Dikay Sumuko nga Agaramid iti Nasayaat
“Ditay koma sumuko nga agaramid iti nasayaat, ta iti naikeddeng a panawen agapittayto no ditay mabannog.”—GALACIA 6:9.
1, 2. (a) Apay a kasapulan ti panagibtur tapno makapagserbi iti Dios? (b) Kasano nga impakita ni Abraham ti panagibtur, ket ania ti nakatulong kenkuana nga agibtur?
KAS Saksi ni Jehova, maragsakantayo a mangaramid iti pagayatan ti Dios. Mabang-arantayo met a mangibaklay iti “sangol” ti panagbalin nga adalan. (Mateo 11:29) Nupay kasta, saan a kanayon a nalaka ti agserbi ken Jehova a kadua ni Kristo. Imbatad daytoy ni apostol Pablo idi indagadagna kadagiti padana a Kristiano: “Kasapulanyo ti panagibtur, tapno iti kasta, kalpasan a naaramidyon ti pagayatan ti Dios, awatenyo ti kaitungpalan ti kari.” (Hebreo 10:36) Kasapulan ti panagibtur agsipud ta mabalin a makakarit ti panagserbi iti Dios.
2 Dayta a kinapudno ket paneknekan ti biag ni Abraham. Namin-adu a naipasango kadagiti narigat a pangngeddeng ken narikut a kasasaad. Rugrugi laeng ti bilin a panawanna ti nasaliwanwan a biag idiay Ur. Di nagbayag, naipasango iti bisin, ibubusor dagiti kaarrubana, iti nganngani pannakapukawna iti asawana, pananggura kenkuana dagiti dadduma a kabagianna, ken ti kinaulpit ti gubat. Dumtengto pay laeng idi dagiti dakdakkel a suot. Ngem pulos a di simmuko ni Abraham nga agaramid iti naimbag. Naisangsangayan daytoy yantangay awanan idi iti kompleto a Sao ti Dios, saan a kas kadatayo ita. Nupay kasta, awan duadua nga ammona ti maipapan iti umuna a padto, idi a kinuna ti Dios: “Mangikabilakto ti panagginnura iti nagbaetanyo iti babai ken iti nagbaetan ti bin-im ken ti bin-ina.” (Genesis 3:15) Siempre, yantangay ni Abraham ti pagtaudan ti Bin-i, isu ti puntiria ti ibubusor ni Satanas. Iti pannakaamirisna iti daytoy, awan duadua a natulongan ni Abraham a mangibtur a sirarag-o kadagiti pakasuotanna.
3. (a) Apay a ti ili ni Jehova itatta rumbeng a namnamaenda dagiti pakarigatan? (b) Ania ti pammaregta kadatayo ti Galacia 6:9?
3 Ti ili ni Jehova itatta rumbeng a namnamaenda met dagiti pakarigatan. (1 Pedro 1:6, 7) Ngamin, ballaagannatayo ti Apocalipsis 12:17 a ni Satanas ‘gubgubatenna’ ti natda kadagiti napulotan. Gapu iti nadekket a pannakitimpuyogda kadagiti napulotan, kapungtot met ni Satanas ti “sabsabali a karnero.” (Juan 10:16) Malaksid iti ibubusor a mabalin a pakaipasanguan dagiti Kristiano iti publiko a ministerioda, mabalin a mapasaranda met dagiti narikut a pakarigatan iti personal a panagbiagda. Indagadag ni Pablo kadatayo: “Ditay koma sumuko nga agaramid iti nasayaat, ta iti naikeddeng a panawen agapittayto no ditay mabannog.” (Galacia 6:9) Wen, nupay determinado ni Satanas a mangdadael iti pammatitayo, masapul a sarangtentayo, nga agtalinaedtayo a natibker iti pammati. (1 Pedro 5:8, 9) Ania ti mabalin nga ibunga ti kinamatalektayo? Ilawlawag ti Santiago 1:2, 3: “Ibilangyo a rag-o amin, kakabsatko, no maipasangokayo iti nadumaduma a pakasuotan, yantangay ammoyo a daytoy nasubok a kualidad ti pammatiyo mangpataud iti panagibtur.”
Direkta nga Iraraut
4. Kasano nga us-usaren ni Satanas ti direkta nga ibubusor iti panangpadasna a mangdadael iti kinatarnaw ti ili ti Dios?
4 Ti biag ni Abraham nalawag nga ipakitana dagiti “nadumaduma a pakasuotan” a mabalin a pakaipasanguan ita dagiti Kristiano. Kas pagarigan, kasapulan idi a sanguenna dagiti rimmaut a naggapu idiay Sinar. (Genesis 14:11-16) Di pakasdaawan, agtultuloy nga us-usaren ni Satanas ti direkta nga ibubusor babaen ti panangidadanes. Manipud idi nagpatingga ti Gubat Sangalubongan II, adu a pagilian ti nangiparit iti Nakristianuan a trabaho a panangisuro dagiti Saksi ni Jehova. Ipadamag ti 2001 Yearbook of Jehovah’s Witnesses ti maipapan iti kinaranggas nga inibturan dagiti Kristiano idiay Angola iti ima dagiti kabusor. Gapu iti panagpannurayda ken Jehova, sititibker a nagkedked a sumardeng dagiti kakabsattayo kadagita a pagilian! Nagtignayda, saan a babaen ti kinaranggas wenno panagalsa, no di ket babaen ti siaannad a panangitultuloyda iti trabaho a panangasaba.—Mateo 24:14.
5. Kasano a mabalin a maidadanes idiay eskuelaan dagiti Kristiano nga agtutubo?
5 Nupay kasta, saan a kanayon a naranggas ti pannakaidadanes. Idi agangay, naparaburan ni Abraham iti dua nga annak—da Ismael ken Isaac. Kunaen kadatayo ti Genesis 21:8-12 a naminsan ‘sutsutilen’ ni Ismael ni Isaac. Iti suratna kadagiti taga Galacia, impakita ni Pablo a saan daytoy a basta panaginnangaw dagiti ubbing, ta kinunana nga indadanes ni Ismael ni Isaac! (Galacia 4:29) Gapuna, ti pananguyaw dagiti kaeskuela ken panangrabngis dagiti bumusbusor ket umiso a maibilang a pannakaidadanes. Malaglagip ti agtutubo a Kristiano nga agnagan Ryan ti panangtutuok kenkuana dagiti kaeskuelana: “Kasla adu nga oras a rinabrabakdak bayat ti 15 a minuto a panagluganko iti bus a mapan ken aggapu iti eskuelaan. Sininitdak kadagiti pangipit iti papel a pinapudotda kadagiti pagsindi iti sigarilio.” Ania’t makagapu iti daytoy a nasabrak a panangtrato? “Naidumaak iti sabsabali nga agtutubo idiay eskuelaan gapu iti nateokratikuan a pannakasanayko.” Nupay kasta, nakapagibtur a simamatalek ni Ryan gapu iti tulong dagiti nagannak kenkuana. Dakayo nga agtutubo, maup-upaykayo kadi gapu iti panangum-umsi dagiti kapatadayo? Bueno, dikay sumuko! Babaen ti simamatalek a panagibturyo, matungpal kadakayo ti sasao ni Jesus: “Naragsakkayo inton umsiendakayo dagiti tattao ken idadanesdakayo ken siuulbod a sawenda ti tunggal kita ti nadangkes a banag a maibusor kadakayo maigapu kaniak.”—Mateo 5:11.
Dagiti Inaldaw a Pakaringgoran
6. Ania dagiti banag a mabalin a mangdadael iti relasiontayo kadagiti padatayo a Kristiano?
6 Ti kaaduan a pakasuotantayo ita ket mainaig kadagiti gagangay nga inaldaw a pakaringgoran. Nasken idi nga ibturan ni Abraham a mismo dagiti parikut a rimsua iti nagbabaetan dagiti agtartaraken kadagiti animalna ken dagiti animal ni Lot a kaanakanna. (Genesis 13:5-7) Kasta met ita, ti panagduduma ti personalidad ken babassit a panagimon mabalin a dadaelenna ti relasion ken pagpeggadenna pay ti talna ti kongregasion. “No sadino ti ayan ti imon ken rinnupir, adda sadiay ti riribuk ken isuamin a nakadakdakes a banag.” (Santiago 3:16) Anian a nagpateg a ditay sumuko no di ket ipangpangrunatay koma ti talna imbes a ti bukodtayo a paglaingan, kas iti inaramid ni Abraham, ket panunotentayo ti pagimbagan ti sabsabali!—1 Corinto 13:5; Santiago 3:17.
7. (a) Ania ti rumbeng nga aramiden ti maysa no sinair ti padana a Kristiano? (b) Kasano a nangipasdek ni Abraham iti nasayaat nga ulidan iti panangtaginayon iti nasayaat a relasion kadagiti sabsabali?
7 Mabalin a maysa a karit ti panagbalin a mannakikappia no mariknatayo a di nainkalintegan ti panangtrato kadatayo ti kapammatiantayo. Kunaen ti Proverbio 12:18: “Adda daydiay agsasao a siaaleng-aleng a kas kadagiti panangsugat ti kampilan.” Mabalin a makapasakit unay ti di naannad a panagsao, uray no di inggagara. Mabalin a nasasaem pay no mariknatayo a napardayatayo wenno awanan asi nga intsismisdatayo. (Salmo 6:6, 7) Ngem saan a rumbeng a sumuko ti maysa a Kristiano gapu iti sakit ti nakem! No kasta ti kasasaad, ilintegyo ti bambanag babaen ti naayat a pannakisaritayo iti daydiay nangsair kadakayo. (Mateo 5:23, 24; Efeso 4:26) Madadaankay koma a mangpakawan. (Colosas 3:13) Babaen ti panangiwaksi iti sakit ti nakem, masaluadan ti mismo a riknatayo ken ti relasiontayo iti kabsattayo. Saan a nagimula ni Abraham iti sakit ti nakem ken ni Lot. Kinapudnona, nagdardaras idi ni Abraham a nangsalaknib ken ni Lot ken ti pamiliana!—Genesis 14:12-16.
Dagiti Pakasuotan a Gapuanantayo
8. (a) Kasano a dagiti Kristiano mabalin a ‘salputenda ti intero a bagida iti adu nga ut-ot’? (b) Apay a naaddaan ni Abraham iti natimbeng a panangmatmat kadagiti material a banag?
8 Kinaagpaysuanna, adda dagiti pakasuotan a datayo a mismo ti makin-aramid. Kas pagarigan, imbilin ni Jesus kadagiti pasurotna: “Isardengyo ti agurnong maipaay iti bagbagiyo kadagiti gameng iti daga, sadiay nga ibusen ti sanga ken lati, ken sadiay a serken ken takawen dagiti mannanakaw.” (Mateo 6:19) Ngem, adda dagiti kakabsat a “sinalputda ti intero a bagbagida iti adu nga ut-ot” gapu iti panangyun-unada kadagiti material a banag imbes a dagiti banag a mainaig iti Pagarian. (1 Timoteo 6:9, 10) Situtulok ni Abraham a nangisakripisio kadagiti pagnam-ayan iti biag tapno maay-ayona ti Dios. “Babaen iti pammati isu nagnaed kas ganggannaet iti daga ti kari a kas iti sabali a daga, ket nagnaed kadagiti tolda a kaduana da Isaac ken Jacob, dagiti makipagtawid kenkuana iti daydi met laeng a kari. Ta inur-urayna ti siudad nga addaan kadagiti pudpudno a pamuon, a ti nangibangon ken nangaramid iti dayta a siudad isu ti Dios.” (Hebreo 11:9, 10) Ti pammati ni Abraham iti masanguanan a “siudad,” wenno gobierno ti Dios, ket nakatulong kenkuana a saan nga agpannuray iti kinabaknang. Saan aya a nainsiriban a kastatay met koma?
9, 10. (a) Kasano a mamataud iti suot ti panagtarigagay iti kinatan-ok? (b) Kasano a makapagtignay ti maysa a kabsat ita kas “nanumnumo”?
9 Utobenyo ti sabali a benneg. Ipaay ti Biblia daytoy nainget a pammagbaga: “No ti asinoman pagarupenna nga adda pategna idinto ta awan, al-allilawenna ti bukodna a panunot.” (Galacia 6:3) Kanayonanna, naidagadag kadatayo nga ‘awan ti aniaman nga aramidentayo gapu iti rinnupir wenno gapu iti panangipasindayaw iti bagi, no di ket buyogen ti kinapakumbaba iti isip.’ (Filipos 2:3) Dagiti dadduma parigatenda ti bagbagida met laeng gapu iti saanda a panangyaplikar iti daytoy a balakad. Gapu iti panagtarigagayda iti kinatan-ok imbes a panagtarigagay iti “nasayaat nga aramid,” maupay ken marurodda no saanda a maikkan iti pribilehio iti kongregasion.—1 Timoteo 3:1.
10 Nangipaay ni Abraham iti nagsayaat nga ulidan iti ‘saan a panangpanunot iti bagi ngem iti rebbengna.’ (Roma 12:3) Idi nagsabatda ken ni Melquisedec, saan a nagtignay ni Abraham a kas man la natantan-ok gapu iti naparaburan a saadna iti imatang ti Dios. Imbes ketdi, binigbigna ti nangatngato a saad ni Melquisedec kas padi babaen ti panangtedna kenkuana iti apagkapullo. (Hebreo 7:4-7) Dagiti Kristiano ita rumbeng a situtulokda met nga agtignay a kas “nanumnumo” ket saanda a tarigagayan ti pannakaitan-okda. (Lucas 9:48) No kasla agkedked dagiti mangidadaulo iti kongregasion a mangipaay kadagiti pribilehio kadakayo, sipapasnek a sukimatenyo ti bagiyo tapno maammuanyo no ania ti mabalinyo a balbaliwan iti personalidadyo wenno iti wagas a panangtamingyo kadagiti bambanag. Imbes nga agsakit ti nakemyo gapu kadagiti pribilehio nga awan kadakayo, aprobetsarenyo a naan-anay ti pribilehio nga adda kadakayo—ti pribilehio a tumulong iti sabsabali a mangammo ken Jehova. Wen, “agpakumbabakayo . . . iti sidong ti mannakabalin nga ima ti Dios, tapno itan-oknakayo iti naikeddeng a tiempo.”—1 Pedro 5:6.
Pammati Kadagiti Banag a Di Makita
11, 12. (a) Apay a dagiti dadduma iti kongregasion mabalin a mapukaw ti pannakariknada iti kinaganat? (b) Kasano a nangipaay ni Abraham iti nagsayaat nga ulidan iti panangipamaysa iti biagna iti pammatina kadagiti kari ti Dios?
11 Ti sabali pay a suot ket mabalin a mainaig iti kasla mabayag pay nga iyaay ti panungpalan daytoy dakes a sistema ti bambanag. Sigun iti 2 Pedro 3:12, dagiti Kristiano ‘urayen ken agtalinaedda a silalagip unay iti kaadda ti aldaw ni Jehova.’ Nupay kasta, adu dagiti mangur-uray iti daytoy nga “aldaw” iti adun a tawen, adun a dekada kadagiti dadduma. Kas resultana, mabalin a maupay ti dadduma ken mapukaw ti pannakariknada iti kinaganat.
12 Utobenyo manen ti ulidan ni Abraham. Impamaysana ti intero a biagna iti pammatina kadagiti kari ti Dios, nupay imposible a matungpal amin dagitoy iti unos ti panagbiagna. Pudno a nakitana ti panagmataengan ni Isaac nga anakna bayat ti panagbiagna. Ngem sinigsiglo pay ti aglabas sakbay a mayarig dagiti kaputotanna “kadagiti bituen ti langlangit” wenno “kadagiti binukel ti darat nga adda iti aplaya.” (Genesis 22:17) Nupay kasta, saan a nagsakit ti nakem wenno naupay ni Abraham. Gapuna, kastoy ti kinuna ni apostol Pablo maipapan ken ni Abraham ken kadagiti dadduma pay a patriarka: “Iti pammati natay amin dagitoy, nupay saanda a nagun-odan ti kaitungpalan dagiti kari, ngem nakitada ida iti adayo ket inabrasada ida ken silalatak nga indeklarada a ganggannaetda ken temporarioda nga agnanaed iti daga.”—Hebreo 11:13.
13. (a) Kasano a kasla ‘temporario nga agnanaed’ dagiti Kristiano ita? (b) Apay a pagpatinggaen ni Jehova ti agdama a sistema ti bambanag?
13 No naitultuloy ni Abraham a naipamaysa ti biagna kadagiti kari a ti kaitungpalanda idi ket “iti adayo” pay, anian a nangnangruna pay koma kadatayo ita, ta asidegen a matungpal dagitoy! Kas ken Abraham, masapul nga ibilangtay ti bagbagitayo a kas ‘temporario nga agnanaed’ iti sistema ni Satanas, a ditay agbiag iti wagas a mapennek ti amin a tarigagaytayo. Natural a kayattayo a dumteng koman, saan a basta asidegen a dumteng, ti “panungpalan ti amin a bambanag.” (1 Pedro 4:7) Mabalin nga agsagsagabatayo iti nakaro a sakit. Wenno mabalin a madagdagsenantay unay gapu iti kinarigat ti biag. Ngem, masapul a laglagipentayo nga iyeg ni Jehova ti panungpalan, saan laeng a tapno makalung-awtayo kadagiti nakalkaldaang a kasasaad, no di ket tapno santipikarenna ti naganna. (Ezequiel 36:23; Mateo 6:9, 10) Umay ti panungpalan, saan nga iti panawen a kombiniente kadatayo, no di ket iti kasayaatan a tiempo a pannakaibanag dagiti panggep ni Jehova.
14. Kasano a ti kinaanus ti Dios ket agpaay a pagimbagan dagiti Kristiano ita?
14 Laglagipenyo met a “saan a nabannayat ni Jehova maipapan iti karina, kas ti panangibilang ti dadduma a tattao a kinabannayat, no di ket an-anusannakayo agsipud ta saanna a tarigagayan a madadael ti asinoman no di ket tarigagayanna a makagteng ti isuamin iti panagbabawi.” (2 Pedro 3:9) Siputanyo, ti Dios “an-anusannakayo”—dagiti kameng ti kongregasion Kristiano. Mabalin a kasapulan ti dadduma kadatayo ti ad-adu a tiempo nga agbalbaliw tapno “kamaudiananna masarakanna[tayo] a di namulitan ken awan pakapilawanna ken sitatalna.” (2 Pedro 3:14) Gapuna, saan aya a rumbeng nga agyamantayo ta an-anusannatayo ti Dios?
Panagrag-o iti Laksid Dagiti Tubeng
15. Kasano a nataginayon ni Jesus ti rag-ona iti baet dagiti pakasuotan, ken kasano a makagunggona kadagiti Kristiano ita ti panangtulad kenkuana?
15 Adu ti masursuro dagiti Kristiano ita iti biag ni Abraham. Saan laeng a pammati ti impakitana no di pay ket kinaanus, kinasirib, tured, ken di agimbubukodan nga ayat. Inyun-unana iti biagna ti panagdayaw ken Jehova. Ngem, masapul a laglagipentayo a ni Jesu-Kristo ti nangipasdek iti kasayaatan nga ulidan a tuladentayo. Adu met dagiti pakasuotan ken pannubok a napasaranna, ngem iti baet amin dagitoy, saan a napukaw ti rag-ona. Apay? Agsipud ta naisentro ti panunotna iti namnama nga agur-uray kenkuana. (Hebreo 12:2, 3) Gapuna, inkararag ni Pablo: “Ita ti Dios a mangipaay iti panagibtur ken liwliwa ipalubosna koma kadakayo a maaddaankayo ti isu met laeng a kababalin ti isip a naadda ken Kristo Jesus.” (Roma 15:5) No umiso ti panagpampanunottayo, makapagrag-otayo iti laksid dagiti tubeng nga ipasango kadatayo ni Satanas.
16. Ania ti mabalintay nga aramiden no kasla manglapunos dagiti parikut?
16 No kasla manglapunos dagiti parikut, laglagipenyo nga ay-ayatennakayo ni Jehova kas iti panagayatna ken Abraham. Kayatna nga agballigikayo. (Filipos 1:6) Agtalekkayo a naan-anay ken Jehova, a makasigurokayo a “saannanto nga ipalubos a masulisogkayo iti labes ti kabaelanyo nga itured, no di ket maigiddan iti pannakasulisog aramidennanto met ti dalan a pagruaran tapno mabalinanyo nga ibturan dayta.” (1 Corinto 10:13) Iyugaliyo ti inaldaw a panagbasa iti Sao ti Dios. (Salmo 1:2) Kanayon nga agkararagkayo, a kiddawenyo ken Jehova a tulongannakayo nga agibtur. (Filipos 4:6) ‘Ikkanna iti nasantuan nga espiritu dagidiay agdawdawat kenkuana.’ (Lucas 11:13) Aprobetsarenyo dagiti probision ni Jehova a mangsustiner kadakayo iti naespirituan, kas kadagiti naibatay-Biblia a publikasiontayo. Agpatulongkayo met kadagiti kakabsat. (1 Pedro 2:17) Simamatalek a tabunuanyo dagiti Nakristianuan a gimong, ta sadiay a maawatyo ti pammaregta a kasapulan tapno makapagibturkayo. (Hebreo 10:24, 25) Agrag-okayo agsipud ta ammoyo a ti panagibturyo ket mangiturong iti naanamongan a kasasaad iti imatang ti Dios ket ti kinamatalekyo paragsakenna ti pusona!—Proverbio 27:11; Roma 5:3-5.
17. Apay a di rumbeng a maawanan iti namnama dagiti Kristiano?
17 Ti Dios inayatna ni Abraham a kas ‘gayyemna.’ (Santiago 2:23) Kaskasdi, nagsasaruno dagiti nakaro a pakasuotan ken pakarigatan a simmangbay iti biag ni Abraham. Ngarud, kasta met ti namnamaen dagiti Kristiano kadagitoy dakes a “maudi nga aldaw.” Kinapudnona, namakdaar ti Biblia a “dagiti nadangkes a tattao ken dagiti agpampammarang rumang-aydanto manipud dakes nga agturong iti dakdakes pay.” (2 Timoteo 3:1, 13) Imbes a maawanantayo iti namnama, bigbigenyo a dagiti rigat a pakaipasanguantayo ket pammaneknek nga asidegen ti panungpalan ti dakes a sistema ni Satanas. Ngem palagipannatayo ni Jesus a “ti nakapagibtur agingga iti panungpalan isunto ti maisalakan.” (Mateo 24:13) Gapuna, ‘dikay sumuko nga agaramid iti nasayaat!’ Tuladenyo ni Abraham, ket maibilangkay koma “kadagidiay a babaen ti pammati ken kinaanus tawidenda dagiti kari.”—Hebreo 6:12.
Tinandaananyo Kadi?
• Apay a rumbeng a namnamaen ti ili ti Dios ita dagiti pakasuotan ken pakarigatan?
• Kadagiti ania a pamay-an a mabalin nga usaren ni Satanas ti direkta nga ibubusor?
• Kasano a marisut ti personal a di panagkikinnaawatan iti nagbabaetan dagiti Kristiano?
• Kasano a mangparnuay kadagiti pakasuotan ti kinamanagpannakkel ken panagimbubukodan?
• Iti ania a pamay-an a nangipaay ni Abraham iti nagsayaat nga ulidan iti panaguray iti kaitungpalan dagiti kari ti Dios?
[Ladawan iti panid 26]
Adu a Kristiano nga agtutubo ti maidaddadanes, nga um-umsien dagiti kapatadanda
[Ladawan iti panid 29]
“Adayo” pay ti kaitungpalan dagiti kari ti Dios idi kaaldawan ni Abraham, ngem impamaysana ti biagna kadagitoy