Ti Panangmatmat ti Biblia
Rumbeng Kadi nga Isidirtayo ken Satanas Amin a Basoltayo?
NAISIDIR ken Satanas ti immuna a basol ti tao. “Ti uleg inulbodnak ket nanganak,” kinuna ni Eva. (Genesis 3:13) Sipud idin, “ti kadaanan a serpiente, daydiay naawagan iti Diablo ken Satanas” intultuloyna nga allilawen ti sangatauan, ‘a binulsekna ti pampanunot’ dagiti tattao ken “mangiyaw-awan iti intero a mapagnaedan a daga.” (Apocalipsis 12:9; 2 Corinto 4:4) Awan tao a makalisi iti pammarigatna, ngem kaipapanan kadi daytoy a ditay masaranget ti impluensiana? Ket no agbasoltayo, kanayon kadi a basolna?
Ilawlawag ti Biblia nga agpayso nga inallilaw ni Satanas ni Eva. (1 Timoteo 2:14) Naallilaw ni Eva iti pagarupna a no salungasingenna ti bilin ti Dios, magun-odanna ti kasla dios a pannakaawat ken wayawaya. (Genesis 3:4, 5) Gapu iti dayta a pagarup, nagbasol ni Eva. Ngem, pinagsungbat ti Dios ni Eva ket sinentensiaanna a matay. Apay? Agsipud ta nupay nagulbod ni Satanas, naan-anay met nga ammona ti bilin ti Dios. Pulos a saan a napilit a simmukir; imbes ketdi, isu latta ti nangkontrol iti tigtignayna, a naan-anay a kabaelanna a sarangten ti impluensia ni Satanas.
Sarangtenyo ti Diablo
Kabaelan dagiti tattao a sarangten ti Diablo. Idiay Efeso 6:12, napakaammuantayo nga “addaantayo iti pannakigubal” maibusor kadagiti “nadangkes nga espiritu a puersa kadagiti nailangitan a disso.” Nalawag ngarud a namnamaen ti Dios a labanantayo ti impluensia ni Satanas. Ngem kasano a masaranget ti tao ti nabilbileg a pannakabalin ni Satanas ken dagiti demoniona? Makiddaw kadi kadatayo a sarangtentayo ti ditay kabaelan a sarangten, daydiay sigurado a pakaabakantayo? Saan, agsipud ta saan nga ibagbaga ti Dios kadatayo a sarangtentayo ti Diablo babaen iti bukodtayo a pigsa. Ikkannatay ni Jehova iti nadumaduma a pangsaranget kadagiti pannulisog ti Diablo tapno makapagballigitayo. Ibagbaga ti Biblia kadatayo no siasino ti Diablo, no kasano ti panangallilawna, ken no kasano a masalaknibantayo ti bagitayo.—Juan 8:44; 2 Corinto 2:11; 11:14.
No Kasano a ‘Busoren ti Diablo’
Isingasing dagiti Kasuratan ti dua a pamay-an tapno masarangettayo ti Diablo. Mabagbagaantayo: “Ipasakopyo ti bagbagiyo iti Dios; ngem busorenyo ti Diablo, ket isu agtalawto kadakayo.” (Santiago 4:7) Ti umuna a pamay-an ti panagpasakoptayo iti Dios ramanenna ti panagtulnogtayo kadagiti bilinna. Ti kanayon a pananglaglagiptayo iti kaadda ti Dios, ti kinaimbagna, ti naisangsangayan a pannakabalin ken autoridadna, ken dagiti nangato a pagalagadanna ti mangpabileg kadatayo a mangbusor ken Satanas. Napateg met ti naynay a panagkararag iti Dios.—Efeso 6:18.
Amirisenyo idi sinulisog ti Diablo ni Jesus. Sigurado a nakatulong ken Jesus a nangsaranget ti pananglagip ken panangdakamatna iti nadumaduma a bilin ti Dios. Gapu ta dina naguyugoy ni Jesus nga agbasol, pinanawan ni Satanas. Kalpasan dayta a suot, ni Jesus ket lalo a pinabileg ni Jehova, babaen kadagiti anghelna. (Mateo 4:1-11) Gapuna, sikokompiansa a naparegta ni Jesus dagiti adalanna a kiddawenda iti Dios nga ‘ispalenna ida iti daydiay nadangkes.’—Mateo 6:13.
Ti panangispal ti Dios kadatayo dina kayat a sawen a palikmutannatayo iti mangsalaknib a kalasag. Imbes ketdi, ibagbagana kadatayo a sukayentayo dagiti nadiosan a kalidad, a kas iti kinapudno, kinalinteg, talna, ken pammati. Dagitoy a kalidad ti agtignay a kas “kabal,” tapno mabalinantayo ti “agtakder a sititibker maibusor kadagiti pangallilaw a pamuspusan ti Diablo.” (Efeso 6:11, 13-18) Isu a babaen iti tulong ti Dios, mabalin a keltayen dagiti pannulisog ti Diablo.
Ti maikadua a pamay-an a naisingasing idiay Santiago 4:7 ket ‘busoren ti Diablo.’ Kasapulan daytoy ti natured a tignay, a manglaksid kadagiti makadangran nga impluensiana. Masapul a liklikan ti maysa ti pannakaisarangna iti makaallilaw a pannakabalin ti Diablo ken ilaksid ti materialistiko ken imoral a pilosopiana nga agraira ita iti agdama a lubong. Nagpateg ti kasta a panangbusor iti Diablo a napakuyogan iti biag a naipamaysa iti panangay-ayo iti Dios tapno masarangettayo ni Satanas. Ngem amin kadi a basol ket direkta a resulta ti impluensia ti Diablo?
Ti Pannakidangadangtayo iti Bagitayo
Ilawlawag ti mannurat ti Biblia a ni Santiago: “Tunggal maysa masuot babaen ti pananggargari ken panangsulbog ti bukodna a derrep. Kalpasanna ti derrep, inton naiyinawen, agipasngay iti basol.” (Santiago 1:14, 15) Nakalkaldaang ta saantay a maparmek a naan-anay ti natawidtayo a pagkapuyan ken kinaimperpektotayo. (Roma 5:12) “Awan ti nalinteg a tao iti rabaw ti daga, nga agaramid iti naimbag, ket saan nga agbasol,” kuna ti Biblia.—Eclesiastes 7:20.
Di kayat a sawen daytoy nga amin a basol ket naan-anay a ditay kabaelan a lapdan. No dadduma, gapu iti di umiso a pangngeddengtayo, sulsulisogentayo a mismo ti bagitayo. Ngarud, nupay ti maysa a dakes a tarigagay ket mabalin a gapu iti kinaimperpektotayo wenno iti impluensia ni Satanas, pampanuynoyantayo man wenno laklaksidentayo dayta, datayo ti naan-anay a makaammo iti dayta. Maitutop ti insurat ni apostol Pablo: “Aniaman nga imulmula ti maysa a tao, daytoyto met ti apitenna.”—Galacia 6:7.
Bigbigentayo a Manungsungbattayo
Masansan a marigatan ti tattao a mangbigbig kadagiti mismo a pagkapuyan, babak, pagkurkuranganda—wen, dagiti basolda. (Salmo 36:2) Ti maysa a makatulong kadatayo a mangbigbig iti sungsungbatantayo kadagiti basoltayo ket ti pannakaammo a ti Dios dina kalkalikaguman ita nga agbalintay a perpekto. “Saanna nga impaay kadatayo ti kas mayannatup kadagiti basbasoltayo, dinatayo met sinupapakan iti katutopan dagiti kinadangkestayo,” kinuna ni salmista David. (Salmo 103:10) Nupay manangpakawan ti Dios, namnamaenna pay laeng a makidangadangtay a naimbag, disiplinaentay ti bagitayo, maibusor kadagiti pannulisog ti Diablo ken kadagiti mismo a pagannayasantayo nga agbasol.—1 Corinto 9:27.
Rumbeng a maawatantayo a nupay bigbigen ti Dios a kabaelan ti Diablo nga impluensiaan ti tigtignaytayo ken dakkel ti sungsungbatanna iti kinamanagbasol ti sangatauan, dina kaipapanan daytoy nga awanen ti sungsungbatantayo. Gapuna, kuna ti Roma 14:12: “Tunggal maysa kadatayo idatagnanto iti Dios ti maysa a pannakikuenta a maipaay iti bagina.”
Nupay kasta, no “karurod[ta]yo ti nadangkes,” ken “kumpet[ta]yo iti naimbag,” maparmektayo ti dakes. (Roma 12:9, 21) Ti immuna a babai, ni Eva, dina inaramid dayta ket nadusa gapu iti kinasukirna; nabaelanna koma ti nagkitakit ken nagtulnog iti Dios. (Genesis 3:16) Nupay kasta, saan a linaksid ti Dios ti naaramidan ti Diablo a panangallilaw kenkuana. Nailunod ken nakondenar ti Diablo iti agnanayon a pannakadadael. (Genesis 3:14, 15; Roma 16:20; Hebreo 2:14) Asidegen a ditayton sarangten ti nadangkes nga impluensiana.—Apocalipsis 20:1-3, 10.
[Picture Credit Line iti panid 26]
Erich Lessing/Art Resource, NY