No Kasano a Masarakam ti Pudno nga Ayat

Ania ti mabalinmo nga aramiden tapno masarakam ni ayat ken agbalinka nga ad-adda a maay-ayat, saan laeng nga iti romantiko a pamay-an? Makatulong ngata ti panagbalinmo a nabaknang? Panangpasayaat iti langam?

MASANSAN a dagita a kalat ti solusion ti lallaki ken babbai a maallilaw iti anunsio ken maallukoy iti media. Siempre, natural laeng a kayattayo a napintastayo, ngem uray iti sidong dagiti kasayaatan a kasasaad, temporario laeng ti kinapintas ken saan a makaipaay iti natibker ken manayon a singgalut ti panagkaykaysa. Saan met a maipaay ti kinabaknang dayta. Ngem ti pudno a makatulong isu ti panangipakita iti awan agumna nga ayat iti sabsabali. Insuro ni Jesus: “Iyugaliyo ti mangted, ket mangtedto kadakayo dagiti tattao.” (Lucas 6:38) No kasta, no kayatmo nga ayatendaka, agayatka.

Kasanotay a maaramid dayta? Iti panagsuratna babaen ti panangiwanwan ti nasantuan nga espiritu ti Dios, sinungbatan ni apostol Pablo dayta a saludsod. Impakitana nga aktibo ti ayat, ken saan a maipakita dayta babaen laeng iti rikna no di ket babaen iti aramiden ken dina aramiden agpaay iti sabsabali. Kastoy ti kinuna ni Pablo: “Ti ayat mabayag-panagituredna ken manangngaasi. Ti ayat saan a managimon, saan nga agpangas, saan nga agtangsit, saan a naalas ti panagtigtignayna, saanna a sapulen dagiti bukodna a pagimbagan, saan a magargari nga agpungtot. Saanna nga ing-ingpen ti pannakadangran. Saanna a pagrag-oan ti kinakillo, no di ket makipagrag-o iti kinapudno. Anusanna ti amin a bambanag, patienna ti amin a bambanag, inanamaenna ti amin a bambanag, ibturanna ti amin a bambanag.”​—1 Corinto 13:4-7.

Ania ti riknam no naasi kenka ti maysa a tao wenno kayatna ti makigayyem kenka nupay adda dagiti babassit a banag a makaparurod a naibagam wenno naaramidmo? Saan kadi a suminged ti riknam iti maysa a tao a sipapasnek a maseknan kenka, a saan a dagus a makaunget, mamakawan ken napudno uray pay no narigat ti mamakawan ken agbalin a napudno?

Gapuna, aramidem met dayta iti sabsabali. Kinuna ni Jesus: “Amin a bambanag, ngarud, a kayatyo nga aramiden kadakayo dagiti tattao, masapul a kasta met ti aramidenyo kadakuada.” (Mateo 7:12) Saan a kanayon a nalaka nga ipakita ti ayat, ngem makagunggona no ikagumaan. Maysa pay, ad-adda nga ayatendaka ti pamiliam, gagayyemmo, asawam, wenno ti agbalinto nga asawam. Kasta met, maragsakankanto a husto ti inaramidmo, nga impaaymo ti bagim agpaay iti sabsabali. Wen, “ad-adu ti kinaragsak iti panangted ngem iti panangawat.”​—Aramid 20:35.

Sursuruem ti Agayat Manipud iti Kangatuan a Gubuayan ti Ayat

Ni Jehova ti Dios ti ayat ken ti kangatuan a gubuayan dayta. (1 Juan 4:8) Ti ayatna ti mangtigtignay kenkuana a mangisuro iti panagayat iti amin a situtulok a mangsursuro iti dayta. Amirisem ti sumagmamano a prinsipio ti Biblia a makatulong kadatayo nga agayat ken maayat.

“Nasiglat no iti panagdengngeg, nainayad no iti panagsao.” (Santiago 1:19) Impakita ti surbey iti nasurok a 20,000 a pagassawaan a dagiti kararagsakan a tattao isu dagidiay naimbag nga umimdeng ti assawada. Nasken ti nasayaat a komunikasion iti maysa a relasion. Kastoy ti insurat ti maysa a propesor iti sosiolohia: “Mariknam nga agsolsoloka iti maysa a relasion no ti asawam saanna nga ammo ti mapaspasaram. Wenno nakarkaro pay, daydiay ammona ti mapaspasaram ngem dina maawatan no apay a nakaro ti pakarigatam.” Innayonna pay nga uray nagduma ti personalidad ti dua a tao iti dadduma a pamay-an, “no makipagrikna ti asawam iti panangmatmatmo ken no kasano a maapektaranka kadagiti mapaspasaram iti biag, bassit laeng a banag dagita a nagdumaanyo.”

“Nailetankayo kadagiti bukodyo a kinalailo. . . . Lumawakayo.” (2 Corinto 6:12, 13) Magunggonaantayo no lumawatayo iti panagayattayo iti sabsabali. Kinuna ti maysa a publikasion iti Havard Medical School: “Impakita ti Nagadu a panagadal a dagiti tattao nga addaan kabinnulig, kas kadagidiay addaan iti makapnek a relasion iti pamilia, gagayyem, ken komunidad, ket naragragsak, manmano nga agsakit, ken napapaut ti biagda.”

“Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid.” (Hebreo 10:24, 25) Kadawyan a maimpluensiaantayo iti kakaduatayo. No makilangenka kadagidiay mangipakpakita iti Nakristianuan nga ayat, masagrapmo ti ayat ket masursurom no kasano nga ipakita dayta iti biagmo. Ikagkagumaan dagiti Saksi ni Jehova nga ipakita ti kasta a panagiinnayat, ta ammoda a dayta ti pakailasinan dagiti pudno nga adalan ni Jesus. (Juan 13:35) Naimpusuan nga awisendaka a tumabuno kadagiti Nakristianuan a gimongda.

No mariknam a saanka a maay-ayat, dika maupay wenno ipagarup a nauyongka. Laglagipem a makitkita ni Jehova ti kasasaadmo. Malagipmo aya ni Lea, a nadakamat iti immuna nga artikulo iti daytoy a serye? Nakita ni Jehova ti kasasaadna, isu nga idi agangay, nagbalin nga ina ti innem nga annak a lallaki ken maysa nga anak a babai. Nagsayaat dayta a bendision idi panawen a maibilang dagiti annak a napateg a gameng! Maysa pay, amin nga annak ni Lea nagbalinda nga inapo dagiti tribu ti Israel. (Genesis 29:30-35; 30:16-21) Makaliwliwa la ketdi ken Lea ti naayat a pannakaseknan ti Dios!

Iti baro a lubong a naikari iti Kasuratan, awanton ti makarikna a di maay-ayat. Imbes ketdi, agarinto ti pudno nga ayat iti kagimongan ti tattao. (Isaias 11:9; 1 Juan 4:7-12) Isu nga ipakitatay itan a kayattayo nga addatayto sadiay, babaen ti panangsukaytayo iti ayat a naisuro iti Biblia ken ti impakita ti Autorna. Wen, agpannuray ti pudno a rag-o saan laeng a gapu ta maay-ayatka no di ket gapu ta ipakpakitam ti awanan agum nga ayat iti sabsabali.​—Mateo 5:46-48; 1 Pedro 1:22.

[Blurb iti panid 8]

“Ad-adu ti kinaragsak iti panangted ngem iti panangawat.”​—Aramid 20:35

[Ladawan iti panid 8]

No kayatmo nga ayatendaka, agayatka