Talaga Kadi nga Adda Maseknan Kaniak?

Nariknam kadin nga agmaymaysaka ken awan gawgawaymo, a kasla awan a talaga ti makaawat kadagiti parikutmo? Ken uray no ammoda dagita, mariknam a kasla saanda a maseknan.

NO TUMAUD dagiti problema, kasla kanayon nga adda bagyo iti biagtayo. No dadduma, mabalin a panunotentayo a naimamegtayo ken di nainkalintegan ti mapaspasarantayo ket ditayon maanduran dayta. Masansan a kasta ti mariknatayo no agsagsagabatayo gapu iti emosional a pakarigatan, depresion, nakaro nga aksidente wenno sakit, ken dadduma pay. Pampanunotentayo no pakasarakantayo iti liwliwa gapu ta mariknatayo nga awan gaway ken namnamatayo. Talaga kadi nga adda maseknan kadatayo?

Maseknan “ti Dios ti Amin a Liwliwa”

Iti Biblia, natukoy ti Dios kas “ti Ama dagiti nadungngo nga asi ken ti Dios ti amin a liwliwa.” (2 Corinto 1:3) Ti Dios nga agnagan Jehova ammona a kasapulantayo ti liwliwa. Nasurok a sangagasut a daras nga inusar ti Biblia ti sao a “liwliwa” iti nagduduma a pamay-an. Pammatalged dayta a saanna laeng a matarusan dagiti mapaspasarantayo no di ket kayatnatayo pay a liwliwaen. Daytoy a pannakaammo kombinsirennatayo a makita, matarusan, wenno maseknan ni Jehova kadagiti pakarigatantayo, uray no kasla saan a kasta dagiti dadduma.

Nalawag nga ipakita ti Kasuratan a maseknan ni Jehova kadagiti tattao kas indibidual. “Dagiti mata ni Jehova addada iti amin a lugar,” kuna ti Biblia, “a sisisiput kadagidiay dakes ken kadagidiay naimbag.” (Proverbio 15:3) Kasta met ti mabasatayo iti Job 34:21: “Dagiti matana addada kadagiti dalan ti tao, ket amin dagiti addangna makitana.” Makita ni Jehova ti ar-aramidentayo​—naimbag man wenno dakes​—ken ammona dagiti kasasaadtayo isu nga agtignay sigun iti kasapulantayo. Napatalgedan daytoy kadagiti sasao ni propeta Hanani kenni Ari Asa iti Juda: “No maipapan ken Jehova, mapan nga agsublisubli dagiti matana iti intero a daga tapno ipakitana ti pigsana maigapu kadagidiay a ti pusoda naan-anay kenkuana.”​—2 Cronicas 16:7, 9.

Agtultuloy a bambantayannatayo ni Jehova gapu iti sabali pay a rason. Kuna ni Jesus: “Awan ti tao a makaumay kaniak malaksid no ti Ama, a nangibaon kaniak, ti mangyasideg kenkuana.” (Juan 6:44) Gapu ta maseknan ni Jehova kadatayo, sukimatenna ti puso ti maysa tapno makitana no isu ket agannayas kenkuana. Iti kasta, makapagtignay iti naisangsangayan a pamay-an. Kas pagarigan, naospital ti maysa a babai a taga-Dominican Republic gapu iti operasion iti kanser. Nagpatulong iti Dios a mabirokanna koma ti pudno a relihion. Kalpasanna, inted kenkuana ni lakayna ti broshur nga Ania ti Kalikaguman ti Dios Kadatayo?a nga impaay ti maysa a Saksi ni Jehova a simmarungkar iti balayda iti dayta nga agsapa. Binasa ti babai dayta a broshur ket nabigbigna a daytoy ti sungbat ti Dios iti kararagna. Nagpayadal iti Biblia kadagiti Saksi. Awan pay innem a bulan, indedikarna ti biagna iti Dios ket nabautisaran.

Iti libro ti Biblia a Salmo, adu a makatukay a sasao dagiti nagkauna a Hebreo a salmista, kas ken Ari David, ti nangdeskribir iti naayat a pa nangaywan ni Jehova kadagiti adipenna. Iti Salmo 56:8, mabasatayo ti pakaasi ni Ari David iti Dios: “Ikabilmo dagiti luak iti lalat a boteliam. Saanda aya nga adda iti librom?” Dayta a panangyarig ipakitana nga ammo ni David a makitkita ni Jehova saan laeng a dagiti sagsagabaenna no di pay ket ti epekto dayta iti emosionna. Ammo ni Jehova ti saem a marikrikna ni David ken silalagip iti mapaspasaranna a nakaigapuan ti panagsangitna. Wen, bambantayan ti Namarsua ti amin a mangikagumaan a mangaramid iti pagayatanna, ‘dagidiay a ti pusoda naan-anay kenkuana.’

Ti sabali pay a teksto iti Biblia a nangdakamat iti naayat a panangaywan ti Dios ket ti nalatak a maika-23 a Salmo. Dagiti panglukat a sasao inyarigna ti Dios iti maysa a naayat a pastor: “Ni Jehova ti Pastorko. Saanakto nga agkurang iti aniaman.” Ti maysa a pastor iti Makintengnga a Daya ket maseknan iti tunggal karnerona, nga inagananna pay ti tunggal maysa kadakuada. Inaldaw nga ayabanna ti tunggal karnero sa aprosan ken kitaenna no adda sugatna. No adda, sapsapuanna iti lana tapno alisto nga umimbag ti sugat. No agsakit ti karnero, pilitenna a patomaren ken tulonganna a bumangon tapno saan nga agidda ket matay. Nagsayaat la ketdi dayta a panangiladawan iti pannakaseknan ti Dios kadagidiay agpatulong kenkuana.

Kararag ken ti Panagungar​—Pammaneknek a Maseknan ti Dios

Saan a nairekord iti Biblia dagita ken ti dadduma a makatukay a salmo tapno laeng basaen ken tagiragsakentayo. Ipakitada kadatayo no kasano a dagiti nagkauna a matalek nga adipen ti Dios impeksada ti linaon ti pusoda ken Jehova tapno agpatulongda iti Dios ken agyamanda iti panangiwanwan ken pamendisionna kadakuada. Nalawag nga ipakita dagita nga ebkas a dagiti nagkauna nga adipen ti Dios sititibker a patienda a maseknan kadakuada ti Dios. Ti panangbasa ken panangutob kadagitoy a naimpusuan a sasao tulongandatayo a makarikna iti kasta maipapan iti Dios. Ti probision a panagkararag ket nabileg a pammaneknek a maseknan ti Dios.

Ngem no dadduma, malapunostayo kadagiti parikut ket ditay ammo no kasano nga ikararag dagita. Lapped kadi dayta tapno saan a maammuan ni Jehova dagiti pakarigatantayo? Sumungbat ti Roma 8:26: “Makikadua met ti espiritu buyogen ti tulong a maipaay iti kinakapuytayo; ta ti parikut a no ania ti ikararagtayo a kasapulantayo saantayo nga ammo, ngem ti espiritu a mismo agdawat a maipaay kadatayo buyogen dagiti asug a di mayebkas.” Ibaga kadatayo dayta a teksto a dagiti naipaltiing a kararag dagiti nagkauna nga adipen ti Dios mabalin nga iyanninawda ti riknatayo. Ti “Managdengngeg iti kararag” a ni Jehova awatenna dagita a kararag a kasla naggapu kadatayo.​—Salmo 65:2.

Ti namnama a panagungar ti maysa pay a makakombinsir a pammatalged nga interesado ti Dios iti tunggal indibidual. Kuna ni Jesu-Kristo: ‘Um-umayen ti oras nga amin dagidiay adda kadagiti pakalaglagipan a tanem mangngegdanto ti timek ni Jesus ket rummuarda.’ (Juan 5:28, 29) Ti Griego a sao a nausar ditoy ket siuumiso a naipatarus kas “pakalaglagipan a tanem” saan laeng a basta “tanem.” Iyallatiwna ti kapanunotan a malaglagip ti Dios ti pakasaritaan ti biag ti maysa a natay.

Panunotenyo laengen: Tapno mapagungar ti Dios ti maysa a tao, masapul nga ammuenna ti amin maipapan kenkuana, agraman ti langana, dagiti natawid ken napatanorna a kababalin, ken ti kompleto a memoriana! (Marcos 10:27) Saan a mapukaw iti lagip ti Dios dayta a tao uray kalpasan ti rinibu a tawen. (Job 14:13-15; Lucas 20:38) Gapuna, ti amin a detalye maipapan iti binilion a natayen ket adda iti lagip ni Jehova a Dios​—makakombinsir a pammaneknek a maseknan kadatayo ti Dios kas indibidual!

Mananggunggona ni Jehova

Ania ti masapul nga aramidentayo tapno magun-odtayo ti naayat a pannakaseknan ken panangaywan ti Dios? Kangrunaanna, masapul nga agtalek ken agtulnogtayo kenkuana, nga ipakitatayo nga addaantayo iti pammati kenkuana. Impatuldo ni apostol Pablo nga agkanaig ti pammati ken ti panangtagiragsak iti panangaywan ti Dios. Insuratna: “No awan ti pammati isu di mabalin nga ay-aywen a naan-anay, ta ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.”​—Hebreo 11:6.

Imutektekanyo nga adda dua nga aspeto ti pammati a makaay-ayo iti Dios. Umuna, masapul a ‘patientayo nga isu,’ kayatna a sawen, patientayo nga adda Dios ken isu ti Kangrunaan nga Agturay, a maikari iti panagtulnog ken panagdayawtayo. Maikadua, masapul a patientayo nga isu ti “mananggunggona kadagidiay sipapasnek a mangsapsapul kenkuana.” Ti pudno a pammati ramanenna ti panamati a ti Dios ket interesado iti pagimbagan ti amin a sipapasnek a mangaramid iti amin a pagayatanna ken gunggonaanna ida. Babaen iti panagadalyo iti Sao ti Dios ken pannakitimpuyogyo kadagidiay agtulnog kenkuana, maaddaankayo iti kita ti pammati a maikari iti pamendision ti Dios ken iti naayat a pannakaseknanna.

Adu a tattao ita ti mamati a saan nga interesado ti Dios kadagiti aramid ti tao. Ngem kas nakitatayon, nalawag nga ipakita ti Biblia a maseknan unay ti Dios kadagidiay mangiparparangarang iti pudno a pammati kenkuana. Nupay ti biag ita ket masansan a napno iti pakarigatan, pakadanagan, pannakaupay, ken saem, saantayo koma a maawanan iti namnama. Talaga a maseknan ni Jehova a Dios. Kinapudnona, siaayat nga awisennatayo nga agpatulong kenkuana. “Ipalladawmo ti dadagsenmo ken Jehova a mismo, ket isu saranayennakanto,” kuna ti salmista. “Saannanto a pulos ipalubos nga agdiwengdiweng daydiay nalinteg.”​—Salmo 55:22.

[Footnote]

[Kahon/Ladawan iti panid 29]

Dagiti Teksto a Mangpabileg iti Panagtalekmo iti Naayat a Panangaywan ti Dios Kenka

“No maipapan ken Jehova, mapan nga agsublisubli dagiti matana iti intero a daga tapno ipakitana ti pigsana maigapu kadagidiay a ti pusoda naan-anay kenkuana.”​—2 CRONICAS 16:9

“Ikabilmo dagiti luak iti lalat a boteliam. Saanda aya nga adda iti librom?” ​—SALMO 56:8

“Ni Jehova ti Pastorko. Saanakto nga agkurang iti aniaman.”​—SALMO 23:1

“O Managdengngeg iti kararag, kenka a mismo umayto dagiti tattao iti isuamin a lasag.”​—SALMO 65:2

“Umawagkanto, ket siak sungbatankanto. Kailiwmonto ti aramid dagita imam.”​—JOB 14:15

“Ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.”​—HEBREO 11:6

“Ipalladawmo ti dadagsenmo ken Jehova a mismo, ket isu saranayennakanto. Saannanto a pulos ipalubos nga agdiwengdiweng daydiay nalinteg.”​—SALMO 55:22