LEKSION 22
Kasanom a Maibaga ti Naimbag a Damag iti Dadduma?
Bayat a maam-ammuam dagiti kinapudno iti Biblia, mabalin a maibagam, ‘Masapul a maammuan ti amin daytoy!’ Husto! Masapul a maammuan ti amin daytoy. Ngem mabalin nga agnerbioska a mangibaga iti dadduma iti nasursurom. Pagsaritaanta no kasanom a malabanan ti nerbiosmo tapno naragsakka a mangibaga iti naimbag a damag iti Biblia.
1. Kasanom a maibaga kadagiti am-ammom dagiti nasursurom?
Imbaga dagiti adalan ni Jesus: “Saan a mabalin nga isardengmi nga ibaga ti bambanag a nakita ken nangngegmi.” (Aramid 4:20) Ipatpateg unay dagiti adalan ti kinapudno isu a kayatda a maammuan koma dayta ti amin a tattao. Kasta met kadi ti marikriknam? No wen, mangbirokka kadagiti oportunidad tapno nadayaw a maibagam iti pamiliam ken gagayyemmo dagiti nasursurom.—Basaen ti Colosas 4:6.
No kasanom a mairugi
No kasarsaritam dagiti kapamiliam, mairugim ti saritaan maipapan iti maysa a topiko iti Biblia no ibagam: “Adda nagmayat a nasursurok daytoy a lawas.”
Mangibagaka iti makapabileg a teksto iti gayyemmo nga agsaksakit wenno madandanagan.
Ibagam iti katrabahuam a mangkomkomusta kenka ti nasursurom iti panagadalmo iti Biblia wenno iti gimong ti kongregasion.
Ipakitam kadagiti gagayyemmo ti website a jw.org.
Awisem ti dadduma a makikadua kenka iti panagadalmo iti Biblia, wenno ipakitam no kasano ti ag-request iti panagadal iti jw.org.
2. Apay a nagsayaat a kalat wenno goal ti mangasaba a kadua dagiti kakabsat?
Saan la nga impakaammo dagiti adalan ni Jesus ti naimbag a damag kadagiti am-ammoda. “Imbaon [ni Jesus] a sagdudua ken umun-una a mapan iti tunggal siudad” dagiti adalanna tapno mangasaba. (Lucas 10:1) Gapu ta organisado dayta a panangasaba, ad-adu a tattao ti nakangngeg iti naimbag a damag. Kasta met, nakaragragsak dagiti adalan ta nagkakaduada a nangasaba. (Lucas 10:17) Kayatmo met kadi a padasen ti mangasaba a kadua dagiti kakabsat?
AMMUEM TI AD-ADU PAY
Ammuem no kasanom a malabanan ti nerbiosmo ket mariknam ti ragsak ti panangipakaammom iti naimbag a damag.
3. Tulongannaka ni Jehova
Mabalin nga agnerbios ti dadduma a mangasaba gapu ta pampanunotenda ti maibaga dagiti tattao kadakuada wenno ti reaksion dagiti makasaritada.
Agnerbioska kadi a mangibaga iti dadduma kadagiti nasursurom? Apay, wenno apay a saan?
I-play ti VIDEO, sa pagsaritaan ti sumaruno a saludsod.
Kasano a nalabanan dagiti agtutubo a Saksi ti butengda?
Basaen ti Isaias 41:10, sa pagsaritaan daytoy a saludsod:
No mabutengka a mangasaba, kasano a matulongannaka ti kararag?
Ammom kadi?
Adu idi a Saksi ni Jehova ti mangpampanunot a saanda a kaya nga ibaga iti sabsabali ti naimbag a damag. Kas pagarigan, awan idi ti kompiansa ni Sergey iti bagina ken marigatan a makisarita iti dadduma. Ngem idi kuan, nagadal iti Biblia. Imbagana: “Uray no mabutengak, inturturedko nga ibaga iti dadduma ti nasursurok. Nasdaawak ta bayat nga ibagbagak ti maipapan iti Biblia iti dadduma, dumakdakkel met ti kompiansak iti bagik ken lalo pay a bimmileg ti pammatik.”
4. Agbalinka koma a narespeto
No ibagbagam ti naimbag a damag, panunotem saan laeng a no ania ti ibagam no di ket no kasanom nga ibaga dayta. Basaen ti 2 Timoteo 2:24 ken 1 Pedro 3:15, sa pagsaritaan dagitoy a saludsod:
Kasanom a maaramid ti ibagbaga dagitoy a teksto no makisarsaritaka iti sabsabali maipapan iti Biblia?
Baka saandaka a patien ti dadduma a kapamiliam wenno gagayyemmo. Ania ti aramidem? Ania ti saanmo nga aramiden?
Apay a maymayat no agusarka iti napagpanunotan a saludsod imbes a pilitem ida a mamati iti ibagbagam?
5. Makaparagsak ti panangipakaammo iti naimbag a damag
Inted ni Jehova ken Jesus ti trabaho a panangikasaba iti naimbag a damag. Ania ti nangibilangan ni Jesus iti dayta a trabaho? Basaen ti Juan 4:34, sa pagsaritaan dagitoy a saludsod:
Makatulong ti pannangan iti nasustansia a makan tapno agtultuloytayo nga agbiag ken tapno naragsaktayo. Apay a ti panagaramid iti pagayatan ti Dios—kas iti panangasaba—ket impada ni Jesus iti pannangan?
Panagkunam, ania dagiti makaparagsak a resulta no ikasabam ti naimbag a damag?
Tip
Iti gimong iti tengnga ti lawas, mangbirokka iti gundaway a makisarita iti dadduma.
Damagem iti mangyad-adal kenka no kasanoka a makapagpaset iti gimong iti tengnga ti lawas. No agpaspasetkanton, mas nakasaganakanton a mangibaga iti dadduma kadagiti maad-adalmo.
Usarem ti seksion a “Kuna ti Dadduma” wenno “No Adda Agsaludsod” iti daytoy a libro tapno mapraktismo no kasanom a sungbatan dagiti gagangay a saludsod ken pangguped iti saritaan.
NO ADDA AGSALUDSOD: “Komustaka?”
Kasanom nga usaren daytoy nga oportunidad tapno maibagam ti nasursurom iti panagadalmo iti Biblia?
SUMARIO
Makaparagsak ti panangibaga iti naimbag a damag iti dadduma. Mabalin a pampanunotem a narigat dayta, ngem ti agpayso, nalaka laeng.
Rebiu
Apay nga ibagam ti naimbag a damag iti dadduma?
Kasanom a maaramid dayta iti nadayaw a pamay-an?
Kasanom a malabanan ti nerbiosmo a mangasaba?
AGDISKOBREKA PAY
Ammuem ti uppat a simple a pamay-an a maipakaammom ti naimbag a damag nga usarem ti jw.org contact card.
Ammuem ti uppat a kualidad a makatulong kenka a mangipakaammo iti naimbag a damag.
“Nakasaganaka Kadin nga Agbalin a Mangngalap iti Tattao?” (Ti Pagwanawanan, Septiembre 2020)
Buyaem ti maysa a pagtuladan iti Biblia a makatulong kadatayo nga agbalin a natured a mangipakaammo iti naimbag a damag uray no ubingtayo pay.
Kitaem no kasanom a makasarita maipapan iti Biblia dagiti kapamiliam a saan pay a makaam-ammo ken Jehova.
“Panangdanon iti Puso ti Di Manamati a Kakabagian” (Ti Pagwanawanan, Marso 15, 2014)