Panangaywan Kadagiti Sanikua ti Apo

¹ Idi tiempo ti Biblia, dakkel nga annongen ti naitalek iti mayordomo. Impabiang ni Abraham iti mayordomona nga isu ti agbirok iti asawaen ti anakna, ni Isaac. (Gen. 24:1-4) Kayariganna, responsabilidad ti mayordomo a siguraduen ti panagtultuloy ti kaputotan ni Abraham. Anian a responsabilidad! Di pakasdaawan a kinuna ni apostol Pablo: “Ti sapsapulen kadagiti mayordomo ket tao a matalek”!—1 Cor. 4:2.

Ti Nakristianuan a Kinamayordomo

² Nadeskribir iti Biblia ti dadduma nga aspeto ti Nakristianuan a ministerio kas kinamayordomo. Kas pagarigan, dinakamat ni apostol Pablo kadagiti taga Efeso ti “kinamayordomo ti di kaikarian a kinamanangaasi ti Dios a naited kaniak maipaay kadakayo.” (Efe. 3:2; Col. 1:25) Minatmatanna ti rebbengenna a mangidanon iti naimbag a damag kadagiti nasion kas kinamayordomo a masapul nga asikasuenna a simamatalek. (Ara. 9:15; 22:21) Nagsurat ni apostol Pedro kadagiti napulotan a kakabsatna: “Managpadaguskayo koma iti maysa ken maysa nga awanan panagdayengdeng. Kas mairukod iti sagut nga inawat ti tunggal maysa, usarenyo dayta iti panagserbi iti maysa ken maysa kas dagiti nasayaat a mayordomo ti di kaikarian a kinamanangaasi ti Dios a naiyebkas iti nadumaduma a pamay-an.” (1 Ped. 4:9, 10; Heb. 13:16) Aniaman a material a banag nga ik-ikutan dagiti Kristiano idi umuna a siglo ket bunga ti di kaikarian a kinamanangngaasi ni Jehova. Gapuna, isuda idi ti mayordomo kadagidiay a banag ket nasken nga usarenda dagitoy iti Nakristianuan a wagas.

³ Itatta, kasta met laeng ti panangmatmat dagiti Saksi ni Jehova kadagiti bambanag. Indedikarda ti bagbagida ken Jehova a Dios ket amin nga ik-ikutanda—ti biagda, pisikal a pigsada, dagiti material a sanikuada—ibilangda kas bungbunga ti “di kaikarian a kinamanangaasi ti Dios a naiyebkas iti nadumaduma a pamay-an.” Kas nasasayaat a mayordomo, patienda a manungsungbatda ken Jehova a Dios iti wagas a panangusarda kadagitoy a banag. Mainayon pay, naited kadakuada ti pannakaammo iti naimbag a damag. Naitalek met daytoy kadakuada a tarigagayanda nga usaren iti kasayaatan a wagas: tapno maidayawda ti nagan ni Jehova ken matulonganda dagiti sabsabali a mangammo iti kinapudno.—Mat. 28:19, 20; 1 Tim. 2:3, 4; 2 Tim. 1:13, 14.

⁴ Kasano nga itungtungpal dagiti Saksi ni Jehova dagiti rebbengenda kas mayordomo? Ipakita ti tinawen a report nga itay laeng napan a tawen, iti sangalubongan nasurok a maysa a bilion nga oras ti binusbosda iti panangikasaba iti “naimbag a damag ti pagarian” ken nakaidauloda iti nasurok nga 4,500,000 a panangyadal iti Biblia kadagiti interesado. (Mat. 24:14) Naipakita met ti kinamatalekda kas mayordomo ni Jehova babaen kadagiti naparabur a kontribusionda maipaay iti sangalubongan a trabaho ken panangsuporta kadagiti lokal a Kingdom Hall, babaen ti kinamanagpadagusda kadagiti agdaldaliasat a manangaywan ken dadduma pay, ken babaen ti naisangsangayan a kinamanangngaasida kadagidiay agkasapulan unay—kas kadagiti biktima ti gubat. Kas maysa a bunggoy, nasayaat ti panangaywan dagiti pudno a Kristiano kadagiti sanikua ti Apo.

“Ti Matalek a Mayordomo, ti Maysa a Masirib”

⁵ Ti kinamayordomo ket saan laeng nga iti kada indibidual no di pay ket kas maysa nga organisasion. Inawagan ni Jesus ti kongregasion dagiti napulotan a Kristiano ditoy daga kas “ti matalek a mayordomo, ti maysa a masirib.” (Luc. 12:42) Ti rebbengen daytoy a “matalek a mayordomo” ket mangipaay iti “abasto a taraon” ken mangidaulo iti internasional a panangikasaba iti naimbag a damag. (Apoc. 12:17) Mainaig iti daytoy, ti matalek a klase mayordomo, nga irepresentar ti Bagi a Manarawidwid, addaan iti inted-Dios a responsabilidad a mangimanehar a siuumiso kadagiti namaterialan ken naespirituan a ‘talentona.’ (Mat. 25:15) Maitunos iti ulidan “ti matalek a mayordomo,” dagiti korporasion iti tunggal sanga pagreggetanda a naan-anay nga usaren amin a pinansial a kontribusion iti responsable a wagas, a mangyadelantar kadagiti interes ti Pagarian. Naitalek amin dagita a donasion, ket “ti matalek a mayordomo, ti maysa a masirib” isu ti responsable a mangsigurado a mausar dagitoy iti nakairantaanda ken mataming dagitoy iti nainsiriban, naekonomia, ken epektibo a wagas.

⁶ Ti pagarigan iti nainsiriban a panangusar kadagiti naurnong a pundo ket makita iti irarang-ay ti trabaho a panagimprenta dagiti Saksi ni Jehova iti maika-20 a siglo. Ti panagiwaras kadagiti Biblia agraman kadagiti literatura ti Biblia—dagiti magasin, libro, broshur, bokleta, tracts, ken Kingdom News—dakkel ti naitulongda iti pannakaisaknap “ti naimbag a damag” kadagitoy “maudi nga al-aldaw.” (Mar. 13:10; 2 Tim. 3:1) Ket nakapatpateg nga instrumento ti magasin a Pagwanawanan iti pannakaipaay ti ‘taraon iti umiso a tiempo’ iti “sangakabbalayan ti Dios” ken kadagiti kakaduada, ti “dakkel a bunggoy” dagiti “sabsabali a karnero.”—Mat. 24:45; Efe. 2:19; Apoc. 7:9; Juan 10:16.

⁷ Idi damo, amin a literatura dagiti Saksi ni Jehova ket ar-aramiden dagiti komersial nga agim-imprenta. Ngem idi dekada ti 1920, naikeddeng nga ad-adda nga epektibo ken makagunggona iti naespirituan no dagiti adipen ni Jehova ti mismo nga agimprenta. Nangrugi iti bassit idi 1920, in-inut a dimmur-as ti panagimprenta idiay Brooklyn, New York, agingga a nakadakdakkelen. Idi 1967 dagita a pasilidad nasaknapandan ti uppat a bloke ti siudad. Agim-imprenta met idin ti dadduma pay a dagdaga, ngem iti kaaduan kadakuada, sininga dayta ti Gubat Sangalubongan II.

⁸ Nupay dimmakkel unay ti operasion ti panagimprenta idiay Estados Unidos, dina masuportaran idi ti intero a lubong. Gapuna, kadagiti tawen kalpasan ti gubat, naipasdek wenno agan-andar idin dagiti operasion ti panagimprenta iti adu a sabsabali pay a pagilian, a pakairamanan ti Canada, Denmark, Grecia, Inglatera, Makinlaud nga Alemania, South Africa, ken Switzerland. Idi kattapog ti dekada 1970, nainayon iti listaan ti Australia, Brazil, Finland, Ghana, Japan, Nigeria, ken ti Pilipinas. Dadduma kadagitoy a pagilian nagaramidda met kadagiti libro. Kasta met, idi kattapog ti dekada 1970, nasanay dagiti misionero ti Gilead nga agimprenta ket naibaonda iti dadduma kadagitoy a pagilian a tumulong kadagiti lokal a kakabsat iti panagimprenta.

⁹ Kabayatan ti dekada 1980, ti kaadu dagiti pagilian nga agim-imprenta kadagiti magasin naabutna ti kangatuan a bilang a 51.a Anian a nagsayaat a panangusar kadagiti sanikua ti Apo ti ipaneknek amin daytoy! Anian a nagpigsa nga ebidensia iti irarang-ay ti trabaho ti Pagarian! Ken anian a nagbileg a pammaneknek iti naparabur a suporta dagiti minilion a Saksi ni Jehova a ‘nangpadayaw ken Jehova babaen kadagiti napateg a bambanagda’! (Prov. 3:9, NW) Gapuna, pinaneknekanda ti bagbagida kas nasasayaat a mayordomo a gapu iti dayta binendisionan ida ni Jehova iti nadumaduma a pamay-an.

Panangbalbaliw

¹⁰ Idi dekada ti 1970 ken apagtapog ti dekada ti 1980, dakkel ti rimmang-ayan iti teknolohia ti panagimprenta, ket inaramat dagiti Saksi ni Jehova dagiti barbaro a wagas ti panagimprenta. Idi, us-usarenda ti kadaanan nga estilo ti panagimprenta a letterpress. In-inut a nabaliwan daytoy bayat a rinugianda nga usaren ti namodmoderno nga offset printing. Kas resultana, maar-aramid dagiti napintas a publikasion nga addaan kadagiti de kolor nga ilustrasion, imbes a ladladawan a dua ti kolorna (nangisit ken maysa pay a kolor) a patauden idi dagiti daan a letterpress. Maysa pay, ti teknolohia iti kompiuter binaliwanna ti intero a prepress operation (pannakaisagana dagiti maimprenta). Nangpartuat dagiti Saksi ni Jehova iti Multilanguage Electronic Phototypesetting System (MEPS), computerized a sistema a mangsupsuporta itan iti panagimprenta iti nasurok a 370 a nagduduma a pagsasao. Awan komersial a programa a pumadpad iti MEPS iti kapasidadna a mangtaming iti nakaad-adu a pagsasao.

¹¹ Gapu iti MEPS computer technology ken pannakausar ti dadduma pay nga imbento a kas ti electronic mail, adda manen dakkel a rimmang-ayan ti panangpataud kadagiti taraon iti umiso a tiempo. Idi maus-usar pay ti nadadaan a teknolohia, ti impormasion a linaon dagiti saan nga Ingles a magasin ket maud-udida iti Ingles iti sumagmamano a bulan wenno makatawen pay. Ita, aggigiddanen ti ruar Ti Pagwanawanan iti 115 a nagduduma a pagsasao, ken ti Agriingkayo! iti 62. Kaipapanan daytoy nga iti sangalubongan nasurok a 95 porsiento kadagidiay tumabtabuno iti linawas a Panagadal dagiti Saksi ni Jehova iti Pagwanawanan usigenda nga aggigiddan ti isu met laeng a material. Anian a bendision daytoy! Pudno a nagsayaat dayta a panangusar kadagiti sanikua ti Apo a maaramat kadagita a baro a teknolohia!

Dagiti Sabali a Kasapulan ti Organisasion

¹² Dagitoy baro a sistema binaliwanna dagiti kasapulan ti organisasion iti sangalubongan nga operasion dagiti Saksi ni Jehova iti panagimprenta. Dagiti web offset press ket naparpartak ngem kadagiti daan a letterpress, ngem nanginnginada met nga amang. Dagiti sistema ti kompiuter a mangsuporta iti nainaig a trabaho a kas ti panagsurat, panagipatarus, art, ken graphics, nupay nasaysayaat nga amang ti maaramidanda ngem kadagiti daan a sistema, nanginngina met. Di nagbayag agparang a nagastos unayen ti panagimprenta kadagiti magasin iti 51 a nagduduma a pagilian. Gapuna, iti dekada ti 1990, “ti matalek a mayordomo” inusigna manen dagiti bambanag. Aniat’ resultana?

¹³ Ipakita dagiti panangusig a dagiti ‘napateg a bambanag’ nga impaay dagiti Saksi ni Jehova ken dagiti gagayyemda ket nasaysayaat ti pannakausarna no saan unay nga adu ti agimprenta. Gapuna in-inut a nakissayan ti bilang dagiti agimprenta a sanga. Ti Alemania ti agimprenta kadagiti magasin ken literatura a mausar iti adu a pagilian idiay Makindaya ken Makinlaud a Europa, a pakairamanan ti adu a dati nga agim-imprenta. Ti Italia ti mangipaay kadagiti magasin ken literatura kadagiti paset ti Africa ken abagatan a daya a Europa, a pakairamanan ti Grecia ken Albania. Idiay Africa, ti laengen Nigeria ken South Africa ti agimprenta iti magasin. Napasamak met ti kasta a panamagtitipon iti intero a lubong.

Dagiti Banag nga Usigen

¹⁴ Inton Hulio 1998, maisardengton ti panagimprenta iti magasin iti sumagmamano a pagilian ti Europa, a pakairamanan ti Austria, Denmark, Francia, Grecia, Netherlands, ken Switzerland. Ti panagimprenta idiay Europa ket aramidenton ti Britania, Finland, Alemania, Italia, España, ken Sweden. Iti kastoy a wagas, maliklikan dagiti di nasken a paggastuan ket mausar dagiti kontribusion iti nasaysayaat a wagas para iti sangalubongan a trabaho. Kasano a naikeddeng no aniada a pagilian ti agtultuloy nga agimprenta ken no sadino a maisardeng ti panagimprenta? Kas panangipangag iti bilin a sisisirib nga aywananna dagiti sanikua ti Apo, siaannad nga inusig “ti matalek a mayordomo” ti kinapraktikal ti panagimprenta iti kada lugar.

¹⁵ Ti dakkel a rason no apay a naisardeng ti panagimprenta iti dadduma a pagilian sa napagtitipon iti dadduma ket praktikal. Ti panagimprenta ti maysa a pagilian kadagiti literatura a para iti dadduma pay a pagilian ket ad-adda a kombeniente ken nasaysayaat a panangusar iti nangina nga alikamen. Maar-aramid itan ti panagimprenta kadagiti lugar a basbassit ti magasto, ad-adu ti maala a materiales, ken addaan kadagiti nasayaat a pasilidad iti panagipatulod. Iti kasta, mausar a siuumiso dagiti sanikua ti Apo. Siempre, ti pannakaisardeng ti panagimprenta iti maysa a pagilian dina kayat a sawen a maisardeng ti panangasaba sadiay. Kaskasdi nga aglaplapusananto ti magun-odan a babasaen, ket dagiti ginasut a ribu a Saksi ni Jehova kadagidiay a pagilian agtultuloy ti kinaregtada a mangipakaammo kadagiti kaarrubada “ti naimbag a damag ti kappia.” (Efe. 2:17) Maysa pay, daytoy a reorganisasion ket nagresulta iti dadduma pay a pagimbagan.

¹⁶ Ti maysa a pagimbaganna, kaaduan kadagiti moderno a pagimprenta idiay Denmark, Grecia, Netherlands, ken Switzerland ket naipatulod idiay Nigeria ken ditoy Pilipinas. Dagiti nalaing a makinista kadagiti pagilian ti Europa immannugotda iti awis a kumuyogda iti pakaipanan dagiti pagimprenta ket sanayenda dagiti lokal a makinista a mangusar kadagita. Gapuna, umaw-awat metten dagitoy a pagilian kadagiti de kalidad a magasin a kas iti aw-awaten ti dadduma a pagilian.

¹⁷ Panunotenyo ti sabali pay a pagimbaganna: Ti magasto iti panagimprenta kadagiti magasin ket ibakbaklay itan ti sumagmamano a pagilian nga agim-imprenta. Kas resultana, kadagiti pagilian a saanen nga agim-imprenta, mabalinen a mausar dagiti pundoda iti dadduma a panggep, kas ti panagbangon kadagiti Kingdom Hall ken panangtulong iti kasapulan dagiti kakabsattayo kadagiti napangpanglaw a pagilian. Gapuna, ti naannad a panangusar kadagiti sanikua ti Apo kaipapananna a mabalin a mayaplikar nga ad-adda pay iti internasional a kasaknap ti sasao ni Pablo kadagiti taga Corinto: “Saanko a kayat a sawen a dayta ket nalag-an kadagiti sabsabali, ngem narigat kadakayo; no di ket babaen ti panamagpapada anayan koma ti pagsursurokanyo ita met laeng ti pagkurkuranganda . . . tapno maaramid koma ti panamagpapada.”—2 Cor. 8:13, 14.

¹⁸ Kas resulta daytoy a panamagtitipon, nasingsinged itan ti singgalut dagiti Saksi ni Jehova iti sangalubongan. Saan a problema kadagiti Saksi idiay Denmark a mayimprenta dagiti magasinda idiay Alemania, nupay dati nga agim-imprentada. Pagragsakanda ti serbisio dagiti Aleman a kakabsatda. Marurod kadi dagiti Saksi ni Jehova idiay Alemania gapu ta maus-usar dagiti kontribusionda iti panangipaay kadagiti literatura idiay Denmark—wenno idiay Rusia, Ukraine, ken dadduma pay a pagilian? Siempre saan! Maragsakanda a makaammo a ti kontribusion dagiti kakabsatda kadagidiay a pagilian ket mausar itan iti dadduma a nasken a panggep.

Panangaywan Kadagiti Sanikua

¹⁹ Iti tunggal Kingdom Hall dagiti Saksi ni Jehova iti intero a lubong, adda kahon ti kontribusion a namarkaan iti “Kontribusion Para iti Sangalubongan a Trabaho ti Sosiedad—Mateo 24:14.” Dagiti boluntario a kontribusion a maipisok kadagidiay a kahon ket nakasagana a mausar iti sadinoman a pakasapulan. “Ti matalek a mayordomo” ken dagiti korporasion iti tunggal sanga ti mangikeddeng no kasano a mausar dagiti kontribusion. Gapuna, no ipalubos ti linteg, ti kuarta a maipisok iti kahon ti kontribusion iti maysa a pagilian mabalin a suportaranna ti aktibidad dagiti Saksi ni Jehova iti sabali a pagilian a rinibu a kilometro ti kaadayona. Maus-usar dagiti kontribusion iti dadduma a pagilian kas masindadaan a tulong kadagiti kapammatian nga agsagsagaba gapu kadagiti nadawel a bagyo, allawig, ginggined, ken gerra sibil. Ken maus-usar dagita a donasion a pangsuporta kadagiti misionero iti nasurok a 200 a pagilian.

²⁰ Kadagiti kongregasion dagiti Saksi ni Jehova, kas gagangay, maminsan laeng iti makabulan a madakamat dagiti pinansial a bambanag—ken sumagmamano laeng a minuto. Awan plato a pagkolekta a maipasa kadagiti Kingdom Hall wenno asamblea. Awan panagur-or iti pundo kadagiti indibidual. Awan matangtangdanan nga agur-or iti pundo. Kadawyanna, adda laeng maysa nga artikulo Ti Pagwanawanan iti makatawen a mangilawlawag no kasano a dagidiay agtarigagay mabalinda ti mangted kadagiti kontribusion iti Watch Tower Bible and Tract Society tapno masuportaran ti sangalubongan a trabaho. Awan regular a panangdakamat ti Sosiedad kadagiti pinansial a bambanag iti Agriingkayo! No kasta, kasano a masupsuportaran ti nagdakkel a sangalubongan a trabaho a panangikasaba iti naimbag a damag, panagbangon kadagiti kasapulan a Kingdom Hall, panangaywan kadagidiay adda iti naisangsangayan nga amin-tiempo a serbisio, ken panangtulong kadagiti Kristiano nga agkasapulan? Binendisionan ni Jehova ti ilina iti nakaskasdaaw a wagas a buyogen ti espiritu ti kinamanagparabur. (2 Cor. 8:2) Gundawayanmi ita ti agyaman kadagiti amin a nakiraman iti ‘panangpadayaw ken Jehova babaen iti napapateg a bambanagda.’ Makasiguradoda a “ti matalek a mayordomo” itultuloyna nga aywanan dagiti sanikua ti Apo. Ket ikararagtayo nga itultuloy a bendisionan ni Jehova amin nga urnos para iti pannakapalawa ti sangalubongan a trabaho.

[Footnote]