenka daytoy dekolor a broshur. [Maipakita nga agpadpada iti sango ken likud nga akkubna.] Kayatyo kadi ti agbiag iti kastoy a kasasaad? [Palubosanyo a sumungbat.] Daytoy a broshur ti nadisenio a tumulong kadakayo a mangadal iti ad-adu pay maipapan no kasano a dakayo ken ti pamiliayo ket makasagana nga agbiag idiay paraiso. Mabalinyo a matagikua daytoy babaen laeng iti ₱4.20.”
7 Mabalin a makasarakkayo pay iti sabali nga epektibo a wagas a mangiyammo kadagitoy a broshur iti serbisio bayat ti Hulio ken Agosto. Agsaganakayo a naimbag, ket ipaay koma ni Jehova kadakayo iti rag-o a mangipresenta iti naimbag a damag babaen iti broshur ken ikagumaan nga ipasdek iti panagadal ti Biblia kadagidiay a mangipakita iti interes.