Nasayaat Koma ti Pakasarsaritaanyo iti Imatang ni Jehova
“Lagipennak, O Diosko . . . Lagipennak, O Diosko, a maipaay iti naimbag.” —NEHEMIAS 13:22, 31.
1. Aniat’ makatulong kadagidiay dedikado iti Dios a mangidatag iti nasayaat a pakasarsaritaan iti imatang ni Jehova?
ADDA amin a tulong a kasapulan dagiti adipen ni Jehova tapno makaipaayda kenkuana iti nasayaat a pakasarsaritaan. Apay? Gapu ta addaanda iti nadekket a relasion iti Dios kas paset ti naindagaan nga organisasionna. Impalgakna kadakuada dagiti panggepna, ken impaayanna ida iti tulong ken nauneg a naespirituan a pannakaawat babaen ti nasantuan nga espirituna. (Salmo 51:11; 119:105; 1 Corinto 2:10-13) Gapu kadagitoy naisangsangayan a kasasaad, siaayat nga aw-awisen ni Jehova dagiti adipenna ditoy daga nga idatagda ti bagida kenkuana agpadpada iti kinasiasinoda ken iti maaramidanda iti bileg ken iti tulong ti nasantuan nga espirituna.
2. (a) Kadagiti ania a pamay-an a nangipaay ni Nehemias iti nasayaat a pakasarsaritaan iti imatang ti Dios? (b) Buyogen ti ania a kiddaw nga ingngudo ni Nehemias ti libro ti Biblia a naipanagan kenkuana?
2 Ni Nehemias, a para-serbi iti arak ti Ari ti Persia a ni Artaxerxes (Longimanus) ket maysa a tao a nasayaat ti takderna iti Dios. (Nehemias 2:1) Nagbalin ni Nehemias a gobernador dagiti Judio ken imbangonna manen ti bakud ti Jerusalem nupay adda dagiti bumusbusor ken peggad. Buyogen ti regta maipaay iti pudno a panagdayaw, impaalagadna ti Linteg ti Dios ken impakitana ti pannakaseknan kadagiti maidadanes. (Nehemias 5:14-19) Indagadag ni Nehemias kadagiti Levita a dalusanda a kanayon ti bagida, bantayanda dagiti ruangan, ken santipikarenda ti aldaw ti Sabbath. Gapuna naikararagna: “Lagipennak, O Diosko, iti daytoy met, ket kaasiannak kas mayalubog iti kinadakkel ti kinamanagayatmo.” Mayanatup met, ingngudo ni Nehemias ti nadiosan pannakaipaltiingna a librona buyogen ti kiddaw a: “Lagipennak, O Diosko, a maipaay iti naimbag.”—Nehemias 13:22, 31.
3. (a) Kasanot’ panangiladawanyo iti maysa a tao nga agar-aramid iti naimbag? (b) Ti panangutob iti dana ni Nehemias tignayennatay a mangyimtuod iti bagitayo kadagiti ania a saludsod?
3 Ti maysa a tao nga agar-aramid iti naimbag ket natakneng ken al-alagadenna dagiti nalinteg nga aramid a pakagunggonaan dagiti sabsabali. Kasta ni Nehemias. Addaan iti nadayaw a panagbuteng iti Dios ken nasged a regta iti pudno a panagdayaw. Maysa pay, impategna dagiti pribilehiona iti panagserbi iti Dios ken naaddaan iti nasayaat a pakasarsaritaan iti imatang ni Jehova. Ti panangutobtay iti danana tignayennatayo a mangyimtuod iti bagitayo, ‘Kasanot’ panangmatmatko kadagiti inted-Dios a pribilehio ken responsabilidadko? Ania a kita ti pakasarsaritaan ti ipapaayko kada Jehova a Dios ken ni Jesu-Kristo?’
Manungsungbattayo Gapu iti Pannakaammo
4. Aniat’ imbilin ni Jesus kadagiti pasurotna, ken aniat’ inaramid dagidiay “siuumiso a maikari iti agnanayon a biag”?
4 Imbilin ni Jesus kadagiti pasurotna: “Inkayo . . . ket mangaramidkayo kadagiti adalan a tattao iti isuamin a nasnasion, a bautisaranyo ida . . . , nga isursuroyo kadakuada a tungpalenda dagiti isuamin a bambanag nga imbilinko kadakayo.” (Mateo 28:19, 20) Maaramid dagiti adalan babaen ti panangisuro kadakuada. Gapuna dagidiay nasursuruan ken “siuumiso a maikari iti agnanayon a biag” isudat’ mabautisaran, kas iti inaramid ni Jesus. (Aramid 13:48; Marcos 1:9-11) Aggapu iti puso ti tarigagayda a mangtungpal iti amin a banag nga imbilinna. Dumtengda iti punto a panagdedikar babaen ti pananggun-od ken panangyaplikar iti umiso a pannakaammo iti Sao ti Dios.—Juan 17:3.
5, 6. Kasanot’ panangtarustayo iti Santiago 4:17? Iyilustraryo ti pannakaiyaplikarna.
5 No naun-uneg ti pannakaammotayo iti Kasuratan, nasaysayaat met ti pundasion ti pammatitayo. Maigiddato iti dayta, dakdakkel met ti sungsungbatantayo iti Dios. Kuna ti Santiago 4:17: “No ti maysa ammona ti agaramid iti umiso ket kaskasdi dina aramiden dayta, basol dayta kenkuana.” Daytoy a sao ket nabatad a panangadaw iti kadakdakamat ni adalan a Santiago maipapan iti panagpasindayag imbes a naan-anay a panagpannuray iti Dios. No ammo ti maysa a tao nga awan aniaman a maaramidanna a manayon no awan tulong ni Jehova ngem di agtignay a maitunos iti dayta, maysa daytoy a basol. Ngem agaplikar met ti sasao ni Santiago kadagiti basol a maigapu iti kinaliway. Kas pagarigan, iti pangngarig ni Jesus maipapan kadagiti karnero ken kalding, nakondenar dagiti kalding, saan a maigapu kadagiti dakes nga aramid, no di ket gapu iti dida panangtulong kadagiti kakabsat ni Kristo.—Mateo 25:41-46.
6 Saan unay idi a rumangrang-ay iti naespirituan ti maysa a lalaki nga idadauluan dagiti Saksi ni Jehova iti panagadal iti Biblia, a nabatad a maigapu iti dina panagsardeng nga agsigarilio, nupay ammona a masapul nga isardengna. Kiniddaw kenkuana ti maysa a panglakayen a basaenna ti Santiago 4:17. Kalpasan ti panangkomentona iti kinapateg daytoy a kasuratan, kinuna ti panglakayen: “Nupay saanka a nabautisaran, adda sungsungbatam ket masapul nga ibaklaymo a naan-anay ti responsabilidadmo iti pangngeddengmo.” Makaparagsak, nangipangag ti lalaki, insardengna ti agsigarilio, ket di nagbayag nakualipikar a mabautisaran kas simbolo ti dedikasionna ken Jehova a Dios.
Manungsungbat Gapu iti Ministeriotayo
7. Aniat’ maysa a pamay-an tapno maipakitatay ti panagyamantayo iti “mismo a pannakaammo ti Dios”?
7 Ti naimpusuan a tarigagaytayo isu komat’ panangay-ayo iti Namarsua kadatayo. Ti maysa a pamay-an a panangipakitatay iti panagyamantayo iti “mismo a pannakaammo ti Dios” isut’ panangitungpaltayo iti annongen a panagaramid kadagiti adalan ti Anakna, ni Jesu-Kristo. Maysa met daytoy a wagas a panangipakitatay iti ayattayo iti Dios ken iti padatay a tao. (Proverbio 2:1-5, NW; Mateo 22:35-40) Wen, gapu iti pannakaammotayo iti Dios manungsungbattayo kenkuana, ken kasapulan a matmatantayo dagiti padatayo a tao kas potensial nga ad-adalan.
8. Apay a maikunatayo a narikna ni Pablo a manungsungbat iti Dios gapu iti ministeriona?
8 Ammo ni apostol Pablo a ti naimpusuan a panangawat ken panagtulnog iti naimbag a damag mangibunga iti pannakaisalakan, idinto ta ti panangilaksid iti dayta mangibunga iti pannakadadael. (2 Tesalonica 1:6-8) Gapuna nariknana a manungsungbat ken Jehova gapu iti ministeriona. Kinapudnona, inapresiar unay ni Pablo ken dagiti kakaduana ti ministerioda ta siaannad a liniklikanda uray ti panangipaay iti impresion nga aggangganansiada iti dayta. Maysa pay, ti puso ni Pablo ti nangtignay kenkuana a mangikuna: “Ita, no idekdeklarak ti naimbag a damag, saan a rason dayta tapno agpasindayagak, ta ti panagkasapulan naipabaklay kaniak. Pudno unay, asiak pay no diak indeklara ti naimbag a damag!”—1 Corinto 9:11-16.
9. Ania a nasken nga utang ti masapul a bayadan ti amin a Kristiano?
9 Yantangay dedikadotayo nga ad-adipen ni Jehova, ‘naipabaklay kadatayo ti panagkasapulan a mangideklara iti naimbag a damag.’ Rebbengentayo nga ikasaba ti mensahe ti Pagarian. Inawattay dayta a responsabilidad idi indedikartay ti bagitayo iti Dios. (Idiligyo ti Lucas 9:23, 24.) Mainayon pay, addaantay iti utang a masapul a bayadan. Kinuna ni Pablo: “Nakautangak agpadpada kadagiti Griego ken kadagiti Barbaro, agpadpada kadagiti masirib ken kadagiti nakuneng: gapuna adda kinagagar iti biangko nga ideklara ti naimbag a damag kadakayo met nga adda dita Roma.” (Roma 1:14, 15) Nakautang ni Pablo gapu ta ammona nga annongenna ti mangasaba tapno mangngeg dagiti tattao ti naimbag a damag ket maisalakanda. (1 Timoteo 1:12-16; 2:3, 4) Gapuna inkagumaanna a tungpalen ti annongenna ken bayadan ti utangna kadagiti padana a tao. Kas Kristiano, addaantay met iti kasta nga utang a masapul a bayadan. Ti panangikasaba iti Pagarian ket maysa met a napateg a pamay-an a panangipakita iti ayattayo iti Dios, iti Anakna, ken iti padatayo a tao.—Lucas 10:25-28.
10. Pinalawa ti dadduma ti ministerioda babaen ti panangaramidda iti ania?
10 Ti maysa a pamay-an a panangipaay iti makaay-ayo a pakasarsaritaan iti imatang ti Dios isut’ panangaramattay kadagiti abilidadtayo a mangpalawa iti ministeriotayo. Tapno maiyilustrar: Nagsangpet idiay Britania dagiti tattao manipud iti adu a nasion kadagiti kallabes a tawen. Tapno maidanon ti naimbag a damag iti kakasta a tattao, nasurok a 800 a payunir (amin-tiempo a manangaskasaba ti Pagarian) ken ginasut a sabsabali pay a Saksi ti agad-adal iti nagduduma a pagsasao. Nangibunga daytoy iti nasayaat a pammaregta iti ministerio. Kinuna ti maysa a payunir a mangisursuro iti Insik iti maysa a klase: “Pulos a diak pinanunot nga isurok ti pagsasaok iti sabsabali a Saksi, tapno maiburayda ti kinapudno iti sabsabali iti kastoy a wagas. Makapnek unay daytoy!” Mabalinyo kadi a palawaen ti ministerioyo iti umasping a wagas?
11. Aniat’ resultana idi nangasaba ti maysa a Kristiano iti di pormal a pamay-an?
11 Nalabit, aramiden tunggal maysa kadatayo ti amin a kabaelantayo a mangalaw iti malmalmes a tao. Umasping iti dayta magagaran dagiti adipen ni Jehova a mangusar iti abilidadda a mangasaba iti amin a gundaway. Itay nabiit, maysa a Saksi ti nakikatugaw iti maysa a babai iti bus ket nakisarita kenkuana maipapan iti Kasuratan. Gapu ta maragsakan iti nangngegna, adu ti insaludsod ti babai. Idi dandanin bumaba ti Saksi iti bus, kiniddaw ketdi ti babai a kumuyog iti pagtaenganna, tangay adu pay ti saludsodna. Immanamong ti Saksi. Ti nagbanaganna? Nairugi ti panangyadal iti Biblia, ket innem a bulan kalpasanna, ti babai nagbalin a di nabautisaran nga agibumbunannag ti Pagarian. Di nagbayag mangidadaulon a mismo iti innem a panangyadal iti Biblia iti pagtaengan. Anian a makaparagsak a gunggona iti panangaramat ti maysa iti abilidadna iti serbisio ti Pagarian!
12. Kasanotay a mausar a sieepektibo iti tay-ak ti serbisio ti abilidadtayo kas ministro?
12 Dagiti abilidadtayo kas ministro maaramat a sieepektibo iti tay-ak babaen ti panangusar kadagiti publikasion a kas ti 192-panid a libro a Pannakaammo a Mangiturong iti Biag nga Agnanayon. Idi Abril 1996, inanamongan ti Writing Committee ti Bagi a Manarawidwid dagiti Saksi ni Jehova ti pannakaipablaak ti libro a Pannakaammo iti nasurok a 140 a pagsasao, ket manipud idin 30,500,000 a kopia daytoy ti naimalditen iti 111 a pagsasao. Naisurat daytoy a libro tapno matulongan dagiti estudiante ti Biblia a mangadal a naan-anay maipapan iti Sao ken pangpanggep ti Dios tapno makapagdedikarda ken Jehova ken mabautisaranda. Tangay saanen a mangidaulo dagiti agibumbunannag ti Pagarian iti panangyadal iti Biblia iti pagtaengan iti isu met laeng nga estudiante iti adu a tawtawen, makaidauloda kadagiti panangyadal iti ad-adu a tao wenno ad-adu ti maaramidanda iti panagbalaybalay a trabaho ken dadduma pay a porma ti ministerio. (Aramid 5:42; 20:20, 21) Tangay ammoda a manungsungbatda iti Dios, ipakaammoda dagiti nadibinuan a pakdaar. (Ezequiel 33:7-9) Ngem ti kangrunaan a panggepda isut’ panangidayaw ken Jehova ken ad-adu koma pay ti matulonganda a mangammo iti naimbag a damag iti ababa a tiempo a nabatbati pay iti daytoy dakes a sistema dagiti bambanag.
Panangipaay iti Nasayaat a Pakasarsaritaan kas Pamilia
13. Apay a dagiti nadiosan a pamilia rumbeng a maaddaanda iti regular a panagadal ti pamilia iti Biblia?
13 Tunggal indibidual ken pamilia a mangabrasa iti pudno a Kinakristiano manungsungbatda iti Dios ket ngarud agreggetda koma a “rumang-ay iti kina-nataengan” ken agbalin a “natibker iti pammati.” (Hebreo 6:1-3; 1 Pedro 5:8, 9) Kas pagarigan, dagidiay nakaadalen iti libro a Pannakaammo ken nabautisaranen kasapulan nga an-anayenda ti Nainkasuratan a pannakaammoda babaen ti regular nga itatabuno kadagiti gimong kasta met ti panagbasa iti Biblia ken dadduma pay a Nakristianuan a publikasion. Dagiti nadiosan a pamilia rumbeng met nga addaanda iti regular a panagadal ti pamilia, ta maysa dayta a napateg a pamay-an tapno ‘makapagtalinaed a siririing, makapagtakder a sititibker iti pammati, agmaingel kas lallaki, bumileg.’ (1 Corinto 16:13) No maysaka nga ulo ti sangakabbalayan, nangnangruna a manungsungbatka iti Dios a siguraduem a nasayaat ti pannakataraon ti pamiliam iti naespirituan. No kasano a makatulong ti nasustansia a literal a taraon iti pisikal a salun-at, kasta met a kasapulan ti nawadwad ken regular a naespirituan a taraon tapno agtalinaedka ken ti pamiliam a ‘nasalun-at iti pammati.’—Tito 1:13.
14. Aniat’ imbunga ti panangasaba ti maysa a nasayaat-pannakaisurona a balasitang nga Israelita?
14 No adda annak iti sangakabbalayanyo, nasayaatto ti pakasarsaritaanyo iti imatang ti Dios gapu iti panangipapaayyo kadakuada iti nasayaat a naespirituan a sursuro. Magunggonaanda iti kasta a pannursuro, no kasano a nagunggonaan ti balasitang nga Israelita a kinautibo dagiti Siriano idi kaaldawan ti mammadto ti Dios a ni Eliseo. Isu ti nagbalin a tagabo ti asawa ti agkukutel a Siriano a kapitan ti buyot, a ni Naaman. Nupay ubing pay ti balasitang, kinunana ken ni apona a babai: “Amangan koma no ni apok adda iti mammadto, nga adda idiay Samaria! No kasta immimbag koma iti kukutelna.” Gapu iti pammaneknekna, napan ni Naaman idiay Israel, a nagtulnog kamaudiananna iti imbaga ni Eliseo nga agdigus iti mamimpito idiay Karayan Jordan, ket naimbagan ti kukutelna. Maysa pay, nagbalin ni Naaman a managdaydayaw ken Jehova. Naragsakan la ketdi dayta a balasitang!—2 Ar-ari 5:1-3, 13-19.
15. Apay a napateg ti nasayaat a naespirituan a panangsanay dagiti nagannak kadagiti annakda? Iyilustraryo.
15 Saan a nalaka ti mangpatanor kadagiti managbuteng iti Dios nga annak iti daytoy nakadakdakes a lubong nga adda iti sidong ti pannakabalin ni Satanas. (1 Juan 5:19) Nupay kasta, manipud iti kinamaladaga ni Timoteo, sibaballigi nga insuro kenkuana da apongna a Loida ken ni nanangna, ni Eunice, ti Kasuratan. (2 Timoteo 1:5; 3:14, 15) Ti panangyadal iti Biblia kadagiti annakyo, panangikuyog kadakuada a regular kadagiti Nakristianuan a gimong, ken inton agangay panangikuyog kadakuada iti ministerio ket paset amin ti panangsanay a masapul a sungbatanyo iti Dios. Maysa a Kristiano idiay Wales, nga agtawen itan iti nasurok a 80, malaglagipna nga idi rugrugi ti dekada ti 1920, isut’ ikuykuyog ni tatangna bayat a pagnaenna ti 10 a kilometro a labsanna ti maysa a bantay (20 a kilometro nga agpapan-agawid) tapno agiwaras iti tracts ti Biblia kadagiti pumurok iti kabangibang a tanap. “Kabayatan dagidiay a pannagna nga intukit ni tatang ti kinapudno iti pusok,” kunana a buyogen ti panagyaman.
Manungsungbat Dagiti Panglakayen—Kasano?
16, 17. (a) Ania dagiti pribilehio a tinagiragsak dagiti lallakay a nataengan iti naespirituan iti nagkauna nga Israel? (b) No maidilig iti kasasaad iti nagkauna nga Israel, apay nga ad-adu pay ti makalikaguman kadagiti Kristiano a panglakayen ita?
16 “Ti ubanan nga ulo balangat ti kinadayag no masarakanto iti dalan ti kinalinteg,” kinuna ni masirib a Solomon. (Proverbio 16:31) Ngem saan laeng a ti pisikal nga edad ti mangkabal iti maysa a tao maipaay iti responsabilidad iti kongregasion ti ili ti Dios. Nagserbi dagiti nataengan iti naespirituan a lallakay iti nagkauna nga Israel kas uk-ukom ken opisial iti pannakaipatungpal ti hustisia ken pannakataginayon ti talna, nasayaat nga urnos, ken naespirituan a salun-at. (Deuteronomio 16:18-20) Nupay pudno met dayta iti kongregasion Kristiano, ad-adu pay ti makalikaguman kadagiti panglakayen bayat nga umad-adani ti panungpalan daytoy a sistema ti bambanag. Apay?
17 Dagiti Israelita ket ‘napili nga ili’ nga insalakan ti Dios manipud iti nagkauna nga Egipto. Tangay inawatda ti Linteg babaen ti mangibabaet kadakuada, ni Moises, naipasngay dagiti kaputotanda iti maysa a dedikado a nasion ken pagaammoda idi dagiti bilin ni Jehova. (Deuteronomio 7:6, 11) Nupay kasta, awan maipasngay iti kasta a dedikado a nasion ita, ken no maidilig bassit dagiti mapatpatanor kadagiti nadiosan a pamilia a makaammo unay iti Nainkasuratan a kinapudno. Dagidiay nabiit pay a nangrugi a “magmagna iti kinapudno” nangnangruna a kasapulanda ti instruksion no kasanot’ agbiag maitunos kadagiti Nainkasuratan a prinsipio. (3 Juan 4) No kasta anian a responsabilidad ti masapul nga ibaklay dagiti matalek a panglakayen bayat a “salimetmetan[da] ti pagtuladan iti makapasalun-at a sasao” ken tulonganda ti ili ni Jehova!—2 Timoteo 1:13, 14.
18. Ania a kita ti tulong ti masapul a sisasagana nga ipaay dagiti panglakayen ti kongregasion, ken apay?
18 Mabalin a maitibkol ken matuang ti maysa nga ubing nga agsursuro a magna. Di natalged ti riknana ken kasapulanna ti tulong ken pammatalged ti nagannak. Mabalin met a maitibkol wenno matuang iti naespirituan ti maysa nga indibidual a naidedikar ken Jehova. Uray ni apostol Pablo nakitana a nasken ti pannakidangadang nga agaramid iti umiso wenno naimbag iti imatang ti Dios. (Roma 7:21-25) Dagiti papastor iti arban ti Dios kasapulan nga ipaayda ti naayat a tulong kadagiti Kristiano a nakabasol ngem pudpudno nga agbabbabawi. Idi sinarungkaran dagiti panglakayen ti maysa a dedikado a babai a nakaaramid iti nakaro a biddut, kinunana iti imatang ti dedikado nga asawana: “Ammok nga ilaksiddak!” Ngem nagarubos ti luana idi naibaga a kayat dagiti panglakayen nga ammuen no ania a tulong ti kasapulan tapno mapabilegda ti pamilia iti naespirituan. Gapu ta ammoda a manungsungbatda, naragsakan dagiti panglakayen a timmulong iti maysa nga agbabbabawi a kapammatian.—Hebreo 13:17.
Itultuloyyo ti Mangipaay iti Nasayaat a Pakasarsaritaan
19. Kasanotay a makapagtultuloy a mangipaay iti nasayaat a pakasarsaritaan iti imatang ti Dios?
19 Dagiti panglakayen iti kongregasion ken amin a sabsabali pay nga adipen ti Dios kasapulan nga itultuloyda ti mangidatag ken Jehova iti nasayaat a pakasarsaritaan. Posible daytoy no ipangagtayo ti Sao ti Dios ken aramidentay ti pagayatanna. (Proverbio 3:5, 6; Roma 12:1, 2, 9) Nangnangruna a kayattay ti agaramid iti naimbag kadagidiay nainaig kadatayo iti pammati. (Galacia 6:10) Nupay kasta, adu pay laeng ti maani, ket bassit dagiti managobra. (Mateo 9:37, 38) Gapuna agaramidtay iti naimbag kadagiti sabsabali babaen ti siaanep a panangiwaragawag iti mensahe ti Pagarian. Nasayaatto ti pakasarsaritaanyo iti imatang ni Jehova no itungpaltayo ti dedikasiontayo, aramidentay ti pagayatanna, ken simamatalek nga iwaragawagtay ti naimbag a damag.
20. Aniat’ maadaltayo iti panangusig iti dana ni Nehemias?
20 Itultuloytay ngarud ti maaddaan iti adu nga aramid iti trabaho ti Apo. (1 Corinto 15:58) Ket nasayaat unay nga usigentayo ni Nehemias, a nangibangon manen iti bakud ti Jerusalem, impaalagadna ti Linteg ti Dios, ken sireregta nga intandudona ti pudno a panagdayaw. Inkararagna a laglagipen koma ni Jehova a Dios maipaay iti naimbag a naaramidanna. Sapay koma ta kasta met ti kinapasnekyo ken Jehova, ket nasayaat koma ti pakasarsaritaanyo iti imatangna.
Ania Dagiti Sungbatyo?
◻ Ania nga ulidan ti impakita ni Nehemias?
◻ Apay a manungsungbattayo iti Dios gapu iti pannakaammo?
◻ Kasanotayo a makaipaay iti makaay-ayo a pakasarsaritaan iti imatang ni Jehova iti ministeriotayo?
◻ Aniat’ maaramidan dagiti pamilia tapno makaipaayda iti nasayaat a pakasarsaritaan iti imatang ti Dios?
◻ Kasano a manungsungbat dagiti Kristiano a panglakayen?
[Dagiti ladawan iti panid 18]
Kas ken Pablo, makaipaaytayo iti nasayaat a pakasarsaritaan iti imatang ti Dios kas manangiwaragawag ti Pagarian
[Ladawan iti panid 19]
Nabileg kadi ti pammati dagiti annakyo a kas iti balasitang nga Israelita iti pagtaengan ni Naaman?