Kellaat a Pannakadadael!—Kasanoda a Napagballigian?

IDI ni Bagio Hugo pinaraspasna ti Guadeloupe idi Sabado, Setiembre 16, 1989, kasla awan paginggaan ti rabii. “MAYSA A NAKAAM-AMAK A RABII” ti pannakapanagan dayta. Sumaganad, nakigtot met ti Montserrat iti 230 kilometro por ora nga angin. Nasurok a 20 ti natay kadagitoy nga isla ti Caribe.

Iti panangitultuloynat’ irarautna, pinarigat ni Hugo dagiti purpuro ti St. Kitts ken Nevis ti Leeward Islands. Iti sumaganad a rabii pinarigatna met ti St. Croix ken St. Thomas ti U.S. Virgin Islands. Ti dadael nga imbatina idiay St. Croix ket nganggani di nakapappapati. Iti panagtultuloyna, idi agarup tengngat’ aldaw ti Lunes plinastar ti bagio ti umamianan a daya a paset ti Puerto Rico, a dinadaelna nangnangruna dagiti babattiutit a purpuro nga adayo iti igid nga isudat’ Vieques ken Culebra.

Kalpasan ti panangpabaronat’ pigsana iti rabaw ti danum, inurnong manen ni Hugo ti bagbagina a maipaay iti maysa pay nga agpatnag nga irarautna. Idi dandani tengngat’ rabii ti Huebes, iti nakapigpigsa nga angin a 220 kilometro por ora, sinaplitna ti kosta ti South Carolina idiay Estados Unidos. Daytat’ nangdadael ti maysa a lugar a nasurok a 160 kilometro ti kalawana manipud abagatan ti Charleston aginggat’ labes ti Myrtle Beach. Ti makadadael a panangkabilna ket nataginayon aginggat’ surong iti nasurok a 320 a kilometro, a nangtukkol kadagiti poste ti koriente ken nangituang kadagiti dadakkel a kaykayo nga oak agingganat’ Charlotte, North Carolina.

Ginasgasut a ribo ti pimmanaw kadagiti luglugar nga asideg ti baybay ket nakalasatda idi a ti angin ken dagiti 5 kadapan a dalluyon inyanudnat’ nakaad-adu a balbalay ken dinadaeldat’ ginasgasut pay a dadduma. Iti literal pinulpullo a ribo a pagtaengan ken dadduma pay a patakder ti naperperdi.

Ti panangdadael ket masapul a makita tapno patien—dagiti bilog nagtutuonda aginggat’ innem ti kangatona, naideposito dagiti darat iti kaunegna a sangametro kadagiti lansangan, ti dadakkel a kaykayo nagtinnagdat’ tuktok dagiti balbalay, dagiti atep naglalawat’ abutda a kasla ginammatan ti higante nga ima. ‘Ti baritok agtartaraken kadagiti kawitan nga ilako,’ insalaysay ti maysa a babai. ‘Impagodna ida amin tapno saanda a maitayab, ket kaaduan ti saan. Isuna laeng ta naidutdotanda met amin.’

Kaskasdi, gapu ta naipangag dagiti pammakdaar, 26 laeng a tattao idiay Estados Unidos ti natay bayat ti bagio, ken nasursurok pay bassit ngem dayta idiay Caribe. Iti kasumbangirna, nagdakkelan dagiti pukaw iti ekonomia, a daytat’ agkidar iti adu ribo a milion a doliar. Ti linteg a naipaulog iti gobierno ti E.U. kalpasan ti bagio nangted ti pangrugian a $1.1 a bilion kas insigida a tulong kadagiti biktima ti Hugo, ti kadadakkelan pay laeng a naipaulog a linteg a tulong iti didigra a naaprobaran. Dayta a rekord, nupay kasta, ket di nagbayag nalab-awan.

Ti Ad-adda a Kellaat a Pannakadadael

Idi Oktubre 17, makabulan kalpasan ti panagdisso ni Hugo iti daga, nakintayeg ti umamianan a California iti ginggined a nagrukod ti 7.1 iti pagrukodan a Richter. Narnarba dagiti rangtay, natnatuang dagiti patpatakder, ken rinibo ti nagtataray nga agik-ikkis manipud balbalayda wenno kimterdat’ buteng idi nagtulid ti daga ket nayugyog iti 15 segundos wenno nasursurok pay. Nasursurok ngem sangagasut a ribo a balbalay ti naperperdi, ken manipud sumagmamano a gasut aginggat’ sangaribo ti nadaddadael. Maysa lawas kalpasan ti ginggined, agarup sangapulo ribo nga agnaed iti Santa Cruz County ti saan pay a makaawid kadagiti pagtaenganda gapu kadagiti reggaay a nangbangen ti kalkalsada.

Ti ipapatay ken panangdadael dakdakkel pay koma no dagiti managbangon saanda a sinurot dagiti kodigo a mangibilbilin kadagiti panagbangon a naandor iti ginggined. Ti 1988 a ginggined idiay Armenia, kas pangarigan, ket nakapkapuy ngem nangpapatay ti 25,000. Kaskasdi, agparang a nakurang pay ngem 70 ti natnatay iti ginggined idiay California, nga adu kadagitoy ti natay idi a ti makingngato a dalan iti sangamilia a seksion ti haywey Interstate 880 narba kadagiti kotse iti makimbaba a dalan.

Awan pay pulos didigra a natural iti historia ti E.U. a kastat’ kanginana. Iti sumaganad a lawas, nangipaulog ti linteg ti gobierno a nangipaay iti nasurok a tallo a bilion a doliar kas tulong. Nupay kasta, dakdakkel pay ti kasapulan iti panagbangon manen. Ti presidente ti Personal Insurance Federation of California ti nagkuna a ti dagup a napattapatta a perdi ti ginggined a sangapulo bilion a doliar “ket rasonablen.”

Panangipalagip kadagiti Kangrunaan a Kasapulan

Maysa a lalaki adda iti paraanganna iti residensial a seksion ti Charleston dua nga aldaw kalpasan ti panangkabil ni Hugo. Idi limmabas ti maysa a tao a tumultulong a nakakotse, insaludsod ti lalaki: “Adda kad’ sangabaso a danumyo?” Iti apagkanito saan a simken-panunot ti tumultulong a trabahador a dagiti tattao awan pay uray danum a mainumda!

Nasurok a 1,900 a tawen ti napalabasen, intudo ni apostol Pedro ti kangrunaan a kasapulan dagidiay adda iti kakasta a makapadukot a sirkumstansia. “Ti tungpal dagiti isuamin a banag asidegen,” kunana. “Ket nangnangruna iti amin, adda koma kadakayo met laeng ti nasged nga ayat iti maysa ken maysa.” (1 Pedro 4:7, 8) Ti panungpalan ti intero a Judio a sistema dagiti bambanag ket asidegen idi insurat ni Pedro dagidiay a sasao. Ti panungpalan immay sumagmamano a tawen iti kamaudiananna, idi 70 K.P., idi a rinebbek dagiti buybuyot a Romano ti Jerusalem. Nupay kasta, naikkan dagiti Kristiano ti pagilasinan nga immuna, ket impangagda dayta ket nagkamangda kadagiti bambantay iti ballasiw ti Karayan Jordan idiay asideg ti ili a Pella.—Lucas 21:20-22.

Padasenyo nga iladawan iti isipyo ti situasion idi nalabit rinibo a Kristiano dimtengdan iti dayta kabambantayan a disso. Kaawatan awan ti mapagtaenganda wenno dadduma pay a nasken a kasapulan no di ket isudat’ mangipatakder kadagiti kalkalapaw. Addada kinakirang ken rigrigat. (Mateo 24:16-20) Aniat’ nangnangruna a kasapulanda iti dayta narigat a panawen? “Ti nasged nga ayat iti maysa ken maysa,” kuna ni Pedro. Wen, ti panangtulong iti maysa ken maysa tapno makaandorda.

Naiparangarang aya ti kasta nga espiritu ti panagtitinnulong ken ayat kalpasan dagiti nabiit pay a panangdadael a pinataud ni Hugo ken ti ginggined?

Panangibtur ti Panangdadael ni Hugo

Idiay St. Croix, dagiti nakalasat ken Hugo kinablaawanda ti maysa ken maysa iti arakup ti rag-o ken pannakagin-awa, a maragsakanda gapu laeng ta sibibiagda. Di nagbayag sumungaden ti kasta unay a regget a tumulong, a mangipaay ti paglinongan ken taraon kadagiti biktima. Nupay kasta, dadduma sapulendat’ pannakaganansiada manipud kinadaksanggasat dagiti biktima. Dagiti managganansia agkobrarda ti nagngangato a presio. Kas pangarigan, ti sangasupot a yelo a dati 79 centimos ket mailako iti $10. Addada pay panagtakaw. Ngem kaaduanna ti kasta a kinakurang ti asi nga ar-aramid ket linab-awan dagiti adu nga ar-aramid ti natauan a kinamanangaasi ken pannakipagrikna. Nangnangruna a nakadkadlaw dagiti report maipapan ti regget a panangtulong dagiti Saksi ni Jehova.

Uray pay sakbay nga immay ni Hugo, sinarungkaranen dagiti panglakayen a Kristiano dagidiay aggigian kadagiti di unay natalged a balbalay ket inggunamgunamda kadakuada nga umakarda kadagiti napigpigsat’ pannakabangonna a Kingdom Halls wenno kadagiti nataltalged a balbalay dagiti kakabsatda a Kristiano. Ti Kingdom Hall idiay Summerville, South Carolina, addaan nasurok ngem 50 katao a nagtaeng iti dayta iti agpatnag kabayatan ti bagio!

Idiay Guadeloupe ti kakasta a panagsagana maipaay iti bagio ket napaneknekan a makaispal biag. Iti dayta laeng a puro, 117 a balbalay dagiti Saksi ti nadaddadael, bayat a ngangngani 300 a balbalay dagiti dadduma a Saksi ti nakarot’ pannakaperdida. Mainayon pay, 8 a Kingdom Halls ti nakarot’ pannakadaperdida, bayat a 14 a dadduma pay ti bassit laeng pannakaperdida.

Nupay sumagmamano a Saksi ti nadundunor, awan met ti natay, idiay Guadeloupe wenno sadinoman pay iti Caribe. Ti dakkelen nga anak a lalaki ti maysa kadagiti Saksi, nupay kasta, natay idi isut’ literal a sinultop ti angin a bigla a nangitayab ti atep manipud balayda.

Idi laeng maikatlo nga aldaw kalpasan ti bagio a dagiti padada a Saksi nakasaoda dagiti kakabsatda idiay Guadeloupe babaen iti telepono. Kabayatanna, nupay kasta, dagiti agdaldaliasat a manangaywan ken dagiti personel ti sanga nga opisina iti isla nagtataripnongda tapno mangorganisar ti panangsurbey iti kaskasapulan dagiti kakabsatda, kayatna a sawen, dagiti padada a Saksi.

Di nagbayag ti danum, taraon, kawes, ken dadduma pay a kasapulan ti sibubuslon nga idondonaren dagidiay di unay naapektaran. Magun-odan ti danum manipud sanga nga opisina, ket makaparagsak a makita dagiti kakabsat a mangiyeg iti amin a maiggamanda a pagikabilan, punnuenda ida, ket sada iwaras kadagidiay agkasapulan. Dagiti Saksi idiay Martinique ti immun-una kadagiti dadduma a pagpagilian a nagtignay kadagiti kasapulan ti kakabsatda idiay Guadeloupe.

Yantangay ti Guadeloupe ket adda iti kontrol dagiti Pranses, dagiti Saksi ni Jehova idiay Francia dagus a nangipatulodda idiay isla babaen iti eroplano kadagiti napupuskol a plastik nga abbong, lublubid a nylon, ken latlata a plastik agpaay iti danum. Di nagbayag, agarup 100 metriko tonelada nga abasto a pagbangon ti naibarko nga agturong Guadeloupe ket dagdagusda a naiwaras.

Insigida, dagiti Saksi idiay Puerto Rico nangrugida met a nangorganisar ti programa a tumulong. Iti ngudo ti lawas kalpasan ti bagio, ginasgasut manipud kadagiti di naapektaran a disso iti puro bumabbabadan kadagiti naperperdian nga ili tapno tumulong nga agtarimaan ti balbalay. Kasta met, dua a barko a napunnot’ taraon, materiales, ken agarup 40 a Saksi ti naglayag nga agturong idiay bassit a puro ti Culebra. Di nagbayag ti estasion ti radio sadiay indaydayawna ti trabaho a panagbangon a maar-aramidan. Ti sumaganad a ngudo ti lawas 112 a Saksi, a kagiddanda ti innem a tonelada a materiales a pagpatakder, ti naglayag met nga agturong iti bassit a puro ti Vieques a maipaay iti umas-asping a trabaho a panagibangon.

Idi laeng Biernes, lima nga aldaw kalpasan ti bagio, a sala nakaabang dagiti kakabsat a taga Puerto Rico ti eroplano a pagkargaan ket nangipanda ti taraon ken medisina idiay St. Croix. Maysa kadagiti kakabsat a lallaki ti nagkuna: “Manipud tangatang ti intero nga isla ket arignat’ maysa a basuraan. Dagiti intero a purok ti narbek ken natirtiritir. Iti intero a katurturodan addada dagiti paset ti kaykayo, metal, ken rugrugit; awan aniaman a berde, basta brown a pungdol ti kaykayo ken nauram a karuotan, a kinesset ti pegges ti angin nga ingganat’ 320 kilometro por ora.”

Kalpasan ti panangsiertodat’ kasaknap ti dadael, nangipatulod dagiti Saksi ti agarup 75 toneladas nga abasto ti pagpatakder. Bayat ti Oktubre, agarup sangagasut a boluntario a taga Puerto Rico ti timmulong kadagiti kakabsat idiay St. Croix a nagibangon manen. Maysa a Kingdom Hall ti nagserbi kas dormitorio. Tunggal aldaw ti nangrugi babaen ti panangsalaysay iti maysa a teksto ti Biblia, kas maar-aramidan kadagiti amin a sanga nga opisina dagiti Saksi ni Jehova. Dagiti lokal a kakabsat a babbai a Kristiano isudat’ naglaba, nagdalus, ken nagluto para kadagiti kakabsat a lallaki.

Ni Sheila Williams ket nagurnong iti adu a tawtawen tapno mangibangon ti baro a balay, ket kaak-akarna laeng iti dayta idi a daytat’ dinadael ni Hugo. Idi nangngeganna a dagiti Kristiano a kakabsatna ket aggapudat’ Puerto Rico a tumulong kadagiti biktima, imbagana kadagiti katrabahuanna. Ngem kunada: “Awan aramidenda nga agpaay kenka. Maysaka a negra, saan nga Español a kas kadakuada.” Anian ti pannakakellaatda idi ni Sheila naaddaan ti kumpleto a baro a balay!

Maysa a limat’ tawenna a taga Michigan, E.U.A., gaput’ pannakakitana kadagiti damag ti pannakadadael ti St. Croix, tinarigagayanna a tulongan dagidiay napukawan ti sansanikuada. Dimmawat daytoy a balasitang ti pammalubos ni nanangna a mangted ti maysa a bestida iti balasitang met a kas kenkuana tapno ‘isut’ napintas itsurana inton mapan idiay Kingdom Hall.’

“Iti panagsiddaawko,” kuna ti ina, “pinilina ti maysa kadagiti kapintasan a badona.” Naipatulod ti bestida, ket kas makitayo iti panid 18, maysa nga ubing a taga St. Croix ti maragsakan a nangawat iti dayta.

Kalpasan a pinaraspas ni Hugo ti South Carolina iti Biernes ti agsapa, Setiembre 22, maysa a komite ti panangtulong ti insigida a nabukel. Dagiti panglakayen a Kristiano iti tunggal maysa kadagiti pinulpullo a kongregasion kadagiti apektado a luglugar ti napakaammuan, ket dagitoy, met, ti nangmatmat iti tunggal kameng ti kongregasionda. Makaparagsak, ta awan ti nadundunor wenno natnatay, numan pay dagiti pagtaengan ti sumagmamano kadagiti Saksi ket nadaddadaelda ken ti balbalay dagiti dadduma nakarot’ pannakaperdida. Maysa a Kingdom Hall ti permet’ pannakadadaelna, ken daddumat’ nagsagaba met ti sumagmamano a pannakadadael.

Agparang dagiti bambanag a nangruna a nakalkaldaang iti uneg ken iti aglawlaw ti Charleston, ta rinibribo kadagiti kaykayo ti natuang, ginasgasut nga atep dagiti agtedted, nadaddadael ti balbalay wenno nalasanglasangda, awan danum a mainum, awan koriente, awan repriherador, ken awan pay magatang a gasolina. Ti kasasaad, nupay kasta, ket dagdagus a nagbaliw.

Adu a kakabsat manipud deppaar ti Charleston ti nagtataripnong iti agsapa ti Sabado, ti aldaw kalpasan ti bagio, nga agur-uray ti tulong. Ni Ron Edling, a manangaywan ti siudad, insalaysayna no aniat’ napasamak idi nakadanonen ti damag a dagiti Saksi kadagiti arubayan a luglugar addadan iti dalanda. “Idi rimmuarkami, nakitami ti maysa kadagiti kapipintasan a buya a nakitami pay laeng. Adda maysa a komboy, ket iti makinsango a sarming ti mangidadaulo a trak ken kadagiti sumarsaruno a trak adda maysa a karatula a mabasa a ‘JW Hurricane Relief Crews.’

“Addada trak a pickup, kotse, trak a pickup a mangguyguyod kadagiti trailers, ken kakuykuyogda ti rinibribo galon a danum. Nagawitda kadagiti de kadena a ragadi, ken 1,100 litros a gasolina a mangpaandar kadakuada. Daytat’ maysa a buya a diakto pulos malipatan. Iti dayta a kanito naikunak, ‘Daytoy ti maysa kadagiti kasasayaatan a kanito a napadasak iti organisasion ti Dios.’ Saan la nga inyeg dagidiay a kakabsat dagiti kasapulan unay nga abasto no di ket kasta met ti namnama. Masiguradok a nadlaw ti tunggal maysa idi no anian a panagkakabsat ti adda kadatayo. Nupay daytat’ mabalin nga agbayag bassit, daytat’ inkam ammuen a bukodmi.”

Iti sumaganad a ngudo ti lawas agingganat’ 400 a Saksi a manangtulong ti immay. Am-amin, naaramidan ti trabaho kadagiti atep wenno iti paraangan ti agarup 800 a pamilia, agraman adu a saan a Saksi. Iti maysa a sentro ti panangtulong, dagiti kakabsat pakpakanenda ti ngangngani 3,000 a tattao iti inaldaw. Iti am-amin, dagiti Saksi immawatda ken nakaiwarasda ti nasurok a 230,000 kilos a taraon ken 78,000 kilos a kawkawes, malaksid pay ti adu a materiales a pagbangon ken adu pay a dadduma a bambanag. Iti Domingo, Oktubre 8, 16 nga aldaw laeng kalpasan ti panangdadael ni Hugo, amin dagiti Kingdom Halls ti natarimaanen agingga nga amin dagiti kongregasion naituloydan dagiti regular nga eskediol ti panaggigimongda.

Panangsaranget iti Ginggined ti California

Ti epicentro ti Oktubre 17 a ginggined ket agarup 110 kilometros iti abagatan ti San Francisco, agarup 16 kilometros iti amianan a daya ti Santa Cruz. Iti daytoy napuskol populasionna a lugar, a sadiay gagangayen dagiti apagbiit a panagkuyegyeg ti daga, minilmilion dagiti napabutngan iti kasla awan ingganan a pannakagunggon iti 15 a segundos wenno nabaybayag pay.

“Ti patakder ket literal a nagpallapallayog,” kuna ni Ray Vaden, maysa a panglakayen a Kristiano idiay San Jose. “Pagduaduaak no daytat’ agtalinaed pay a sitatakder. Idi tuman-awak iti tawa, makitak a dagiti kalsada ket napekpek iti trapiko kadagiti oras a panagawid. Daytat’ alas 5:04 t.m.

“Kamaudiananna nabalinanmi met laengen a nakasao dagiti kakabsat iti kongregasionmi. Dagidiay di madanon babaen iti telepono inyurnosmi ti panagsarungkar iti balbalayda. Inabut daytoy ti sumagmamano nga oras gaput’ kinailet ti trapiko. Iti alas 8:30 t.r. naammuanmin nga awan met ti nadundunor, nupay adda met nabuong a bambanag iti uneg ti adu a balbalay. Iti sumaganad nga aldaw naammuanmi a dagiti pagtaengan ti sumagmamano kadagiti kakabsattayo iti dayta a lugar ket nakarot’ pannakaperdida a gapu itoy masapul a pumanawda. Isudat’ naipan iti pagtaengan dagiti padada a Saksi.”

Iti asideg ti Los Gatos, maysa a kabsat a babai a Kristiano ti agdigdigos idiay maikadua a grado ti dua-grado a balayna idi ti intero nga umuna a grado ket narba. Gapuna isut’ rimmuar iti lababo a pagdigosan iti umuna a grado, a nakaskasdaaw ti saanna a pannakadunor. No isu komat’ adda iti umuna a grado, sigurado koma a natay.

Insigida, kayat a maammuan dagiti gagayyem no aniat’ maaramidanda para kadagiti biktima. Iti Huebes, dua nga aldaw kalpasan ti ginggined, ti komite a mangaywan kadagitoy ti nabuangay. Iti Sabado, dadakkel a bagon ken dadduma pay a luglugan ti nagitulod ti toltolda, supsupot a pagturogan, dagiti lampara ken kusinilia, kawkawes, dagiti plaslait, taraon a de lata, danum a mainum, ken dadduma pay, kadagidiay agkasapulan. Iti dayta laeng nga agsapa, $41,000 ti naidonar agpaay ti pundo a pangtulong!

Anian pannakaidumana iti kababalin nga impamatmat dagiti dadduma a tattao iti lubong! Maysa a lalaki ti nagkaradap a napan iti maysa a biktima a babai a nakulong iti kotsena iti sirok ti narba a paset ti Interstate 880. Inkarina nga isut’ saanna a saksaktan ngem innalana dagiti singsingna, alahasna, ken pitakana, ket sana intarayanen a dina pulos tinultulongan ti babai. Iti pakadagupanna nasurok a 40 ti natnatay iti narba a kalsada, a maysa kadakuada isu ni Mary Washington, maysa kadagiti Saksi ni Jehova.

Ti Regional Building Committee dagiti Saksi ni Jehova di nagbayag rinugianna a kuentaen dagiti perdi. Dua kadagiti Kingdom Halls ti addaan babassit a perdi. Nupay kasta, dagiti pagtaengan ti sumagmamano a Saksi ket nagkarot’ pannakaperdida a dagitat’ kasapulan a dadaelenen. Dagiti trabahador ket nabaelandat’ nangisubli ti sumagmamano a trailers kadagiti pundasionda ket tinarimaanda ti adu kadagiti pagtaengan dagiti kakabsat ken imbangonda manen dagiti dadduma. Ginasut a ribo a doliar ti naidonar tapno mairingpas daytoy a trabaho.

Bayat nga umad-adanin ti panungpalan daytoy a sistema, a kaitungpalan ti padto ni Jesus, manamnamatayo ti ad-adu pay a ginggined ken dadduma a didigra. (Mateo 24:3-8) Addanto rigrigat nga awan duadua nakarkaronto pay ngem dagidiay napasaran dagiti immuna a Kristiano idi a nadadael ti Jerusalem. Ti padto ti Biblia addaan dakdakkel pay a puersa iti kaaldawantayo: “Ngem ti tungpal dagiti isuamin a banag asidegen.” Gapuna, aniat’ kasapulan? “Ket nangnangruna ngem amin, adda koma kadakayo met laeng ti nasged nga ayat iti maysa ken maysa.” (1 Pedro 4:7, 8) Pudno unay a paragsakenna ti puspusotayo a makakita ti kasta nga ayat a maidemdemostran iti panagkakabsat dagiti Saksi ni Jehova!

[Mapa iti panid 15]

(Para iti aktual a pannnakaurnosna, kitaem ti publikasion)

CALIFORNIA

Oakland

San Francisco

Los Gatos

Santa Cruz

[Mapa](Para iti aktual a pannnakaurnosna, kitaem ti publikasion)

E.U.A.

Charleston

Atlantic Ocean

Puerto Rico

Guadeloupe

[Dagiti Ladawan iti panid 16, 17]

Kannawan: Panangdadael ni Hugo iti kosta ti South Carolina

[Credit Line]

Maxie Roberts/Pammadayaw iti THE STATE

Baba: Nagtutuon dagiti kotse iti sanguanan ti maysa a haiskul

[Credit Line]

Maxie Roberts/Pammadayaw iti THE STATE

Kababaan: Tumultulong a bunggoy dagiti Saksi ni Jehova a bumadbadang iti panagdalus ken panagtarimaan

[Dagiti Ladawan iti panid 18]

Kannigid: Maysa a balasitang idiay St. Croix sisusuot ti bado nga impatulod ti maysa a limat’ tawenna nga ubing a taga Michigan a kayatnat’ tumulong

Baba: Dagiti Saksi ni Jehova idiay Guadeloupe a mamaglalasinlasin kadagiti naidonar a taraon

Makimbaba iti kannigid: Ni Sheila Williams a kadua ti trabahador a timmulong a nangibangon manen ti balayna a nadadael

[Dagiti Ladawan iti panid 21]

Ngato: Ti makingngato a kalsada ti Interstate 880 narba iti makimbaba a kalsada

Kannigid: Ni Raim Manor iti maikadua a grado ti balayna, a nagtinnag iti umuna a grado