Dagiti Kristiano a Saksi nga Addaan Nailangitan a Pannakipagili
“No kadatayo, ti pannakipagilitayo adda iti langlangit.”—FILIPOS 3:20.
1. Aniat’ nakaskasdaaw a panggep ni Jehova iti sumagmamano a tattao?
DAGITI maiyanak a tattao agturaydanto kas ar-ari ken papadi idiay langit, uray kadagiti anghel. (1 Corinto 6:2, 3; Apocalipsis 20:6) Anian a nakaskasdaaw dayta a kinapudno! Ngem, pinanggep ni Jehova dayta, ket tungpalenna babaen ti bugbugtong nga Anakna, ni Jesu-Kristo. Apay nga aramiden ti Namarsua kadatayo ti kasta? Ken kasano a ti pannakaammo iti dayta apektaranna ti maysa a Kristiano ita? Kitaentayo no kasano a sungbatan ti Biblia dagitoy a saludsod.
2. Ania a baro a banag ti inwaragawag ni Juan a Mammautisar nga aramiden ni Jesus, ken aniat’ nakainaigan daytoy baro a banag?
2 Idi isagsagana ni Juan a Mammautisar ti dalan agpaay ken Jesus, inwaragawagna a mangaramid ni Jesus iti banag a baro. Kunaen ti rekord: “[Ni Juan] mangasaba, a kunkunana: ‘Iti likudak um-umay ti maysa a nabilbileg ngem siak; saanak a maikari nga agrukob ken mangwarwar kadagiti galut dagiti pallukana. Binautisarankayo iti danum, ngem bautisarannakayto iti nasantuan nga espiritu.’” (Marcos 1:7, 8) Sakbay dayta a panawen, awanen ti nabautisaran iti nasantuan nga espiritu. Maysa daytoy a baro nga urnos a pakairamanan ti nasantuan nga espiritu, ken mainaig daytoy iti dandani maipanayag idin a panggep ni Jehova a panangisagana kadagiti tattao maipaay iti nailangitan a panagturay.
“Maiyanak Manen”
3. Ania dagiti baro a banag maipapan iti Pagarian ti langit ti inlawlawag ni Jesus ken ni Nicodemo?
3 Iti nalimed a pannakisaritana iti maysa a prominente a Fariseo, ad-adu pay ti impanayag ni Jesus maipapan itoy a nadibinuan a panggep. Ti Fariseo, ni Nicodemo, immay ken Jesus iti rabii, ket kinuna ni Jesus kenkuana: “Malaksid no ti asinoman maiyanak manen, dina mabalin a kitaen ti pagarian ti Dios.” (Juan 3:3) Ni Nicodemo, a maysa a Fariseo a nagadal la ketdi iti Hebreo a Kasuratan, adda ammona maipapan iti naindaklan a kinapudno ti Pagarian ti Dios. Impadto ti libro a Daniel a ti Pagarian maited iti “maysa a kas la anak ti tao” ken “kadagiti il-ili dagiti sasanto ti Kangatuan.” (Daniel 7:13, 14, 27) Ti Pagarian ti ‘mangburak ken mangibusto’ kadagiti amin a sabsabali a pagarian ket agtalinaedto nga agnanayon. (Daniel 2:44) Nalabit, impapan ni Nicodemo a matungpal dagitoy a padto iti nasion a Judio; ngem kinuna ni Jesus a tapno makita ti Pagarian, masapul a maiyanak manen ti maysa. Saan a naawatan ni Nicodemo, gapuna intuloy a kinuna ni Jesus: “Malaksid no ti asinoman maiyanak manipud danum ken espiritu, dina mabalin ti sumrek iti pagarian ti Dios.”—Juan 3:5.
4. Kadagidiay nayanak iti nasantuan nga espiritu, kasano a mabalbaliwan ti relasionda ken Jehova?
4 Nasaritan ni Juan a Mammautisar ti bautismo iti nasantuan nga espiritu. Ita, inayon ni Jesus a masapul a maiyanak ti maysa a tao iti nasantuan nga espiritu tapno makastrek iti Pagarian ti Dios. Babaen daytoy naisangsangayan a pannakayanak, sumrek dagiti imperpekto a lallaki ken babbai iti naisangsangayan unay a pannakirelasion ken Jehova a Dios. Agbalinda nga annakna. Mabasatayo: “Kadagiti amin nga immawat [ken Jesus], kadakuada intedna ti kinaturay nga agbalin nga annak ti Dios, agsipud ta inal-alagadda ti pammati iti naganna; ken naiyanakda, saan a manipud iti dara wenno manipud iti nainlasagan a pagayatan wenno manipud iti pagayatan ti tao, no di ket manipud iti Dios.”—Juan 1:12, 13; Roma 8:15.
Annak ti Dios
5. Kaano a nabautisaran dagiti matalek nga adalan iti nasantuan nga espiritu, ken ania a mainaig a panagtignay ti nasantuan nga espiritu ti napasamak iti dayta met la a tiempo?
5 Idi nakisarita ni Jesus ken Nicodemo, dimtengen ti nasantuan nga espiritu ken Jesus, a nangpulot kenkuana maipaay iti masanguanan a panagarina iti Pagarian ti Dios, ken sipapanayagen a binigbig ti Dios ni Jesus kas Anakna. (Mateo 3:16, 17) Nangpataud ni Jehova iti ad-adu pay a naespirituan nga annak idi Pentecostes 33 K.P. Nabautisaran iti nasantuan nga espiritu dagiti matalek nga adalan a naguummong iti makingngato a siled idiay Jerusalem. Iti dayta met laeng a panawen, nayanakda manen iti nasantuan nga espiritu nga agbalin a naespirituan nga annak ti Dios. (Aramid 2:2-4, 38; Roma 8:15) Mainayon pay, napulotanda iti nasantuan nga espiritu maipaay iti nailangitan a pannakipagtawid iti masanguanan, ken naselioanda nga immuna iti nasantuan nga espiritu kas tanda a sigurado dayta a nailangitan a namnama.—2 Corinto 1:21, 22.
6. Aniat’ panggep ni Jehova maipapan iti nailangitan a Pagarian, ken apay a maitutop nga adda paset dagiti tattao iti daytoy?
6 Dagitoy ti immuna nga imperpekto a tattao a pinili ti Dios a sumrek iti Pagarian. Kayatna a sawen, kalpasan ti ipapatay ken panagungarda, agbalindanto a paset ti nailangitan nga organisasion ti Pagarian a mangiturayto kadagiti tattao ken anghel. Panggep ni Jehova a babaen daytoy a Pagarian, masantipikarto ti naindaklan a naganna ken maalangon ti kinasoberanona iti amin a sangaparsuaan. (Mateo 6:9, 10; Juan 12:28) Maitutop la unay nga adda paset dagiti tattao iti dayta a Pagarian! Inaramat ni Satanas dagiti tattao idi imbangonna ti umuna a karitna maibusor iti kinasoberano ni Jehova idiay minuyongan ti Eden, ket ita panggep ni Jehova a mairaman dagiti tattao a mangsungbat iti dayta a karit. (Genesis 3:1-6; Juan 8:44) Nagsurat ni apostol Pedro kadagiti tattao a napili nga agturay iti dayta a Pagarian: “Bendito koma ti Dios ken Ama ni Apotayo a Jesu-Kristo, ta maitunos iti naindaklan nga asina impaayannatayo iti baro a pannakaiyanak nga agturong iti maysa a sibibiag a namnama babaen ti panagungar ni Jesu-Kristo manipud kadagiti natay, nga agturong iti maysa a di agrupsa ken di natulawan ken di agkupas a tawid. Naisagana dayta iti langlangit maipaay kadakayo.”—1 Pedro 1:3, 4.
7. Ania a naisangsangayan a pannakirelasion ken Jesus ti tinagiragsak dagidiay nabautisaran iti nasantuan nga espiritu?
7 Kas naibilang nga annak ti Dios, dagitoy a napili a Kristiano nagbalinda a kakabsat ni Jesu-Kristo. (Roma 8:16, 17; 9:4, 26; Hebreo 2:11) Yantangay napaneknekan a ni Jesus ti Bin-i a naikari ken Abraham, dagitoy napulotan iti espiritu a Kristiano ket kameng, wenno maikadua a paset dayta a Bin-i, a mangbendisionto iti manamati a sangatauan. (Genesis 22:17, 18; Galacia 3:16, 26, 29) Ania a bendision? Ti gundaway a masubbot manipud basol ken maikappia iti Dios ken ti panagserbi kenkuana ita ken iti agnanayon. (Mateo 4:23; 20:28; Juan 3:16, 36; 1 Juan 2:1, 2) Iturong dagitoy a napulotan a Kristiano ditoy daga dagiti nalinteg panagpuspusona a tattao iti daytoy a bendision babaen ti panangpaneknekda iti naespirituan a kabsatda a ni Jesu-Kristo ken iti naibilang nga Amada, ni Jehova a Dios.—Aramid 1:8; Hebreo 13:15.
8. Ania ti “pannakaipanayag” dagiti napulotan iti espiritu nga annak ti Dios?
8 Salsalaysayen ti Biblia ti “pannakaipanayag” dagitoy napulotan iti espiritu nga annak ti Dios. (Roma 8:19) Iti pannakaitimpuyog kas ar-ari a kadua ni Jesus iti Pagarian, makipasetda iti panangdadael iti sistema ti bambanag ti lubong ni Satanas. Kalpasanna, bayat ti sangaribu a tawen, tumulongda a mangipaay kadagiti gunggona ti daton a subbot iti sangatauan ket iti kasta maital-o ti sangatauan iti kinaperpekto a napukaw ni Adan. (2 Tesalonica 1:8-10; Apocalipsis 2:26, 27; 20:6; 22:1, 2) Ti pannakaipanayagda ramanenna amin daytoy. Isu daytoy ti banag a sigagagar nga ur-urayen ti manamati a natauan a sangaparsuaan.
9. Kasanot’ panangtukoy ti Biblia iti sangalubongan a bagi dagiti napulotan a Kristiano?
9 Ti sangalubongan a bagi dagiti napulotan a Kristiano isut’ “kongregasion dagiti inauna isuda a naipasalistan idiay langlangit.” (Hebreo 12:23) Isuda ti umuna a magunggonaan iti daton a subbot ni Jesus. “Bagi [met ida] ni Kristo,” a mangipakpakita iti nadekket a relasionda iti maysa ken maysa ken kasta met ken Jesus. (1 Corinto 12:27) Nagsurat ni Pablo: “Ta no kasano a ti bagi maymaysa ngem addaan adu a kamkameng, ket amin dagiti kamkameng dayta a bagi, nupay aduda, maymaysada a bagi, gapuna kasta met ni Kristo. Ta pudno unay a babaen ti maymaysa nga espiritu nabautisarantayo amin iti maymaysa a bagi, uray no Judio wenno Griego, uray no adipen wenno siwayawaya, ket napainumtayo amin iti maymaysa nga espiritu.”—1 Corinto 12:12, 13; Roma 12:5; Efeso 1:22, 23; 3:6.
“Ti Israel ti Dios”
10, 11. Idi umuna a siglo, apay a kasapulan ti baro nga Israel, ken siasino ti mangbukel iti daytoy baro a nasion?
10 Iti nasurok a 1,500 a tawen sakbay ti iyaay ni Jesus kas ti naikari a Mesias, ti nainlasagan a nasion ti Israel ti naisangsangayan nga ili ni Jehova. Agpapan pay di agsarday a pammalagip, napaneknekan a di matalek ti intero a nasion. Idi nagparang ni Jesus, isut’ linaksid ti nasion. (Juan 1:11) Iti kasta, imbaga ni Jesus kadagiti relihioso a pangulo a Judio: “Ti pagarian ti Dios maikkatto kadakayo ket maited iti maysa a nasion a mangpatpataud kadagiti bungana.” (Mateo 21:43) Ti panangbigbig iti dayta a “nasion a mangpatpataud kadagiti bunga [ti Pagarian]” ket nasken maipaay iti pannakaisalakan.
11 Ti baro a nasion isut’ napulotan a kongregasion Kristiano, a nabuangay idi Pentecostes 33 K.P. Dagiti immuna a kamengna isu dagiti Judio nga adalan ni Jesus a nangakseptar kenkuana kas ti nailangitan nga Arida. (Aramid 2:5, 32-36) Nupay kasta, kameng ida ti baro a nasion ti Dios, saan a maibatay iti Judio a kaputotanda, no di ket maibatay iti pammati ken Jesus. Ngarud, daytoy baro nga Israel ti Dios ket banag a naisangsangayan—maysa a naespirituan a nasion. Idi nagkitakit ti kaaduan kadagiti Judio a mangakseptar ken Jesus, ti awis nga agbalin a paset ti baro a nasion ket naipaay kadagiti Samaritano ken kalpasanna kadagiti Gentil. Naawagan ti baro a nasion iti “Israel ti Dios.”—Galacia 6:16.
12, 13. Kasano a bimmatad a ti baro nga Israel ket saan laeng a sekta ti Judaismo?
12 Iti nagkauna nga Israel, no agbalin a proselita dagiti di Judio, masapul nga agpasakopda iti Mosaiko a Linteg, ken iparangarang daytoy dagiti lallaki babaen ti panagpakugit. (Exodo 12:48, 49) Narikna ti sumagmamano a Kristiano a Judio a mayaplikar met dayta kadagiti di Judio iti Israel ti Dios. Nupay kasta, adda sabali a pampanunoten ni Jehova. Inturong ti nasantuan nga espiritu ni apostol Pedro iti pagtaengan ti Gentil a ni Cornelio. Idi impangag ni Cornelio ken ti pamiliana ti panangaskasaba ni Pedro, immawatda iti nasantuan nga espiritu—uray kasakbayan ti pannakabautisarda iti danum. Nabatad nga impakita daytoy nga inawat ni Jehova dagitoy a Gentil kas kameng ti Israel ti Dios a dina kinalikaguman nga agpasakopda iti Mosaiko a Linteg.—Aramid 10:21-48.
13 Narigat nga akseptaren ti adu a manamati daytoy, ket masapul idin a pagsasaritaan dagiti apostol ken panglakayen iti Jerusalem ti isuamin a banag. Dimngeg dayta a bagi nga addaan autoridad iti pammaneknek a nangibinsabinsa no kasano a nagbalin nga aktibo ti nasantuan nga espiritu kadagiti di Judio a manamati. Impakita ti panagsukimat iti Biblia a daytoy ket kaitungpalan ti naipaltiing a padto. (Isaias 55:5; Amos 9:11, 12) Nagtengan ti umiso a desision: Saanen a masapul nga agpasakop dagiti di Judio a Kristiano iti Mosaiko a Linteg. (Aramid 15:1, 6-29) Ngarud, ti naespirituan nga Israel ket pudno a maysa a baro a nasion ken saan laeng a sekta ti Judaismo.
14. Aniat’ impasimudaag iti panangawag ni Santiago iti kongregasion Kristiano kas ‘dagiti sangapulo ket dua a tribo a naiwarawara’?
14 Maitunos iti daytoy, idi nagsurat kadagiti napulotan a Kristiano idi umuna a siglo, inturong ni adalan a Santiago ti suratna “kadagiti sangapulo ket dua a tribo a naiwarawara.” (Santiago 1:1; Apocalipsis 7:3-8) Siempre, saan a naituding dagiti umili ti baro nga Israel kadagiti espesipiko a tribu. Awan ti pannakabingbingay iti 12 a nadumaduma a tribu iti naespirituan nga Israel a kas ti naaramid iti nainlasagan nga Israel. Nupay kasta, ipaspasimudaag ti naipaltiing a sao ni Santiago nga iti imatang ni Jehova naan-anay a sinuktan ti Israel ti Dios dagiti 12 a tribu ti nainlasagan nga Israel. No ti nayanak iti lasag nga Israelita ket nagbalin a paset iti baro a nasion, awan pateg ti nainlasagan a kaputotanna—uray no isut’ nagtaud iti tribu ni Juda wenno Levi.—Galacia 3:28; Filipos 3:5, 6.
Maysa a Baro a Tulag
15, 16. (a) Kasanot’ panangmatmat ni Jehova kadagiti di Judio a kameng iti Israel ti Dios? (b) Iti ania a legal a pangibatayan a nabuangay ti baro nga Israel?
15 Iti imatang ni Jehova, dagiti di Israelita a kameng daytoy baro a nasion ket naan-anay a naespirituan a Judio! Inlawlawag ni apostol Pablo: “Isu saan a maysa a Judio no iti makinruar, wenno ti pannakakugit iti lasag saan met a makinruar. No di ket isu maysa a Judio no iti uneg, ket ti pannakakugitna isu daydiay iti puso babaen ti espiritu, ket saan a babaen ti naisurat a pagannurotan. Ti pannakaidayaw dayta a maysa umay, saan a manipud iti tattao, no di ket manipud iti Dios.” (Roma 2:28, 29) Adu a Gentil ti nangipangag iti awis nga agbalin a paset iti Israel ti Dios, ket daytoy a pasamak tinungpalna ti padto ti Biblia. Kas pagarigan, nagsurat ni mammadto Oseas: “Kaasiakto daydiay saan a nakagun-od iti kaasi, ket kunakto kadagidiay saanko nga ili idi: ‘Sika ti ilik’; ket isuda, kunadanto: ‘Sika ti Diosko.’”—Oseas 2:23; Roma 11:25, 26.
16 No awan dagiti naespirituan nga Israelita iti sidong ti Mosaiko a Linteg ti tulag, ania ti pangibatayan a paset ida ti baro a nasion? Nangaramid ni Jehova iti baro a tulag iti daytoy naespirituan a nasion babaen ken Jesus. (Hebreo 9:15) Idi rinugian ni Jesus ti Panglaglagip iti ipapatayna, idi Nisan 14, 33 K.P., impasana ti tinapay ken arak kadagiti 11 a matalek nga apostol ket kinunana a ti arak isimbolona ti ‘dara iti tulag.’ (Mateo 26:28; Jeremias 31:31-34) Kas nadakamat iti salaysay ni Lucas, kinuna ni Jesus a ti kopa ti arak isimbolona “ti baro a tulag.” (Lucas 22:20) Iti kaitungpalan ti sasao ni Jesus, idi naiparukpok ti nasantuan nga espiritu idi Pentecostes ken nayanak ti Israel ti Dios, naikkat ti Pagarian manipud iti nainlasagan nga Israel ket naited iti baro, naespirituan a nasion. Imbes a ti nainlasagan nga Israel, daytoy baro a nasion ti adipen ni Jehova itan, a buklen dagiti saksina.—Isaias 43:10, 11.
“Baro a Jerusalem”
17, 18. Aniada a panangiladawan ti naipaay iti libro nga Apocalipsis maipapan iti kinadayag nga agpaay kadagiti napulotan a Kristiano?
17 Anian a kinadayag ti agur-uray kadagidiay addaan pribilehio a makiraman iti nailangitan a pannakaawag! Ken talaga a nakaragragsak a maammuan dagiti nakaskasdaaw [a bambanag] nga agpaay kadakuada! Ikkannatayo ti libro nga Apocalipsis iti makaparagsak a panangiladawan iti nailangitan a tawidda. Kas pagarigan, iti Apocalipsis 4:4, mabasatayo: “Iti aglikmut ti trono [ni Jehova] adda duapulo ket uppat a trono, ket kadagitoy a trono nakitak a situtugaw dagiti duapulo ket uppat a panglakayen a nakakawes iti puraw a makinruar a kawkawes, ket iti rabaw dagiti uloda nabalitokan a korkorona.” Dagitoy 24 a panglakayen ket napulotan a Kristiano, a napagungar ket ita okuparenda ti nailangitan a saad nga inkari ni Jehova kadakuada. Dagiti korona ken tronoda ipalagipda kadatayo ti kinaarida. Panunotenyo met ti nakaskasdaaw a nangato a pribilehioda nga agserserbi iti aglikmut ti trono ni Jehova!
18 Iti Apocalipsis 14:1, makitatay manen ida: “Ket nakitak, ket, adtoy! ti Kordero nga agtaktakder iti Bantay Sion, ket kaduana ti sangagasut uppat a pulo ket uppat a ribo nga addaan iti naganna ken ti nagan ni Amana a naisurat kadagiti mugingda.” Ditoy makitatayo ti limitado a bilang dagitoy a napulotan—144,000. Makita ti naarian a kasasaadda ta agtaktakderda a kadua ti naitrono nga Ari [nga insaad] ni Jehova, “ti Kordero,” ni Jesus. Ket addada iti nailangitan a Bantay Sion. Masarakan idi ti Jerusalem, ti naarian a siudad ti Israel, iti naindagaan a Bantay Sion. Ti nailangitan a Bantay Sion irepresentarna ti naitan-ok a saad ni Jesus ken dagiti kaduana nga agtawid, a mangbukel iti nailangitan a Jerusalem.—2 Cronicas 5:2; Salmo 2:6.
19, 20. (a) Ania a nailangitan nga organisasion ti pakipasetanto dagiti napulotan a Kristiano? (b) Bayat ti ania a panawen a pinili ni Jehova dagidiay makipagilinto idiay langit?
19 Maitunos iti daytoy, dagiti napulotan iti nailangitan a kinadayag natukoyda met kas “Baro a Jerusalem.” (Apocalipsis 21:2) Ti naindagaan a Jerusalem isut’ “siudad ti naindaklan nga Ari” ken pakasarakan met iti templo. (Mateo 5:35) Ti nailangitan a Baro a Jerusalem isut’ natan-ok nga organisasion ti Pagarian a pagturturayan ita ti naindaklan a Soberano, ni Jehova, ken ti dinutokanna nga Ari, ni Jesus, ken pagserserbianna kas padi bayat nga agayus dagiti nabaknang a bendision manipud iti trono ni Jehova agpaay a pakaagasan ti sangatauan. (Apocalipsis 21:10, 11; 22:1-5) Iti maysa pay a sirmata, nangngeg ni Juan dagiti matalek, napagungar, napulotan a Kristiano a natukoy kas ti ‘asawa ti Kordero.’ Anian a makaparagsak puso a panangiladawan iti kinadekket a tagiragsakendanto ken Jesus ken ti situtulok a panagpasakopda kenkuana! Iladawanyo ti rag-o idiay langit inton ti maudi kadakuada awatenna kamaudiananna ti nailangitan a gunggonana. Ita, maaramid met laengen ti “panagkasar ti Kordero”! Maan-anayton dayta a naarian a nailangitan nga organisasion.—Apocalipsis 19:6-8.
20 Wen, agur-uray dagiti nakaskasdaaw a bendision agpaay kadagidiay a nagkunaan ni apostol Pablo: “No kadatayo, ti pannakipagilitayo adda iti langlangit.” (Filipos 3:20) Iti agarup dua ribu a tawenen, nagpilpilin ni Jehova kadagiti naespirituan nga annakna ken insagsaganana idan maipaay iti nailangitan a tawid. Sigun kadagiti amin a pammaneknek, dandanin makompleto daytoy trabaho a panagpili ken panangisagana. Ngem saan la a dagita ti mapasamak, kas naipalgak ken Juan iti sirmatana a nailanad iti Apocalipsis kapitulo 7. Isu nga ita, sabali pay a bunggoy dagiti Kristiano ti pangiturongantay ti atensiontayo, ket usigentayto daytoy a grupo iti sumaganad nga artikulo.
Malagipyo Pay Aya?
◻ Ania dagiti nadumaduma a panagtignay ti espiritu kadagidiay addaan nailangitan a tawid?
◻ Ania a nadekket a relasion ti tagtagiragsaken dagiti napulotan ken ni Jehova? ken ni Jesus?
◻ Kasano a nailadawan ti kongregasion dagiti napulotan a Kristiano iti Biblia?
◻ Iti ania a legal a pangibatayan a nabuangay ti Israel ti Dios?
◻ Ania dagiti agur-uray a nailangitan a pribilehio kadagiti napulotan a Kristiano?
[Dagiti Ladawan iti panid 10]
Bayat ti agarup dua ribu a tawen, pinili ni Jehova dagidiay agturayto iti nailangitan a Pagarian