Malagipyo Pay Aya?
Inikkanyo aya ti naannad a panagpampanunot dagiti nabiit pay a bilang Ti Pagwanawanan? No wen, nalabit a malagipyo pay dagiti sumaganad:
◻ Iti ania a pannakaawat nga inusar ni Pablo ti termino a “manangibabaet” idi tinukoyna ni Jesus idiay 1 Timoteo 2:5, 6?
Iti daytoy a teksto, us-usaren ni Pablo ti sao ti Griego a me·siʹtes a para ti “manangibabaet,” a dayta a termino addaan ti legal a pategna, gapuna dina us-usaren daytoy a sao iti nalawa a gagangay a kaipapananna iti adu a pagsasao. Gapuna, di ibagbaga ni Pablo a ni Jesus isut’ Manangibabaet ti Dios ken ti amin a sangatauan. Imbes ketdi, tuktukoyenna ni Kristo kas ti legal a Manangibabaet ti baro a tulag, nga isut’ nakaibatayan ti pannakiraman dagiti napulotan a paspasurot ni Kristo a kaduana iti nailangitan a Pagarianna. (2 Corinto 5:1, 5; Efeso 1:13, 14; Hebreo 8:7-13)—8/15, panid 30, 31.
◻ Idiay Mateo 25:34, aniat’ kayat a sawen ni Jesus idi a kinunana kadagiti kimmarnero: “Tawidenyo ti pagarian a naisagana kadakayo nanipud idi pannakabangon ti lubong”?
Di kayat a sawen ni Jesus a dagitoy a kimmarnero a tattao makipagturaydanto a kaduana idiay langit. Imbes ketdi, tawiden dagiti kimmarnero ti naindagaan a paset ti Pagarian a naisagana kadakuada “manipud idi pannakabangon ti lubong” ti mabalin a subboten a sangatauan. Iti daytoy a pamay-an agbalindanto a naindagaan nga annak ti “Agnanayon nga Amada,” ti Ari, a ni Kristo Jesus. (Isaias 9:6, 7)—9/1, panid 20.
◻ Nesesita aya a sibibiagto pay dagiti napulotan a natda ditoy daga tapno abrasaenda ti panagsubli dagiti mapagungar a matalek a natnatay sakbay ti 33 K.P.?
Saan, daytoy ti saanen a kasapulan. Adu kadagiti dakkel nga umariwekwek a makalasatto iti dakkel a rigat ti masansanayen a mangaywan kadagiti organisasional a responsabilidad. Gapuna, maaywanandanto daytan a situasion ken sursuruandanto dagiti mapagungar maipapan iti “baro a daga” iti sidong ti “baro a langlangit.” (2 Pedro 3:13)—9/1, panid 20, 21.
◻ Ania a bambanag ti nairaman iti “pannakaisalakan”? (Aramid 16:30)
Ti kangrunaan a kasapulan ket: “Mamatika ken Apo Jesus ket maisalakankanto.” (Aramid 16:31) Ramanen daytoy ti pananggun-od ti umiso a pannakaammo kadagiti pangpanggep ti Dios ken ti dalan ti panangisalakanna. Kalpasanna masapul ti panangalagad ti pammati ken Jesu-Kristo kas ti Kangrunaan nga Ahente ti pannakaisalakan. (Juan 3:16; Tito 2:14) Daytoy ti mangikabil ti Kristiano iti naisalakan a kasasaad, ngem masapul nga agtultuloy a napinget iti panagaramid ti pagayatan ti Dios ket itultuloyna a salimetmetan amin nga al-alagaden ti Dios iti intero a panagbiagna. Iti dayta laeng nga isut’ maisalakan agturong iti biag nga awan inggana. (Mateo 24:13)—9/15, panid 7.
◻ Kasano a ti pammati ni Noe binabalawna ti lubong? (Hebreo 11:7)
Ti kinatulnog ken nalinteg nga ar-aramid ni Noe ti nangidemostra a dadduma malaksid kenkuana ken ti pamiliana ti nakalasat koma iti Layus no situtulokda a nangbalbaliw ti estilot’ panagbiagda. Agpapan pay panangparigat ti mismo nga imperpekto a lasagna, ti lubong iti aglawlawna, ken ti Diablo, pinaneknekan ni Noe a posible ti maddaan iti biag a makaay-ayo iti Dios.—10/1, panid 11.
◻ Apay rebbeng nga agannadtayo kontra ti uray bassit laeng a panangidanondanon?
Mabalin makaisaotayo ti di nairanta a mangpasakit ti asinoman, ngem daytoy kasla inosente a panangidanondanon ti mabalin a mangpasakit no daytat’ maulit-ulit, masursurokan, wenno matiritir, a gapu itoy dadaelenna ti dayaw daydiay adda a mapagsasaritaan, a pakatakawanna ti naimbag a nagan. (Proverbio 20:19)—10/15, panid 13.
◻ Ania dagiti bentaha no dagiti pagassawaan pareho ti nakaisangolanda?
Ti asawa a lalaki ken babbai addadat’ kasasaad a mangparegta ti maysa ken maysa no maipapan iti panagdaydayaw iti Diosda. Kasta met, mabalinda a duat’ kumita kadagiti Kasuratan maipaay iti pannakaiwanwan iti panangrisut kadagiti dida pagkinnaawatan.—11/1, panid 20.
◻ Kasano a ti Sangapulo a Bilbilin matulongannatay itatta?
Ipalgakda ti panangmatmat ni Jehova kadagiti bambanag ken agserbida kas palagip iti obligasiontayo nga ayaten ti Dios ken ti padatayo a tao. (Mateo 22:37-39; 2 Timoteo 3:16, 17)—11/15, panid 5, 6.
◻ Iti ania a tallo nga okasion a nagsao ti Dios a nangngegan ni Jesus ken dagiti dadduma a tattao?
Ti umuna nga okasion ket idi tiempo a mabautisaran ni Jesus babaen ken Juan a Mammautisar (Mateo 3:17); ti maikadua ket idi a nagbaliw ti langa ni Jesus iti imatang da Santiago, Juan, ken ni Pedro (Mateo 17:5); ken ti maikatlo isu idi Nisan 10, uppat nga aldaw sakbay ti ipapatay ni Jesus, idi a ti timek ti Dios ti nangngegan ti umariwekwek a sitatakder idiay templo. (Juan 12:28)—12/1, panid 8.