Salsaludsod Dagiti Agbasbasa
Ania ti mangtigtignay kadagiti “matarigagayan a banag dagiti amin a nasion” tapno umayda iti “balay” ti pudno a panagdayaw?—Haggeo 2:7.
Impakauna ni Jehova babaen ken propeta Haggeo: “Yugayogekto dagiti amin a nasion, ket umayto dagiti matarigagayan a banag dagiti amin a nasion; ket daytoy a balay punnuekto iti dayag.” (Haggeo 2:7) Ti kadi pannakayugayog “dagiti amin a nasion” tigtignayenna “dagiti matarigagayan a banag” dagiti nasion—dagiti napudno ti panagpuspusoda a tattao—tapno abrasaenda ti pudno a panagdayaw? Ti sungbat ket saan.
Imutektekanyo no ania ti mangyugyugayog, wenno manggunggunggon, kadagiti nasion ken no ania ti ibungana. Kuna ti Biblia a “nagaarimbangaw dagiti nasion ket dagiti met laeng nasional a bunggoy nangidaydayamudomda iti ubbaw a banag.” (Salmo 2:1) Ti “ubbaw a banag” a kanayon nga ‘idaydayamudomda,’ wenno ut-utobenda, ket ti panangtaginayon iti kinasoberanoda. Awanen ti ad-adda a manggunggunggon kadakuada no di ti aniaman a pangta iti panagturayda.
Ti sangalubongan a panangikasaba dagiti Saksi ni Jehova iti naipasdeken a Pagarian ti Dios ti nagbalin a pangta kadagiti nasion. Kinapudnona, ti Mesianiko a Pagarian ti Dios nga iturayan ni Jesu-Kristo ‘rumekennanto ken pagpatinggaenna amin a pagarian’ nga impasdek ti tao. (Daniel 2:44) Ti mensahe maipapan iti panangukom a nairaman iti trabahotayo a panangasaba gunggunggonenna dagiti nasion. (Isaias 61:2) Pumigpigsa ti pannakagunggonda bayat a sumaksaknap ken gumangganetget ti trabaho a panangasaba. Ania ti kaipapanan ti pannakayugayog a naipadto iti Haggeo 2:7?
Mabasatayo iti Haggeo 2:6: “Ta daytoy ti kinuna ni Jehova ti buybuyot, ‘Maminsan pay—iti mabiiten a kanito—ket yugayogek ti langlangit ken ti daga ken ti baybay ken ti namaga a daga.’” Nagadaw ni apostol Pablo iti daytoy a bersikulo idi insuratna: “Inkarina, a kunkunana: ‘Kaskasdi a maminsan pay pagkintayegekto saan laeng a ti daga no di ket kasta met ti langit.’ Ita ti ebkas a ‘Kaskasdi a maminsan pay’ ipamatmatna ti pannakaikkat ti bambanag a magunggon kas bambanag a naaramiden, tapno agtalinaed ti bambanag [ti Pagarian] a saan a magunggon.” (Hebreo 12:26, 27) Wen, madadaelto ti intero nga agdama a sistema ti bambanag tapno mangrugi ti baro a lubong ti Dios.
Dagiti napudno ti panagpuspusoda a tattao inabrasada ti pudno a panagdayaw saan a gapu ta nayugayog, wenno nagunggon dagiti nasion. Ti gapu nga immadanida ken ni Jehova ken iti panagdayaw kenkuana ket isu met laeng ti gapu ti pannakagunggon dagiti nasion—ti sangalubongan a panangikasaba iti naipasdeken a Pagarian ti Dios. Ti pannakaideklara ti ‘naragsak a damag maipapan iti agnanayon a naimbag a damag’ iyadanina dagiti tattao a siuumiso nga agannayas nga agdayaw iti pudno a Dios.—Apocalipsis 14:6, 7.
Ti mensahe ti Pagarian ket maipapan iti pannakaukom ken iti pannakaisalakan. (Isaias 61:1, 2) Dua ti ibanag ti sangalubongan a pannakaikasabana: ti pannakayugayog dagiti nasion ken ti iyaadani dagiti matarigagayan a banag dagiti nasion a pakaidayawan ni Jehova.